Read Tobelo O MARKUS 5 Bible Online

O MARKUS 5 - Tobelo bible

O MARKUS 5

¹Ipaha o Yesus deʼ iwinöninïki imahiädono o Galilea ma Taaga mahonongaika, o Gerasa madaeraoka.

²O Yesus kade wouti o ngotiroka, wïngino Unangino o nauru womatëngo o jere ma arukino de wohupu.

³O nyawa gënanga o womaha madorou iwikuaha deʼ wogogere o jereoka. Unanga iwiliko yakunokaua; ngaro de o rante.

⁴Ma ngaroka ail̄ou deʼ aigiama yaliko de o rante, mä salalu marante-rante gënanga watöaka, deʼ o behi ai l̄ouoka watobiki. Unanga hoko gënanga ai kuata moi okaua o nyawa yakunu iwi tatoko.

⁵O hutu deʼ o wange ünanga wakaika wakaino o jereika deʼ i totoporonika, daha wopöa-pöaka deʼ ai röehe o helewoika wohi boha-boha hiädono i wi l̄abo-l̄abo.

⁶Magurutokahi ünanga wïmäke o Yesus woböa, ünanga woma popäta de womaruku o Yesus aihimangoka.

⁷Deʼ ai ilingi makuatil̄e ünanga wopöaka, ”Yesus ma Jou Madutu wokö Kurutil̄e ai Ngohaka! Aha Ngona nohidodoa ngohi nënanga? De ma Jou Madutu ngohi togahoko, uha nohi hangihara ngohi!” (

⁸O nyawa gënanga wotemo hoko gënanga hababu o Yesus wïtemo unangika, ”Womaha madorou, nohupu de o nyawa nënanga!”)

⁹Deʼ o Yesus wïleha unangika, ”Ani romanga okia?” O nyawa gënanga wohaluhu, ”Ahi romanga ’Legiun’ — hababu ngomi nënanga duru kamiangöe!”

¹⁰Wögogilio ünanga woributu wogahoko hupaya o Yesus uha wahuloko o womaha madorou gënanga i hupu de o daera gënanga.

¹¹Itigika de o ngï gënanga naga duru kahä ngöe o ode magogiriaka o inomo ima lingiri o gelehoroka.

¹²O womaha madorou gënanga igahoko o Yesusika, ”Nomï huloko ngomi miwohama o odeika gënanga.”

¹³Deʼ o Yesus wömodeke. Hoʼ, o womaha madorou gënanga i hupu de o nyawa gënanga deʼ i wohama o odeika. Mata-mata o ode de matika gënanga i piringana deʼ ima ngumo o bakoro madatekoka de o taagauku hoyalutu — mata-mata naga o dutu o ribuhu hinoto.

¹⁴O ode yogöa-göana gënanga yopiringana, deʼ ihingahu o abari gënanga o kotaika deʼ o kapongo o kota magilolitino. Ho o nyawa yohupu laʼ yolega okia idädadioka.

¹⁵Onanga yaika o Yesusika, ho iwi mäke o nyawa hoko kangano iwi ngoha-ngohamika o womaha madorou gënanga, wogogeruku genangoka. Unanga woma pakeangoka, deʼ aihininga itiaioka. Onanga mata-mata yohawanoka.

¹⁶O nyawa yamäke-mäke de mangalako mahirete idädadi mangale o nyawa deʼ o ode gënanga ihiade-ade okia idädadioka.

¹⁷Ho o daera gënanga manyawa yogahoko hupaya o Yesus wamal̄a o daera gënanga.

¹⁸Maöraha o Yesus woharene o ngotiril̄e, o nyawa kokangano iwi kuaha o womaha madorou gënanga wogahoko o Yesusika, hupaya yakunu wonïki.

¹⁹Mä o Yesus wihigumal̄aua, wïtemo, ”Nolio deʼ nohingahu aniriadodotika okia ma Jou wodiaioka mangale ngona deʼ hoko kia Unanga aioa ngonaika!”

²⁰O nyawa gënanga woiki, deʼ muläenge woade-ade o Kota Ngimoi madaeraoka, okia o Yesus wodiaioka unangika. Mata-mata o nyawa yohëranga yoihene gënanga.

²¹O Yesus womaki lioroli o taaga mahonongaika. O taaga madatekoka gënanga mangangöe o nyawa iwihidoomu iwikilolitino o Yesus.

²²Womatëngo airomanga o Yairus woböaino. Unanga ganga o pupuji matau matutuda o kota magoronaka gënanga. Maöraha ünanga wïmäke o Yesus, ünanga womaruku aihimangoka,

²³deʼ wogahoko woributu, ”Bapa, ngohi ora mopanyake duru kami hiri. Kayaoa de noböa laʼ nomi pal̄anga, hupaya münanga motogumu deʼ uha mohonenge!”

²⁴Ho o Yesus de o Yairus yoiki imatuono. Manga ngöe o nyawa iwinïki Unanga deʼ iwihi dehoto Ai higili de Ai niraka, Ai himanga de Ai porete.

²⁵Manga hidogoronaka nagaoli momatëngo o ngoheka o taongo ngimoi de hinoto madëkana, mopanyake mokokopoa.

²⁶Mata-mata amitiwi deʼ ami arata koiwaka mamatäka mapäke mahi fangu imi hou-houru, mä komoiua yakunu imihi togumu duga-duga ami panyake idogo itubuho.

²⁷O ngoheka gënanga moihenoka mangöe mangale o Yesus. O nyawa yowöe-wöe manga hidogoronaka gënanga münanga momahi tigi o Yesusika ai poretino möböa,

²⁸karana muna ami hiningaka, ”Iti ngohi tatigi dika Ai juba ngohi aha totogumu!”

²⁹Münanga matigi o Yesus aijuba, deʼ o öraha gënanga dika ami awunu itogumu mokopoa okaua. Münanga mamäo muna motogumoka.

³⁰O öraha gënanga dika o Yesus wamäo naga o kuata ihupu Ai dirino. Unanga womä lega o nyawa yowöe-wöeika gënanga deʼ woleha, ”O nagona yatigi Ahi juba?”

³¹Iwinöninïki yotemo, ”Bapa Ngona mahirete namäke naga hokokia manga ngöe o nyawa imakokehoto. Deʼ Bapa kanolehahi, o nagona ini tigi Bapa?”

³²Mä o Yesus kahoko genangika dika wotailako Ai gilolitino de wälingiri o nyawa iwi tigi-tigioka gënanga.

³³O ngoheka gënanga manäko okia idadioka ami dirioka, mohahara deʼ ami hawana momaruku o Yesus aihimangoka deʼ momangaku mata-mata okia idadioka.

³⁴De o Yesus womitemo mangoheka gënanga, ”Ngohi ora, karana ngona nongaku Ngohino, ngona notogumu! Noiki de mahalamati. Ngona duru notogumoka!”

³⁵Magogiriaka o Yesus kawo temo-temohi, o huhuloko yamuruononaga o Yairus aitauoka de yaino. ”Ngoni moholehe Tuanga mohonengoka,” önanga yotemo o Yairusika. ”Ngarouha Tuanga o huha nidiaioli ma Bapa Guru.”

³⁶Wohaduliikaua okia ihi ngahu o nyawa gënanga, o Yesus wïtemo o Yairusika, ”Uha nohawana, nongaku dika!”

³⁷De o Yesus wotagi gila-gila, mä moiö de wahi gumal̄aua iwinïki, sawaliua o Petrus de o Yakobus deʼ ai dodoto o Yohanis.

³⁸Maöraha imahi ädono o Yairus ai tauika, o Yesus wamäke i ruaeuku, deʼ woihene o gari de o dodora makuatil̄e.

³⁹De o Yesus wowohama deʼ wätemo onangika, ”Yadodoa honigigoro deʼ niari? O ngohaka gënanga mohonengua; muna duga-duga moma idu!”

⁴⁰Onanga iwigogiete o Yesus. Unanga wähuloko önanga mata-mata yohupu. De Unanga wä ao o ngohaka gënanga ngomi ayo de ami ama deʼ yaruange iwinöninïki yowohama o ngohaka gënanga ami kamarika.

⁴¹O Yesus wasö o ngohaka gënanga ami giama deʼ womitemo munangika, ”Talita kum,” mamangarati, ”Ngohaka ngoheka, Ngohi toni temo ngonaika: nomomiki!”

⁴²O ngohaka moholehe gënanga de majapati momomiki deʼ momädagi. (Ami umuru o taongo ngimoi de hinoto i böto.) Mata-mata yahöhakihi idädadi gënanga duru yokiriri!

⁴³Mä o Yesus wahipoma-poma kamoikaö de yakunua ihingahu o hali gënanga. Deʼ wätemo, ”Nimi tofo o ngohaka gënanga.”