Read Tobelo O MARKUS 6 Bible Online

O MARKUS 6 - Tobelo bible

O MARKUS 6

¹Kagenangoka de o Yesus wolio imakomoteke de iwinöninïki, ai kapongika.

²O Yahudioka manga Puji mawangeoka Unanga womuläenge wodotoko o pupuji matauoka. Naga o nyawa manga ngöe genangokadau. Maöraha o nyawa gënanga yoihene o Yesus aidodötoko, önanga duru yohëranga. Onanga yotemo, ”O nyawa nënanga okiaino wamäke mata-mata nënanga? O sawaro marupa sarakia nënanga naga Unangoka? Sarakia ho Unanga wodiai i hëra-hëranga?

³Mode koigoungua Unanga nënanga o gota matukanga, o ngo Maria amingohaka, deʼ Ai dodoto o Yakobus, o Yosis, o Yudas deʼ o Simon? Igoungu Ai bira-biranga managa yogogere kanenangokadau.” Karana gënanga önanga iwioluku Unanga.

⁴ Ho o Yesus wätemo onangika, ”O nabi womatëngo okiaka dika iwi horomati, sawaliua aikapongoka, deʼ airiadodoto deʼ aiayo de aibiranga manga hidogoronaka, iwihoromatiua.”

⁵O ngï genangoka o Yesus wakunua wodiai okianaga ihera-herangö, sawaliua wahitogumu yamuruono naga o nyawa yopopanyake de wägelenga Ai giama manga l̄okuoka.

⁶O Yesus wohëranga önanga yongakuua. Ipaha o Yesus woiki wokiloliti o kapo-kapongika gënanga, deʼ wodotoko.

⁷Unanga wä ahoko iwinöninïki yangimoi de yahinoto, de wähuloko önanga yähohinoto deʼ wahidöaka o kuaha onangika laʼ yaduhu o womaha madorou.

⁸ Unanga wahidöaka ohidumutu nënanga onangika, ”Ngarouha nimägao okianaga niadodagi magoronaka, sawaliua o diki-diki. Uha niao o inomo ekola o hadaka mapopoje, ekola o tiwi.

⁹Nia päke o hapato, mä uha nimä gao o baju o dobiki hinoto.”

¹⁰Unangö wätemo, ”Nako ngini niwohama o tau moika, nigogere genangokadau hiädono ngini nia mal̄a o kota gënanga.

¹¹ Mä nako ngini niädono o ngï moioka, deʼ o nyawa genangokadau yoluku inï tarima deʼ inihigihene ngini, nia mal̄a o ngï gënanga. Deʼ o kafo nia l̄ouoka niahurerouku hokä o hohininga onangika!”

¹²De iwinöninïki o Yesus yangimoi de yahinoto gënanga ima goraka. Onanga yoiki de ihi ngahu o abari, o nyawa kokiani yotoba de yamal̄a o baradoha gënanga.

¹³ Iwinöninïki o Yesus gënanga yaduhu mangöe o womaha madorou, yahi ehe o zaitun maminya o nyawa yopopanyakeika deʼ yahi togumu önanga.

¹⁴ O abari-abari mangale mata-mata idädadioka gënanga yadonoli ma Koano Herodesika, hababu o Yesus airomanga ihiorikoka kiaka dika. Naga o nyawa yotemo, ”O Yohanis Wo ohi-ohiki wowangokali! Gënanga mahababu Unanga de Ai kuaha wodiai i hëra-hëranga gënanga.”

¹⁵Mä o nyawa mahomoa yato, ”Unanga o Elia.” Nagaoli yato, ”Unanga o nabi, hokä o nabi womatëngo kahuruonino.”

¹⁶Maöraha o Herodes woihene gënanga, ünanga wotemo, ”Marai nënanga o Yohanis Woohi-ohiki, kiaka kahuruono ngohi tähulokoka yatobiki aihäeke. Orahanënanga ünanga wowangokali!”

¹⁷ Hababu koidadiowahi gënanga o Herodes wähulokoka o nyawa iwitagoko o Yohanis, deʼ iwihingohama o buika. O Herodes wodiai hokogënanga karana mangale o ngo Herodias, aidodoto mahirete ngoi hekata, enagënanga o Filipus. Hababu o Herodes womi kawingoka o ngo Herodias,

¹⁸deʼ yakorona de o hali gënanga o Yohanis wögogilio wïtaaere o Herodes hokonënanga, ”Yakunua ngona nokawingi de anidodoto ngoi hekata gënanga!”

¹⁹Gënanga mahababu o ngo Herodias mijanggutu o Yohanisika deʼ momau o Yohanis iwitöma, mä munanga makunua madiai o hali gënanga, karana o Herodes womitätatoko.

²⁰Hababu o Herodes wähulokoka o nyawa iwïgöana ihidodiai o Yohanis uha wobodito, karana ünanga wïmodongo o Yohanisika. Unanga wohi öriki o Yohanis o nyawa maoa moi, wïhulokoka ma Jou Madutu. Deʼ hokogënanga o Yohanis wotemo, o Herodes kawoigo wohigihene, ngarokö ünanga duru wobaliha karana gënanga.

²¹Mabaha o ngo Herodias mamäke o ngëkomo o Herodes aiwange woma kil̄au mataongoka. O öraha gënanga o Herodes wodiai o rame mangale yopopareta i kökurutil̄e, o pareta makuahaka, deʼ o kapita-kapita deʼ o Galilea makawaha mabalu-baluhu.

²²O rameoka gënanga o ngo Herodias ngomi ora moholehe mosëlo, deʼ ami sëlo gënanga o Herodes aihininga yasanangi de aitamu-tamu. Hoʼ o Herodes womitemo mamoholehika gënanga, ”Ngona okia nöigo, nogahoko dika. Ngohi aha tonihi döaka ngonaika!”

²³Daha o Herodes wojaji o moholehika gënanga deʼ makoboto. O Herodes womi temo, ”Okia dika ngona nogahoko aha tonihidöaka, igoungu ngarokö ahi pareta mahononga!”

²⁴Ho o moholehe gënanga mohupu deʼ momileha ngomi ayoika, ”Ayo okia yaoa kokiani ngohi togahoko?” Ngomi ayo mohaluhu, ”Nogahoko o Yohanis Woohi-ohiki ai häeke.”

²⁵O moholehe gënanga tai-taiti momakilioro o Herodesika deʼ motemo, ”Ngohi togahoko o Yohanis Woohi-ohiki aihäeke nohihi döaka ngohino öraha nënanga dika moi o dulanga mal̄okuoka!”

²⁶Woihene o gogahoko gënanga o Herodes duru ai hininga ihuha. Mä unanga wakunua watila o gogahoko gënanga karana ünanga wokobotoka aitamu-tamu manga himangoka.

²⁷Hoʼ unanga gila-gila wïpareta womatëngo aigogöana wal̄ë o Yohanis Woohi-ohiki ai häeke. De ma tentaraoka gënanga woiki o buika, daha watobiki o Yohanis Woohi-ohiki aihäeke.

²⁸Ipaha ünanga wao o häeke gënanga o dulanga mal̄okuoka deʼ wohilapahi mamoholehika gënanga. Deʼ o moholehe gënanga mohi döakoli ngomi ayoika.

²⁹Maöraha iwinöninïki o Yohanis yoihene o hali gënanga, önanga yoiki yal̄ë o Yohanis aimayeti, deʼ yalungunu.

³⁰O rasul-rasul wähulo-huloko o Yesus gënanga ipaha imakilioroli, deʼ imatoomu de o Yesus. Onanga ihingahu Unangika mata-mata önanga yadodiaioka, deʼ yodotokoka.

³¹Manga ngöe duru o nyawa yoböa deʼ yoiki, hiädono mangale yol̄omo mä o Yesus deʼ iwinöninïki yakunua. Hababu gënanga o Yesus wätemo iwinö ninïkika, ”Niaino laʼ ngone hoiki o ngï magigoro koiwa-iwaika kiaka ngoneyakunu homa tëngoka deʼ ngini yakunu nimahi batongo jai-jai.”

³²Ho onangö imagöraka yoiki de o ngotiri yödumutu o ngï magigoro koiwa-iwaika.

³³Mä manga ngöe o nyawa yämäkeoka önanga yamal̄a o ngï gënanga, deʼ yänäko önanga o nagona. Hoʼ, mata-mata o kota madaera gënanga, manyawa imapopopäta yanïki o dudungika mangëkomo, yärorebe o Yesus deʼ iwinöninïki.

³⁴ Maöraha o Yesus o ngotiroka de wouti, Unanga wämäke o nyawa mangangöe. Unanga aidora onangika, hababu önanga hokä o duba magogöana koiwa. Ho Unangö womuläenge wädotoko mangöe o hali onangika.

³⁵Maöraha o bimaoaka, o Yesus iwinöninïki yotemo Unangika, ”I tigi-tigi yohutu deʼ o ngï nënanga itingakino.

³⁶Iholoi yaoa Bapa nähuloko o nyawa neönanga yoiki, hupaya önanga yakunu imaija o inomo o kapongo-kapongoika deʼ o kapo-kapongo ikilolitino nënanga.”

³⁷Mä o Yesus wohaluhu, ”Ngini dika niahiol̄omo önanga.” ”Owë, boteka ngomi kokiani mioiki mi ija o roti ma ija o ratuhu hinoto o tiwi haäka mangale miahiol̄omo o nyawa neönanga?” yato hoko gënanga o Yesus iwinöninïki gënanga.

³⁸Daha o Yesus wäleha, ”Naga o roti muruono nginioka? Beika nioiki niolega.” Iböto önanga yölega, önanga yato, ”Naga o roti motoa deʼ naga o nawoko o ngai hinoto.”

³⁹Daha o Yesus wähuloko o nyawa mata-mata gënanga yogogere o doomu-doomu moi o momo maijo-ijoka.

⁴⁰Onangö gënanga yogogere de madatoro, o doomu-o doomu moi. Naga yaratuhu moi o doomu moi, deʼ nagaö yamoritoa o doomu moi.

⁴¹I paha o Yesus wal̄ë o roti motoa deʼ o nawoko hinoto gënanga, deʼ womamataga o dihangil̄e deʼ wotemo tarima kasi ma Jou Madutuika. I böto de gënanga, Unanga wabëla-bëlaka o roti gënanga de Ai giama deʼ wohidöaka iwinöninïkika laʼ hikodoku o nyawa yowöe-wöeika gënanga. Deʼ o nawoko hinoto gënanga ihi kodokuoli onangika mata-mata.

⁴²Onanga yol̄omo hiädono yäpunuhu.

⁴³Ipaha o inomo maboloi gënanga o Yesus iwinöninïki yatoomu — mata-mata naga o karaja ngimoi de hinoto i omanga.

⁴⁴O nau-nauru ya ol̄o-ol̄omo o roti gënanga yatakihiri naga yaribuhu motoa.

⁴⁵Ipaha de gënanga o Yesus womataiti wähuloko iwinöninïki yosobo yongotiri yohira o Betsaidaika o taaga mahonongaka, Unanga magogiriahi wähuloko o nyawa yowöe-wöe gënanga yolio.

⁴⁶O nyawa yowöe-wöe gënanga wäpidiloka, o Yesus woiki o tonaka itotoporonika laʼ womäniata.

⁴⁷Yohutuoka, iwinöninïki o Yesus manga ngotiri o taaga mahidogoronaka yaikaka, hode o Yesus kao dudungokahi.

⁴⁸Unanga wämäke önanga kamanga hangihara de yokangela yaoru o ngotiri gënanga, karana o hidal̄oko yapuhukika. Hababu gënanga, done ho o takoro hange deʼ o takoro butanga o hutu inohi mahigorona, Unanga waino onangino womä dagi o akere mal̄okuika. Deʼ Unanga wotagi wogila-gila hokä aha wätilakuru önanga.

⁴⁹Maöraha önanga iwi mäke womä dagi o akere mal̄okuika, önanga yato bote o tokata,

⁵⁰hiädono önanga yopöa-pöaka yohawana. Hababu önanga mata-mata iwi mäke Unanga deʼ onanga duru yatodokana. Mä gila-gila o Yesus wätemo onangika, ”Nima rirïdi! Ngohi o Yesus. Uha nihawana!”

⁵¹Dahaö Unanga wodöa manga ngotiril̄e, deʼ mahidal̄oko ma irïdi. Iwinöninïki o Yesus duru yohëranga.

⁵²I hëra-hëranga de o roti motoa gënanga kowahiohi önanga i mangarati. Mahuhahi onangika laʼ i mangarati.

⁵³Maöraha imahi ädono o taaga mahonongaika, önanga i matapu o Genesaret mahohanoka.

⁵⁴Maöraha önanga yohupu o ngotiril̄e, o nyawa yämäke yaino-ino gënanga o Yesus.

⁵⁵Ho önanga ima popopäta o daera gënanga yamöde-mödeke, deʼ yomuläenge yä ao o nyawa yopopanyake o Yesusika o tikara mal̄okuoka. Nako önanga yoihene o Yesus naga o ngï moioka, önanga yä ao o nyawa yopopanyake dokengika.

⁵⁶Kiaka dika o Yesus woböa — kaya oa o kapongoka, o kotaka ekola o kapongoka — genangino o nyawa salalu yaino deʼ yakelenga manga nyawa yopopanyake o lapangoka. Dahaö önanga yogahoko yagegoto hupaya o nyawa yopopanyake gënanga yahi gumal̄a yatigi o Yesus aijuba, ngarokö mabarenika dika. Mata-mata yatigi-tigi Ai juba, yotogumu.