Read Tobelo O MARKUS 7 Bible Online

O MARKUS 7 - Tobelo bible

O MARKUS 7

¹O doomu moi o Farisi manyawa deʼ yamuruono naga o agama maguru o Yerusalemino, yoböa o Yesusika.

²Onanga yämäke yamuruono naga o Yesus iwinöninïki yol̄omo de manga giama itebinua moteke o agama, enagënanga ihiraua yaihoro manga giama imoteke o agama madatoro.

³O Farisi manyawa kogenangoli mata-mata o Yahudi manyawa, duru yosetia yanïki mangaete de mangatohora manga adati. Onanga aha yol̄omua, nako ihiraua manga giama yaihoro, imoteke madodagi ihigogeroka.

⁴Okia yoija o paharoka aha koya ol̄omua, nako yaihorua ihira. Deʼ mangöe o datoro mahomoahi mangaete de mangatohoraino kiaka önanga kai keketohi yasö; hokä mangale madatoro, o galahi yaihoro, o udo-udomo, deʼ o pakakaha o tabaga.

⁵Hababu gënanga o Farisi manyawa deʼ o agama maguru-guru gënanga yoleha o Yesusika, ”Yadodoa hoininöninïki gënanga yol̄omo de manga giama yaihorua? Mahababu okia önanga yamotekua nangaete de nangatohora manga adati?”

⁶ O Yesus wohaluhu, ”Ngini o nyawa nielu-eluku! Yakorona duru okia o Yesaya wohi ngahuoka mangale ngini, enagënanga, ’Ma Jou Madutu wato hokonënanga, O nyawa ge önanga duga-duga de o demo-demo Ngohi ihi huba, mä manga hininga ikurutika de Ngohi.

⁷Parahaja önanga ihihuba Ngohi, hababu o nyawa manga datoro önanga yädotoko matero-tero gënanga Ahi datoro!ʼ

⁸Ma Jou Madutu ai pareta-pareta ngini nio legaikaua, de o nyawa manga dato-datoro ngini niasö niakëkekete.”

⁹De o Yesus wotemoli, ”Ngini duru nisawaro niatila ma Jou Madutu aipareta hupaya yakunu nia tumunguku niadodötoko mahirete.

¹⁰ O Musa wohidöakoka o pareta nënanga, ’Nia horomati niaama de niaayo,’ deʼ ’O nagona hönanga yatetemo manga ama de manga ayo, kokiani yähukumu yohonenge.’

¹¹Mä ngini nidotoko: Nako o nyawa yätemo manga dimonika, ’Okia kokiani ngohi tohi döaka ahi ama deʼ ngohi ayoika, ngohi tohihubaka ma Jou Madutuika,’

¹²ho manga manarama yäriwo manga ama de manga ayo, ngini niahilapahioka o nyawa ge önanga.

¹³Hoʼ de nia dodötoko mahirete kiaka ngini niahidöakoka o nyawa geonangika, ngini niahohihanga ma Jou Madutu aidemo. Kahangöeohi o hali hokonënanga ngini niadiai.”

¹⁴De o Yesus wä ahoko wohigalioli o nyawa yowöe-wöe gënanga deʼ wätemo onangika, ”Ni ihene hupaya nimangarati!

¹⁵Koiwa naga okia naga moi maporetino de iwohama o nyawa manga goronauku yakunu yadiai önanga yopeseke. Haidulu yaino, ihupu-hupu o nyawa moino genangala yadiai önanga yopeseke. [

¹⁶Hoʼ, nako de nia ngauku, ni ihene.]”

¹⁷Maöraha o Yesus wämal̄a o nyawa yowöe-wöe gënanga deʼ wowohama o tauika, iwinöninïki yoleha Unangika mangale o hitotero gënanga madungutu.

¹⁸De o Yesus wätemo onangika, ”Mode ngini nimangaratiowahi? Mode ngini yakunua nimangarati iwöwoha-wohama o nyawa moi nanga goronauku yakunua yadiai o nyawa gënanga wopeseke?

¹⁹Hababu iwö woha-wohama gënanga yanonuua nanga hininga, mä yanonu nanga mämata, deʼ ipaha ihupuoli.” De o demo-demo gënanga o Yesus wohi nyata mata-mata o inomo ihalali.

²⁰De o Yesus wotemoli, ”Ihupu-hupu o nyawaino, gënanga doka iwi peseke ünanga.

²¹Hababu magoronail̄e enagënanga nanga hiningail̄e, ipuda o diba-dibanga madorou, idadi o hababu o nyawa yodiai o manarama de o demo isö safarune, yotohiki, yotoma,

²²yohowono, yotipu, o nyawa yahi ade-ade i totorou, deʼ yadiai hagala moi-moi i totorou, idadi yokal̄il̄u, yotingkai, yotaleana, ima edenge, deʼ ihuha yädotoko.

²³Mata-mata o dorou gënanga i puda nanga goronail̄e, deʼ genanga doka yadiai o nyawa yopeseke.”

²⁴Ipaha o Yesus wamal̄a o ngï gënanga, deʼ woiki o daera i tigi-tigika de o Tirus makota. Unanga wowohama o tau moi magoronaika deʼ woluku o nyawa ihiöriki Unanga naga genangoka. Mä Unanga wakunua Ai diri waiunu.

²⁵O ayo momatëngo, ngomi ora o womaha madorou imï ngohamika, moihene mangale o Yesus. Münanga maino o Yesusino deʼ moma ruku Ai himangoka,

²⁶deʼ mogahoko hupaya o Yesus waduhu o womaha madorou ngomi oraka gënanga. O ngoheka gënanga o Yahudi manyawaua, moma kil̄au o Fenisia madaeraka o Siriaoka.

²⁷O Yesus womitemo munangika, ”O ngoha-ngohaka kokiani ihira hahiol̄omo. Itorou hal̄ë o ngoha-ngohaka manga inomo de hödotumo o kahoika.”

²⁸”Tuanga,” o ngoheka gënanga mohaluhu, ”hagala o kaho o meja matimiuku ma yaol̄omo o inomo mahou-hou kiaka o ngoha-ngohaka yatifa-tifauku!”

²⁹Daha o Yesus womitemo munangika, ”Karana ani bobaluhu gënanga, nolio; o womaha madorou ihupuoka ngoni oraino!”

³⁰Ma ayo gënanga molio. Otauoka, münanga momimäkeino ngomi ora momahi ruba-ruba o dangiroka deʼ o womahamadorou i gou-goungu i hupuoka o ngohakino gënanga.

³¹Ipaha o Yesus wamal̄a o Tirus madaera, deʼ aidodagi wohi gila-gila wanonu o Sidon de o Galilea ma Taagaika. Unanga wal̄ë o ngëkomo watilakuru o Kota Ngimoi madaera.

³²Genangokadau o nyawa iwi ao Unangika womatëngo womou de witopongono. Onanga yogahoko o Yesus wögelenga Ai giama o nyawauku gënanga.

³³O Yesus wiao o nyawa gënanga o nyawa yowöe-wöeoka de wï tingakika womatëngoka dahaö o Yesus wakelenga Ai hagarara o nyawa gënanga aingauku hinotö magoronaika. Daha o Yesus wobiri, deʼ wapal̄anga o nyawa gënanga ai äkiri.

³⁴Iböto de gënanga o Yesus womamataga o dihangil̄e, daha wowomaha wakua-kuata deʼ wïtemo o nyawaika gënanga, ”Efata,” mamangarati, ”Ihelenga!”

³⁵O nyawa gënanga aingauku ihelenga deʼ aiäkiri idadi yabole okali, deʼ unanga womuläenge wotemo-temo dema gapanga.

³⁶Daha o Yesus wäduhunu önanga mata-mata ihiade-ade o hali gënanga o nagonaikadika. Mä iholoi o Yesus wäduhunu, gënanga hongoli önanga ihingahu-ngahu.

³⁷Deʼ mata-mata o nyawa yoihe-ihene gënanga duru yohëranga. Onanga yotemo, ”Mata-mata wodiai kayaoa! Igou-goungu o nyawa yatopongono imahihene deʼ o nyawa yomou yotemo-temo!”