Read Tobelo O MARKUS 8 Bible Online

O MARKUS 8 - Tobelo bible

O MARKUS 8

¹Ipahaika tedekanua, nagali o nyawa manga ngöe o doomu moi yaino imatoomuino. Karana önanga manga inomo koiwa, o Yesus wä ahoko iwinöninïki deʼ wätëmo,

²”Ngohi tädora o nyawa manga ngöe nënanga. O wange hange iböto madekana önanga dede Ngohi, deʼ o öraha nënanga önanga manga inomo koiwa.

³Nako Ngohi tä huloko önanga yolio de manga mämata madol̄a koiwa, önanga aha yokiditoko o ngëkomo mahi goronaka. Dahaoli manga hidogoronaka naga magö gurutoka de yaino.”

⁴O Yesus iwinöninïki yohaluhu, ”O ngï mahoanoka itingakino nënanga kiaka o nyawa yakunu yamäke o inomo laʼ mangale yä wedono o nyawa manga ngöe nënanga?”

⁵”Naga hoko kia mangöe o roti nginioka?” o Yesus wä leha. ”Tumidi,” önanga yohaluhu.

⁶Ho o Yesus wähuloko o nyawa yowöe-wöe gënanga yogogeruku o tonaka mal̄okuoka, dahaö Unanga wal̄ë o roti tumidi gënanga deʼ wotemo sukur ma Jou Madutuika. Ipaha Unanga wa bëla-bëlaka o roti gënanga de Ai giama deʼ wohidöaka iwinöninïkika la hikodoku o nyawaika. Ho iwinöninïki yadiai hokoganga.

⁷Onanga manga nawoko ma alu-aluhu o ngai muruono nagali. O Yesus wotemo sukur ma Jou Madutuika mangale o nawoko gënanga, daha wähuloko iwinöninïki ihikodoku manawokoli gënanga.

⁸Onanga yol̄omo hiädono yäpunuhu — yatakihiri naga o nyawa yaribuhu iata yol̄omo. I paha iwinöninïki o Yesus yatoomu o inomo maboloi — o karaja tumidi iömanga. Deʼ o Yesus wähuloko o nyawa yowöe-wöe gënanga yolio,

¹⁰deʼ Unanga de iwinöninïki yoharene o ngotiril̄e deʼ yoiki o Dalmanuta madaeraika.

¹¹ Yamuruono naga o Farisi manyawa yoböa o Yesusika, deʼ muläenge imateke ributu de Unanga laʼ mangale yalingi-lingiri Ai howono. Onanga yogahoko o Yesus wodiai i hëra-hëranga hokä o nonako Unanga ma Jou Madutuoka de waino.

¹² O Yesus womaridemo howohaluhu, ”Okia mahababu o nyawa o öraha nënanga yogahoko Ngohi todiai ihëra-hëranga? Kowali! Ngohi aha tahi döakua o nonako marupa hoko gënanga onangika!”

¹³Ho o Yesus wamal̄aika önanga, deʼ woharene o ngotiril̄e; ipaha imä jobo o taaga gënanga mahonongaika.

¹⁴Iwinöninïki o Yesus yawohanga imä gao o roti yäwëdono. Onanga duga-duga o gahumu moi manga roti o ngotiroka.

¹⁵ ”Nimahi dodiai itike o Farisi manyawa manga ragi deʼ o Herodes ai ragika,” o Yesus wätemo onangika.

¹⁶Ho iwinö ninïki o Yesus gënanga muläenge ima koke temo mangale o hali gënanga. Onanga yotemo, ”Unanga wotemo hoko gënanga, hababu koiwa nanga roti.”

¹⁷O Yesus wanäko okia önanga imakokeleha. Hababu gënanga Unanga wäleha onangika, ”Yadodoa hongini nima kokeleha mangale koiwa o roti? Boteka ngini nianäkoua deʼ nimangarati owahi? Hoko gënanga mabongono niadibanga?

¹⁸ Ngini de nialakoka — yadodoa ho niamäkeua? Ngini de niangaukoka — yadodoa ho niihenua? Ngini niohiningaua

¹⁹o roti motoa gënanga kiaka Ngohi tabëla-bëlaka laʼ mangale o nyawa yaribuhu motoa? O karaja muruono i ömanga mainomo maboloi ngini niatoomu?” ”Ngimoi de hinoto,” önanga yohaluhu.

²⁰”Deʼ maöraha Ngohi tabëla-bëlaka o roti tumidi laʼ mangale o nyawa yaribuhu iata,” o Yesus wälehali, ö karaja muruono ma inomo maboloi ngini niatoomu?” ”Tumidi,” önanga yohaluhu.

²¹”Aa, ngini koni mangarati owahi?” o Yesus wätemoli.

²²Onanga imahiädono o Betsaida makotaika. Genangokadau o nyawa iwiao womatëngo wopilo-piloko o Yesusika, deʼ yogahoko hupaya Unanga wïpal̄anga o nyawa wopilo-piloko gënanga laʼ wihi togumu.

²³Ho o Yesus wasö o nyawa wopilo-piloko gënanga aigiama deʼ wïtuda ünanga o kota gënanga maporetika. Ipaha o Yesus waobiri o nyawa gënanga ailako. Unanga wögelenga Ai giama o nyawa gënanga ailakouku, deʼ wïleha unangika, ”Kayakunu ngona namäke okianaga o öraha nënanga?”

²⁴O nyawa gënanga womälega mahimangika, dahaö wotemo, ”Ia. Ngohi tämäke o nyawa yotagi-tagi; mä onanga tä lega-lega hokä o gota.”

²⁵O Yesus wogelengaoli Ai giama o nyawa gënanga ailakouku. Nënanga mamoi o nyawa gënanga wohidailako womälega wohi dodiaino. Ai lako itogumu, deʼ unanga wamäke mata-mata de duru itiai.

²⁶De ika o Yesus wïtemo unangika, ”Nolio, deʼ uha noma kilioro o kotaika gënanga.”

²⁷O Yesus deʼ iwinöninïki yoiki o kapo-kapongika o Kaisaria Filipi magilolitino. O ngëkomo mahoanika o Yesus wäleha onangika, ”Imoteke o nyawa yato, o naguna Ngohi nënanga?”

²⁸ Onanga yohaluhu, ”Naga yato: O Yohanis Wo ohi-ohiki; nagaoli yato o Elia, deʼ mahomoali yato: o nabi moi.”

²⁹ ”Mä imoteke ngini mahirete, Ngohi nënanga o naguna?” o Yesus woleha. O Petrus wohaluhu, ”Bapa Ngona ganga o Koano Wohi hohalamati!”

³⁰De ika o Yesus wäpoma önanga, hupaya o nagonaikadika ma uha ihi ngahu mangale Ai diri.

³¹Ipaha de gënanga, o Yesus womuläenge wädotoko iwinöninïki, ahaö o Nyawa manga Ngohaka kokiani watagongo o hangihara mangöe, deʼ o tutuda-tutuda, o imam-imam manga häeke, deʼ o agama maguru-guru aha iwilawani. Unanga aha iwitoma, mä o wange hangeoka Unanga aha womomikoli.

³²De wohi totiaika duru o Yesus wohi ngahu o hali gënanga iwinöninïkika. De o Petrus witauru o Yesus aidatekoka, deʼ wïtaaere o Yesus.

³³Mä o Yesus womä lega aiporetoko deʼ wäpulono iwinöninïkiika, deʼ witaaere o Petrus, ”Noiki nenangoka, Nogoda-goda! Ani dibanga gënanga o nyawa madibanga; ma Jou Madutua ai dibanga!”

³⁴ I paha o Yesus wäahoko o nyawa yowöe-wöe genangoka kamamoi deʼ iwinöninïki. Ika de wätemo onangika, ”O nyawa yomau ihinïki Ngohi, kokiani yawohanga manga paralu mata-mata, ipaha yamoku manga salib, deʼ gila-gila ihi nïki Ngohi.

³⁵ Hababu o nyawayomau yöriwo manga ngango, aha ihihanga manga ngango. Mä o nyawa ihidöaka mangangango mangale Ngohi deʼ mangale o Abari ma Oa ma Jou Madutuino, aha yahihalamati.

³⁶Okia mautumu o nyawaika, nako mata-mataika o dunia nënanga idadi kato önanga, mä onanga manga ngango ihihanga?

³⁷Kayakunu o ngango gënanga ihitagali de okianaga moi?

³⁸Nako womatëngo iwimal̄eke ihihigoungu Ngohi deʼ Ahi dodötoko de o dorou maorahoka nënanga, o Nyawa manga Ngohakö aha iwimal̄eke wahigoungu o nyawa gënanga, maorahoka Unanga ahao woböa de ai Ama Ai kuaha, imakinïki de o malaekat-malaekat yotebi-tebini.”