Read Tobelo O LUKAS 1 Bible Online

O LUKAS 1 - Tobelo bible

O LUKAS 1

¹Teofilus nobobarija, Manga ngöe o nyawa ihi dailakoka yatulihö de yödatoro hagala okia naga i dädadioka nanga hidogoronaka.

²Onanga yatulihi ima däene de o nyawa yamäke-mäke mahirete okia naga idädadioka gënanga muläenge mahira de inä ade-ade ngoneino, deʼ i paha ihi ngangahu toëna maabari.

³Ngohi tatailakoka tohidodiai mata-mata idädadioka gënanga matitioka de yaino, de ipaha, ngohi tapulono kayaoa hötatulihi o bukuika tohidodiai tatatoro la mangale ngona Tuanga.

⁴Ngohi tadiai gënanga hupaya Tuanga nanäko, okia inï dotokoka ngonaika Tuanga, marai itiai.

⁵ Maöraha o Herodes wodadi o koano o Yudea mabereraka, naga womatëngo ma imam airomanga o Zakharia. Unanga wowohama o Abia ma imam-imam manga dodoomu. Ngoi hekata ami romanga o ngo Elisabet, o imam manga difaukuoli.

⁶O giahekata gënanga manga wowango ma Jou Madutu aihininga yasanangi. Yahinotö yamoteke mata-mata ma Jou aipareta deʼ Aitita yangodumu.

⁷Onanga manga ngohaka koiwa hababu o ngo Elisabet mofätua deʼ onanga yahinotö yäperekioka.

⁸O wange moiuku, maöraha o Abia aidodoomu yamäke o hidoku, o Zakharia wohidagi o manarama hokä ma imam ma Jou Madutu aihimangoka.

⁹De o undi kiaka biaha o imam-imam yadiai, o Zakharia iwitumutu la wowohama ma Jou ai Tau magoronaika deʼ wotuhuku o manyanyi.

¹⁰Magogiriaka o manyanyi maduhuku idiai, o nyawa yowöe-wöe imä niata maporetoka.

¹¹O öraha gënanga ma Jou aimalaekat imahimatoko madiri o Zakhariaika. O malaekat gënanga imaokoino o mëja o manyanyi yatuhu-tuhuku mangï manirakoka.

¹²Maöraha o Zakharia wamäke o malaekat gënanga, ünanga wobingu deʼ wohawana.

¹³Mä o malaekat gënanga iwitemo, ”Uha nohawana, Zakharia! Ma Jou Madutu woihenoka anihubayanga. Ngoni hekata o ngo Elisabet aha momagilianga womatëngo o ngohaka o nauru. Ngona kokiani nihiromanga o Yohanis unangika.

¹⁴Ngona aha duru nomörene deʼ manga ngöe o nyawa aha yomore-morene nako o ngohaka gënanga womakil̄au!

¹⁵ Unanga aha wodadi o nyawa yolago-agomo imoteke ma Jou ailolegaka, deʼ unanga yakunua o angguru wokere ekola o daluku ibiha-biha. Kade womakil̄au ünanga aha ma Jou Madutu ai Womaha iwikuaha.

¹⁶Manga ngöe o Israel manyawa aha wätuda imakilioro ma Jou Madutuika, to önanga manga Jou.

¹⁷ Unanga aha wodadi ma Jou ai huhuloko wokua-kuata deʼ wokuaha hokä o Elia. Unanga aha wahikadame o ngohaka de o ama, deʼ o nyawa yototo motekua aha wätuda imakilioro o dibanga madiai mangekomika. De hokogënanga ünanga wasadia o umati moi, kiaka i böbötoka mangale ma Jou.”

¹⁸”Sarakia ngohi tohiöriki o hali gënanga aha idadi?” o Zakharia woleha o malaekatika gënanga. ”Ngohi ihi perekioka, deʼ ngohi hekata mä imiperekioka.”

¹⁹ O malaekat gënanga wohaluhu, ”Ngohi nënanga o Gabriel. Ngohi tileleani ma Jou Madutu deʼ Unanga wohihuloko ngohi tohi ädono o abari maoa nënanga ngonaika.

²⁰Okia ngohi tahetongo, aha idadi maorahoka. Mä karana ngona nongakua, ngona aha nakunua notemo; ngona aha nomou hiädono okia tahëto-hëtongoka gënanga idadi.”

²¹O öraha gënanga, o nyawa kaiwi dodamäohi o Zakharia. Onanga yohëranga yadodoa ho ünanga hokogënanga aidëkana ma Jou ai Tau magoronaka.

²²Deʼ maöraha ünanga wohupu, ünanga wakunua wotemo onangika. Unanga de ai giama wo tumu-tumutu, deʼ kahirahi womou. De o nyawa geönanga mayanäko, ünanga wamäkeoka okianaga moi ihëra-hëranga ma Jou ai Tau magoronaka.

²³De ipaha imatäka aimanarama maöraha ma Jou ai Tauoka, o Zakhariaö ma wolio ai tauika.

²⁴Ipahaika i tedekanua, ngoihekata o ngo Elisabet o ngohaka mohiao, daha kamomagögogono o tauoka o mede motoaino madëkana.

²⁵Münanga motemo, ”Mabobahaka ma Jou wohiriwo ngohi deʼ waehe ahi mal̄eke.”

²⁶Maöraha o ngo Elisabet mohiaoka o ngohaka o mede butanga, ma Jou Madutu wahuloko o malaekat Gabriel i oiki o Nazaretika moi o kota o Galilea madaeraoka.

²⁷ O Gabriel iwihuloko o moholehika momatëngo, amiromanga o ngo Maria. O moholehe gënanga momaneoka de womatëngo airomanga o Yusuf ma Koano Daud ai difauku.

²⁸O malaekat gënanga yaika o ngo Mariaika deʼ imitemo, ”Halamati, ngona wonihi barakati ma Jou de madodagi kabiahaua! Ma Jou naga dede ngona!”

²⁹Moihene o malaekat gënanga mademo, o ngo Maria imitodokana, hiädono amihiningaka ileha-leha okia madungutu o tabea nënanga.

³⁰De o malaekat gënanga imitemo o ngo Mariaika, ”Uha nohawana, Maria, hababu ngona ma Jou Madutu ai hininga yadäene.

³¹ Ngona aha o ngohaka nohiao de nongohaka womatëngo o ngohaka, de kokiani ngona nihiromanga o Yesus.

³² Unanga aha wodadi womulia deʼ aha iwihetongo ma Jou Madutu wokö Kurutil̄e ai Ngohaka. Ma Jou Madutu aha wihidadi Unanga o koano hokä ma Koano Daud, aiete de aitohora.

³³Deʼ Unanga aha wäpareta o Yakub aidifauku kahi ado-adonika hokä o koano. Ai Pareta aha mabaha koiwa.”

³⁴”Mä ngohi o moholehe maboro,” o ngo Maria motemo o malaekatika gënanga, ”Sarakia o hali gënanga yakunu i dadi?”

³⁵O malaekat gënanga imïbaluhu, ”Ma Jou Madutu ai Womaha aha iböa ngonaino, deʼ ma Jou Madutu aikuaha aha inihawo ngona. Gënanga mahababu o ngohaka aha womakokil̄au gënanga aha iwihetongo wo Tebini, ma Jou Madutu ai Ngohaka.

³⁶Nohininga: O ngo Elisabet, ngoni riadodoto gënanga o ngohaka mohi aoka o mede butanga, ngarokö münanga imi perekioka deʼ o nyawa yato mofätua.

³⁷ Hababu ke ma Jou Madutu koiwa la naga idadiua.”

³⁸Daha o ngo Maria motemo, ”Ngohi nënanga ma Jou aigilaongo; mal̄aika la idadi ngohino hokä ngona nahetongoka.” Daha o malaekat gënanga woiki womimal̄aika o ngo Maria.

³⁹Iböto de gënanga momataiti o ngo Maria moiki o kota moika o Yudea madaera i l̄oku-l̄okuoka.

⁴⁰Münanga moiki o Zakharia aitauika, deʼ maöraha mowohama münanga momitabea o ngo Elisabet.

⁴¹Deʼ hokogënanga o ngo Elisabet moihene o ngo Maria amitabea, o ngohaka doka o ngo Elisabet amiröehoka gënanga imakëlu. De o ngo Elisabet ma Jou Madutu ai Womaha i mi kuaha,

⁴²daha mopöaka, ”Ngona duru inihibarakati o ngongoheka mata-mata manga hidogoronaka! Iwihi barakati o ngohaka aha ngona nihingohaka gënanga!

⁴³O nagona ngohi nënanga hiädono ma Jou ngoi ayo noböa ngohino?

⁴⁴Hokogënanga ngohi toihene anitabea, o ngohaka ahiröehe magoronaka gënanga imakëlu imore-morene.

⁴⁵Noutumu ngona, karana nongaku okia ma Jou wahetongo ngonaika gënanga aha idadi!”

⁴⁶ O ngo Maria motemo, ”Ahi hininga tïpuji ma Jou,

⁴⁷deʼ ahi jiwa kai more-morene karana ma Jou Madutu ahi Juru Halamati.

⁴⁸ Unanga wohihininga ngohi, Ai gilaongo kotoböbaragunaua! Muläenge o öraha nënanga mata-mata o hoana de o berera, yahetongo ngohi toutumu.

⁴⁹Karana ma Jou Madutu Duru woko Kuaha wodiai o hali ma ago-agomo ngohino. I Tebini Ai romanga.

⁵⁰O ahali de o ahaluku ma Jou de Ai hayanga de Ai dora o nyawaika iwï modo-modongo Unangika.

⁵¹De Ai giama i poputurungu Unanga wahigerewoto o nyawa manga hininga i kokurutil̄e, deʼ waruae toönanga manga datoro.

⁵² O kokoano wahiguti manga kuruhi i momuliaka deʼ o nyawa yobobaragunaua wahikurutil̄e.

⁵³O nyawa yähähahini aha yäpunuhu de hagala o oa-oa, yokaya-kaya wäduhu de manga kia-kiaua.

⁵⁴Unanga wäriwo o Israeloka Ai gilaongo, imoteke Ai jaji wadodiai de nangaete de nangatohora.

⁵⁵ Ma Jou wawohangua Ai jaji, Unanga aihininga imura o Abrahamika deʼ ai difauku kahiado-adonika.”

⁵⁶Done ho mede hange madëkana o ngo Maria mogogere de o ngo Elisabet, dahaö münanga molio ami tauika.

⁵⁷Ami öraha yadonoka o ngo Elisabet momägilianga. Münanga amingohaka imakil̄au o ngohaka o nauru.

⁵⁸Ima kokadateke deʼ amiriadodoto yoihene hokokia ma Jou aioa o ngo Elisabetika, deʼ onanga mayomörene dede münanga.

⁵⁹ Maöraha o ngohaka magil̄au gënanga maumuru o wange tufange, önanga yaino la ünanga iwihuna. Onanga yomau o ngohaka magil̄au gënanga iwihiromanga o Zakharia imoteke aiama airomanga,

⁶⁰mä ngoi ayo mato, ”Kowali! Unanga kokiani hihiromanga o Yohanis.”

⁶¹”Moiua aniriadodotino manga romanga hokogënanga,” önanga yotemo munangika.

⁶²Hoʼ iwïmou-mou önanga yoleha o Zakhariaika o romanga okia iwihi romanga aingohakika.

⁶³O Zakharia wogahoko o aoto mabelaka de o dudulihi, daha wotulihi, ”Ai romanga o Yohanis.” Onanga mata-mata yohëranga.

⁶⁴Oraha gënanga dika o Zakharia wakunoli wotemo deʼ ma Jou Madutu wïpuji.

⁶⁵Ima kokadateke mata-mata yohawana, deʼ o abari gënanga yodogilianga o Yudea i l̄oku-l̄okuoka madaera mata-mataika.

⁶⁶Mata-mata o nyawa yoihe-ihene o hali gënanga manga hiningaka ileha, ”Aha wodadi okia o ngohaka gënanga?” Hababu ma Jou iwitomoteke ünanga.

⁶⁷O Zakharia o ngohaka gënanga aiama, ma Jou Madutu ai Womaha iwikuaha hiädono ünanga wohingahu o behehongo ma Jouino. Unanga wotemo,

⁶⁸”Niaino ngone hïpuji ma Jou, o Israeloka manga Jou Madutu! Unanga woböaka wäriwo Ai umati deʼ wätuhuhu önanga.

⁶⁹Unanga wonahidöaka o Juru Halamati wopoputurungu, Ai gilaongo, o Daud aidifauku.

⁷⁰Kahuruonino ainabi-nabi wäiri-irikoka, ihingahu, ma Jou wohidöakoka Ai jaji

⁷¹la wonahihalamati ngone nanga haturü manga giama ma hoatoka, deʼ o nyawa inädoha-dohata manga kuahaino.

⁷²La wohimatoko Ai hininga mamura nanga ete de nanga tohoraika, Ai jaji i tebi-tebini gënanga aha watotomo.

⁷³Unanga wokoboto o Abraham nanga amaika, deʼ wojaji la wonahihalamati nanga haturü manga giama mahoatoka, hupaya ngone hohawanua hileleani Unanga

⁷⁴

⁷⁵salalu homahi gilaongo Unangika deʼ hasanangi Ai hininga nanga wowango magurutu.

⁷⁶ Ngona, hei ahingohaka, aha ini hetongo ma Jou Madutu wokö Kurutil̄e ainabi. Ngona ini huloko ma Jou nihihira la nohi pairi Ai ngëkomo,

⁷⁷la wohingahu Ai umatika önanga aha yahihalamati, nako ma Jou Madutu wä apongoka toonanga manga baradoha.

⁷⁸Nanga Jou ai hininga imura deʼ wotodora; Unanga woböa matiti wonahihalamati ngone. Hokä o wange malako i böa o ngorumino,

⁷⁹ hoko genangala Unanga wohidöaka Ai dararono o nyawa mata-mataika yowango o huhutu deʼ o modongo magoronaka. Unanga wonä tuda ngone o ngekomika madumutu o dameika.”

⁸⁰O Zakharia aingohaka gënanga idogo wolamoko deʼ i dogo ikuata ai womaha. Unanga wogogere o tonaka makö kakahaka, hiädono maöraha yadono ünanga womahi matoko ai diri o Israel manyawaika.