Read Tobelo O LUKAS 10 Bible Online

O LUKAS 10 - Tobelo bible

O LUKAS 10

¹Ipaha gënanga ma Jou wäiriki yamori tumidoli iwinöninïki, daha wähuloko yahohinoto, önanga yohira o kota yogetongo deʼ o ngï kiaka o Yesus womau wödulu.

² ”Ma hasili aha yautu-utuku iwöe,” wätemo onangika, ”mä yokokarajanga youtuku duga-duga manga huhutulu. Hababu gënanga, nigahoko madumule madutuika hupaya Unanga wohidingoto yomomanarama la yautuku majoro mahasili.

³ Aa, nimäjobo! Ngohi tinïhuloko ngini hokä o duba o kaho honganika mahidogoronaka.

⁴ Uha niao o tiwi mangï ekola o bilaono, ekola o hapato. O ngëkomo mahoanika, ka o nyawa moikaö de uha nimatogumu niähoromati.

⁵Nako ngini niwohama o tau moika, ihira nitemohi, ’Tanu naga o dame o tau nënanga magoronaka.’

⁶Nako genangoka naga o nyawa yoigo o dame, niadame matabea gënanga aha igogere onangoka; nako kowali, niakilioli niadame matabea gënanga.

⁷ Nigogere o tau moioka dika. Nia tarima okia inihidöaka nginika genangoka, hababu o nyawa yomanarama manga haku yatarima manga hewa. Uha nima totururu o tau moioka de o tau moika.

⁸Nako ngini niaika o kota moioka deʼ dokengoka ngini inïbuhuku kai rorahai, niaol̄omo okia inihidöaka nginika genangoka.

⁹Nia hitogumu o nyawa yopopanyake o kota gënanga magoronaka, deʼ niahingahu genangokadau manyawa, ’Ma Jou Madutu de majapati aha womuläenge wopareta hokä o Koano niahidogoronaka.’

¹⁰ Mä nako ngini niaika o kota moioka deʼ genangokadau initarimaua ngini, nihupu o ngekomika deʼ niahetongo,

¹¹’Igoungu niakota makafo yatau-taulika mia l̄ouoka, ngomi miahurero hokä o hohininga nginika. Mä nihiöriki itigioka maöraha ma Jou Madutu womuläenge wopareta hokä o Koano, ngini niahidogoronaka!ʼ

¹² Nio hohininga, o kiamati mawangeoka, ngaro de o kota gënanga manyawa, ma o Sodom manyawaohi aha iholoi igapanga ma Jou Madutu wä apongo!”

¹³ ”Nibodito ngini, o Korazim makota! Deʼ nibodito ngini o Betsaida makota! Hohiade ihëra-hëranga idodiai niahidogoronaka gënanga nako idiaioka o Tirus deʼ o Sidon makotaka, marai manyawa genangoka madekanoka yotoba yodiai okaua o baradoha, deʼ yapäke o huha mapakeanga de inoli o kafo yogelenga manga mumukoka.

¹⁴O kiamati mawangeoka, nako de ngini, o Tirus deʼ o Sidonohi manyawa aha iholoi igapanga ma Jou Madutu wä apongo.

¹⁵ Deʼ ngini, o Kapernaum makota! Ngini niatobote, ngini aha inïtedeil̄e hiädono o horogail̄e? Kowali! Mä ngini aha inï umo o naraka uku!”

¹⁶ Daha o Yesus wätemo iwinöninïkika, ”O nyawa inihigihene ngini, ihihi gihene Ngohi. O nyawa inïtila ngini, ihitila Ngohi. Deʼ o nyawa ihitila Ngohi, iwitilaö Unanga wohihulo-huloko Ngohi.”

¹⁷Yamori tumidi iwinöninïki imakilioro de manga mörene duru. ”Jou,” önanga yotemo, ö womaha madorou ma imihi moteke ngomino nako ngomi miapareta enanga de To ngona aniromanga Jou!”

¹⁸O Yesus wohaluhu, ”Ngohi tamäke o Ibilihi itifa o dihanguku hokä o leletongo.

¹⁹ La nihi öriki! Ngini tinihidöakoka o kuaha hupaya ngini yakunu niadoko o dodiha deʼ o kokakatama de inoli niatobiki hagala o haturü manga kuata, de koiwa naga okianaga moiö de yakunu inïbodito ngini.

²⁰Ngaro hokogënanga ma uha nimörene karana o womaha madorou inihimoteke nginika. Iholoi yaoa ngini nimörene karana niaromanga yatulihi o horogaka.”

²¹O öraha genangö, o Yesus womörene karana ma Jou Madutu ai Womaha iwikuaha. O Yesus wotemo, ”Ama, o Jou nako Kuaha o dihanga deʼ o dunia! Ngohi totarima kasi Ngonaika karana mata-mata gënanga Ngona narahasia o nyawa yososawaroika deʼ de manga dodotokokaika, mä Ngona nohi matoko o nyawa yohohakola ikaua. Genangala yasanangi Ani hininga Ama.

²² Hagala mata-mata nohidöakoka Ngohino Ama. Mahomoa de Ngona Ama, kao nyawa moiö de koiwa iwinäko ma Ngohaka, mahomoa de ma Ngohaka kao nyawa moiö de koiwa ininäko Ngona Ama.”

²³Daha o Yesus womä lega iwinöninïkika, ipaha wätemo onangika mahirete, ”Niutumu ngini karana niamäkeoka okia nia mäke-mäke o örahanënanga.

²⁴Hababu nimahininga: Manga ngöe o nabi deʼ o koano yönahihu yamäke ngini niamäke-mäke o öraha nënanga, mä onanga yamäkeua. Onanga yönahihu yoihene ngini ni ihe-ihene o öraha nënanga, mä onanga yoihenua.”

²⁵ Ipaha womatëngo o agama maguru womaoko de wïtaili o Yesus. Unanga woleha, ”Bapa Guru, ngohi kokiani okia todiai hupaya yakunu tatarima o ngango madutu deʼ i kakali?”

²⁶O Yesus wohaluhu, ”Okia itulihoka Ma Jou Ai Demo ma Buku magoronaka? Sarakia anidamäke mangale o hali gënanga?”

²⁷ O nyawa gënanga wohaluhu, ” ’Nïdora ani Jou Madutu de anihininga magahumu, deʼ anijiwa magahumu, de anikuata mata-mata, deʼ de ani akali itotiai,’ deʼ ’Nädora ani dodiawo hokä ngona nödora anidiri mahirete.’ ”

²⁸ ”Ani bobaluhu gënanga itiai,” o Yesus wato. ”Nadiai gënanga, done ngona aha nowango.”

²⁹Mä o agama maguru gënanga womau aidiri itiai. Unanga woleha, ”O nagona tongohi ahi dodiawo gënanga?”

³⁰O Yesus wohaluhu, ”Naga o nauru womatëngo o Yerusalemoka de wouti o Yerikhouku. O ngëkomo mahoanoka ünanga iwitagoko o nyawa madorouoka yoora-ora, de yaora mata-mata aikiahonanga, iwigohara ngade wohonenge, daha iwimal̄aika wobitikangil̄e o ngekomoka de ainabo ma ago-agomo.

³¹Imateke korona ma imam womatëngo wakainoli o ngekomino gënanga. De wïmäke o nyawa gënanga wobitikangil̄e, ünanga worehene o ngëkomo mahonongaika, daha kawogila-gila.

³²Kogenangoli de o Lewi manyawa womatëngo, wakaino genangino; de wïmäke o nyawa gënanga, ünanga womahi tigi-tigika la wïtailako. Mä unanga makaworehene o ngëkomo mahonongaika, daha kawo gila-gila.

³³ Mä ipaha o Samaria manyawa womatëngo, aidodagi magogiriaka, genangino wakainoli. Maöraha wïmäke o nyawa gënanga wobitikangil̄e, aihininga duru iwitora karana wïdora.

³⁴O Samaria manyawa gënanga womatogumu, de wïukeruku o nyawa gënanga daha watebini ainabo-nabo de o angguru deʼ wahouru de o minya, ipaha wapakiti ainabo-nabo gënanga. I böto gënanga ünanga wihidöa o nyawa gënanga ai jarail̄e, daha wïao o dudulu matauika deʼ wïpaliara.

³⁵Yarehino mawange ünanga wal̄ë o tiwi o rupia ribuhu hinoto deʼ wohi döaka o dudulu matau madutuika de wotemo, ’Nipaliara neünanga, deʼ nako nipaliara de matiwi nënanga yadonua, napäkeohi dika anitiwi, aha ngohi tafangu damä nako ngohi tomakilioro nengino.’ ”

³⁶Ipaha o Yesus wohibobaha o ade-ade gënanga de o loleha nënanga, ”O nyawa yaruange nënanga, imoteke anidamäke o nagona yodiai hokä aidodiawo o nyawa iwi ora-oraika gënanga?”

³⁷O agama maguru iwileha-leha gënanga wohaluhu, ”O nyawa iwi riwo-riwoka o nyawa iwi ora-ora gënanga.” ”Aa, noiki de nadiai hokä hokogenangoli!” o Yesus wotemo.

³⁸ Ipaha o Yesus deʼ iwinöninïki ihigila-gila mangadodagi, de imahiädono o kapongo moioka. Genangoka o ngoheka momatëngo amiromanga o ngo Marta, mïahoko o Yesus wotulu manga tauika.

³⁹O ngo Marta ngomi dodoto momatëngo ami romanga o ngo Maria. O ngo Maria nënanga mogogeruku momahi tigi-tigika ma Jou Yesusika mohigihene Ai dodötoko.

⁴⁰Ma o ngo Marta duru mokaika mokaino moleleani manga tauoka. Münanga moiki o Yesusika deʼ motemo, ”Jou boteka Jou nohaduliua o ngo Maria mohi mal̄aika ngohi dika mahirete tokarajanga? Nomi huloko münanga mohï riwo!”

⁴¹”Marta, Marta!” ma Jou wohaluhu. ”Ngona nohawatere deʼ notasibu napikiri nënanga deʼ genanga;

⁴²enahioko duru iparalu duga-duga moi. Deʼ o ngo Maria mairikoka maoa-oa, de aha yakunua yal̄ë munangoka.”