Read Tobelo O LUKAS 12 Bible Online

O LUKAS 12 - Tobelo bible

O LUKAS 12

¹ O nyawa dema ribu-ribuhu imakehoto hiädono naga ima kodoko manga l̄ou. O nyawa manga ngöe gënanga magogiriaka imatoomu, o Yesus wätemo iwinöninïkika, ”Nimahi dodiai mangale o Farisi manyawa manga ragi, Ahi dungutu, toönanga manga tengeluku.

² Koiwa naga iiu-iunu aha koimäkeua, deʼ koiwa i rorahasia de aha koi kiliangua.

³O hutu-hutu ngini niahetongo, aha yoihene o wange-wange; deʼ ngini nihihudu o nyawa manga ngaukika o kamari i beno-benoino magoronaka, aha ihi ngahu-ngahu kiaika honanga.”

⁴”Nio hohininga, Ahi dodiawo! Uha niämodongo onangika yatöma-töma niaröehe mä yakunua yodiai iholoi de gënanga.

⁵Kayaoa de Ngohi tinihi dumutu nginika o naguna kokiani ngini niwïmodongo. Niwï modongo ma Jou Madutuika! Hababu winï toma iböto, Unanga wokuahaö winïumo o narakaika! Ningaku, Unanga kokiani ngini niwï modongo.

⁶Gahumu motoa o totoai yahukunu o rupia ratuhu hinoto. Ngarokö hokogënanga kamoiö de ma Jou Madutu wawohangua.

⁷Nia tadauru niahäekokaö mangai yogetongoka mata-mata, hababu gënanga uha nihawana; ngini nia ija iholoi i kurutil̄e de o totoai!”

⁸”Nio hininga nihidodiai: O nyawa imahi nyata o kawaha manga himangoka igoungu önanga ihinöninïki, o Nyawa manga Ngohakö aha wahigoungu ma Jou Madutu aimalaekat-malaekat manga himangoka.

⁹Mä o nyawa imahi pongono o kawaha manga himangoka önanga ihinöninïki, o Nyawa manga Ngohakö aha wahi pongono ma Jou Madutu aimalaekat-malaekat manga himangoka.

¹⁰ Nako o nyawa okia naga moi yotemo iwilawani o Nyawa manga Ngohaka, ünanga yakunu iwihiapongo; mä nako ünanga wohi kauku ma Jou Madutu ai Womaha, ünanga yakunua iwihi apongo.

¹¹ Nako ngini inïao o pupuji matauika la yalingiri niahowono ekola niadiai o popareta ekola yokokuaha manga himangoka, uha nihawatere mangale aha sarakia niadiri nioriwo ekola mangale okia kokiani ngini nitemo.

¹²Hababu okia kokiani ngini nitemo gënanga ma orahoka aha ma Jou Madutu ai Womaha inïdotoko nginika.”

¹³Yowöe-wöe manga hidogoronaka womatëngo wïtemo o Yesusika, ”Bapa Guru, nohitaili Bapa nïhuloko ahidodoto wohihidöaka ngohino o arata o hidoku moi mia ama wamal̄a-mal̄aika.”

¹⁴O Yesus wohaluhu, ”Riadodoto, o nagona ihigoraka Ngohi todadi o hakimi ekola tohikokodoku inihinoto niapuhaka?”

¹⁵Ipaha genangokadau manyawa mata-mata o Yesus wätemo, ”Nimahi dodiai deʼ nimägöana, uha hiädono ngini nikal̄il̄u. Hababu o nyawa manga wowango imahigagaoua de aikaya, ngarokö aiarata duruë iwöe.”

¹⁶Daha o Yesus woade-ade o hitotero nënanga, ”Naga womatëngo wokaya. Unanga de aitonakoka, de mahasili iwöe.

¹⁷O nyawa kaya gënanga muläenge womapikiri aihiningaka, ’Tato tagogono ahi tonaka mahasili koiwakali o ngï. Okia tohi akali o öraha nënanga?ʼ

¹⁸Ipaha ünanga wapikiroli deʼ watemo aidirika mahirete, ’Aa, ngohi naga ahiakali; ahigudanga aha tähuloko yakilianga daha tohigoko iholoi ilamoko. La genangoka aha tagogono mata-mata ahi gandum de ahibara-baranga mahomoa.’

¹⁹Ipaha aha tatemo ahi dirika mahirete, ’Ngona noutumu! Hagala maoa-oa ngona naparetaka, deʼ aha koimataua de matao-taongo. Nomahibatongo o öraha nënanga! Nokere de nol̄omo deʼ nomahi sosanangi!ʼ

²⁰Mä ma Jou Madutu wïtemo unangika, ’Hei bodo! O hutu nënanga dika ngona aha nohonenge, daha o nagona aha yapuhaka anikaya mata-mata ngona natotoomuoka mangale anidiri gënanga?ʼ

²¹Hoko gënanga imadadi de o nyawa moi-nyawa moi kiaka ima hi dailako yodadi kaya mangale manga diri mahirete, mä imahidailakoua yodadi kaya ma Jou Madutu ailakoka.”

²²O Yesus wätemo iwinöninïkika, ”Gënanga mahababu Ngohi totemo, ’Uha nihawatere mangale niangango, enagënanga okiaaha ngini niaol̄omo, ekola okia aha ngininiapäke.’

²³O ngango ganga iholoi de o inomo, deʼ o röehe iholoi de o pakeanga.

²⁴Nia tailako o totaleo o wogono! Enanga idatomua, iutukua, magudanga ekola mainomo matauö makoiwa. Mä ma Jou Madutu wapaliara ënanga! Ngini iholoi ikurutil̄e niaragane de o totaleo!

²⁵O nagona ngini niahidogoronaka de aihawatere yakunu wakurutu aiumuru ngaroka mahuhutulu?

²⁶Nako o hali maiteteke gënanga dika niakunokaua niadiai, yadodoa honihawatere mangale o hali mahomoa?

²⁷ Niatailako sarakia o bunga iwango; o bunga-bunga gënanga imanaramua, o baju iuriti makowali. Mä ma Koano Salomo hokogënanga aikaya mawapäkeua o pakeanga ma hailoa hokä o bunga gënanga!

²⁸O momo o gol̄owaka iwango o wange nënanga deʼ yarehino yatuhuku imatäka. Mä ma Jou Madutu hoko gënanga mahailoa wapäke wohidodiai o momo gënanga. Okiali ngini! Mä ngini kuranga ningaku!

²⁹Hoʼ uha nihawatere deʼ nibingu mangale okia aha ngini niaol̄omo de niaokere.

³⁰O hali hoko gënanga o nyawa iwinäko-näkoua ma Jou Madutu yaninïki yalingiri. Enahioko nia Ama wanäko mata-mata gënanga ngini niparalu.

³¹Mä ngini kokiani nimahi dailako hupaya ma Jou Madutu wapareta niangango, done mahomoahi gënanga aha ma Jou Madutu winihidöakoli nginika.”

³²”Ngini duga-duga o doomu maiteteke, uha nihawana! Hababu nia Ama wosanangi wohidöaka nginika o barakati ai Poparetaino.

³³Niahukunu niaarata deʼ niahidöaka matiwi o nyawa mihikinïka. Nimä diai mangale niadiri o tiwi mapopoje ibäbabitua, enagënanga o arata igögogono o horogaka. O arata gënanga yakunua ihihanga, karana yotohi-tohiki yakunua yal̄ë deʼ o buteteke yakunua yabodito.

³⁴Hababu kiaka niaarata genangokaö niahininga!”

³⁵ ”Nimä göa-göana nio himanga o hali moi-moi. Ngini kokiani kahoko genangika nimägöana nimapakeanguku deʼ niahilo kai wango-wango,

³⁶ imatero hokä yolöleleani mangagogiria yogöana iwi damä manga tuanga womakilioro o kawingi marameangino. Nako matuanga gënanga woma kilioro deʼ o ngorana wotolo, önanga aha de majapati o ngorana yahelenga.

³⁷Hokokia manga utumu yolöleleani maöraha matuanga woböa de wämäkeino magogiria yotamä. Ningaku: o tuanga gënanga aha womahidiai deʼ wähuloko iwilöleleani gënanga yogogeruku, daha Unanga wäleleani önanga.

³⁸Hokokia manga utumu yolöleleani gënanga nako to ona manga tuanga gënanga wämäkeino önanga manga gogiria ima sadia iwi damä, ngarokö Unanga woböa o hutu gorona ekola iholoi itedekana de gënanga!

³⁹ Nio hohininga nënanga! Hohiade o tau madutu wohiöriki o takoro muruono yotohi-tohiki aha yoböa, ünanga aha womägöana hupaya yotohi-tohiki yakunua yowohama aitau magoronaika.

⁴⁰Hababu gënanga nginiö kokiani nimä göa-göana, karana o Nyawa manga Ngohaka aha woböa maöraha ngini nia näko-näkoua.”

⁴¹”Jou, boteka o dodötoko gënanga Jou nohidungutu ngomino ekola o nyawa mata-mataika?” o Petrus woleha.

⁴²Ma Jou wohaluhu, ”O nagona yolöleleani yosetia deʼ yosawaro hiädono aituanga wïgoraka wodadi yolöleleani mahomoa manga häeke hupaya ünanga wahidöaka önanga o inomo maorahoka?

⁴³Hokokia aiutumu wolöleleani gënanga nako maorahoka ai tuanga womakilioro de wïmäkeino aigogiria wadiai aimanarama!

⁴⁴Ningaku: O tuanga gënanga aha wihigogöana hagala aiarata wolöleleanika gënanga.

⁴⁵Mä nako wolöleleani gënanga wotemo aihiningaka, ’Ahi tuanga madekanohi dahaö womakilioro,’ de ünanga wägohara yolöleleani mata-mata deʼ wol̄omo de wokere hiädono iwidaluku,

⁴⁶done aituanga aha womakilioro mawange deʼ maöraha wanäko-näkoua. Deʼ wolöleleani gënanga aituanga wïduhu wohupu wïdiai imake tero manga hangihara de o nyawa yototomotekua ma Jou Madutuika.

⁴⁷Wolöleleani wanäko aituanga ai mau, mä womä göa-göanua deʼ wadiaiua aituanga aimau gënanga, aha iwigohara kahakuata.

⁴⁸Mä wolöleleani wanäkoua aituanga aimau, ipaha wadiaiokia naga moi ihowono hiädono kokiani iwigohara aha iwigohara mahuhutulu dika. Hababu o nyawa yahidöakoka iwöe, onangino aha yögahoko iwöe. Deʼ o nyawa yahigogöanoka iwöe, onangino aha yägahoko iwöeoli.”

⁴⁹”Ngohi toböa la tapuda o nguku o duniaka nënanga. Duru yaoa nako mauku itokaroka!

⁵⁰ Kanagahi o huha de o hangihara ma ago-agomo kokiani Ngohi tatoku-toku. Deʼ Ahi hininga duru ihuha ihira de gënanga imadadi.

⁵¹Boteka ngini niatobote Ngohi toböa mangale toao o dame o duniaino? Kowali, o dameua duga-duga o galawani.

⁵²Muläenge örahanënanga, o tau moi madol̄a yamotoaka aha ima teke ributu, ya ruange yälawani yahinoto ekola yahinoto yälawani yaruange.

⁵³ O ama aha wïlawani aingohaka o nauru, deʼ o ngohaka o nauru aha wïlawani ai ama. O ayo momi lawani ngomi ora deʼ o ngohaka o ngoheka momi lawani ngomi ayo. Madunungu o ngoheka aha momilawani ngomi mol̄oka, deʼ mamol̄oka aha momi lawani ngomi hunungu.”

⁵⁴O Yesus wätemoli o nyawa yowöe-wöeika, ”Nako ngini niamäke o lobi idöa o wange madumuniha, gila-gila ngini nitemo, ’Aha o awana.’ Deʼ igou-goungu o awana.

⁵⁵Nako ngini niamäo o hidal̄oko iböa o koreharauku, ngini niato, ’Aha ihiwara.’ Deʼ igou-goungu ihiwara.

⁵⁶Ngini o nyawa nioigo nimadodiai! De niolega o dihanga deʼ o dunia madodagi o gitawa aha idadi ngini niakunu nihingahu. Yadodoa ho o örahanënanga manonako ngini niakunua nihingahu okia aha idadi?”

⁵⁷”Yadodoa hongini niaakunua niaputuhu okianaga madiai?

⁵⁸Nako naga o nyawa inïkalaki ngini o hakimika, nihidailako niagou-goungu la niatiai niaparakara gënanga dede una, kiaka ngini kao ngëkomo mahoanikahi. Nako kowali, done ünanga winïtauru ngini o hakimi manga himangoka, deʼ o hakimi gënanga aha winihilapahi ngini o polisika, deʼ o polisi winihi ngohama ngini o bui magoronaika.

⁵⁹Ningaku! Ngini aha nihupua o buioka nako niabobangu niamatauahi nifangu.”