Read Tobelo O LUKAS 15 Bible Online

O LUKAS 15 - Tobelo bible

O LUKAS 15

¹ O wange moiuku, o soungu yogaho-gahoko manga ngöe deʼ o nyawa o kawaha yäpulono o nyawa maoa-oaua, yoböa iwihi gihene o Yesus.

²O Farisi manyawa deʼ o agama maguru-guru yomuläenge yokurubungu. Onanga yotemo, ”Cei, o nyawa nënanga wätarima o nyawa madorou deʼ inoli wol̄omo dede önanga!”

³Mahababu gënanga o Yesus wä ade-ade onangika o hitotero nënanga,

⁴”Hohi ade nginioka womatëngo aiduba o ratuhu moi, ino de gahumu moi ihihanga — okia aha ünanga wodiai? Marai ünanga aha wamal̄aika maduba mori hiwo de hiwo o momoka, deʼ woiki walingiri ihïhihanga gënanga hiädono wamäke.

⁵Deʼ nako ünanga wamäkeokali aiduba gënanga, ünanga hoko gënanga womörene hiädono o duba gënanga wamokuino aibelekaka,

⁶daha wolio wao. Ipaha ünanga wä ahoko aidodiawo deʼ imakokukekere, deʼ wätemo, ’Niaino ngone homore-morene. Ahi duba ihïhihanga tamäke okali!ʼ

⁷Aa, hoko genangoli o horogaka hababu imatëngo o nyawa yobö baradoha yotoba naga o mörene iholoi ilamoko, de yamori hiwo de hiwo o nyawa maoa deʼ i paralua yotoba.”

⁸”Ekola hohi ade, momatëngo o ngoheka amitiwi haäka o gahumu ngimoi, de ino moi ihihanga — okia aha modiai? Münanga aha amihilo mawango deʼ mahehara amitau daha malingiri kiaika hönanga hiädono mamäke o tiwi gënanga.

⁹Maöraha münanga mamäkeoka o tiwi gënanga, münanga mä ahoko amidodiawo deʼ imakokukere, daha mato, ’Ngohi duru tosanangi tamäkeokali ahi tiwi ihïhihanga. Niaino ngone homore-morene!ʼ

¹⁰Hoko genangoli ma Jou Madutu aimalaekat yomörene nako naga o nyawa madorou imatëngo yotoba o baradoha yodiaiokaua. Ningaku!”

¹¹O Yesus wotemoli, ”Naga o ama womatëngo aingohaka o nauru yahinoto.

¹²Madodoto makiditoko wotemo aiamaika, ’Ama, tongone nanga kaya nohihidöaka ngohino o örahanënanga ahi hidoku.’ Ho manga kaya gënanga aiama wahidoku aingohaka yahinoto.

¹³O wange muruononaga ipahaika mangohaka madodoto makiditoko gënanga aihidoku gënanga wahukunu daha woiki o berera magögurutika. Dokengoka ünanga wohigogule aitiwi de wowango kaworame-rame.

¹⁴Maöraha aitiwi imatäka mata-mata, o habirokata maamoko idadi o bereraka gënanga, hiädono ünanga womuläenge wohuha.

¹⁵Daha ünanga woiki wokarajanga o berera gënanga manyawaka womatëngo, kiaka ünanga wïhuloko o dumuleika wögöana aiode.

¹⁶Unanga hokogënanga iwihahini hiädono wönahihu wadol̄a aimämata de o ode mainomo gënanga. Ngarokö hokogënanga ünanga iwihahini, koiwa moi o nyawa iwihidöaka o inomo unangika.

¹⁷Mabaha ünanga womamäo de wotemo, ’O nyawa yomomanarama ahi amaoka manga inomo kadema boboloi, deʼ ngohi nenangoka ngade o hahini tohihonenge!

¹⁸Ngohi aha tomagoraka deʼ toiki ahiamaika deʼ totemo unangika: Ama, ngohi tobaradoha ma Jou Madutuika deʼ ahi Amaika.

¹⁹Ipatutokaua ngohi nohihetongo aningohaka Ama. Nohipulono ngohi hokä womatëngo wonïkokarajanga.’

²⁰De womagoraka ünanga wolio aiamaika. O tauoka de magurutikahi, aiama wïmäkeoka ünanga. Ai ama womapopäta wïmäke ünanga de duru iwitora, daha wïkololo deʼ wï ame.

²¹O ngohaka gënanga wato, ’Ama,’ ’ngohi tobaradohaka ma Jou Madutuika deʼ ngonaika Ama. Ipatutokaua ngohi nohihetongo aningohaka Ama.’

²²Mä aiama wäahoko iwïlöleleani deʼ wätemo, ’Itaiti! Nial̄ë o pakeanga duru irörorahai, deʼ niwihipäke unangika. Nihinoa o ali-ali aihagararaoko, deʼ o hapato ail̄ouil̄e.

²³Iböto gënanga nial̄ë o hapi mangohaka iböboburere deʼ nia töaka. Ngone aha hol̄omo deʼ homore-morene.

²⁴Hababu ahi ngohaka nënanga wohonengoka, o örahanënanga wowangokali; ünanga wohihangoka, o örahanënanga tïmäkeokali.’ Daha yomuläenge yorame-rame.

²⁵O örahagënanga mangohaka o riaka naga o dumuleoka. Maöraha ünanga wolio de wotigioka o tauika, ünanga woihene o musik mailingi deʼ o selo-selo.

²⁶Unanga wïahoko yolöleleani womatëngo, de woleha, ’Naga okia o tauoka nënanga?ʼ

²⁷Wolöleleani gënanga wohaluhu, ’Tuanga anidodoto woböaka! Deʼ Tuanga aniama wähulokoka yotöaka o hapi mangohaka iböboburere, hababu ünanga wïmäkeokali aingohaka kawo hohalamati!ʼ

²⁸O ngohaka mariaka gënanga duru iwitohata hiädono ünanga woluku wowohama o tauika. Ho aiama wohupu deʼ wïbaja ünanga wowohama.

²⁹Mä unanga wato, ’Madekana dema tao-taongo ngohi tokarajanga tomahohonenguku mangale ngona Ama. Komaiwa ngohi talawani anipareta Ama. Deʼ okia nohidöaka Ama ngohino? O kabingi moiö makomaiwa Ama nohihidöaka ngohino la torame-rame de ahidodiawo!

³⁰Ama aningohaka gënanga wamatäka anikaya Ama, de o ngoheka mangawowango itotorou, mä hokogënanga ünanga wolio, Ama ngona natöaka o hapi mangohaka iböboburere mangale una!ʼ

³¹Ai ama wïbaluhu, ’Ahi ngohaka,’ ’ngona salalu naga nengokadau dede ngohi. Mata-mata o arata ngohioka, ganga katongona aniarata.

³²Mä ngone kokiani horame-rame deʼ homörene, hababu anidodoto gënanga wohonengoka, mä orahanënanga wowangoli; ünanga wohihangoka mä orahanënanga hï mäkeokali.’ ”