Read Tobelo O LUKAS 18 Bible Online

O LUKAS 18 - Tobelo bible

O LUKAS 18

¹Ipaha de gënanga o Yesus woade-ade moi o hitotero la wädotoko iwinöninïki hupaya önanga salalu yohubayanga deʼ uha manga nganono itöaka.

²O Yesus wato, ”O berera moioka naga womatëngo mahakimi wïmodongua ma Jou Madutuika, deʼ o nagonaika dika mawohaduliua.

³O bereraka gënanga nagali momatëngo o bobao, mohigali-gali mïhimanga mahakimi gënanga mogahoko amiparakara wöriwo. ’Nohïriwo ngohi nähimanga tongohi ahilawani,’ o bobao gënanga mato.

⁴O öraha muruono naga madekana mahakimi gënanga woluku womïriwo o bobao gënanga. Mä mabaha mahakimi gënanga womapikiri, ’Ngarokö ngohi tïmodongua ma Jou Madutuika deʼ kamoikaö de tohaduliua,

⁵mä karana o bobao nënanga kahokogenangika dika mohiburakiti, iholoi yaoa ngohi töriwo ami parakara. Nako kowali, aha münanga kahokogenangika maino deʼ mohïdiai o huha.’ ”

⁶De ma Jou wotemo, ”Niatailako okia mahakimi woadi-adilua gënanga wotemo!

⁷Aa, boteka ma Jou Madutu aha kowäriwoua Ai umati mahirete manga parakara kiaka yopöa-pöaka Unangika o hutu deʼ o wange? Boteka Unanga aha maöraha wadohu-dohuku mangale wäriwo önanga?

⁸Ningaku: Unanga aha de majapatioka wöriwo manga parakara! Mä maöraha o Nyawa manga Ngohaka woböa, boteka kawämäkeohi o duniaka nënanga o nyawa yongaku-ngaku Unangika?”

⁹O Yesus wohiade-adeö o hitotero nënanga wohidungutu o nyawaika kiaka yäpulono o nyawa mahomoa okiaua yädäene, mä yanäko de madiai manga diri mahirete yaoa.

¹⁰O Yesus wato, ”Naga o nyawa yahinoto yoiki ma Jou ai Tauika la imäniata. Womatëngo o Farisi manyawa, deʼ mahomoa womatëngo o soungu wogaho-gahoko.

¹¹O Farisi manyawa gënanga womaokoino womatëngoka deʼ wohubayanga, ’Ya Jou Madutu, ngohi totemo tarima kasi Ngonaika, hababu ngohi hokä o nyawa mahomoaua, yokokal̄il̄u, yorusi-rusi, ekola yohowo-howono. Ngohi tosukur karana ngohi hokä o soungu wogaho-gahokua gënanga.

¹²Ngohi topuaha mahinoto o minggu moi, deʼ ngohi tohihuba Ngonaika, o regu ngimoi okianaga ngohi tamäke-mäkeino.’

¹³Mä o soungu wogaho-gahoko gënanga womaokoino magurutika deʼ womamataga o dihangil̄e makowimoroënua. Ino de aiale mangunungu watino de ünanga wotemo, ’Ya Jou Madutu, nohïdora ngohi, o baradoha manyawa nënanga!ʼ ”

¹⁴ O Yesus wato, ”Ningaku,” ”maöraha yolio o tauika, o soungu wogaho-gahoko gënanga ma Jou Madutu wïtarima deʼ o Farisi manyawaua gënanga. Hababu o nyawa moi-o nyawa moi i hi kurutil̄e manga diri aha yähitipokouku; deʼ o nyawa moi-o nyawa moi ihi tipokouku manga diri aha yahi kurutil̄e.”

¹⁵Naga o nyawa yäao manga ngoha-ngohaka mahohumujuru o Yesusika hupaya Unanga wäpal̄anga deʼ wahibarakati önanga. Maöraha o Yesus iwinöninïki gënanga yämäke, o nyawa geönanga yängamo.

¹⁶Mä o Yesus wä ahoko o ngoha-ngohaka gënanga daha wätemo iwinöninïkika, ”Niamal̄aika o ngoha-ngohaka yaino Ngohino! Uha niaduhunu önanga, hababu o nyawa hokonënanga marupa yodadi o gegetongo ma Jou Madutu aiumati.

¹⁷Nimä hohininga! O nyawa iwihimangua ma Jou Madutu, hokä o ngohaka moi, aha yakunua yodadi o gegetongo ma Jou Madutu aiumati.”

¹⁸Womatëngo o Yahudioka manga tutuda woleha o Yesusika, ”Bapa Guru maoa, ngohi kokiani okia todiai hupaya yakunu tatarima o ngango madutu deʼ ikakali?”

¹⁹”Yadodoa ho ngona nato Ngohi yaoa?” o Yesus wïleha unangika. ”Mahomoa de ma Jou Madutu mahirete, koiwa naga maoa.

²⁰ Ngona nanaköka ma Jou Madutu wohipopareta: ’Uha nihowono, uha nitoma, uha nitohiki, uha nihakihi ni elu-eluku, deʼ niahoromati niaayo deʼ niaama.’ ”

²¹”O pareta gënanga mata-mata ngohi tamotekoka katoma goduru ikahi,” o nyawa gënanga wohaluhu.

²²Woihene gënanga o Yesus wïtemo, ”Kanagahi o hali moi kokiani ngona nadiai: Nahukunu mata-mata aniarata, matiwi nahi döaka o nyawa mihikinika, deʼ ngona aha namäke o arata o horogaka. Iböto gënanga noböa nohinïki Ngohi.”

²³Mä o nyawa gënanga maöraha woihene gënanga, ünanga aihininga ihuha karana ünanga duru wokaya.

²⁴O Yesus wohiöriki o nyawa gënanga aihininga ihuha, hababu gënanga Unanga wotemo, ”Ihuhaholi o kaya manyawa yodadi o gegetongo ma Jou Madutu aiumati!

²⁵Iholoi igapanga o onta o aiwani maago-agomo iwohama o populaki mapidahika, de o kaya manyawa womatëngo wowohama ma Jou Madutu ai Dunia ma Hungika.”

²⁶O nyawa yoihe-ihene o Yesus wahetongo hokogënanga yoleha, ”Nako hoko gënanga, o nagona yakunu yohalamati?”

²⁷O Yesus wohaluhu, ”Ka o nyawa idadiua, ma’ ma Jou Madutu kai dadi!”

²⁸Daha o Petrus wotemo, ”Namäke! Ngomi miamal̄aka miatau madol̄a la mangale mininïki Bapa.”

²⁹”Ningaku!” o Yesus wato. ”O nyawa yamal̄aka mangatau ekola mangahekata, ekola mangariadodoto ekola mangaayo deʼ mangaama ekola mangangoha-ngohaka karana iwïleleani ma Jou Madutu,

³⁰o nyawa gënanga aha wamäke mabalaha de ilape-lape o öraha nënanga, deʼ o öraha aha iböa-böa ünanga iwihi döaka o ngango madutu deʼ ikakali.”

³¹O Yesus wätoomu iwinöninïki yangimoi de yahinoto wätingakika, daha wätemo, ”Ni ihene! Ngone o örahanënanga hodumutu o Yerusalemika. Dokengoka, o nabi-nabi yatuli-tulihi mata-mata yakorona o Nyawa manga Ngohaka aha idadi.

³²Unanga aha iwihilapahi o Yahudi manyawaikaua, aha iwihohedu, iwihikauku, deʼ Unanga iwiobiri.

³³Onanga aha iwihangihara deʼ Unanga iwi toma, mä o wange hangeoka, Unanga aha womomiki.”

³⁴Mata-mata iwinöninïki o Yesus gënanga, kama huhutulö de imangaratiua. Ai demo-demo mamangarati gënanga warahasia onangika. Onanga yohiorikua mangale okia Unanga woade-ade.

³⁵Maöraha o Yesus tigi-tigi womahiädono o Yerikho ma bereraika, womatëngo wopilo-piloko wogogeruku o ngëkomo madatekoka wogaho-gahoko.

³⁶Maöraha ünanga woihene o nyawa manga ngöe gënanga yakaino ünanga woleha, ”Naga okia?”

³⁷”O Yesus o Nazaret manyawa gënanga, wakaino,” önanga yato unangika.

³⁸De o nyawa wopilo-piloko gënanga wopöaka, ”Yesus, o Daud aingohaka! Nohïdora ngohi!”

³⁹O nyawa mahima-himangoka, iwingamo deʼ iwihuloko ünanga womarïdi. Mä unanga wopöaka iholoi ikuatil̄eoli, ”Daud aingohaka! Nohïdora ngohi!”

⁴⁰O Yesus womatogumu deʼ wohuloko o nyawa iwiao o nyawa wopilo-piloko gënanga Unangika. Unanga womahiadonika, o Yesus wïleha,

⁴¹”Okia ngona nomau Ngohi todiai ngonaika?” ”Tuanga,” o nyawa wopilo-piloko gënanga wohaluhu, ”ngohi tomau tomahi öriki.”

⁴²Daha o Yesus wotemo, ”Nako hokogënanga, nölega! Karana ngona nongaku ngohiino, ngona notogumu.”

⁴³O öraha gënanga dika ünanga yakunu womahiöriki, daha ünanga winïki o Yesus inoli wotemo tarimakasi ma Jou Madutuika. Maöraha o nyawa manga ngöe gënanga yamäke o hali gënanga, önanga mata-mata iwihigiriri ma Jou Madutu.