Read Tobelo O LUKAS 2 Bible Online

O LUKAS 2 - Tobelo bible

O LUKAS 2

¹O öraha gënanga ma Kaisar Agustus wohipareta hupaya mata-mata o kawaha o Roma ma Popareta magoronaka ihingohama manga romanga la yäetongo.

²O gegetongo madodihiraka nënanga ihidagi maöraha o Kirenius wodadi gubernur o Siria mabereraka.

³Mata-mata o nyawa o öraha gënanga yoiki moi-moi manga bereraika la ihingohama manga romanga.

⁴O Yusuf ö womäjobo o Nazaret o Galilea madaeraoka, de o Betlehemika o Yudea mabereraka, ma Koano Daud aingï womakil̄au; hababu o Yusuf o Daud aidifauku.

⁵O Yusuf wohingohama manga romanga, de o ngo Maria ngoi mamane kiaka münanga o ngohaka mohiaoka.

⁶Maöraha önanga imahiädono o Betlehemika amiöraha imahiädono o ngo Maria momägilianga.

⁷Münanga momägilianga moi o ngohaka o nauru, ami ngohaka mariaka. O ngohaka gënanga iwihawoino de o ngöere, daha iwikelengauku, o aiwani mainomo mangïoka ihinaoil̄e de o gandum maröehe; hababu önanga imämäkeua dodogumu mangï.

⁸O hutu gënanga naga o aiwani yogöa-göana magogiria yögöana manga duba-duba o daera gënanga magol̄owaka.

⁹Itodokanino ma Jou aimalaekat imahimatoko onangika, deʼ o dararono ma Jouino maletongo yadihiwara yahitararono önanga deʼ onanga duru yohawana.

¹⁰Mä o malaekat gënanga itemo, ”Uha nihawana! Hababu ngohi toböa tinïgao o abari maoa mangale ngini — o abari gënanga yadiai mata-mata o nyawa duru yomörene.

¹¹O wange nënanga o Daud aibereraka womakil̄auoka ma Koano Winihihohalamati enagënanga o Kristus, ma Jou.

¹²Nënanga ainonako: Ngini aha niwimäke womatëngo o ngohaka magil̄au iwihawoino de o ngöere, deʼ womaidu o aiwani mainomo mangï magoronaka.”

¹³Itodokanino o malaekat gënanga yanïkino mangöe o malaekat mahomoa iwipuji ma Jou Madutu. Onanga yotemo,

¹⁴”O puji ma Jou Madutuika o dihanga ikokurutil̄eoka! Deʼ o dunia mal̄okuoka, yohalamati o nyawa yasosanangi ma Jou aihininga!”

¹⁵Ipaha o malaekat-malaekat yämal̄a o aiwani yogöa-göana deʼ imakilioro o horogaika, o aiwani yogöa-göana gënanga imaketemo, ”Niaino ngone hoiki o Betlehemika deʼ hölega okianaga idädadi gënanga, kiaka ma Jou wonahingahu ngoneino.”

¹⁶Onanga imataiti yoiki, daha yämäke o ngo Maria deʼ o Yusuf, de mangohaka magil̄au gënanga womäiduiha o aiwani mainomo mangï magoronaka.

¹⁷Maöraha o aiwani yogöa-göana iwimäke o ngohaka magil̄au gënanga, önanga yoade-ade okia o malaekat-malaekat yahetongoka mangale o ngohaka magil̄au gënanga.

¹⁸Deʼ mata-mata o nyawa yohëranga yoihene o aiwani yogöa-göana manga ade-ade gënanga.

¹⁹Mä o ngo Maria magogono mata-mata gënanga amihininga magoronaka deʼ matötakihiri.

²⁰O aiwani yogöa-göana gënanga imakilioro o momo i gogol̄owaika daha iwipuji deʼ iwihimulia ma Jou Madutu, karana mata-mata okia yoihenoka deʼ yamäkeoka, i tiai hokä o malaekat yahetongo.

²¹ Ai umuru o wange tufange iböto, o ngohaka gënanga iwihuna. Deʼ onanga iwihiromanga o Yesus, o romanga kiaka o malaekat ihidöaka unangika, ihira de ngoi ayo mihiao unanga amiröehoka.

²² Yadonoka maöraha o Yusuf deʼ o ngo Maria yadiai o debini ma adati imoteke o Musa aitita. Hoʼ onanga iwiao o ngohaka gënanga o Yerusalemika la iwihilapahi ma Jouika.

²³ Hababu ma Jou ai Titaoka itulihi hokonënanga, ”O ngohaka o nauru mariaka mahigetongo, kokiani ihilapahi ma Jouika.”

²⁴Onangö manga dungutu ihihuba mangahuhuba, enagënanga o habi moi o pombo furu ekola o dutu hinoto o namo dara mangohaka, hokä higogeroka ma Jou ai Titaoka.

²⁵Oraha gënanga o Yerusalemoka naga womatëngo o bereki airomanga o Simeon. Unanga o nyawa maoa, de wïmodongo ma Jou Madutu deʼ wototamä maöraha ma Jou Madutu wahihalamati o Israel manyawa. Ma Jou Madutu ai Womaha dede ünanga

²⁶deʼ ma Jou Madutu ai Womaha iwihingahuoka unangika, ünanga aha wohonengua, nako wïmäkeuwahi o Koano Wohihohalamati ma Jou wahijäjajioka.

²⁷Mangale ma Jou Madutu ai Womaha matutuda, o Simeon wowohama ma Jou ai Tauika. Oraha gënanga o Yusuf deʼ o ngo Maria iwiao iwihingohama o Yesus, ka aiete-etekohi gënanga la yadiai o agama mamau-mau, kiaka hiparetaka o agama matitaka.

²⁸O Simeon wil̄ë o ngohaka gënanga deʼ wïtotiri daha wïpuji ma Jou Madutu,

²⁹”Orahanënanga, Jou, ngona natotomoka Ani jaji. Mal̄aikala Ani gilaongo nënanga tohonenge de ahihininga i rïdi.

³⁰Hababu ahi lako mahirete ngohi tamäkeoka o Juru Halamati Ngonaino.

³¹O Juru Halamati gënanga Ngona nasadiaka hagala o hoana de o berera manyawa manga himangoka:

³² hokä o dararono yatararono o hoana de o berera mahomoa mangale yoböa Ngonaika; o dararono genangala ohoromati iao Ani umati o Israel manyawaika.”

³³Ai ama deʼ ngoi ayo o ngohaka gënanga, yohëranga okia o Simeon wotemo mangale toönanga manga ngohaka.

³⁴O Simeon wahi barakati önanga, deʼ o ngo Maria o ngohaka gënanga ngoi ayoika womitemo, ”O ngohaka nënanga ma Jou Madutu wïirikoka la wahibinaha deʼ wahihalamati o Israel manyawa manga ngöe. Unanga aha wodadi o nonako ma Jouino, aha iwilawani manga ngöe o nyawa,

³⁵deʼ hoko gënanga ikilianga to önanga manga hininga madol̄a. O hininga mahuha aha yatohoko anihininga hokä o oworo madoto-doto.”

³⁶Naga momatengoli manabi o ngoheka duru imiperekioka. Ami romanga o ngo Hana o Fanuel ngoi ora o Asyer aibätuku. O taongo tumidi mokawingino,

³⁷o ngo Hana mofäo, deʼ oraha gënanga amiumuru o taongo mori tufange de iata. Komaiwa münanga matingaka ma Jou ai Tau. O hutu deʼ o wange münanga moleleani genangoka ma Jou Madutuika, de momäniata deʼ mopuaha.

³⁸Imateke korona öraha genangö münanga moböa, daha mïpuji ma Jou Madutu deʼ mohi ade-ade mangale o ngohaka gënanga o nyawa mata-mataika, kiaka yödodamä maöraha ma Jou Madutu walapahi o Yerusalem.

³⁹ I paha o Yusuf deʼ o ngo Maria yadiaioka mata-mata ma Jou ai Tita yahipatu-patutoka, önanga yolio o Nazaretika o Galileaoka.

⁴⁰O ngohaka gënanga idogo-dogo wolamoko deʼ wokuata. Unanga duru wosawaro deʼ ma Jou Madutu duru wïdora Unanga.

⁴¹ O taongo higëto-gëtongo o Yesus aidimono yoiki o Yerusalemika la ihirame o Paskah ma Wange ma Amoko.

⁴²Deʼ maöraha o Yesus aiumuru o taongo ngimoi de hinoto, önanga yoiki o rameika gënanga imoteke mabiaha.

⁴³O rame gënanga ipaha önanga yolio, mä o Yesus o ngohaka gënanga kawogögogerohi o Yerusalemoka, deʼ aiama de ngoiayo ihiorikua.

⁴⁴Onanga yatobote Unanga wänïkoka Ai dodiawo yowöe-wöe. Yotagi o wange moi iböto de ahaö önanga iwilingiri Unanga manga riadodoto deʼ imakokanäko manga hidogoronaka.

⁴⁵Mä onanga iwimäkeua hoʼ onanga imakilioro o Yerusalemika iwilingiri Unanga.

⁴⁶O wange hange iböto iwilingiri de ahaö iwimäke Unanga ma Jou ai Tau magoronaka. Unanga magogiria wogogeruku wohigihene o agama maguru-guru deʼ manga loleha-loleha Unangika.

⁴⁷Mata-mata o nyawa yoihe-ihene Ai bobaluhu gënanga yohëranga karana wosawaro wöbaluhu.

⁴⁸Ai dimono mayohëranga iwimäke Unanga. Ngoi ayo mïtemo Unangika, ”Ngohaka, yadodoa honodiai hoko nënanga ngomino? Ani ama deʼ ngoni ayo mia hininga ihuha mini lingiri Ngona!”

⁴⁹O Yesus wohaluhu, ”Yadodoa ho ahi ama deʼ Ngohi ayo nihi lingiri Ngohi? Okia ho ahiama deʼ Ngohiayo nianäkoua Ngohi kokiani naga Ahi Ama aitau magoronaka?”

⁵⁰Mä onanga imangaratiua o Yesus ai bobaluhu.

⁵¹Ipaha o Yesus wolio dede önanga o Nazaretika, deʼ wahimoteke onangika. Mata-mata o hali nënanga ngoi ayo magogono ami hiningaka.

⁵² O Yesus i dogo-dogo wolamoko deʼ idogo wosawaro, de ma Jou Madutu wïdora Unanga deʼ o nyawa iwï igo.