Read Tobelo O LUKAS 21 Bible Online

O LUKAS 21 - Tobelo bible

O LUKAS 21

¹Ma Jou ai Tauoka, o Yesus wälega-lega o nyawa yokaya-kaya yönoa mangatiwi o huhuba mangïuku.

²Unanga womi mäkeoli momatëngo o bobao duru momihikini mönoa hinoto o tiwi tabaga.

³Daha o Yesus wotemo, ”Niihene: o bobao nënanga mönoa iholoi iwöe, ngaro de mahomoa mata-mata.

⁴Hababu önanga ihidöaka manga arata maboloi. Mä o bobao nënanga, ngarokö duru momihikini, mohidöaka mata-mata naga munangoka kiaka muna mahirete moparalu la mangale mowango.”

⁵Naga o nyawa manga ngöe ihiade-ade yakorona hokokia marahai ma Jou ai Tau ihidiai de o helewo mahohailoa deʼ okia naga ihihuba-huba ma Jou Madutuika. O Yesus wätemo onangika,

⁶”Ahao naga maöraha, mata-mata niamäke-mäke nënanga aha yakilianga; nenangoka kaohelewo moiö de koiwa naga imakalapeuku marioka!”

⁷Onanga yoleha o Yesusika, ”Bapa Guru, muruonoka o hali gënanga aha idadi? Deʼ okia manonako ganga yadonoka maöraha o hali gënanga aha idadi?”

⁸O Yesus wätemo, ”Nimahidodiai, uha hiädono ngini inïtipu. Manga ngöe o nyawa aha yoböa de yapäke Ahi romanga, deʼ yotemo, ’Nënanga Ngohi!ʼ deʼ ’Ma orahoka.’ Mä uha ngini niänïki önanga.

⁹Uhaö nihawana nako ngini niihene o parangi deʼ o galawani ma abari. Mata-mata gënanga kokiani ihira idadi. Mä genanga mamangaratiua kiamati maorahoka.”

¹⁰Daha o Yesus wohigila-gila Aiade-ade, wato, ”Moi o hoana manyawa aha yoparangi yälawani o hoana manyawa mahomoa deʼ moi o negara aha yängika yälawani o negara mahomoa.

¹¹Kiaka dika aha idadi o ohu ikua-kuata, o habirokata deʼ o panyake o bobaku. Aha idadi o dihangoka o hali höboborohono deʼ hö modo-modongo.

¹²Mä mata-mata gënanga idadiowahi, ngini aha inïtagoko deʼ inïaniaya. Ngini aha yatailako niahowono o pupuji matauoka deʼ inihingohama o buiika. Deʼ ngini aha inï tatauru inïao o kokoano deʼ yokokuaha manga himangoka karana ngini nihinöninïki.

¹³Gënanga tingini niaöraha la nihingahu o Abari ma Oa ma Jou Madutuino.

¹⁴ De niahininga magahumu ngini aha nihawaterua mangale okia kokiani ngini nitemo la nioriwo niadiri.

¹⁵Ngohi mahirete aha tinihidöaka nginika o demo-demo deʼ o sawaro gënanga, hiädono moiua niahaturüino yakunu inilawani ekola ihipongono okianaga ngini nitemo.

¹⁶Niaayo deʼ niaama, niadodoto, niaroriadodoto deʼ niadodiawo aha ngini inïnakokaua. Utu nginino aha önanga yätoma.

¹⁷Ngini aha manga ngöe o nyawa inïdohata karana ngini Nihinöninïki.

¹⁸Mä niatadauru nia häekoka mangai moiö de aha koihihangua.

¹⁹Nako ngini nitongohono deʼ itaitua inïtohata, ngini aha nihalamati.”

²⁰”Oraha kia ngini niamäke o Yerusalem ihigilolitino o tentara, ngini aha nihiöriki o berera gënanga itedekanokaua aha ibinaha.

²¹O öraha gënanga o nyawa o Yudea madaeraoka kokiani yopiringana o l̄oku-l̄okuika. Onanga o kota magoronaka kokiani yamal̄a o kota, deʼ onanga o kota maporetoka uha yowohama o kotaika.

²² Hababu owange-owange gënanga ganga ’Yaputuhu o Hukumanga ma Wange’, hupaya de hokogënanga idadi okianaga itulihoka Ma Jou Ai Demo ma Buku.

²³Hokokia maborohono o wange gënanga mangale o ngoheka de manga röehoka, deʼ o ayo kayahühuhuohi manga ngohaka magil̄au! O berera nënanga aha yaöhana o huha maamoko, deʼ ma Jou aha wähukumu o hoana manyawa nënanga.

²⁴Naga aha yätoma de o oworo, nagaoli aha yäao hokä o tabuanga manyawa o nyawa mahomoa manga bereraika; deʼ o nyawa iwinäko-näkoua ma Jou Madutu aha yapito-pitoko o Yerusalem hiädono maöraha imata ma Jou wohigogeroka mangale önanga.”

²⁵ ”Ahao o wange malakoka, o mede, deʼ o murumu o dihangoka aha yamäke o nonako-nonako. O duniaka o hoana de o berera manyawa aha yohawana deʼ yobingu yöhimanga o moku-moku maruruhu deʼ o lulu o ngötoka.

²⁶O nyawa aha yohawana yätoka yohonenge yöhimanga okia aha idädadi o dunia mata-mataika nënanga, hababu yakokuaha o gitawa aha iruaeuku.

²⁷ Oraha gënanga o Nyawa manga Ngohaka aha woböa o lobi magoronaka de Ai kuaha deʼ Ai mulia maamoko.

²⁸O öraha okia o hali-o hali gënanga imuläenge idadi, nimomiki deʼ niahäeke niagoraka, hababu botino dika ngini aha inihihalamati.”

²⁹Daha o Yesus woade-ade onangika o hitotero moioli nënanga, wato, ”Niatailako o ara mautu magota deʼ mata-mata o gota mahomoa mautu.

³⁰Oraha okia madubo-dubo imuläenge niöriki, ngini nianäko, ngade-ngadeoka maöraha ihiwara.

³¹Hoko genangoli nako ngininiöriki o hali-o hali gënanga idadi ngini aha nihiöriki ma Jou Madutu de majapatioka aha wopareta hokä o Koano.

³²La nihiöriki! O hali-o hali gënanga aha idadi, o nyawa yowango-wango o örahanënanga yohonengowahi mata-mata.

³³O dihanga deʼ o dunia aha ihihanga mä Ahi demo itatapu kahiado-adonika.”

³⁴”Niogöana niadiri, uha hiädono ngini talalu nitasibu nirame-rame deʼ niokere o daluku ibiha-biha, ekola kalioli niapikiri niangango madodagi, hiädono ngini nimasadiaua maöraha iböa o wange gënanga i todokanino.

³⁵Hababu ma Wange gënanga aha iböa hokä o aiwani madadagoko o nyawa mata-mataika o dunia nënanga mahimangoka.

³⁶Nimä göa-göana, deʼ nimäniata salalu hupaya ngini nikuata nio himanga o hali mata-mata aha idodädadi deʼ ngini yakunu niwï himanga o Nyawa manga Ngohaka.”

³⁷ O wangeoka o Yesus wodotoko ma Jou ai Tauoka, deʼ yohutuku Unanga woiki o Zaitun ma Doporonika deʼ genangoka wogogere.

³⁸O ngorumino magetongo mangangöe o nyawa yoiki ma Jou ai Tauika la yoihene o Yesus wodotoko.