Read Tobelo O LUKAS 22 Bible Online

O LUKAS 22 - Tobelo bible

O LUKAS 22

¹ O Roti i Ragi-ragi Ua ma Rameanga yahetongoli o Paskah itigioka.

²O imam-imam manga häeke deʼ o agama maguru-guru yolingi-lingiri o ngëkomo la iwitoma o Yesus de moiua ihiöriki, karana önanga yämodongo o nyawa yowöe-wöeika.

³Ipaha o Ibilihi iwïngohama o Yudas iwihetongoli o Iskariot, enagënanga yangimoi de yahinoto o Yesus iwinöninïki manga dodiawo.

⁴Karana gënanga o Yudas woiki deʼ imateke ade-ade deʼ o imam-imam manga häeke deʼ ma Jou ai Tau magogöana manga häeke mangale sarakia ünanga yakunu wihilapahi o Yesus onangika.

⁵Onanga duru yosanangi deʼ yojaji aha iwihidöaka o tiwi unangika.

⁶O Yudasö wohimoteke deʼ womuläenge wolingiri o öraha maoa la wihilapahi o Yesus onangika, de moiua o nyawa ihiöriki.

⁷O Roti i Ragi-ragi Ua ma Rameanga mawange imahiadonoka done o duba o Paskah mainomo yatöaka.

⁸O Yesus wähuloko o Petrus deʼ o Yohanis, ”Nioiki nihidiai nanga Paskah mainomo.”

⁹”Kiaka Bapa nomau ngomi mihidiai?” önanga yoleha.

¹⁰O Yesus wohaluhu, ”Maöraha ngini niwohama o kotaika, o nauru womatëngo woao moi o rube-rube madol̄a o akere aha nimakamäke de ngini. Niwinïki matau kiaka ünanga wöngohama,

¹¹deʼ niahëtongo matau madutuika gënanga: Mia Guru wato, ’Kiaka mangï la mangale ihinöninïki deʼ Ngohi miol̄omo o Paskah mangol̄omo?ʼ

¹²Matau madutu gënanga aha winihimatoko nginika o ngï moi maamo-amoko o lotengoka, mameja de magogogere itotiai. Nihi diai mata-mata dokengoka.”

¹³De o Petrus deʼ o Yohanis yoiki daha yamäke mata-mata itiai hokä o Yesus waheto-hetongoka. Onangö ihidiai o Paskah mangol̄omo gënanga.

¹⁴Itedekanua o Paskah mainomo mangol̄omo yadonoka maöraha o Yesus wogogeruku de iwinöninïki o jamuanga mangïoka.

¹⁵De Unanga wätemo onangika, ”O huha deʼ o hangihara tatagongowahi Ngohi duru töigo taol̄omo o Paskah mainomo nënanga dede ngini!

¹⁶Hababu ningaku: Ngohi aha taol̄omokaua nënanga hiädono o jamuanga nënanga mamangarati ihinyata ma Jou Madutu ai Dunia ma Hungioka.”

¹⁷Ipaha de gënanga o Yesus wagoraka o angguru magalahi, daha womäniata wosukur ma Jou Madutuika, ipaha wotemo, ”Nia l̄ë nënanga, deʼ nihikodoku;

¹⁸karana nianako: muläenge o öraha nënanga Ngohi aha tokerokauali o angguru nënanga hiädono ma Jou Madutu wakuahaoka mata-mataika.”

¹⁹Iböto de gënanga o Yesus wal̄ë o roti. Deʼ womäniata de wosukur ipaha, Unanga wabëla-bëlaka o roti gënanga de Ai giama daha wahidöaka onangika, deʼ wotemo, ”Nënanga Ahi röehe [tohilapahi mangale ngini. Niadiai nënanga mangale nihihininga Ngohi.”

²⁰ Hoko genangö yol̄omo ipaha, Unanga wohidöaka o angguru maudo-udomo gënanga deʼ wotemo, ”Udo-udomo nënanga ganga ma Jou Madutu aijaji mahungi, ihigoungu de Ahi awunu — o awunu i kokopoa mangale ngini].”

²¹ ”Ma nialega! O nyawa yosetiaokaua Ngohino naga nengokadau dede Ngohi!

²²O Nyawa manga Ngohaka marai aha wohonenge hokä sarakia ma Jou Madutu wohitantuoka; mä yobodito o nyawa yososetiaua Unangika!”

²³Onanga yomuläenge imakokeleha, manga hidogoronaka o nagona o hali gënanga aha yodiai.

²⁴ O Yesus iwinöninïki manga hidogoronaka ipuda o ributu mangale toönanga manga hidogoronaka o naguna kokiani iwipulono iholoi wolamoko.

²⁵ O Yesus wätemo onangika, ”O hoana de o berera manyawa manga kokoano iwinäko-näkoua ma Jou Madutu yätuku manga kawaha, deʼ yokokuaha yähetongo ’O Kawaha manga Hohohongo’.

²⁶ Mä ngini yakunua hokogënanga. Haramoioli, o nyawa yolago-agomo nia hidogoronaka kokiani yodadi hokä yohohumujuru, deʼ o tutuda kokiani yodadi hokä yolöleleani.

²⁷ O nagona iholoi yolamoko: o nyawa yogögogeruku yol̄omo o mejaka ekola o nyawa iwïlöleleani ünanga? Marai o nyawa wogögogeruku gënanga. Mä Ngohi naga tingini niahidogoronaka hokä wolöleleani.

²⁸Hagala Ahihuha magoronaka, ngini salalu dede Ngohi.

²⁹Hoka sarakia o Ama wohihidöakoka Ngohino la topareta, hokogenangoli Ngohi aha tohidöaka o haku gënanga nginika.

³⁰ De hoko gënanga ngini yakunu nimoteke nimahi sosanangi dede Ngohi ma orahoka Ngohi todadi o Koano. Deʼ ngini aha nigogeruku ngimoi de hinoto o kuruhi imomulia mal̄okuoka, la niäpareta o Israel manyawa o hoana ngimoi de hinoto.”

³¹”Simon, Simon, noihene! O Ibilihi ihigumal̄aka la inïtaili ngini; hokä o gandum ma akeme ihitingaka maafa, hiädono maoa ihitingaka de madorou.

³²Mä Ngohi tohubayangoka mangale ngona, Simon, hupaya aningongaku ma Jouika uha ihihanga. Deʼ nako ngona nomakilioroka Ngohino, kokiani ngona nahikuata aniroriadodoto.”

³³O Petrus wohaluhu, ”Jou, ngohi katömodeke towohama o bui deʼ tohonenge dede ngona Jou!”

³⁴”Nongaku, Petrus,” o Yesus wato, ö wange nënanga o kuru-kuru i horenowahi ngona nohihi pongono nohigali mahange.”

³⁵ Ipaha de gënanga o Yesus wätemo onangika, ”Mahira maöraha Ngohi tinïhuloko ngini tinihigumal̄aua ngini nimägao o tiwi mangï, o popoje ekola o hapato, boteka ngini okianaga nikuranga?” ”Kowali!” önanga yohaluhu.

³⁶”Mä o öraha nënanga,” o Yesus wato, önagona de manga tiwi mangï ekola o popoje, kokiani imägao; deʼ o nagona koiwa manga oworo, kokiani manga juba yahukunu la imäija o oworo.

³⁷ Hababu, ningaku, Ma Jou Ai Demo ma Buku itulihi hoko nënanga, ’Unanga iwipulono hokä o nyawa madorou moi,’ kokiani idadi Ahi diriuku. Hababu okia ituli-tulihoka Ma Jou Ai Demo ma Buku yakorona Ngohi o öraha nënanga magogiriaka idadi.”

³⁸”Jou,” o Yesus iwinöninïki yotemo, ”nölega, nenangoka naga o oworo hinoto.” ”I böto dika!” o Yesus wohaluhu.

³⁹O Yesus wamal̄a o berera deʼ woiki hokä biaha o Zaitun ma Doporonika, deʼ iwinö ninïki yoikoli dede Unanga.

⁴⁰Maöraha imahiädono genangoka, Unanga wätemo onangika, ”Nimä niata hupaya uha nibaradoha näko ngini inïtaili.”

⁴¹Ipaha Unanga woiki iholoi ikurutika mahuhutulu dede önanga, magurutika done ngade-ngade höhokawelika de o helewo, daha watilabukuku deʼ womäniata.

⁴²”Ama,” wotemo, ”nako yakunu, nohihitingaka dede Ngohi o huha de o hangihara kiaka kokiani tatago-tagongo nënanga. Mä uha imoteke Ahimau, duga-duga imoteke Animau dika Ama.” [

⁴³O malaekat womatëngo waino Unangino deʼ wihikuata.

⁴⁴O Yesus aihiningaka duru wamäo o huha de o hangihara hiädono Unanga iholoi wakaigoungu womä niata. Ai gahauku itututu hokä o awunu o tonakuku.]

⁴⁵Iböto womäniata, o Yesus womakilioroli iwinöninïkino. Unanga wämäkeino önanga imäiduoka karana manga hininga duru ihuha.

⁴⁶De Unanga wätemo onangika, ”Yadodoa hongini nima idu? Nimomiki deʼ nimäniata hupaya ngini inikoronaua o bobaja.”

⁴⁷O Yesus kawo ade-adeohi magogiriaka, o nyawa o doomu moi yoböa. Onanga wähihira o Yudas o Yesus iwinöninïki manga dodiawo. Ipaha o Yudas woiki o Yesusika daha wïame.

⁴⁸Mä o Yesus wïtemo unangika, ”Yudas, mode de o game gënanga ngona nomau nihibodito o Nyawa manga Ngohaka?”

⁴⁹Maöraha o Yesus iwinöninïki naga genangoka yamäke okia aha idadi, önanga yotemo, ”Jou, ngomi miatoka dika de miaoworo!”

⁵⁰Gila-gila womatëngo manga hidogoronaka, wïoto ma imam womomulia aigilaongo, de o oworo, hiädono aingauku manirakoka itöaka.

⁵¹Mä o Yesus wotemo, ”Ibötohi!” Daha Unanga wapal̄anga o nyawa gënanga aingauku deʼ wohitogumoka.

⁵²Ipaha o Yesus wätemo o imam-imam manga häekika deʼ ma Jou ai Tau magogöana mabalu-baluhika inoli o Yahudioka manga tutuda yaino-ino genangino la iwitagoko Unanga, ”Mode Ngohi nënanga o nyawa madorou, hiädono ngini niböa de niaoworo deʼ niaboboha la nihitagoko Ngohi?

⁵³ O wange higetongo Ngohi naga dede ngini ma Jou ai Tauoka, ngini nihitagokua. Mä nenanga toënanga maöraha ngininiadiai niamau, o huhutu makuaha maöraha idadi o tutuda.”

⁵⁴Onanga iwitagoko o Yesus deʼ iwiao ma imam womomulia aitauika. O Petrus winïki womakökurutoko.

⁵⁵O löa gënanga mahidogoronaka o uku itofo-tofoino itokaril̄eoka deʼ o Petrus woiki wogogeruku dede önanga de manyawa yogögogeruku magilolitino.

⁵⁶Momatëngo o ngoheka molöleleani mïmäke o Petrus wogogeruku o uku itofo-tofoino madatekoka gënanga; daha o ngoheka molöleleani gënanga mïtotailako o Petrus, ipaha mato, ”O nyawa ne unangö kangano naga de o Yesus!”

⁵⁷Mä o Petrus womahipongono. Unanga wotemo, ”Ngohi ha kali-kali tinäkoua o nyawa geünanga!”

⁵⁸Ipahaika hokokiaua womatëngo mahomoa wïmäke o Petrus deʼ wato, ”Ngonaö to önanga manga dodiawo!” Mä o Petrus wohaluhu, ”Kowali, ngohiua!”

⁵⁹Done ho o jam moi ipahaika, womatëngo mahomoali wotemo wakua-kuatil̄e, ”Maraioka o nyawa nënanga wininïki o Yesus, hababu unangö o Galilea manyawa!”

⁶⁰Mä o Petrus wohaluhu, ”Okia animau, ngohi tohi orikua!” O öraha gënanga dika, o Petrus kawo ade-adeohi, o kuru-kuru ihorene.

⁶¹O Yesus womälega deʼ wïpulono o Petrus. Gila-gila o Petrus womähininga ma Jou wïtemoka unangika, ”O wange nënanga o kuru-kuru ihorenowahi, ngona nohigali mahange nohihi pongono.”

⁶²De o Petrus wohupu genangoka deʼ woari iwihöhowo-howo.

⁶³O nyawa mangangöe iwïgögoa-goana o Yesus, imahigogule deʼ iwigohara Unanga.

⁶⁴Onanga yatamunoko Ai lako de yoleha Unangika, ”Abeika nähetongo o nagona inigohara?”

⁶⁵Mangöeoli o hikauku mademo-demo iwihitemo Unangika.

⁶⁶Mangoru-ngorumino, o Yahudioka manga tutuda, deʼ o imam-imam manga häeke deʼ o agama maguru-guru imatoomu, de o Yesus iwiao manga Agama ma Juru Hakimika.

⁶⁷”Nomihi ngahu ngomino,” iwitemo Unangika, ”mode Ngona nënanga ma Koano Wohihohalamati?” O Yesus wohaluhu, ”Nako Ngohi tinihingahu nginika, ngini aha ningakua.

⁶⁸Deʼ nako Ngohi tinileha nginika, ngini aha nihaluhua.

⁶⁹Mä muläenge o örahanënanga, o Nyawa manga Ngohaka aha wogogeruku ma Jou Madutu Duru woko Kuaha ainirakoka.”

⁷⁰Onanga mata-mata yotemo, ”Nako hokogënanga, Ngona nënanga ma Jou Madutu ai Ngohaka?” O Yesus wohaluhu, ”Hokogënanga ngini niato.”

⁷¹De önanga yotemo, ”Iparaluokaua o hakihiohi! Ngone hoihenoka Ai uruiha mahirete!”