Read Tobelo O LUKAS 23 Bible Online

O LUKAS 23 - Tobelo bible

O LUKAS 23

¹Mata-mata o juru hakimi yohima-himanga gënanga imaoko daha iwiao o Yesus o Pilatusika.

²Genangoka önanga yomuläenge iwikalaki Unanga. Onanga yato, ”Ngomi miwimäke o nyawa nënanga wäao o kawaha o ngëkomo ihowo-howonika. Unanga wahigaro o nyawa hupaya uha yofangu o soungu ma Kaisarika, hababu wato ünanga ganga o Kristus, o koano moi.”

³De o Pilatus wïleha o Yesusika, ”Igoungu Ngona o Yahudioka manga koano?” O Yesus wohaluhu, ”Hokogënanga anidemo.”

⁴O Pilatus wätemo o imam-imam manga häekika, deʼ o nyawa yowöe-wöe gënanga, ”O nyawa nënanga Ai howono kamoiö de tamäkeua la yakunu hïhukumu Unanga.”

⁵Mä onanga iholoi yogegotoli, ”De aidodötoko Unanga wahigaro o Yudea madaeraoka manyawa la yolawani; madodihiraka o Galilea madaeraoka, deʼ o örahanënanga yadonoli nenangino.”

⁶Maöraha o Pilatus woihene gënanga, ünanga woleha, ”Mode o nyawa nënanga o Galilea manyawa?”

⁷Iwihi ngahuoka o Yesus aiahali o Herodes wakokuaha madaeraino, o Pilatus wihidingoto o Yesus o Herodesika, kiaka o öraha gënanga unangö o Yerusalem mabereraka.

⁸O Herodes duru wosanangi wïmäke o Yesus, karana madekanoka ünanga woihene mangale o Yesus deʼ woigo wïmäke. Unanga wönganono yakunu wahakihi o Yesus wodiai ihëra-hëranga.

⁹Hababu gënanga o Herodes wïleleha o loleha mangöe Unangika, mä o Yesus mata-mata wöbaluhua.

¹⁰O imam-imam mangahäeke deʼ o agama maguru-guru onangö yohimangika genangoka deʼ iwikalaki o Yesus kahagiria.

¹¹O Herodes deʼ aitentara imahigogule deʼ iwihikauku o Yesus, daha iwihinöa o gikiri yoago-agomo manga pakeanga, ipaha Unanga iwihidingotoli o Pilatusika.

¹²O wange genangö o Herodes deʼ o Pilatus imahobatokali, mahira imahaturü.

¹³O Pilatus wätoomu o imam-imam mangahäeke, o tutuda-tutuda, deʼ o kawaha,

¹⁴daha wätemo onangika, ”Ngini niwiao o nyawa ne Unanga ngohino deʼ niahetongo Unanga wäao o nyawa o dorouika. O örahanënanga niahimangoka ngohi titailakoka Unanga, mä ngohi hakali-kali tamäkeua kao dorou moiö de kiaka ngini niwikokalakioka.

¹⁵Hokogenangoli o Herodes aidamäke, hababu unangö o Yesus gënanga wihidingotokali ngomino. O nyawa ne Unanga kaokia naga moiö de kowodiaiua ipatutu hïhukumu de o hohonenge mahukumanga.

¹⁶Karana gënanga ngohi aha tïgohara Unanga ipaha tïlapahi.” [

¹⁷O Paskah marameanga higeto-getongo, o Pilatus kokiani wälapahi o bui manyawa imatëngo mangale o kawaha.]

¹⁸O nyawa mata-mata imatotoomuino genangokadau yopöaka, ”Unanga niwitoma! O Barabas niwilapahi mangale ngomi!” (

¹⁹O Barabas iwi bui karana o huru-hara idädadi o bereraka deʼ karana o doma.)

²⁰O Pilatus womau wïlapahi o Yesus, hababu gënanga ünanga wätemo wohigali mamoioli o nyawa yowöe-wöeika gënanga.

²¹Mä onanga yopöaka, ”Unanga niwisalib! Unanga niwisalib!”

²²Daha wohigali mahangeoka o Pilatus wopöaka onangika, ”Mä okia Aihowono? Kao howono moiö de ipatutu hïhukumu de o honenge mahukumanga ngohi kota mäkeua. Ngohi aha tïgöhara Unanga, daha tïlapahi.”

²³Mä onanga gila-gila yopöaka genangö manga kuata o Yesus kokiani iwisalib. Deʼ mabaha mangaböaka gënanga ihasili.

²⁴Daha o Pilatus wïgelenga o honenge mahukumanga o Yesusuku imoteke de o nyawa mangangöe gënanga manga gogahoko,

²⁵deʼ wïlapahi o Barabas kiaka önanga yogahoko, enagënanga o nyawa iwi bui-bui karana o huru-hara deʼ o doma. Ipaha o Yesus wihilapahi onangika la iwidiai imoteke toönanga manga mau.

²⁶O Yesusö önanga iwiao. O ngëkomo mahoanoka, önanga imakamäke de o nyawa womatëngo airomanga o Simon, aiahali o Kirene mabereraino, womau wowohama o kotaika. Onanga iwitagoko ünanga, daha ünanga iwipakisa wamoku o salib magota gënanga o Yesus aiporetino.

²⁷Mangangöe o nyawa imädagi yanïki o Yesus aiporetino — manga hidogoronaka nagaö yamuruono naga o ngongoheka. O ngongoheka gënanga iwïgari deʼ iwïdodora o Yesus.

²⁸Mä o Yesus womälega onangika deʼ wätemo, ”O Yerusalem mangongoheka! Uha Ngohi nihïgari. Nio gari niadiri mahirete deʼ niangoha-ngohaka.

²⁹Hababu maöraha aha iböa o nyawa aha yotemo, ’Duru youtumu o ngongoheka komaiwa o ngohaka ihiao-ao, kiaka komaiwa de manga ngohaka deʼ komaiwa o ngohaka magil̄au yahuhu!ʼ

³⁰ O öraha gënanga o nyawa aha yatemo o l̄okuika, ’Nimï tapal̄u ngomi!ʼ Deʼ o dodoporonika, ’Nimï pohuku ngomi!ʼ

³¹Hababu nako o gota mangangoika o nyawa yodiaioka hoko nënanga, okiali aha önanga yodiai de o gota itotoolengokaika!”

³²Nagaoli o nyawa yahinoto mahomoa — yahinotö o nyawa madorou — önanga yäao la yähukumu yähohonenge kamamoi de o Yesus.

³³Maöraha yadono o ngï yaheto-hetongo ”O häeke makabelanga”, önanga iwisalib o Yesus deʼ yahinoto o nyawa madorou gënanga — womatëngo o Yesus ainirakoka deʼ womatengoli Ai higiloka.

³⁴ De o Yesus wohubayanga, ”Ama, önanga nahi apongo! Onanga ihi orikua okia önanga yodiai.” O Yesus aipakeanga genangoka önanga imäkokeregu imoteke o undi.

³⁵ Mangangöe o nyawa imaokoino genangoka de imädomina, o Yahudioka mangatutuda iwihohedu deʼ yotemo, ”Unanga wahihalamatoka o nyawa mahomoa; abeika o örahanënanga wohihalamati Aidiri mahirete, nako Unanga igou-goungu ma Koano Wohihohalamati ma Jou Madutu aingongiriki!”

³⁶ O tentara-tentaraoka ma iwihohedu Unanga. Onanga yaino deʼ iwihidöaka o angguru magogiohiki Unangika

³⁷inoli yato, ”Nako Ngona o Yahudioka manga koano, nohihalamati Ani diri!”

³⁸O Yesus aisalib magota mal̄okuil̄e ihitulihi o demo-demo nënanga: ”Nënanga o Yahudi ma Nyawa manga Koano.”

³⁹Manyawa madorouoka womatëngo iwisosalib genangoka wihikauku o Yesus. Unanga wotemo, ”Koigoungua Ngona ma Koano Wohihohalamati? Aa, nohihalamati Anidiri deʼ ngomi!”

⁴⁰Mä manyawa madorouoka womatengoli witaaere aidodiawo gënanga, wato, ”Mode ngona nimodongua ma Jou Madutu? Ngona kamamoi inihukumu inihohonenge hokä Unanga.

⁴¹Duga-duga nanga hukumanga inähinoto igoungu imadäene de tongone nanga manarama. Mä Unanga hakali-kali kowahowonua!”

⁴²Daha ünanga wotemo, ”Yesus nohihininga ngohi, nako Ngona noböa hokä o Koano!”

⁴³”Nongaku,” o Yesus wïtemo unangika, ”O wange nënanga aha ngona dede Ngohi o Firdausoka.”

⁴⁴Mudukua o takoro ngimoi de hinoto o wange ikorona, o wange malako itararonua, deʼ o berera mata-mataika idadi ihuhutu duru hiädono o takoro hange bimaoa.

⁴⁵ O guba yanü nuneuku ma Jou ai Tau magoronaka, ikakihi ibelaka hinotoka.

⁴⁶ Daha o Yesus wopöaka de Ai ilingi makuatil̄e, ”Ama! Anigiama mahoatika Ahi diri tohilapahi!” Wotemo hoko gënanga ipaha, Unanga wohonenge.

⁴⁷Maöraha o tentaraoka madoomu manga baluhu wamäke okia i dädadioka, ünanga wihigiriri ma Jou Madutu. Daha ünanga wotemo, ”Igoungu, Unanga wahowonua!”

⁴⁸O nyawa manga ngöe yaino-ino yototomina genangino, yamäke okia naga idädadi. Onanga mata-mata yolio de manga hininga duru imatoduba.

⁴⁹ Deʼ mata-mata imakokanäko de o Yesus, de o ngongoheka iwinöninïki Unanga o Galilea de yaino, imaokoino magurutika, deʼ yamäke mata-mata gënanga.

⁵⁰Naga womatëngo airomanga o Yusuf, aiahali o Arimatea mabereraino o Yudea madaeraoka. Unanga o nyawa maoa de o nyawa iwihoromati, deʼ wödodamä maöraha ma Jou Madutu womuläenge wopareta hokä o Koano. Ngarokö ünanga o Agama ma Juru Hakimi magegetongo, mä unanga wohimotekua o Juru Hakimi manga manarama madodagi de manga putuhu gënanga.

⁵¹

⁵²O Yusuf nënanga woiki wïhimanga o Pilatus deʼ wogahoko hupaya o Yesus aimayeti ihidöaka unangika.

⁵³Ipaha ünanga o saliboka de wohiguti o Yesus aimayeti, daha wahawoino de o mayeti mahahawo o hutara. Iböto gënanga ünanga wakelenga o lungunuku, kiaka o lungunu gënanga o doporono i hohelewo magoronaka — o lungunu gënanga komaiwahi yapäke.

⁵⁴O wange gënanga o Jumati mawange; deʼ o Yahudioka manga Puji mawange ngade imuläenge.

⁵⁵O ngongoheka yaino-ino de o Yesus o Galileaino iwinïki o Yusuf deʼ yamäke o lungunu gënanga. Onangö yamäke sarakia o Yesus iwikelenga o lungunu magoronaka.

⁵⁶ Ipaha önanga yolio daha yoturunga o rampa-rampa deʼ o minya mabou-bounu la o Yesus aimayeti yaminya. O Yahudioka manga Puji mawangeoka, önanga imatogumu yomanarama mangale yamoteke o agama matita.