Read Tobelo O LUKAS 24 Bible Online

O LUKAS 24 - Tobelo bible

O LUKAS 24

¹O Minggu mawangeoka duru o ngoru-ngorumino, o ngongoheka gënanga yoiki o lungunika yao o rampa-rampa kiaka önanga yasösadiaka.

²O lungunoka, önanga yamäke mahelewo madadamunu iluluika.

³Daha önanga yowohama o lungunu gënanga magoronaika, mäyamäkeua ma Jou Yesus aimayeti genangoka.

⁴Onanga kaimaokoinohi genangoka deʼ yobingu yapikiri o hali gënanga, itodokanino o nyawa yahinoto de manga pakeanga maleto-letongo imaokoino manga datekoka.

⁵Onanga duru yohawana, de imaruku hiädono o tonakuku, o nyawa yahinoto gënanga kamagogiriahi yätemo onangika, ”Yadodoa hongini niälingiri o nyawa yowango-wango yohone-honenge manga hidogoronaka?

⁶ Unanga koiwiwa nengokadau. Unanga womomikoka! Niohohininga okia Unanga winihingahuoka nginika maöraha Unanga ka o Galilea madaeraokahi.

⁷Kiaka o Nyawa manga Ngohaka kokiani iwihilapahi o nyawa baradohaika, daha iwisalib, deʼ o wange hangeoka Unanga aha womomiki!”

⁸De o ngongoheka gënanga imahininga o Yesus aidemo-demo.

⁹Yolioino o lungunino gënanga, önanga yoade-ade mata-mata idädadi gënanga o rasul yangimoi de yamoika deʼ mata-mata iwinöninïki mahomoahi.

¹⁰O ngongoheka ihingöngahu-ngahu mata-mata gënanga o Yesus iwinöninïkika, genangala: o ngo Maria Magdalena, o ngo Yohana deʼ o ngo Maria o Yakobus ngoi ayo, inoli o ngongoheka mahomoahi imakokomoteke dede önanga.

¹¹Mä o rasul-rasul gënanga yatobote o ngongoheka gënanga yoade-ade mafofaidäua. Onanga yongakuua o ngongoheka gënanga manga ade-ade.

¹²Mä o Petrus womomiki deʼ womapopäta o lungunika. De womaponu ünanga watailako magoronaika, de wamäke duga-duga o mayeti mahahawo genangoka. O Petrus duru wohëranga, gila-gila wolio de o loleha mangöe aihininga magoronaka, yakorona okia idädadioka.

¹³O wange genangö, yahinoto o Yesus iwinöninïki yoiki imä dagi o kapongo moiika maromanga o Emaus, o Yerusalemoka de ngade-ngade o kilo ngimoi de moi magurutika.

¹⁴Yotagi magogiriaka önanga imä ade-ade mangale hagala okianaga idädadioka gënanga.

¹⁵Ima temo-temo de o dibanga imahibori döa-döaka magogiriaka, o Yesus mahirete waino deʼ wotagi dede önanga.

¹⁶Onanga iwimäke o Yesus, mä naga okianaga moi yadiai hiädono önanga iwinakoua Unanga.

¹⁷Gila-gila o Yesus wätemo, ”Okia ngini nihi ade-ade o ngëkomo mahoanino nënanga?” Onanga imatogumuku de mangabiono ihuha.

¹⁸Daha womatëngo manga dodiawo airomanga o Kleopas, wïleha o Yesusika, ”Bapa ngona o nyawa maporetino moi o Yerusalemoka ho nanäkoua okianaga idädadi dokengoka ipaha-paha nënanga?”

¹⁹”Okia i dädadi?” o Yesus woleha. ”Okianaga idädadi de o Yesus, o Nazaret manyawa gënanga,” önanga yohaluhu. ”Unanga o nabi. Aidemo-demo deʼ Aimanarama duru de makuaha — yaoa imoteke ma Jou Madutu ailolegaka ekola imoteke o nyawa mata-mata manga lolegaka.

²⁰O imam-imam manga häeke deʼ nangahoana de nangaberera matutuda iwihilapahi Unanga la iwihukumu iwihohonenge, deʼ onanga iwisalib Unanga!

²¹Enahioko ngomi miwïnganono Unanga aha o Israeloka wahibebasi! Deʼ o wange nënanga o wange hange iböto madero o hali gënanga idadi.

²²Inoli, miangongoheka yamuruono naga yodiaioka ngomi imïtodokana. Duru o ngoru-ngorumino önanga yoiki o lungunika,

²³mä yamäkeua Aimayeti dokengoka. Gila-gila önanga imakilioro deʼ yahetongo önanga yamäke o malaekat, deʼ o malaekat gënanga yahetongo o Yesus wowango.

²⁴Yamuruono naga miadodiawo yoiki o lungunika deʼ yamäke hokä okia o ngongoheka gënanga yahetongo i goungu hokoganga, duga-duga önanga iwimäkeua o Yesus.”

²⁵Gila-gila o Yesus wätemo onangika, ”Ngini igoungu nibodo! Itaituaholi niangaku mata-mata okia o nabi-nabi yaheto-hetongoka.

²⁶Mode koigoungua ma Koano Wohihohalamati kokiani waohanohi ihira o huha de o hangihara gënanga dahaö wamäke Ai mulia?”

²⁷Ipaha o Yesus wohitararono onangika okia yatuli-tulihi Ma Jou Ai Demo ma Buku magoronaka yakokorona Aidiri, muläenge o Musa aibuku-bukuoka de o nabi-nabi manga buku.

²⁸Hokokiakaua önanga yatigioka makapongo önanga yödumu-dumutu. O Yesus womadiai hokä womau wotagi wogila-gila,

²⁹mä onanga iwitumungu, ”Nogögogerohi miangïoka,” önanga iwitemo Unangika, ö öraha nënanga i tigioka yohutu deʼ i mulaengoka ihuhutu.” De o Yesus wowohama la womahiduhutu manga ngïoka.

³⁰Ma orahoka wogogeruku wol̄omo dede önanga, o Yesus wal̄ë o roti wotemo sukur ma Jou Madutuika, wabëla-bëlaka o roti gënanga de Aigiama, daha wahidöaka onangika.

³¹Ipaha önanga yanäko gënanga o Yesus. Mä Unanga wohihangoka toona manga lolegaka.

³²Onanga imabori temo, ”Mode koigoungua hamäo nanga hininga hokä iruae, maöraha Unanga homäteke ade-ade o ngëkomo mahoanoka deʼ wohitararono Ma Jou Ai Demo ma Buku madol̄a ngoneino?”

³³O öraha gënanga dika önanga imaoko gila-gila imakilioro o Yerusalemika. Dokengoka önanga yämäkeika yangimoi de yamoi iwinöninïki o Yesus, imatoomuino de mahomoahi.

³⁴Onanga gënanga yato, ”Igoungu itiai ma Jou wowangokali! Unanga womahi matokoka Aidiri o Simonika!”

³⁵Yahinoto iwinöninïki o Yesus aha yoböa-böa gënanga, gila-gila ihiade-ade önanga yamäke-mäke manga dodagi mahidogoronaka, deʼ sarakia önanga iwinako ma Jou maöraha Unanga wabëla-bëlaka o roti.

³⁶Onanga kaima teke ade-adeohi itodokanino o Yesus mahirete woma okoino manga hidogoronaka deʼ wotemo, ”Nihalamati ngini!”

³⁷Onanga yatodokana deʼ yohawana, karana yatobote önanga yamäke o tokata.

³⁸Mä o Yesus wätemo, ”Yadodoa ho ngini nihawana? Yadodoa ho niahiningail̄e ipuda hokä ningakua?

³⁹Nio lega Ahigiama deʼ niolega Ahil̄ou. Nia nako nenangala Ngohi mahirete! Nihipal̄anga deʼ nihitailako, karana o tokata koiwa ma akeme ekola makobongo, hokä ngini niamäke Ngohioka.”

⁴⁰OYesus wotemo hokogënanga inoli wohimatoko onangika Aigiama deʼ Ail̄ou.

⁴¹Deʼ onanga hokä yongakuowahi, karana yomörene holi deʼ yohëranga, o Yesus wäleha onangika, ”Boteka ngini naga de niainomo nenangoka?”

⁴²Onanga iwihidöaka Unangika o nawoko ihohinanga o luiti moi.

⁴³O Yesus wal̄ë o nawoko gënanga, gila-gila waol̄omo toönanga manga himangoka.

⁴⁴Ipaha de gënanga Unanga wätemo onangika, ”Nenangala o hali tinihi ngahu-ngahuoka nginika maöraha Ngohi ka dede nginiohi: o hali moi-moi yatulihi yakorona Ngohi o Musa ai Buku-buku magoronaka, o nabi-nabi, deʼ o Mazmur, kokiani idadi.”

⁴⁵Ipaha o Yesus wahelenga manga dibanga, la imangarati Ma Jou Ai Demo ma Buku madungutu.

⁴⁶Daha Unanga wätemo onangika, ”Ma Jou Ai Demo ma Buku magoronaka yatulihi ma Koano Wohihohalamati gënanga kokiani waohana o huha de o hangihara, deʼ kokiani womomikoli o honenge mahidogoronaka o wange mahangeoka.

⁴⁷Inoli de ma Koano Wohihohalamati Airomanga kokiani ihiabari hagala o hoanika de o berera manyawaika, kiaka o nyawa kokiani yotoba deʼ ma Jou Madutu waapongo manga baradoha. Deʼ o abari gënanga kokiani ihingahu o Yerusalemoka de imuläenge.

⁴⁸Mata-mata gënanga ngini mahöhakihi.

⁴⁹ Deʼ Ngohi mahirete aha tohidingoto nginika okia o Ama wojäjajioka. Mä ngini kokiani nitatapu nitamä o bereraka nënanga hiädono ma Jou Madutu aikuaha inïhawo ngini.”

⁵⁰ Ipaha gënanga o Yesus wäao önanga o berera maporetika hiädono o Betaniaika. Genangokadau Unanga wagöraka Ai giama, daha wahibarakati önanga.

⁵¹Magogiriaka wahibarakati, Unanga iwi göraka o horogaika, de womatingaka dede önanga.

⁵²Onanga ima rukuku iwihuba Unanga, ipaha imakilioro o Yerusalemika de manga hininga duru imörene,

⁵³deʼ ihigila-gila iwihigogiriri ma Jou Madutu, ma Jou ai Tauoka.