Read Tobelo O LUKAS 3 Bible Online

O LUKAS 3 - Tobelo bible

O LUKAS 3

¹Mataongo ngimoi de motoaka ma Kaisar Tiberius aipareta, o Pontius Pilatus wodadi gubernur o Yudeaka, deʼ o Herodes wopareta o Galileaka. O Filipus o Herodes aidodoto wopareta o Iturea deʼ o Trakhonitis madaeraka, ma o Lisanias wopareta o Abileneoka.

²Yodadi o imam-imam womomulia genangala o Hanas deʼ o Kayafas. O taongo gënanga magoronaka ma Jou Madutu witemo Yohanisika, o Zakharia aingohaka o tonaka ikokakahaka.

³De o Yohanis woiki o Yordan ma Ngairi madaera mata-mataika, wamöde-mödeke deʼ wohingahu o abari ma Jou Madutuino. O Yohanis wopöaka, ”Nitoba bötohi o baradoha nidiai, deʼ ngini kokiani inï ohiki, hupaya ma Jou Madutu winïapongo.”

⁴ Gënanga ima däene de i tuli-tulihi ma Nabi Yesaya aibukuoka: ”Naga o nyawa yopöa-pöaka o tonaka ikökakahaka, ’Nihidiai o ngëkomo la mangale ma Jou, mangale Unanga o ngëkomo nihirata.

⁵Moi-moi o wai kokiani niopohuku, moi-moi o l̄oku deʼ o doporono kokiani nihirata. O ngëkomo i popeleoko kokiani nihirikoto, deʼ o ngëkomo iguhu-guhu nihi rata.

⁶O nyawa o dunia mata-mataika aha yamäke ma Jou Madutu o nyawa wahihalamati!ʼ ”

⁷ Manga ngöe o nyawa yoböa o Yohanisika la wäohiki. O Yohanis wätemo onangika, ”Ngini o nyawa madorou! O nagona yahetongo, ngini yakunu inïrehene o hukumanga ma Jou Madutuino aha iböa-böa gënanga?

⁸ Nihimatoko de niamanarama bari ngini nitobaka de nidiaiokaua o baradoha! Uha nimuläenge nitemo bari o Abraham ganga niaete de niatohora. Nio hohininga: O helewo-helewo nënanga ma ma Jou Madutu wakunu wadiai o Abraham ai difauku!

⁹ O bahuku i kelengaukuoka la yatol̄anga magota mautu hiädono ma ngutu-ngutuku. Moi-moi o gota mautu i hohokua o hohoko ma oa aha i tol̄anga deʼ i umo o uku magoronaika.”

¹⁰”Hoʼ, okia kokiani ngomi midiai?” o nyawa iwileha o Yohanisika.

¹¹O Yohanis wohaluhu, ”O nyawa nagona manga baju hinoto, kokiani ihi döaka moi o nyawa koiwa-iwaika; deʼ o nyawa nagona de manga inomoka, kokiani i hi kodoku koiwa-iwaika.”

¹² O soungu yogaho-gahokö yoböa o Yohanisika la wä ohiki. Onanga yoleha, ”Bapa Guru, okia kokiani ngomi midiai?”

¹³O Yohanis wohaluhu, ”Uha nigahoko iholoi ilamoko de okia ihi tatapuoka.”

¹⁴Naga ö o tentaraka yoleha, ”Sarakia de ngomi? Okia kokiani ngomi midiai?” O Yohanis wohaluhu, ”O nagona dika uha niahokoto deʼ uha nia ora manga tiwi de niagalaki itiaiua. Nihi tero-terouku de niagaji!”

¹⁵O öraha gënanga o nyawa yomuläenge yoleha-leha, boteka o Yohanis o Koano Wohihohalamati önanga iwidodamä.

¹⁶Gënanga mahababu o Yohanis wätemo onangika mata-mata, ”Ngohi tinï ohiki ngini de o akere, mä nitamä aha woböa womatëngo i holoi wolamoko de ngohi. Tahohe aihapato malilikoö mangohi topatutua. Unanga aha winïohiki ngini de ma Jou Madutu ai Womaha deʼ o uku.

¹⁷Ai giamoka naga o tatapa la watal̄oko magandum mata-mata hiädono i tebini. O gandum aha yatoomu o gandum matauika, mä mata-mata ma afa aha yatuhuku o ukuika, mauku i hone-honengua!”

¹⁸Hokogënanga o Yohanis wanasihati o nyawa de madodagi mangöe, maöraha ünanga wohingahu o Abari ma Oa.

¹⁹ Mä o Herodes, o Galilea wakokuaha, o Yohanis witaaere imakorona ai gogil̄aka de o ngo Herodias, aidodoto ngoihekata, deʼ yakorona mata-mata o dorou mahomoa wadodiaioka.

²⁰Mä o Herodes kawö dogo aidorou de o Yohanis wihingohama o buiika.

²¹I pahaka mata-mata o nyawa gënanga wäohiki, o Yesusö wïohiki. Deʼ maöraha ünanga magogiriaka womäniata o dihanga ihelenga,

²² deʼ ma Jou Madutu ai Womaha iuti Unanguku marupa o namo dara. Daha yoihene ma Jou Madutu aiilingi ihingahu, ”Ngona Ahi Ngohaka tonï dora-dora. Ngona na sanangi Ahi hininga.”

²³Maöraha o Yesus wamuläenge Ai manarama, Unanga aiumuru takihiri o taongo moruange. Imoteke o nyawa manga damäke, Unanga o Yusuf aingohaka, o Eli aingohaka,

²⁴o Matat aingohaka, o Lewi aingohaka, o Malkhi aingohaka, o Yanai aingohaka, o Yusuf aingohaka,

²⁵o Matica aingohaka, o Amos aingohaka, o Nahum aingohaka, o Hesli aingohaka, o Nagai aingohaka,

²⁶o Maat aingohaka, o Matica aingohaka, o Simei aingohaka, o Yosekh aingohaka, o Yoda aingohaka,

²⁷o Yohanan aingohaka, o Resa aingohaka, o Zerubabel aingohaka, o Sealtiel aingohaka, o Neri aingohaka,

²⁸o Malkhi aingohaka, o Adi aingohaka, o Kosam aingohaka, o Elmadam aingohaka, o Er aingohaka,

²⁹o Yesua aingohaka, o Eliezer aingohaka, o Yorim aingohaka, o Matat aingohaka, o Lewi aingohaka,

³⁰o Simeon aingohaka, o Yehuda aingohaka, o Yusuf aingohaka, o Yonam aingohaka, o Elyakim aingohaka,

³¹o Melea aingohaka, o Mina aingohaka, o Matata aingohaka, o Natan aingohaka, o Daud aingohaka,

³²o Isai aingohaka, o Obed aingohaka, o Boas aingohaka, o Salmon aingohaka, o Nahason aingohaka,

³³o Aminadab aingohaka, o Admin aingohaka, o Arni aingohaka, o Hezron aingohaka, o Peres aingohaka, o Yehuda aingohaka,

³⁴o Yakub aingohaka, o Ishak aingohaka, o Abraham aingohaka, o Terah aingohaka, o Nahor aingohaka,

³⁵o Serug aingohaka, o Rehu aingohaka, o Peleg aingohaka, o Eber aingohaka, o Salmon aingohaka,

³⁶o Kenan aingohaka, o Arpakhsad aingohaka, o Sem aingohaka, o Nuh aingohaka, o Lamekh aingohaka,

³⁷o Metusalah aingohaka, o Henokh aingohaka, o Yared aingohaka, o Mahalaleel aingohaka, o Kenan aingohaka,

³⁸o Enos aingohaka, o Set aingohaka, o Adam aingohaka, ma Jou Madutu aingohaka.