Read Tobelo O LUKAS 4 Bible Online

O LUKAS 4 - Tobelo bible

O LUKAS 4

¹O Yesus iwikuaha ma Jou Madutu ai Womaha maöraha Unanga wamal̄a o Yordan ma Ngairi. Ma Jou Madutu ai Womaha iwiao Unanga o tonaka i kokakahaika.

²Genangoka Unanga o Ibilihi iwitaili o wange moruata madëkana. O öraha madëkana gënanga, Unanga okia-kiaua waol̄omo. Hoʼ mabaha Unanga wamäo iwihahini.

³O Ibilihi iwitemo Unangika, ”Bari Ngona ma Jou Madutu ai Ngohaka? Hoʼ, nahuloko o helewo nënanga imadadi o roti.”

⁴ O Yesus wohaluhu, ”Ma Jou Ai Demo ma Buku magoronaka itulihi, ’O nyawa yakunua yowango kade o roti dika.’ ”

⁵Daha o Ibilihi iwiao o Yesus o ngï magögurutil̄eoka, deʼ o lako dadawi o Ibilihi wihidumutu Unangika mata-mata o kuaha o popareta o duniaka de makaramata.

⁶”Mata-mata o kuaha deʼ o kaya nënanga aha ngohi tonihidöaka Ngonaika,” o Ibilihi i temo o Yesusika, ”Hababu mata-mata nënanga ihihi döakoka ngohino, deʼ ngohi takunu tohidöaka nagonaika dika, ngohi tomau tahi döaka.

⁷Mata-mata gënanga aha idadi kato Ngona, nako Ngona noma ruku nohi huba ngohi.”

⁸ O Yesus wohaluhu, ”Ma Jou Ai Demo ma Buku magoronaka itulihi, ’Niwi huba nia Jou Madutu deʼ niwï leleani Unanga dika.’ ”

⁹Daha o Ibilihi iwiao o Yesus o Yerusalemika deʼ iwikelenga Unanga ma Jou ai Tau maponatoka deʼ iwitemo Unangika, ”Bari Ngona ma Jou Madutu ai Ngohaka? Hoʼ nenangoka de noma ngumo.

¹⁰ Hababu Ma Jou Ai Demo ma Buku magoronaka itulihi, ’Ma Jou Madutu aha wahuloko Ai malaekat-malaekat inï göana ngona ihi dodiai.’

¹¹ Deʼ ikali, ’O malaekat-malaekat aha inilegono Ngona de manga giama, hupaya Ani l̄ou mauha i peleke o helewoika.’ ”

¹² O Yesus wohaluhu, ”Ma Jou Ai Demo ma Buku magoronaka itulihi, ’Uha niwitaili nia Jou Madutu.’ ”

¹³Ipahaka o Ibilihi iwitaili o Yesus de hagala rupa madodagi, ënanga iwimal̄aka o Yesus, deʼ yodamä o öraha maoa.

¹⁴Ipaha o Yesus womakilioro o Galileaika; deʼ Unanga ma Jou Madutu ai Womaha iwikuaha. O abari mangale Ai diri yodogilianga o daera gënanga mata-mataika.

¹⁵Unanga wodotoko o pupuji matauoka, deʼ mata-mata o nyawa iwihigiriri Unanga.

¹⁶O Yesus woikoli o Nazaretika, o ngï Unanga iwipaliara hiädono wolamoko. O Yahudioka manga Puji mawangeoka imoteke mabiaha Unanga woiki o pupuji matauika. Unanga womaoko la wabasa Ma Jou Ai Demo ma Buku,

¹⁷deʼ iwihidöaka ma Nabi Yesaya aibuku. Unanga wahelenga o buku i lüluluino gënanga, daha wamäke o hidoku nënanga,

¹⁸ ”Ma Jou ai Womaha naga Ngohioka, hababu Unanga wohi gorakoka ngohi la tohingahu o Abari ma Oa o nyawa mihikinika. Unanga wohi huloko ngohi la tohi ngahu o duduhuhu o nyawa yätago-tagokika deʼ o nyawa yopiloko ima hiorikoli; la tä hohe o nyawa yahidapara itotorou

¹⁹deʼ tohi ngahu ma Jou aiböa maöraha wahihalamati to Unanga aiumati.”

²⁰O Yesus walulu okali o buku gënanga, deʼ wohigilio wolöleleanika, daha wogogere. Mata-mata o nyawa o pupuji matau magoronaka gënanga iwipulono.

²¹Deʼ o Yesus womuläenge woade-ade onangika hokonënanga, ”Ma Jou Ai Demo ma Buku madol̄a kangano ni ihe-ihene gënanga o wange nënanga iganapuoka maöraha ngini nihigihene.”

²²O demo-demo wohidö demo-demo gënanga duru irahai, hiädono önanga yokiriri deʼ iwihigoungu Unanga. Onanga yotemo, ”Mode koigoungua Unanga o Yusuf aingohaka?”

²³De o Yesus wätemo onangika, ”Marai ngini aha niapäke o hitotero mademo nënanga Ngohino, ’Dotere, nohitogumu anidiri mahirete. Ngomi mi ihene ihëra-hëranga nodiai o Kapernaumoka, nodiaioli anikapongoka mahirete.’ ”

²⁴ O Yesus wödogo, ”Niohohininga, koiwa naga o nabi iwihoromati aikapongoka mahirete.

²⁵ Mä ni ihene: o Elia aiorahoka, ma orahoka iawanua o taongo hange de mahononga madëkana, idadi o habirokata duru kaha giria o berera mata-mataika. O öraha gënanga naga manga ngöe o ngoheka bobao o Israeloka.

²⁶ Ngarokö hokogënanga, kamoikaö de ma Jou Madutu wïhulokua o Elia woiki o bobobaoika gënanga mä duga-duga woiki o bobaoika momatëngo, o Sarfat mabereraka o Sidon madaeraoka.

²⁷ Kogenangoli ma Nabi Elisa aiorahoka naga manga ngöe o nyawa o Israeloka yäpado itotorou, mä manga hidogoronaka kamoiö de wahitogumua, sowaliua o Naaman o Siria manyawa gënanga.”

²⁸Mata-mata o nyawa o pupuji matauoka gënanga duru yongamo, yoihene o hali gënanga.

²⁹Onanga imaoko daha iwiduhu o Yesus o kota maporetika, deʼ iwiao o l̄oku mabakorika, kiaka genangoka ihigoko manga kota. Onanga yomau iwitila Unanga o waiuku.

³⁰Mä o Yesus woma hibilatu o nyawa manga ngöeika gila-gila woiki.

³¹Ipaha o Yesus woiki o Kapernaum makotaika o Galileaka. Dokengoka Unanga wädotoko o nyawa o Yahudi manga Puji ma wangeoka.

³² Onanga yokiriri yamäke madodagi Unanga wodotoko, hababu Unanga wotemo-temo de makumati.

³³Genangoka o pupuji matauoka womatëngo o womaha madorou iwikuaha. O nyawa gënanga woma pöa-pöaka,

³⁴”Hei Yesus, o Nazaret manyawa, Ngona nomau okia nodiai dede ngomi? Ngona naino la nomï binaha ngomi? Ngohi tohiöriki Ngona o nagona: Ngona o huhuloko notebi-tebini ma Jou Madutuino!”

³⁵”Noma rïdi!” o Yesus wodorohu o womaha madorouika gënanga. ”Nohupu de o nyawa nënanga!” Daha o womaha madorou gënanga iwihi paka o nyawa gënanga manga himanguku mata-mata, ipaha ihupu de o nyawa gënanga de wohiriua.

³⁶Mata-mata o nyawa yohëranga, deʼ imaketemo, ”Goguleua Ai demo-demo. De makumati deʼ makuaha, Unanga wapareta o womaha madodorou ihupu, deʼ onanga ma yohupu!”

³⁷De o abari mangale o Yesus yodogilianga o daera gënanga mata-mataika.

³⁸O Yesus wamal̄a o pupuji matau gënanga, daha woiki o Simon aitauika. O Simon ngoitoroa magogiria imigogama mopanyake, deʼ o nyawa ihingahu o hali gënanga o Yesusika.

³⁹O Yesus woiki o ayo gënanga amidangirika, daha o Yesus waduhu o gogama gënanga. O gogama gënanga ihihanga, deʼ o Simon ngoi toroa gila-gila momomiki deʼ mä leleani önanga.

⁴⁰O wange tigi-tigi itumunu, mata-mata o nyawa yäao o Yesusika manga riadodoto yädäe-däene o panyake i rupa-rupa. O Yesus wakelenga Ai giama onanguku moi-moi deʼ onanga wahitogumu.

⁴¹O womaha madodorou maihupu o nyawa yowöe-wöeino gënanga, de yopöa-pöaka, ”Ngona ma Jou Madutu ai Ngohaka!” Mä o Yesus wädorohu önanga deʼ wahigumal̄aua önanga yoade-ade, hababu önanga yanäko bari Unanga ma Koano Wohi hohalamati.

⁴²O wange tigi-tigi iböa o Yesus wamal̄a o kota gënanga de woiki o ngï moika magigoro koiwa-iwa. O nyawa yomuläenge iwilingiri Unanga, deʼ onanga iwimäkeoka, önanga ihidailako hupaya Unanga uha wämal̄a önanga.

⁴³Mä o Yesus wätemo, ”O Abari ma Oa mangale sarakia ma Jou Madutu wopareta, kokiani Ngohi tohi ngahuoli, o kota-kota mahomoaika, hababu matiti gënanga ma Jou Madutu wohihuloko Ngohi o duniaino.”

⁴⁴Karana gënanga o Yesus woriwayati o pupuji matau magoronaka o Yudea maberera mata-mataika.