Read Tobelo O LUKAS 5 Bible Online

O LUKAS 5 - Tobelo bible

O LUKAS 5

¹ Ma moiuku, o Yesus womaokoino o Genesaret ma Taaga madowongioka. Manga ngöe o nyawa imakokehoto la yoihene o abari ma Jou Madutuino.

²O Yesus wamäke hinoto o ngotiri o hohanoka gënanga; manawoko yolingi-lingiri youtioka deʼ manga gogiria manga homa yaihoro.

³O Yesus wöbarene moi o ngotiri, genangala o Simon aingotiri, daha o Simon wïhuloko watilaoko aingotiri gënanga hatoli ikurutika de o hohana. O Yesus wogogeruku o ngotiri magoronaka gënanga deʼ wädotoko o nyawa manga ngöe.

⁴Ho de wodotoko iböto, Unanga wïtemo o Simonika, ”Nohi oru i luku-lukuoko, deʼ nodotumo anihoma la notagoko o nawoko.”

⁵ ”Bapa Guru,” o Simon wohaluhu, ö hutu moi imïhaiwatiki ngomi mikarajanga kahagiria, mä okia-kiaua miatagoko! Mä karana Bapa nohuloko, kayaoa; ngohi aha mahoma todotumoli.”

⁶ Onanga i böto yadiaioka gënanga, önanga yamäke o nawoko hoko gënanga mangöe hiädono manga homa imuläenge ikakihi.

⁷Hababu gënanga önanga imägahoko o roriwo manga dodiawoika o ngotiri mahomoaka. Manga dodiawo gënanga yaino daha önanga imäkiriwo yönoa o ngotiri hinoto gënanga iömanga de o nawoko hiädono ngotiri gënanga ngade iwöro.

⁸O Simon kade wamäke gënanga, ünanga woma rukuku o Yesus aihimangoka, daha wotemo, ”Nohimal̄a ngohi Jou! Hababu ngohi o nyawa baradoha!”

⁹O Simon deʼ mata-mata imakomoteke de ünanga yohëranga yamäke mangöe o nawoko önanga yatagoko.

¹⁰Hoko genangoli o Simon de aidodiawo, gënanga o Yakobus deʼ o Yohanis, o Zebedeus aingoha-ngohaka. O Yesus wïtemo o Simonika, ”Uha nohawana! Muläenge o öraha nënanga aha nodadi nohoma-homa o nyawa.”

¹¹O Simon deʼ aidodiawo yatauru manga ngotiri gënanga o hohaniha, i paha yamal̄aika mata-mata ganga, daha iwi nïki o Yesus.

¹²O wange moiuku, o Yesus naga o kota moioka. Dokengoka naga womatëngo o nauru airöehe yaömanga de o pado. Maöraha ünanga wïmäke o Yesus, ünanga womarukuku o Yesus aihimangoka de wogahoko, ”Bapa, nako Bapa nömodeke, Bapa yakunu nohihi togumu ngohi!”

¹³O Yesus wïpal̄anga o nyawa gënanga de wïtemo, ”Ngohi tömodeke, notogumu!” O öraha gënanga dika aipanyake ihihanga.

¹⁴ Daha o Yesus wïduhunu o nyawa gënanga wohiade-ade o hali gënanga, o nagonaika dika, wato, ”Noiki ma imamika, deʼ nogahoko ünanga wohigoungu ngona notogumoka. Daha noiki nohi huba ani huhuba hokä o Musa wohi pöparetaka, hokä manyonyata i goungu o nyawaika ngona igou-goungu notogumoka.”

¹⁵Mä o abari mangale o Yesus idogo-dogo yodogilianga, kiaka dika, deʼ manga ngöe o nyawa yoböa mangale yoihene deʼ mangale to ona manga panyake itogumu.

¹⁶Ipaha de gënanga o Yesus woiki womä niata o ngï magigoro koiwa-iwaika.

¹⁷O wange moiuku o Yesus aigogiria wodotoko, naga o Farisioka yamuruononaga deʼ o agama maguru-guru yogogeruku genangoka. Onanga o Yerusalemoka de yaino, de o Galilea deʼ o Yudea makotaka de yaino. Ma Jou ai kuaha naga o Yesusoka la wahi togumu o nyawa yopopanyake.

¹⁸O öraha gënanga yamuruono naga yoböaino iwiao womatëngo wolugu-lugu woluluiha o tikara mal̄okuoka. Onanga ihidailako iwiao o nyawa gënanga o tau magoronaika hupaya yakunu ünanga iwikelenga o Yesus ai himangoka.

¹⁹Mä karana o nyawa yowöeholi dokengoka, önanga yakunua iwiao iwihi ngohama. Ho mangale gënanga önanga iwihidöa ünanga o tau makatu mal̄okuino. Daha önanga yakilianga makatu, deʼ iwihiguti ünanga kamamoi de aitikara o Yesus aihimanguku o nyawa yowöe-wöe gënanga manga hidogoronauku.

²⁰Ho deʼ o Yesus wamäke hokokia ma amoko manga ngongaku, Unanga wïtemo o nyawaika gënanga, ”To ngona anibaradoha iapongoka.”

²¹O agama maguru-guru deʼ o Farisi manyawa yomuläenge imakoketemo, ”O naguna o nyawa nënanga wobarani wihikauku ma Jou Madutu? Mahomoa de ma Jou Madutu mahirete, o nagona yakunu ya apongo o baradoha?”

²²O Yesus wohiöriki manga loleha. Hoʼ Unanga wätemo, ”Yadodoa ho ngini nialeha-leha hoko gënanga niahiningaka?

²³Kiaka iholoi igapanga, Tahetongo, ’Ani baradoha iapongoka’, eko To temo, ’Nomomiki deʼ nomä dagi!ʼ?

²⁴Maöraha nënanga Ngohi aha tohimatoko magoungu nginika, o dunia mal̄okuoka nënanga o Nyawa manga Ngohaka wokuaha wa apongo o baradoha.” Daha o Yesus wïtemo o nyawa wolugu-luguika gënanga, ”Nomomiki, nagoraka ani dangiri, deʼ nolio!”

²⁵Womataiti o nyawa gënanga womomiki manga himangoka mata-mata, daha wagoraka aidangiri, deʼ wolio daha wihigiriri ma Jou Madutu.

²⁶Onanga mata-mata duru yohëranga daha iwihigiriri ma Jou Madutu. Deʼ manga modongo, önanga yotemo, ”I hëranga duru okia i dädadioka o wange nënanga ngone hahakihi!”

²⁷Ipaha de gënanga o Yesus wohupu deʼ wïmäke womatëngo o soungu wogaho-gahoko, airomanga o Lewi, wogogeruku aikantoroka. O Yesus wïtemo unangika, ”Nohi nïki Ngohi.”

²⁸O Lewi woma oko deʼ wamal̄aika mata-mata, gila-gila winïki o Yesus.

²⁹I böto gënanga o Lewi wodiai o rame aitauoka mangale o Yesus. Manga ngöe o soungu yogaho-gahoko deʼ o nyawa mahomoa yol̄omo kamamoi dede önanga.

³⁰ Yamuruono naga o Farisi manyawa deʼ o agama maguru-guru yamäo yosanangiua, ho yotemo o Yesus iwinöninïkika, ”Yadodoa hongini mata-mata niol̄omo deʼ niokere de o soungu yogaho-gahoko deʼ o nyawa madorou?”

³¹O Yesus wohaluhu, ”O nyawa yototumuloa yoparalua o dotere; duga-duga o nyawa yopopanyake dika.

³²Ngohi toböa tä ahokua o nyawa yanäko manga diri o nyawa maoa, duga-duga o nyawa yoböbaradoha hupaya önanga yotoba de önanga yodiaiokaua o baradoha.”

³³O nyawa iwitemo o Yesusika, ”Iwinöninïki o Yohanis deʼ yänöninïki o Farisi manyawa hara mangöe yopuaha deʼ imä niata. Mä ininöninïki yol̄omo deʼ yokere.”

³⁴O Yesus wohaluhu, ”Mode ngini yakunu niähuloko yopuaha o nyawa yohima-himangika, o kawingi marameanga, nako manauru wokawi-kawingi naga kadede onangohi? Marai kowali!

³⁵Mä aha maöraha iböa o nauru wokawi-kawingi gënanga manga hidogoronaka de iwi ngoho. Oraha gënanga aha önanga yopuaha.”

³⁶Daha o Yesus woade-ade onangika o hitotero nënanga, ”Koiwa naga o nyawa o baju madorou yotapa de yökakihi o baju mahungi de ihitapa. Hababu ënanga yakakihi o baju mahungi. Inoli o dadapa o ngöere mahungi imakadäenua de o baju madorou.

³⁷Kogenangoli koiwa naga o nyawa yöguhe o angguru mahungi o angguru mangï madorouku, karana o angguru mahungi gënanga aha yarëpa o angguru mangï gënanga. Ho ma angguru ikopoa, de mangï i rëpa.

³⁸O angguru mahungi kokiani yöguhe o angguru mangï mahungi ukuoli.

³⁹Kogenangoli koiwa naga o nyawa yomau yaokere o angguru mahungi, nako yaokeroka o angguru ihira-hira. ’O angguru i hira-hira gënanga i holoi i hëmoro,’ Unanga wato.”