Read Tobelo O LUKAS 6 Bible Online

O LUKAS 6 - Tobelo bible

O LUKAS 6

¹ Ma moiuku o Yahudioka manga Puji mawangeoka, o Yesus wakaino moi o gandum madumuleino, iwinöninïki yautuku magandum. Onanga yahidoro magandum gënanga de manga giama, daha yaol̄omo.

²Yamuruono naga o Farisi manyawa yotemo, ”Yadodoa ho ngini niatilakuru nanga agama matita de niadiai yöduhu-duhunu hadiai nanga Puji mawangeoka?”

³ O Yesus wohaluhu, ”Komaiwahi ngini niabasa mangale wadodiai o Daud, maöraha ünanga de ainyawa yähahini?

⁴ Unanga wowohama ma Jou ai Tau magoronaika, deʼ wal̄ë o roti ihihubaka ma Jou Madutuika, gila-gila waol̄omo. I paha wahidöakoli o roti gënanga ainyawaika. Enahioko moteke nanga agama matita, o imam-imam dika yakunu yaol̄omo o roti gënanga.”

⁵Daha o Yesus wätemo, ”O Nyawa manga Ngohaka wakuaha o Puji mawange!”

⁶O wange moiuku o Yahudioka manga Puji mawange moioli, o Yesus woiki wodotoko o pupuji matauoka. Genangoka naga o nyawa aigiama mahononga ihonenge.

⁷Yamuruono naga o agama maguru deʼ o Farisi manyawa yomau yalingiri o Yesus aihowono hupaya yakunu Unanga iwikalaki. Hoʼ onanga kahoko genangika yotötailako boteka Unanga aha wahitogumu o nyawa o Puji mawangeoka.

⁸Mä o Yesus wanäko toönanga manga dibanga. Ho Unanga wïtemo o nyawa aigiama mahononga ihone-honengika gënanga, ”Naino noma okoil̄e nengokadau mahimangoka!” O nyawa gënanga womomiki daha womaokoil̄e genangokadau.

⁹Ipaha o Yesus wäleha genangokadau manyawa, ”Imoteke o agama, ngone yakunu okia hodiai o Puji mawangeoka? Hodiai o oa ekola hodiai o dorou? Hahihalamati o nyawa ekola hahibodito?”

¹⁰O Yesus womä lega wakiloliti onangika mata-mata, daha wïtemo o nyawaika gënanga, ”Natoakika ani giama.” O nyawa gënanga watoakika aigiama, deʼ aigiama i togumu.

¹¹Mä o agama maguru-guru deʼ o Farisi manyawa duru yongamo, deʼ yomuläenge imahi kadailako, okia önanga yakunu yodiai o Yesusika.

¹²O öraha gënanga o Yesus wadöa moi o doporono la womä niata. Genangoka Unanga wohubayanga ma Jou Madutuika o hutu moi iwihaiwatiki.

¹³De o wange i tararonoka, Unanga wä ahoko iwinöninïki, daha wäiriki yangimoi de yahinoto onangino. Unanga wahiromanga yangimoi de yahinoto gënanga o rasul-rasul. Onanga ganga:

¹⁴O Simon (iwi hetongoli o Petrus), deʼ o Andreas o Simon aidodoto; o Yakobus deʼ o Yohanis, o Filipus deʼ o Bartolomeus,

¹⁵o Matius deʼ o Tomas, o Yakobus o Alfeus aingohaka, deʼ o Simon (o berera ma Gogöana),

¹⁶o Yudas o Yakobus aingohaka deʼ o Yudas Iskariot, ipahaika wosetia okaua.

¹⁷I paha o Yesus o doporonuku gënanga de wouti imakomoteke de o rasul-rasul gënanga, daha imatogumu deʼ imaokoino o ngï madodiaioka. Genangoka nagaö kamanga ngöe iwinöninïki mahomoa deʼ manga ngöe yoböa okiaino honanga o Yudea madaeraino, o Yerusalemino, deʼ o Tirus ma kota-kotaino, deʼ o Sidon o gahi madatekoka.

¹⁸Onanga yoböa mangale yoihene o Yesus wodotoko, deʼ wahi togumu to önanga manga panyake. Yä ngoha-ngohama o womaha madorou onangö ma yoböa deʼ wahi togumu.

¹⁹Mata-mata o nyawa imahi dailako iwi pal̄anga o Yesus, karana naga o kuaha i hupu Ai diriino de yahi togumu önanga mata-mata.

²⁰O Yesus wäpulono iwinöninïki de wätemo, ”Niutumu ngini o nyawa nimömihikini, karana ngini ganga ma Jou Madutu aiumati!

²¹Niutumu ngini inï hahahini o öraha nënanga; ngini aha inï punuhu! Niutumu ngini niari-ari o öraha nënanga; ngini aha niiete!

²² Niutumu ngini nako inïdohata, inïoluku, inïhohedu deʼ o romanga madorou inïdiai, karana o Nyawa manga Ngohaka!

²³ O nabi-nabi yohira-hira kogenangoli yahidiai. Nako o hali gënanga idadi kokiani ngini niahininga isanangi deʼ nihol̄a deʼ niamörene, hababu o hewa ma amoko yasadia o horogaka mangale ngini.

²⁴Mä nibodito ngini nikaya-kaya o öraha nënanga; hababu ngini niamäoka o sanangi!

²⁵Nibodito ngini inïpunu-punuhu o öraha nënanga; hababu ngini aha inïhahini! Nibodito ngini ni ie-iete o öraha nënanga; hababu ngini aha niahininga ihuha deʼ niari!

²⁶Nibodito ngini, nako mata-mata o nyawa inïhigiriri; hababu hokogenangö niaete deʼ niatohora önanga yahigiriri o nabi yoelu-eluku mahiraino.”

²⁷”Mä nihihi gihe-gihene Ngohi o öraha nënanga, Ngohi tohidöaka nginika o behehongo nënanga: niädora niahaturü, deʼ nidiai o oa o nyawa inïdoha-dohatika.

²⁸Niahibarakati o nyawa inï lololai, deʼ niahihubayanga o nyawa manga hininga i totorou nginika.

²⁹Nako o nyawa yapöka niagotoaka mahononga, mal̄aika önanga yapökali niagotoaka mahonongahi. Nako yaöra niajuba niabajuö niahidöaka.

³⁰Nako o nyawa yogahoko okianaga nginika, niahidöaka gënanga onangika; deʼ nako tingini de yaöra, uha niogahoko ihigilioli.

³¹ Niahidiai o nyawa mahomoa hokä ngini nio igo önanga yodiai nginika.

³²Nako ngini niädora o nyawa kainï dora-dora dika, okia niapahala? O nyawa yoböbaradoha ma kayädora o nyawa yädora-dora önanga!

³³Deʼ nako ngini nidiai o oa ka o nyawa yododiai o oa nginika dika, okia niapahala? O nyawa yoböbaradoha mahoko gënanga yodiai.

³⁴Deʼ nako ngini niahibau o tiwi duga-duga ka o nyawa yaku-akunika ihigilio niatiwi, okia niapahala? O nyawa baradohaö yahibau manga tiwi o nyawa yoböbaradohaika, daha yogahokoli ihigilio!

³⁵Kokiani uha hokogënanga! Ilio yaino ngini kokiani niädora niahaturü deʼ nidiai o oa onangika. Kokiani ngini niahibau, deʼ uha nionganono yakunu ihigilio. Nako hoko gënanga niahewa aha ilamoko, deʼ ngini aha nidadi ma Jou Madutu woko Kurutil̄e ai ngoha-ngohaka. Hababu ma Jou Madutu aihininga yaoa o nyawa yanäko-näkouaika yotarima kasi, deʼ o nyawa madorouikaö.

³⁶Kokiani ngini de niadora de niahayanga, hokä nia Ama ö de Ai dora de Ai hayanga.”

³⁷”Uha nima dadi hokä o hakimi o nyawa mahomoaika, hupaya nginikaö ma Jou Madutu uha hoka o hakimi. Uha niahukumu o nyawa mahomoa, hupaya nginiö ma Jou Madutu uha winï hukumu. Nia hiapongo o nyawa mahomoa, hupaya ma Jou Madutuö winï apongo ngini.

³⁸Nia hidöaka o nyawa mahomoaika, hupaya ma Jou Madutuö winihidöaka nginika; ngini aha niatarima o ngongike de maboboloi yatugaka de yöduku-dukuku tingini. Hababu o duduga kiaka ngini niahitugaka o nyawa mahomoa, ma Jou Madutu aha wapäke winihi tuga ngini.”

³⁹ Ipaha o Yesus woade-ade onangika o hitotero nënanga, ”Nako o nyawa yopilo-piloko yätuda o nyawa yopilo-piloko mahomoa, maraioka yahinoto aha yäotaka o gotiuku.

⁴⁰ Koiwa naga o hakola manyawa iholoi woamoko de aiguru. Mä o hakola manyawa nako hidodogumoka imä dotoko, aha yodadi i maka däene hokä ai guru.

⁴¹Yadodoa hongini niatailako o gota mawal̄e niariadodoto ai lako magoronaka, enahioko o balaki nialakoka mahirete ngini niatailakoua?

⁴²Sarakia ngini niakunu nitemo niariadodotika, ’Naino riadodoto, ngohi tohi hupu o gota mawal̄e anilakoka gënanga,’ enahioko anilako magoronaka mahirete naga o balaki kiaka ngini nia mäkeua? Hei tengeluku! Nihi hupu ihira o balaki naga nia lakoka mahirete. Dahaö ngini niakunu niolëga de madiai deʼ yakunu nihihupu o gota mawal̄e niariadodoto ai lakoka.”

⁴³”O gota mautu iboburere ihohokua o hohoko mado dorou. Kogenangoli o gota mautu i boburereua ihohokua o hohoko ma oa-oa.

⁴⁴ O gota mautu yögetongo hanäko mahohokoka. O gota mahohihika ihohokua o ara, deʼ o momo mahohihika ihohokua o angguru.

⁴⁵ O nyawa maoa ihihupu o hali ma oa-oa karana manga hiningaka ioma-omanga de o oa. O nyawa madorou ihihupu o hali madorou, karana manga hininga iomanga de o dorou. Hababu okia o uru ihidemo genangala o hiningaino ikopoa.”

⁴⁶”Yadodoa hongini nihiahoko Ngohi, ’Jou, Jou,’ mä niadiaiua okia taheto-hetongo nginika?

⁴⁷De o nagona yakunu ngone hahi tero o nyawa yaino-ino Ngohino deʼ yoihene Ahi demo, de yadiai? — Kayaoa de Ngohi tinihimatoko nginika — .

⁴⁸Unanga hokä o nyawa Maöraha ihigoko manga tau yafaiti yaluku-lukuku, daha yodiai mahohol̄e o helewo mal̄okuoka. Maöraha naga o nguihi, deʼ o ngairi ma akere yaolu o tau gënanga, o tau gënanga yakëlu yakunua, hababu higokoka o hohol̄e ma oa-oa mal̄okuoka.

⁴⁹Mä o nyawa yoihe-ihene Ahi demo deʼ yadiaiua, ganga hokä o nyawa ihigoko manga tau de mahohol̄e koiwa. Nako o nguihi yaolu o tau gënanga itaiti iruba; deʼ magilianga duru kahagiria!”