Read Tobelo O LUKAS 7 Bible Online

O LUKAS 7 - Tobelo bible

O LUKAS 7

¹I paha wohi ade-ade iböto o hali gënanga o nyawa yowöe-wöeika, o Yesus woiki o Kapernaumika.

²Gangoka naga o Roma manyawa manga kapita aigilaongo duru wïdora-dora. O gilaongo gënanga wopanyake deʼ ngade wohonenge.

³O öraha makapita gënanga woihene mangale o Yesus, ünanga wähuloko yamuruononaga o Yahudioka manga tutuda yoiki o Yesusika la yogahoko hupaya Unanga waino deʼ wihitogumu aigilaongo.

⁴Maöraha imahi ädono o Yesusika, önanga yogahoko yagou-goungu hupaya Unanga wïriwo makapita gënanga. ”Makapita nënanga i patutu Bapa nïriwo,” önanga yotemo o Yesusika,

⁵”hababu ünanga wädora nanga nyawa deʼ wohigokoka tongomi miapupuji matau.”

⁶De o Yesus woiki ima kinïki dede önanga. Ngade-ngade o Yesus wa ädono o tau gënanga, makapita gënanga wähuloko aidodiawo o Yesusika la yotemo, ”Ngaro uha Bapa nomahi huha tongohi ahi tauika. Ngohi topatutua Bapa tonitarima ahitauoka.

⁷Gënanga mahababu ngohi mahirete ihimoroënua tonïhimanga Bapa. Hoʼ o pareta dika nohidöaka hupaya ahigilaongo wotogumu.

⁸Hababu ngohi ma kato ihenoli ahi l̄okuil̄e manga pareta deʼ ahitimiuku nagaö o tentaraka kokiani yoihene ahiparetaika. Nako ngohitïhuloko o tentaraka womatëngo, ’Noiki!ʼ unangö woiki; deʼ nako ngohi tätemo mahomoaika, ’Niaino nengino!ʼ unangö waino. Deʼ nako ngohi täpareta ahigilaongo, ’Nadiai nënanga!ʼ unangö wadiai.”

⁹O Yesus wohëranga woihene gënanga. Unanga womälega ai poretoko deʼ wätemo o nyawa yowöe-wöeika magogiria iwinïki, ”Goguleua o nyawa nënanga. O Israel manyawa manga hidogoronaka makomaiwahi ngohi tamäke o ngongaku ma amoko nënanga!”

¹⁰Maöraha o nyawa yähulo-huloko gënanga imaidulu makapita gënanga aitauika, o gilaongo gënanga wotogumoka.

¹¹Tedekanua ipahaika, o Yesus woiki o Nain makotaika. Iwinöninïki deʼ o nyawa yowöe-wöe yoiki imakomoteke dede Unanga.

¹²Maöraha o Yesus wadono itigioka o kota mangoranika, naga o nyawa yototaka o mayeti o kota maporetika. Wohone-honenge ganga o bobao momatëngo amingohaka o nauru womatëngo-tëngoka. Manga ngöe o kota manyawa iminïki o ayo bobao gënanga.

¹³Maöraha o Yesus womimäke o ngoheka bobao gënanga, Unanga womïdora de wotemo, ”Uha noari, Ayo!”

¹⁴Ipaha o Yesus womahi tigi o mayeti mamomokuika gënanga deʼ wapal̄anga. De yomoku-mokuö ima togumu. O Yesus wotemo, ”Hei goduru, Ngohi toni huloko nomomiki!”

¹⁵Ma goduru wohone-honengoka gënanga, womomiki wogogeruku deʼ womuläenge woade-ade. De o Yesus wihi lapahi ngoi ayoika.

¹⁶Mata-mata o nyawa yohawana deʼ yomuläenge iwihigiriri ma Jou Madutu. Onanga yotemo, ”Womatëngo manabi wolamo-amoko woböaka nanga hidogoronaka! Ma Jou Madutu woböaka la wahihalamati Ai umati!”

¹⁷O abari mangale o Yesus nënanga yodogilianga o Yudea ma berera mata-mataika deʼ madaera yakilolitino.

¹⁸O Yohanis iwinöninïki ihingahu o Yohanisika mata-mata okia idädadioka gënanga. De o Yohanis wä ahoko yahinoto iwinöninïki

¹⁹daha wähuloko önanga yoiki ma Jou Yesusika deʼ yoleha, ”Bapa Ngona manyawa aha noböa-böa imoteke ma Jou Madutu ai jaji, ekola kokiani ngomi miwidamä woma tengoli mahomoa?”

²⁰Yahinoto o Yohanis iwinöninïki gënanga yoiki o Yesusika deʼ yotemo, ”O Yohanis Wo ohi-ohiki womïhuloko minileha Ngonaika Bapa, boteka Bapa Ngona manyawa ahawoböa-böa imoteke ma Jou Madutu ai jaji, ekola kokiani ngomi miwidamä woma tengoli mahomoa?”

²¹O öraha gënanga o Yesus wahitogumu mangangöe o nyawa, deʼ waduhu o womaha madorou mangöe inoli wadiai manga ngöe o nyawa yopilo-piloko yakunu imahiöriki.

²² Hoʼ o Yesus wohaluhu, ”Nima kilioro o Yohanisika deʼ nihingahu okia ngini ni ihene deʼ niamäke: o nyawa yopilo-piloko imahiöriki, o nyawa yolugu-lugu imädagi, o nyawa yäpado-pado yotogumu, o nyawa yätotopongono imahihene, o nyawa yohonengoka yowangokali, deʼ o Abari ma Oa ma Jou Madutuino ihingahu o nyawa yomömihikinika.

²³Youtumu o nyawa nagona mahababu ihimäkeua mangale ihioluku Ngohi.”

²⁴Ipaha o Yohanis wähulo-huloko gënanga yoiki, o Yesus womuläenge woade-ade o nyawa yowöe-wöeika, wato, ”Ngini nioiki o tonaka i kokakahaika la okia nio lega? O tiba o ngahiri moi o hidal̄oko yawü wuwu?

²⁵Ngini nioiki la okia nio lega? Womatëngo ai pakeanga marorahai? O nyawa yapäke-päke o pakeanga marorahai, deʼ yol̄omo de yokere kai hëmo-hëmoro yogogere o kadatoka!

²⁶Hoʼ, ngini nihupu okia niolega? La niwï lega manabi womatëngo? Igoungu, mä unanga woholoi de o nabi moi.

²⁷ Hababu o Yohanis gënanga hokä Ma Jou Ai Demo ma Buku magoronaka i tulihoka hoko nënanga, ’Nënanga Ahi huhuloko,’ ma Jou Madutu wato, ’Ngohi aha tihuloko, de Ngona ünanga wohira, hupaya ünanga wonihi pairi Ani ngëkomo!ʼ ”

²⁸”Nio hohininga,” o Yesus wotemoli, ö duniaka nënanga komaiwa naga o nyawa iholoi yoamoko de o Yohanis Wo ohi-ohiki. Mä o nyawa yoete-eteke ma Jou Madutu aiumati manga hidogoronaka, i holoi yoamoko de o Yohanis Wo ohi-ohiki.”

²⁹ Mata-mata o nyawa — de o soungu yogaho-gahoko — yoihene o Yesus wotemo-temo o hali gënanga; ge önanga manyawa yamote-moteke ma Jou Madutu aihuloko deʼ yömodeke o Yohanis wä ohiki.

³⁰Mä o Farisi manyawa deʼ o agama maguru-guru yoluku yatarima ma Jou Madutu aidatoro mangale manga diri. Onanga yoluku o Yohanis wäohiki.

³¹Daha o Yesus woade-adeoli, wato, ”De okia kokiani Ngohi tahitero o örahanënanga manyawa? Hokä okia önanga?

³²Onanga hokä o ngoha-ngohaka yogögogeruku o paharoka; o doomu moi yäböaka, mahomoaika, ’Ngomi mihinyanyioka o rame-rame manyanyi, mä ngini nioluku niselo! Ngomi mihinyanyioka o huha manyanyi mia inga-ingara, deʼ ngini niariua!ʼ

³³O Yohanis Wo ohi-ohiki woböa — ünanga wopuaha deʼ o angguru wokerua — deʼ ngini nitemo, ’Unanga o tokata wïngohamika!ʼ

³⁴O Nyawa manga Ngohaka woböa — Unanga wol̄omo deʼ wokere — daha ngini nitemo, ’Niwï lega o nyawa gënanga! Wokal̄il̄u, wotoba daluku, o soungu yogaho-gahoko manga dodiawo, o baradoha manyawa manga dodiawo.’

³⁵Ngarokö hokogënanga, ma Jou Madutu aisawaro ma nyonyata igoungu o nyawaoka yatotarima mata-mata gënanga.”

³⁶O Farisi manyawa womatëngo, airomanga o Simon, wïahoko o Yesus yol̄omo. O Yesus woiki aitauika deʼ wogogeruku yol̄omo.

³⁷ O kotaka gënanga nagali momatëngo o ngoheka mowango o baradoha magoronaka. Maöraha münanga moihene o Yesus magogiria wol̄omo o Farisi manyawa aitauoka gënanga, münanga maino de moao o boto gahumu moi madol̄a o minya mabounu ihëmo-hëmoro.

³⁸Münanga moma okoino o Yesus Ai poretoko ail̄ou madatekoka daha mapëhaka o Yesus ail̄ou de ami kongo. Ipaha o Yesus ail̄ou matoraha madudungu de ami tadauru daha ma ame deʼ matuagi de o minya mabounu ihëmo-hëmoro.

³⁹O Farisi manyawa wïaho-ahoko o Yesus wamäke o hali gënanga, ünanga wotemo aihiningaka, ”Ade-ade o nyawa nënanga o nabi, marai Unanga womi nako o ngo kia o ngoheka gënanga, mïpeke-peke Unanga, deʼ o ngoheka gënanga mowango o baradoha magoronaka!”

⁴⁰Daha o Yesus wïtemo o Simonika, ”Simon naga okianaga moi tomau tahetongo ngonaika.” ”Ia, Bapa Guru,” o Simon wohaluhu, ”nahetongo dika.”

⁴¹O Yesus wotemo, ”Naga o nyawa yahinoto manga nagimi o tiwi wahibau-bauika. Womatëngo wonagimi o ratuhu motoa o tiwi haäka, deʼ woma tengoli moritoa o tiwi haäka.

⁴²Yahinotö yakunua yafangu manga nagimi gënanga, ho manga nagimi waeheoka. Aa, yahinoto gënanga o nagona aha i holoi iwïdora o tiwi wahi bau-bauika gënanga?”

⁴³”Ngohi tato o nyawa ainagimi duru i lamo-amoko yaehe!” o Simon wohaluhu. ”Ani damäke itiai,” o Yesus wohaluhu.

⁴⁴Daha o Yesus womï lega o ngoheka gënanga deʼ wïtemo o Simonika, ”Ngona nomi mäke o ngoheka nënanga? Ngohi toböa anitauino, deʼ ngona nasadiaua o akere la tatebini Ahi l̄ou; mä o ngoheka nënanga matebinoka Ahi l̄ou de ami kongo, deʼ madudungu matoraha de ami tadauru.

⁴⁵Ngona nohï buhukua de nohi ameua Ngohi, mä o ngoheka nënanga momatogumua ma ame-ame Ahi l̄ou kade toböa nenangino.

⁴⁶Ngona nögopoaua o minya Ahi häekuku, mä o ngoheka nënanga mogopoaka o minya mabounu i hëmo-hëmoro Ahi l̄ouku.

⁴⁷Igoungu: amidora ma amoko gënanga ihimatoko ami baradoha mangöe gënanga i apongoka! Nako o nyawa yahi apongo mahuhutulu, unangö aha aidora mahuhutulu dika.”

⁴⁸Daha o Yesus womitemo mangohekaika gënanga, ”Ani baradoha i apongoka.”

⁴⁹O nyawa mahomoa yogö gogeruku yol̄omo de o Yesus, ima koke temo, ”O naguna o nyawa nënanga hiädono wakunu o baradoha wa apongo?”

⁵⁰Mä o Yesus womitemo mangohekaika gënanga, ”Karana ngona nongaku Ngohino, ngona nohalamati. Noiki de o dame!”