Read Tobelo O LUKAS 8 Bible Online

O LUKAS 8 - Tobelo bible

O LUKAS 8

¹Ipahaika itedekanua, o Yesus woiki o kota-kotaika deʼ o kapo-kapongika, la wohingahu o Abari ma Oa ma Jou Madutu womuläenge wopareta hokä o Koano. Yangimoi de yahinoto iwinöninïki imakinïki dede Unanga.

² Hoko genangoli o ngoheka yamuruono naga wahi togu-togumoka manga panyake deʼ waduhuoka o womaha madorou onangoka. Onanga ganga o ngo Maria imi hetongo o ngo Magdalena (wo hihupuoka munangino tumidi o womaha madorou);

³o ngo Yohana, o Khuza ngoi hekata, womomanarama o Herodes aikadatoka; o ngo Susana, deʼ manga ngöeohi o ngoheka mahomoa. De toona mahirete manga tiwi, önanga iwï riwo o Yesus deʼ iwinö ninïki.

⁴O nyawa kahoko genangika dika, o kota-kotaino, yaino o Yesusino. Deʼ maöraha manga ngöeoka o nyawa imatoomu, o Yesus wä ade-ade onangika o hitotero nënanga:

⁵”Womatëngo wototumule woiki wohibarihi o gihihi. Unanga magogiriaka wohibarihi, naga o gihihi itifa o ngekomuku. Utu o nyawa yadoko-doko, de utuoli o totaleo yaol̄omo.

⁶Naga ö itifa o tonaka ihohelewouku. Maöraha o gihihi gënanga itori, itaiti imaai hababu matonaka madü dudungu.

⁷Nagaoli magihihi itifa o momo mahohihika mahi dogoronauku. O momo mahohihika gënanga iwango kamamoi de magihihi gënanga, deʼ yarakutu hiädono magihihi ihonenge.

⁸Mä nagali magihihi itifa o tonaka i boburereuku ho iwango deʼ ihi hasili mahohoko ilape i hara maratuhu moi.” I böto o Yesus wohi ade-ade o hitotero gënanga o Yesus wätemo, ”Nako de niangauku, ni ihene!”

⁹Iwinöninïki o Yesus iwileha Unangika mamangarati o hitotero gënanga.

¹⁰ O Yesus wohaluhu, ”Ngini inihi döakoka o ngongike la nianäko marahasia mangale sarakia ma Jou Madutu wopareta hokä o Koano. Mä o nyawa mahomoa Tä dotoko de o hitotero, hupaya önanga yatötailako, mä yanäkoua okia idadi; deʼ onanga yoihene, mä i mangaratiua.”

¹¹”Nënanga o hitotero gënanga mamangarati: O gihihi gënanga ganga ma Jou Madutu aidemo.

¹²O gihihi itifa-tifa o ngekomuku hohitero hokä o nyawa yoihe-ihene ma Jou Madutu aidemo gënanga. Mä o Ibilihi yaino de yaora o abari gënanga manga hiningaka, hupaya önanga uha yongaku deʼ yohalamati.

¹³O gihihi itifa-tifa o ngï ihohelewouku, hohitero o nyawa maöraha yoihene o abari gënanga, yatarima de manga hininga i sosanangi. Mä o abari gënanga imahi ngutukua manga hininga magoronaka. Onanga yongaku ihijai-jai dika, deʼ maöraha o cocoba iböa, önanga ima dohuku de yosetiaokaua.

¹⁴O gihihi itifa-tifa o momo ihohihikauku, hohi tero hokä o nyawa yoihene o abari gënanga, mä yohawatere mangale manga ngango inoli yönahihu yowango okia-kiaua yokuranga deʼ yosanangi o dunia magoronaka nënanga. Mata-mata gënanga yahi dehoto önanga hiädono koiwa manga hohoko marorahai.

¹⁵O gihihi itifa-tifa o tonaka i boburereuku hohitero hokä o nyawa yoihene o abari gënanga, daha yagogono manga hininga ya oa-oa, de iriko-rikoto magoronaka. Onanga yotongohono hi ädono yohohoko.”

¹⁶ ”Koiwa naga o nyawa yatuhuku o hilo daha yatamunuku de o rube, ekola yakelengauku manga dangiri matimiuku. Unanga aha wakelenga o hilo gënanga o hilo matotodengoka, hupaya o nyawa yowoha-wohama yakunu yamäke madararono.

¹⁷ Koiwa naga ima ngiu-ngiunika aha koya mäkeua; deʼ koiwa naga o rahasia aha i kiliangua deʼ ihi orikua.

¹⁸ Hababu gënanga nihigihene nihidodiai okia ngini ni ihene. Hababu o nyawa de maena-enangoka, aha yahidöaka iholoi iwöeoli, mä o nyawa manga kia-kiaua, mahuhutulohi naga onangoka, aha yal̄ëoli.”

¹⁹O Yesus ngoi ayo deʼ airiadödoto, yoböa o Yesusika, mä onanga yakunua iwiädono Unangika karana o nyawa yowöe holi.

²⁰De naga womatëngo wïtemo o Yesusika, ”Bapa, ngoni ayo deʼ ani riadödoto naga maporetoka. Onanga yomau nima kamäke de ngona Bapa.”

²¹Mä o Yesus wätemo onangika, ”O nyawa yoihe-ihene ma Jou Madutu ai demo deʼ yadiai gënanga, ge önanga Ngohi ayo deʼ Ahi riadödoto.”

²²O wange moiuku o Yesus deʼ iwinöninïki yoharene manga ngotiril̄e. ”Niaino ngone hoiki o taaga mahonongaika,” o Yesus wätemo onangika. De onangö imäjobo.

²³Maöraha önanga yohidetil̄e magogiriaka, o Yesus iwikiokoka. Itodokanino o rato yoduguti o taagauku gënanga. O akere imuläenge iwohama manga ngotiril̄e, hiädono yakunu yahibodito önanga mata-mata.

²⁴Iwinöninïki o Yesus yoiki o Yesusika deʼ iwitomanga Unanga. Onanga yotemo, ”Bapa Guru, Bapa Guru, ngone hobodito!” O Yesus womomiki de wodorohu mahidal̄oko deʼ malulu ma ago-agomo gënanga. Ma hidal̄oko deʼ maluluö gënanga imatogumu daha mataaga gënanga duru idadi mangogo-ngogoro.

²⁵Daha o Yesus wätemo iwinöninïkika, ”Yadodoa ho ngini ningakua Ngohino?” Onanga idadi yohëranga deʼ yohawana. Deʼ onanga imakoketemo, ”Imoteke madiai o naguna o nyawa nënanga hiädono wohi pareta o hidal̄oko deʼ o luluika, deʼ enangö iwi himoteke!”

²⁶O Yesus deʼ iwinöninïki yohidete yogila-gila hiädono o Gerasa madaeraika o Galilea ma Taaga mahonongaka.

²⁷Maöraha o Yesus wouti o dudungiha, o nauru womatëngo o womaha madorou wïngohamika waino o Yesusino. O nyawa gënanga o kotaino. Madekanoka ünanga woma pakeangua deʼ woluku wogogere o tauoka. Unanga duga-duga womau wogogere o aru-arukoka o jere mangïoka.

²⁸Maöraha wïmäke o Yesus, ünanga wopöaka daha woma rukuku o Yesus aihimangoka deʼ wopöaka, ”Yesus, ma Jou Madutu ai Ngohaka woko Kurutil̄e! Aha nohidodoa ngohi nënanga? Ngohi togahoko uha nohihangihara ngohi!”

²⁹O nyawa gënanga wotemo hokogënanga hababu o Yesus wohipareta o womaha madorou gënanga ihupu unangoka. Ka hamanaroka ünanga iwikuaha o womaha madorou gënanga hiädono ngarokö aigiama deʼ ail̄ou yalikoka de o rante deʼ unanga iwï göana ihidodiai, ünanga ka wakunohi watöaka o rante gënanga daha o womaha madorou iwi ao ünanga o tonaka i kokakahaika.

³⁰O Yesus wïleha manyawaika gënanga, ”O naguna aniromanga?” ”Ahi romanga o ’Legiun’,” o nyawa gënanga wohaluhu — hababu naga mangöe o womaha madorou iwohamoka aidiriika.

³¹O womaha madorou gënanga igahoko de magiria hupaya o Yesus uha wäduhu önanga o Honenge ma Wai magoronauku.

³²Ima hi tigi-tigika de o ngï gënanga naga duru kaha ngöe o ode magogiria o inomo imälingiri o doporono magelehoroka. O womaha madorou gënanga yogegoto yogahoko o Yesusika hupaya wahigumal̄a yowohama o odeika gënanga. Deʼ o Yesus wömodeke.

³³Daha o womaha madorou gënanga o nyawaka gënanga de ihupu de iwohama o odeika gënanga. Daha o ode gënanga i piringana deʼ o wai madatekoka de ima ngumo o taaga magoronauku, i paha yalutu.

³⁴O ode yogöa-göana gënanga yamäke okia idädadioka. Deʼ onanga yopiringana deʼ ihingahu o abari gënanga o kota deʼ o kapongo magilolitino.

³⁵Daha o nyawa yokoki hupu la yölega okia idädadioka. Onanga yoböa o Yesusika deʼ genangoka önanga iwimäke o nyawa wololapahioka de o womaha madorou gënanga wogogeruku womahi tigi-tigika o Yesus ail̄ouika. Unanga woma pakeangoka deʼ aidibanga itiaioka. Onanga yohawana.

³⁶Onanga yamö mäke-mäke i dädadioka gënanga, yoade-ade o nyawaika sarakia o nyawa gënanga iwihitogumu.

³⁷Daha mata-mata o Gerasa ma daera manyawa gënanga yogegoto yogahoko hupaya o Yesus wamal̄a o ngï gënanga, hababu önanga duru yohawana. Hoʼ o Yesus woharene manga ngotiril̄e womau wolio.

³⁸O nyawa wololapahioka de ö womaha madorou gënanga, wogahoko o Yesusika hupaya ünanga yakunu wonïki. Mä o Yesus wïhuloko ünanga woiki, wïtemo,

³⁹”Nolio deʼ nohi abari okia ma Jou Madutu wodiaioka ngonaika.” De o nyawa gënanga wohingahu o ngï yögetongo o kota magoronaka, okia o Yesus wodiaioka unangika.

⁴⁰Maöraha o Yesus womakilioro o taaga mahonongaika, o nyawa iwïbuhuku Unanga de manga mörene karana önanga magogiriaka iwïdodamä Unanga.

⁴¹Daha woböa womatëngo o pupuji matau genangoka mabaluhu. Ai romanga o Yairus. Unanga womarukuku o Yesus aihimangoka deʼ wogahoko de magiria hupaya o Yesus woböa aitauika,

⁴²karana ngoiora moma tëngo-tëngoka ami umuru o taongo ngimoi de hinoto ngade-ngade mohonenge. Ma gogiriaka o Yesus womä dagi o Yairus aitauika, o nyawa iwihidehoto Unanga okiaino hönanga.

⁴³Manga hidogoronaka nagaoli o ngoheka momatëngo mopanyake mokopoa o taongo ngimoi de hinoto iböto, ima dohanga de ami mede yadono. Münanga mamataka hagala ami tiwi de ami arata moi-moi matiti moma houru madoterika, mä koiwa naga yakunu imitogumu.

⁴⁴O ngoheka gënanga momahi tigi o Yesus ai poretino, daha matigi o Yesus ai juba mabarene. O öraha gënanga o ngoheka mokokopoa gënanga itogumu.

⁴⁵O Yesus woleha, ”O nagona ihitigi Ngohi?” O nyawa mata-mata imahi pongono. De o Petrus wotemo, ”Bapa naga o nyawa duru mangangöe inikilolitino; önanga inieho-ehoto Bapa!”

⁴⁶O Yesus wotemo, ”Mä naga o nyawa ihitigi Ngohi. Ngohi tohiöriki gënanga, hababu naga o kuata ihupu Ngohioka.”

⁴⁷O ngoheka gënanga momanäko amimanarama ihiorikoka. Hoʼ munanga maino de mohahara daha momarukuku o Yesus aihimangoka. De münanga mohi ade-ade o nyawa mata-mata manga himangoka, yadodoa homünanga mïtigi o Yesus, deʼ amipanyake itogumu o öraha gënanga dika.

⁴⁸O Yesus womitemo munangika, ”Ngohi ora, karana ngona nongaku Ngohino ngona notogumu. Noiki de mahalamati.”

⁴⁹Magogiria o Yesus kawo temo-temohi, womatëngo o huhuloko o Yairus aitauoka de waino. Unanga wïtemo o Yairusika, ”Ngoni ora Tuanga mohonengoka. Ngaro uha Tuanga nihidadi huhali ma Bapa Guru.”

⁵⁰Maöraha o Yesus woihene gënanga, Unanga wïtemo o Yairusika, ”Uha nohawana. Nongaku dika, deʼ ngoni ora aha motogumu.”

⁵¹Imahi adonika o Yairus aitauoka, ka o nyawa moiö de o Yesus wahigumal̄aua yowohama dede Unanga sowaliua o Petrus, o Yohanis, o Yakobus deʼ o ngohaka gënanga ngomi ayo de amiama dika.

⁵²Mata-mata o nyawa manga gogiria yoari deʼ yododora karana o ngohaka gënanga mohonenge. Mä o Yesus wätemo, ”Uha niari. O ngohaka gënanga mohonengua, münanga duga-duga momaidu!”

⁵³Onanga iwigogiete o Yesus, hababu önanga ihiöriki o ngohaka o ngoheka gënanga mohonengoka.

⁵⁴Ipaha o Yesus wasö o ngohaka gënanga amigiama deʼ wotemo, ”Nomomiki, Ngohaka!”

⁵⁵O ngohaka gënanga aminyawa ilioli munangika, deʼ o öraha gënanga dika münanga momomiki. Iböto de gënanga o Yesus wähuloko imitofo o ngohaka gënanga.

⁵⁶O ngohaka gënanga amidimono duru yohëranga. O nagonaika dika o Yesus wäduhunu amidimono ihi ngahu i dädadi gënanga.