Read Tobelo O LUKAS 9 Bible Online

O LUKAS 9 - Tobelo bible

O LUKAS 9

¹O Yesus wä ahoko iwinöninïki yangimoi de yahinoto, daha wahi döaka onangika o kuaha la yaduhu o womaha madorou deʼ i hi togumu o panyake.

²Ipaha Unanga wähuloko önanga yoiki yahi togumu o nyawa yopopanyake deʼ ihingahu o abari mangale sarakia ma Jou Madutu wopareta hokä o Koano.

³ ”Uha niao okia naga niadodagioka,” o Yesus wätemo onangika. ”Uha nimägao o diki-diki, ekola o hadaka mapopoje, ekola o inomo, ekola o tiwi, ekola o pakeanga hinoto.

⁴Kiaka dika ngini inïtarima, nigogere genangoka hiädono ngini niamal̄a o kota gënanga.

⁵ Deʼ kiaka ngini inï tarimaua, maöraha ngini niamal̄a o kota gënanga, niaparihuku nia l̄ou mahoatil̄e makafo, hokä o hohininga onangika.”

⁶Iwinöninïki o Yesus imäjobo, daha yoiki o kapongo-kapongoika la ihi ngahu o Abari ma Oa gënanga deʼ yahitogumu o nyawa yopopanyake kiaka de kiaka dika.

⁷ Maöraha o Herodes, wopopareta o Galileaka, woihene mangale mata-mata idädadi gënanga, ünanga wobingu. Hababu naga utu yotemo o Yohanis Wo ohi-ohiki wowangokali.

⁸Nagaoli yotemo o Elia woböakali. O nyawa mahomoali yotemo, o nabi-nabi kahuruonino womatëngo wowangoli.

⁹O Herodes wotemo, ”Ngohi tähulokoka o nyawa yatobiki o Yohanis aihäeke. Mä o nyawa nënanga imoteke madiai o naguna Unanga gënanga? Naga mangöe toihenoka mangale Unanga.” De o Herodes wohi dailako la mangale wïmäke o Yesus.

¹⁰O Yesus airasul-rasul imakilioro deʼ yoade-ade o Yesusika mata-mata önanga yadodiaioka. O Yesus wahigaro önanga, la woiki dede önanga imatingaka o Betsaida makotaika.

¹¹Mä maöraha o nyawa ihiöriki mangale o hali gënanga, önanga iwinïki o Yesus. Unanga wätarima önanga, daha wä ade-ade onangika mangale sarakia ma Jou Madutu wopareta hokä o Koano. Deʼ Unangö wahitogumu o nyawa yopopanyake manga hidogoronaka.

¹²Maöraha owange imuläenge itumunu, yangimoi de yahinoto o Yesus iwinöninïki yaino o Yesusino deʼ yotemo, ”Bapa, o ngï nënanga imatingakino. Iholoi yaoa Bapa nähuloko o nyawa ne önanga yoiki, hupaya önanga yakunu imälingiri o inomo deʼ o dodogumu o kapo-kapongika deʼ o kapongo-kapongoika i kilolitino nënanga.”

¹³Mä o Yesus wohaluhu, ”Ngini dika niahiol̄omo önanga.” Iwinöninïki o Yesus yato, ”Ngomi duga-duga miaroti motoa deʼ o nawoko ngai hinoto. Boteka ngomi kokiani mioiki mi ija o inomo la mangale o nyawa mata-mata nënanga?”

¹⁴(Yatakihiri naga yaribuhu motoa o nau-nauru genangoka.) O Yesus wätemo iwinöninïkika, ”Niä huloko o nyawa ne önanga yogogere imatotoomu, yatakihiri yamoritoa o doomu moi.”

¹⁵Iwinöninïki o Yesus gënanga yadiai okia o Yesus wahetongoka onangika.

¹⁶Daha o Yesus wal̄ë o roti motoa deʼ o nawoko o ngai hinoto gënanga, ipaha womamataga o dihangil̄e deʼ wotemo tarima kasi ma Jou Madutuika. Ipaha de gënanga Unanga wabëla-bëlaka o roti deʼ o nawoko gënanga de Ai giama daha wohidöaka iwinöninïkika la ihikodoku o nyawa yowöe-wöeika gënanga.

¹⁷Onanga mata-mata yol̄omo hiädono yäpunuhu. Daha iwinö ninïki o Yesus yatoomu o inomo gënanga maboloi mangöe o karaja ngimoi de hinoto.

¹⁸O wange moiuku, maöraha o Yesus magogiriaka womäniata womatëngoka, de ipaha iwinöninïki yaino Unangino. O Yesus wäleha onangika, ”Imoteke o nyawa yato, Ngohi nënanga o naguna?”

¹⁹ Onanga yohaluhu, ”Naga yato o Yohanis Wo ohi-ohiki. Nagaö yato o Elia, mahomoali yato o nabi kahuruonino womatëngo wowangoli.”

²⁰ ”Mä imoteke ngini mahirete, Ngohi nënanga o naguna?” o Yesus woleha. O Petrus wohaluhu, ”Bapa Ngona o Koano Wohihohalamati ma Jou Madutu wohijäjajioka.”

²¹Daha o Yesus wätemo iwinöninïkika, ”O nagonaika dika mahakali-kali uha nihingahu o hali gënanga.”

²²O Yesus wotemoli, ”O nyawa manga Ngohaka marai kokiani mangöe o huha watagongo deʼ o tutuda-tutuda deʼ o imam-imam manga häeke, daha o agama maguru-guru aha iwilawani imateke ributu. Unanga aha iwitoma, mä o wange hangeoka aha iwihimomikoli.”

²³ Ipaha o Yesus wätemo o nyawaika mata-mata naga ima toomuino genangoka, ”O nyawa yomau ihinïki Ngohi, kokiani yawohanga manga diri mahirete maparalu, yamoku manga salib o wange higeto-getongo, deʼ madodogumua ihinïki Ngohi.

²⁴ Hababu o nyawa yomau yöriwo manga ngango, aha manga ngango ihihanga. Mä o nyawa ihihuba manga ngango mangale Ngohi ahiparalu, aha manga ngango ihalamati.

²⁵Okia aiutumu womatëngo nako dunia mata-mata nënanga idadi katoünanga, mä unanga aingango ibodito deʼ ihihanga?

²⁶Nako o nyawa yämal̄eke ima ngaku mangale Ngohi deʼ Ahi dodötoko, o Nyawa manga Ngohakö aha iwimal̄eke womangaku o nyawa geönanga, maöraha Unanga woböa aha de Ai kuaha, deʼ Ai Ama aikuaha, de o malaekat-malaekat yotebi-tebini manga kuaha!

²⁷La nihiöriki: nengokadau niahidogoronaka naga yohonengua nako önanga yamäke owahi ma Jou Madutu wopareta.”

²⁸ O Yesus wädotoko o hali gënanga done o minggu moi ipahaika Unanga wäao o Petrus, o Yohanis deʼ o Yakobus o l̄okuil̄e la womäniata.

²⁹Magogiria o Yesus womäniata genangoka Ai biono ingali, deʼ aipakeanga iarehe de ileto-letongo.

³⁰Itodokanino o nyawa yahinoto, gënanga o Musa deʼ o Elia ihimatoko manga diri de o horoga macahaya. Onanga imateke ade-ade de o Yesus mangale Ai honenge kiaka itedekanokaua aha idadi o Yerusalemoka.

³¹

³²O öraha gënanga o Petrus deʼ aidodiawo yäkiokoka, mä itodokanino yomomiki, deʼ iwimäke o Yesus wocahaya, deʼ o nyawa yahinoto gënanga imaokoino dede Unanga.

³³Maöraha o nyawa yahinoto gënanga yomau iwimal̄a o Yesus, o Petrus wotemo o Yesusika, ”Bapa Guru, duru irahai ngone nenangoka. Kayaoa de ngomi mihigoko o tau gahumu hange: moi tongona Tuanga, moi to Musa deʼ moioli to Elia.” (O Petrus wotemo hoko gënanga mawomangaratiua okia wotemo.)

³⁴O Petrus magogiria kawo temo-temohi, moi o lobi iböa, deʼ yähawo önanga hiädono o Petrus de aidodiawo yohawana.

³⁵ I paha o lobino gënanga yoihene o ilingi mabetongo, ”Nënanga Ahi Ngohaka ti iri-iriki. Niwihi gihene Unanga!”

³⁶O ilingi gënanga imatogumu ipaha, önanga iwimäke o Yesus womatëngokahi genangoka. Iwinöninïki o Yesus imarïrïdoka mangale mata-mata gënanga, deʼ o nagonaikaö de ihi ngahua, okia önanga yamäke-mäkeoka.

³⁷Yarehino mawange o Yesus deʼ iwinöninïki yaruange gënanga o l̄okuku de youti, deʼ o nyawa yowöe-wöe yoböa o Yesusika.

³⁸Womatëngo o nauru yowöe-wöe gënanga manga hidogoronaka wopöaka, ”Bapa Guru, nohiriwo nilega ahingohaka — ünanga woma tëngo-tëngoka ahingohaka!

³⁹Nako o womaha madorou iwï ngino, ünanga itodokanino wopöaka deʼ airöehe itiri-tirihoka hiädono aiuru iabo. O womaha madorou gënanga kahoko genangika iwihangihara ünanga deʼ ioluku ihupu unangoka!

⁴⁰Ngohi togahokoka ininöninïki Bapa yaduhu o womaha madorou gënanga, mä onanga yakunua.”

⁴¹O Yesus wohaluhu, ”Goguleua ngini nënanga. Ngini duru o nyawa nitötobalawani deʼ ningakua! Hiädono muruonoka Ngohi kokiani togogere dede ngini deʼ tosabari nginika? Nïao nengino ani ngohaka gënanga!”

⁴²De o ngohaka gënanga womadagi wïdumutu o Yesus, o womaha madorou gënanga iwihi boha deʼ airöehe itiri-tirihoka. Mä o Yesus wapareta o womaha madorou gënanga ihupu deʼ o ngohaka gënanga wotogumu. De o ngohaka gënanga wï hilapahioli aiamaika.

⁴³Mata-mata o nyawa yohëranga yamäke ma Jou Madutu ai kuaha hoko gënanga ma amoko. Maöraha o nyawa kayo hëra-hërangohi yamäke mata-mata wadodiai, o Yesus wätemo iwinöninïkika,

⁴⁴”Nia tailako nihidodiai de uha niawohanga Ahi demo-demo nënanga. O Nyawa manga Ngohaka aha iwi hilapahi o nyawa manga kuahaika.”

⁴⁵Mä iwinö ninïki o Yesus gënanga imangaratiua Ai demo gënanga. O hali gënanga warahasia onangika hupaya önanga imangaratiua. Mä onanga yohawana yoleha o hali gënanga Unangika.

⁴⁶ Iwinöninïki o Yesus manga hidogoronaka ipuda o ributu mangale manga hidogoronaka o nagona iholoi yolamoko.

⁴⁷O Yesus wohi öriki to önanga manga dibanga, hababu gënanga Unanga wa l̄ë o ngohaka mai teteke womatëngo, deʼ o ngohaka gënanga wïokoil̄e Ai datekoka.

⁴⁸ Daha Unanga wätemo iwinöninïkika, ”O nyawa yätarima o ngohaka nënanga karana Ngohi, mamangarati ihitarima Ngohi. Deʼ o nyawa hitotarima Ngohi, iwitarima Unanga wohihö hulo-huloko Ngohi. Hababu o nyawa yo ete-eteke niahidogoronaka, geünanga iholoi woamoko!”

⁴⁹O Yohanis wotemo, ”Tuanga, ngomi miämäke o nyawa yaduhu o hetanga de Tongona Ani romanga, deʼ ngomi miwïduhunu ünanga, hababu ünanga ngone inoua.”

⁵⁰”Uha niwïduhunu ünanga,” o Yesus wïtemo o Yohanisika deʼ iwinöninïki o Yesus mahomoahi, ”hababu o nyawa inïlawanua, mamangarati inihi böa ngini.”

⁵¹Maöraha itigioka o Yesus iwigoraka ohorogaika, Unanga waputuhu la woiki o Yerusalemika.

⁵²Ho Unanga wähuloko o nyawa yoiki yohira, Unanga woturu. O nyawa wähulo-huloko gënanga yoiki, de yowohama o kapongo moi o Samaria mabereraka la yasadia o Yesus aikia honanga.

⁵³Mä o nyawa o kapongoka gënanga yoluku iwitarima o Yesus, hababu inyata-nyata duru Unanga aidumutu o Yerusalemika.

⁵⁴ Maöraha iwinöninïki o Yesus enagënanga o Yakobus deʼ o Yohanis ihiöriki o hali gënanga, önanga yotemo, ”Jou, boteka Jou nomau, ngomi migahoko o uku iuti o dihanguku la yäbinahaka o nyawa ne önanga?”

⁵⁵O Yesus womaiduloko, daha wängamo önanga.

⁵⁶Ipaha de gënanga önanga yoiki o kapongo mahomoaika.

⁵⁷O Yesus deʼ iwinöninïki magogiria ihigila-gila manga dodagi, naga o nyawa iwitemo o Yesusika, ”Bapa, ngohi tomau toninïki Bapa kiaika dika!”

⁵⁸O Yesus wohaluhu, ”O kaho honganika de ma arukoka, deʼ o totaleo de maigutoka, mä o Nyawa manga Ngohaka koiwa Ai ngï womahi ruba-ruba.”

⁵⁹Daha o Yesus wïtemo woma tengoli, ”Nohi nïki Ngohi.” Mä o nyawa gënanga wotemo, ”Bapa nohihi gumal̄a ngohi toliohi la tilungunohi ahiama.”

⁶⁰O Yesus wohaluhu, ”Mal̄aika o nyawa yohone-honengoka yälungunu mahirete manga nyawa yohone-honengoka. Mä ngona, noiki deʼ nohingahu-ngahu o abari ma Jou Madutu womulaengoka wopareta.”

⁶¹ Naga o womatëngo mahomoa wotemo, ”Bapa ngohi tomau toninïki Bapa, mä nohihi gumal̄a ngohi toliohi la tomahi ngahuohi.”

⁶²O Yesus wïtemo o nyawaika gënanga, ”O nyawa yomulaengoka yopajeko, de ima lega manga poretoko, ipatutua yodadi o gegetongo ma Jou Madutu aiumati.”