Read Tobelo O ULANGAN 1 Bible Online

O ULANGAN 1 - Tobelo bible

O ULANGAN 1

¹O buku nënanga madol̄a o demo-demo wohi ado-adono o Musa o Israel manyawaika maöraha önanga naga o tonaka makokaka haka o Yordan ma Waioka. O wai gënanga naga o Yordan ma Ngairi o wange mahiwaroko, imahi tigi-tigika o Suf ma kotaika, o Paran ma kota hara moi, deʼ o kota-kota o Tofel, o Laban, o Bazerot deʼ o Di-Zahab hara moioka mahidogorona.

²(O Sinai mal̄okuoka hiädono o Kades Barneaika yanonu o Edom matonaka madoporono madaera, iparalu madodagi o wange ngimoi de moi.)

³O wange mamoioka o mede ngimoi deʼ moi o taongo moruata ma goronaka ipahaika önanga yamal̄a o Mesir, o Musa wohiadono o Israel manyawaika gënanga mata-mata ma Jou wohi popareta ma-mangale wahetongo onangika.

⁴ Genanga idadi ipahaika o Musa wihohihanga o Sihon, o Amori manyawa manga koano wapopareta o Hesybon ma kota, deʼ o Og, ma koano Basan wapopareta o Asytoret deʼ o Edrei ma kota.

⁵Hoʼ o wange mahiwaroko o Yordan o Moab madaeraka, o Musa madodihiraka wohi tararono ma Jou Ai tita deʼ ai pareta-pareta. O Musa wato,

⁶”Maöraha ngone naga o Sinai mal̄okuoka, ma Jou tongone nanga Jou Madutu wotemo, ’Ngini yaoaka ma dekana nigogere ol̄okuoka nënanga.

⁷O öraha nënanga nia kilianga nia tau-tau madoomu deʼ ni oiki o Amori manyawa manga daera deʼ mal̄oku-l̄oku okaika deʼ ma mata-mataika madaera magilolitino, enagënanga o Yordan ma Wai, o daera deʼ madoporonoka deʼ matonaka irata-rataika, madaera o koreharail̄e idaduoka deʼ Ngöto i Kokorona mahohana. Nioiki nio gogere o Kanaan matonaka deʼ o Libanon mal̄oku mabutu-rungu hiädono o Efrat ma Ngairi ma amo-amokika.

⁸Ngohi, ma Jou, tahijajioka o tonaka gënanga mata-mata ika nia ete deʼ nia tohoraika o Abraham, Ishak deʼ o Yakub ikali toönanga manga difauku. Hoʼ nioiki nio gogere o tonaka gënanga.’ ”

⁹O Musa wätemo o Israel ma nyawaika gënanga, ”Maöraha ngone naga o Sinai mal̄okuoka ngohi tinï temo nginika: Homahi tagongo mangale hinï tuda ngini itubuho holi mangale ngohi. Ngohi tadiai takunua tomatengo, hababu

¹⁰ma Jou nia Jou Madutu wadiaoka nia gegetongo nia ngöe i dogo hokä o murumu o dihangoka mangöe.

¹¹Tanu nia Jou, nia ete deʼ nia tohora manga Jou Madutu wö dogo nia gegetongo nia ngöe hiädono ihi gali maribuhu moi i dogo, deʼ ngini winihidadi o hoana deʼ o berera ma hasili i wöe hokä winihi jajioka!

¹²Mä sarakia ngohi takunu tomatengo tamoku tomahi tagongo madodubuho mangale tadiai mata-mata nia ributu mahali.

¹³Niä iriki o hoana moi-o hoana moi o nau-nauru yamuruono naga yososawaro, iwöe okianaga yanako ima momangarati, hupaya ngohi tä goraka önanga mangale inï tuda ngini.

¹⁴O gogahoko gënanga ngini nia tarima kairorahai.

¹⁵Hababu gënanga o tutuda-tutuda ngini nia iri-iriki manga hidogoronaka, yamuruono naga yososawaro deʼ iwöe okianaga yanako ngohi täl̄ë deʼ ngohi tägoraka mangale inihi häeke ngini. Yamuruono naga yodadi yaribuhu moi manga tutuda, mahomoa yaratuhu moi manga tutuda, yamoritoa deʼ yangimoi. Ngohiö tä goraka o tutuda-tutuda mahomoa mangale ihi dailako nia hoana.

¹⁶Maöraha gënanga ngohi tahimanarama önanga hoko nënanga: Nia tailako nihi dodiai o ributu-ributu idadadi nia hoana manyawa manga hidogoronaka. Nihidöaka o putuhu iadi-adili, kayaoa o perkara magoronaka yakorona nimako hoana deʼ o berera moi, ekola yakorona o nyawa maporetino yogö gogere tingini nia hidogoronaka.

¹⁷Nia putuhu yakunua mahonongauku itubuho; moi-moi o nyawa kokiani ngini nia tailako yahowono ekola yatiai madodagi nihi-koketero, nia fara deʼ nia tingakua o nagona o nyawa geönanga. O nagonaika dika mauha nia modongo, hababu o putuhu ngini naga nio gelenga iböa ma Jou Madutuino. Nako o perkara moi ihuhaholi nginika, niao ngohino, hupaya ngohi taputuhu.

¹⁸O öraha gënanga dika ngohi tohidöaka o hidumutu-hidumutu nginika mangale hagala o hali mahomoa kokiani ngini nia diai.”

¹⁹”De ima moteke deʼ ma Jou tongone nanga Jou Madutu Ai pareta, ngone hamal̄a o Sinai mal̄oku deʼ hotagi hanonu o tonaka ikokakaha ilua-luasi deʼ homodongo hameta o Amori manyawa manga daera deʼ mal̄oku-lokuoka. O öraha gënanga ngone homahi-adono o Kades-Barneaika,

²⁰ngohi totemoka: Oraha nënanga ngini nimahiadonoka o Amori manyawa manga daeraika deʼ mal̄oku-l̄okuoka, o tonaka wonahi döa-döaka ma Jou nanga Jou Madutu, deʼ tongone nanga ete deʼ tohora manga Jou Madutu. Nia make, nia himangoka o tonaka gënanga imahoheika. Nioiki mangale nio gogere hokä ma Jou wohi popareta. Uha nibingu ekola nihawana.

²¹

²²Mä ngini nia ino ngohino deʼ nitemo, ’Iholoi yaoa ngone hahuloko yamuruono naga yohira mangale yatailako o berera gënanga hupaya önanga yakunu yahetongo ngohino o ngekomo okia kokiani ngone hanonu deʼ sarakia o kota-kota aha ngone hongika.’

²³O gogahoko gënanga ngohi tohimoteke, hababu gënanga ngohi tä iriki yangimoi deʼ yahinoto, o hoana moi imatengo.

²⁴Onanga yongohama o daera deʼ mal̄oku-l̄okuoka gënanga imatero magurutika deʼ o Eskol ma Wai, deʼ yatailako kiaika honanga.

²⁵De ipaha ima kilioro ngoneino yoao o gota mahohoko ha ol̄o-ol̄omo önanga yamö make-make dokengoka deʼ ihi ngahu o berera aha ma Jou nanga Jou Madutu wonahi döa-döaka gënanga duru kahaburere.

²⁶ Mä ngini nia lawani ma Jou nanga Jou Madutu Ai pareta deʼ nioluku niö ngohama o berera gënanga.

²⁷Ngini ningamo hoko nënanga, ’Ma Jou wonä dohata ngone. Done Unanga wona ao ngone o Mesir mabereraka deʼ hohupu mangale wona hilapahi ngone o Amori manyawa manga giama ma hoatika hupaya önanga inä toma ngone.

²⁸Hoʼ mangale okia ngone hokaika dokengika? O nyawa ngone ha hidingo-dingoto dokengika yodiai ngone hohawana ihi ngahu o hoana deʼ o berera manyawa gënanga iholoi yokuata deʼ iholoi yonauru deʼ ngone, deʼ önanga yogogere o kotaka mabebeno o mehele hokä o dihanga magurutil̄e. Onanga yämake o nyawa manga ago-agomo dokengoka!ʼ

²⁹Mä ngohi tätemo: Uha nia modongo o nyawa gënanga.

³⁰Ma Jou nia Jou Madutu aha winï tuda ngini deʼ woparangi mangale ngini hokä ngini nia hakihioka mahirete o Mesir ma tonakoka,

³¹ deʼ o tonaka ikokakahaka. Ngini nia make arakia ma Jou nia Jou Madutu winï ao ngini deʼ nia halamati o ngekomo ma gurutu gënanga hiädono o ngï ino nënanga, imatero hokä o ama womatengo watotiri aingohaka.

³² Mä ngaroka ngohi tahetongoka hoko gënanga, ngini ni olukohi ni ngaku ma Jou nia Jou Madutuika,

³³naga wo tagi nia himangoka mangale wo lingiri o ngï ngini ni mä tau. Unanga wo hi matoko o ngekomo nginika o hutu-hutu o liate o uku magoronaka, deʼ o wange-wange o liate o lobi ma goronaka.”

³⁴ ”Ma Jou woihene nia daiana deʼ wongamo. Unanga wokoboto,

³⁵’Moiua o dorou madifauku nënanga aha yongohama o berera iboburere Tahi jajajioka nia ete deʼ nia tohoraika.

³⁶Duga-duga o Kaleb o Yefune aingohaka aha wongohama, karana ünanga kahirahi wosetia Ngohino. O Kaleb deʼ aingohaka deʼ ai danongika aha Tahi döaka o berera watö tailakoka kia ika honanga.’

³⁷Nginiö nidadi o hababu ma Jou wongamo ngohino deʼ wotemo, ’Musa, ngona ma aha konö ngohamua o berera gënanga.

³⁸Mä ani roriwo o Yosua o Nun aingohaka ai hininga nohi kuata. Unanga aha wätuda o Israeloka yaora o tonaka gënanga.’

³⁹De ma Jou wonä temo ngoneino mata-mata, ’Nia ngoha-ngohaka kayo aluhohi mangale yakunuahi ihilihowono maoa deʼ madorou, o ngoha-ngohaka imoteke nia demo aha nia haturu-haturu yaora, onangika dika aha Tahi döaka o tonaka gënanga, deʼ önanga aha yogogere.

⁴⁰Mä ngini, nimakilioro o tonaka ikokakahaika nia nonu o ngekomo yameta o Kaba majikoika.’

⁴¹Ngini nihaluhu, ’Musa, ngomi mibaradohaka ma Jouika. Mä öraha nanga ngomi mimau mitagi mia himangiha miparangi hokä ma Jou, tongone nanga Jou Madutu wohipopareta.’ De moi-moi tingini nia hidogoronaka nima hidiai mangale niparangi, deʼ nia damake nia parangi o daera deʼ mal̄oku-l̄okuoka gënanga o hali ma gapa-gapanga.

⁴²Mä ma Jou wohitemo ngohino, ’Uha nohigumal̄a önanga yoparangi, karana Ngohi aha kotatomotekua önanga, ahaö toönanga manga haturu yahohihanga önanga.’

⁴³Ngohi tohiädono nginika okianaga ma Jou waheto-hetongo, mangini nihaduliua. Ngini nia lawani ma Jou Ai pareta, deʼ nia edenge nioiki o daera deʼ mal̄oku-l̄okuokaika gënanga.

⁴⁴Daha o Amori manyawa yogogogere o daeraka gënanga yohupu inï lawani ngini. Onanga duru kamanga ngöe, hokä o ohungu deʼ matikaka. Onanga iniginïki ngini magurutika ima tero o Hormaika, deʼ ini hohihanga ngini o Edom madaeraika deʼ mal̄oku-l̄okuoka.

⁴⁵De ipaha ngini nimakilioro deʼ nimahi böaka ma Jouika nigahoko o roriwo, mä ”Unanga woluku wohigihene ekola winï tai-lako ngini.”

⁴⁶”Genanga deʼ iböto ngone hogogere o Kades madaeraka duru madekana.