Read Tobelo O ULANGAN 11 Bible Online

O ULANGAN 11 - Tobelo bible

O ULANGAN 11

¹”Ni wï dora ma Jou nia Jou Madutu, deʼ nihingounu salalu hagala Ai pareta.

²Nio hohininga hiädono öraha nënanga de okianaga ngini nia make-makeoka ngini nihi öriki mangale ma Jou. Nia ngoha-ngohaka yanakoua nia mö make-make gënanga. Ngini nia hakihioka ma Jou nia Jou Madutu Ai mulia, Ai kuata, Ai kuaha

³ deʼ ihö hera-heranga Wadodiaioka. Ngini mahirete nia make okianaga Wadodiai o Mesir manga koanoika deʼ ai berera yamode-modekika.

⁴ Ngini nia make sarakia ma Jou wabinaha o Mesir manga tentara manga kuda mata-mata kamamoi deʼ manga kereta ihi poparangi. Onanga mata-mata yalutuoka o Gelagah ma ngötuku maöraha magogiriaka inï ginïki ngini.

⁵Ngini nihi öriki okianaga ma Jou wadodiai nginika o tonaka ikokakahaoka konimahi adonowahi nenangino.

⁶ Nginiö niohininga okianaga ma Jou wadodiai o Datan deʼ o Abiramika, o Eliab aingoha-ngohaka o Ruben ai hoanino. Ngini mata-mata nia himangoka, o tonaka ibelaka deʼ yälahiri önanga kamamoi de manga ngohaka de manga hekata, manga tau, manga gilaongo mata-mata deʼ toönanga manga gigini.

⁷Igoungu ngini deʼ nia lako mahirete nia makeoka mata-mata ihö hera-heranga ma Jou wadodiai.”

⁸”Nihingounu o tita mata-mata ngohi tohi ado-adono nginika o wange nënanga, done ngini aha yakunu nia tobongo o ngairi deʼ niwohama o bereraika itedekanokaua ngini niö gogere.

⁹Deʼ ngini aha niwango itedekana o berera ikaya-kaya deʼ iboburereoka Wahi jajajioka ma Jou nia ete deʼ nia tohoraika deʼ toönanga manga ngohaka deʼ manga danongika.

¹⁰O berera ahaö nio gogogere gënanga hokä o Mesir ma tonakua, o ngï mahira ngini nio gogere. Dokengoka kokiani ngini nikarajanga itubuho mangale o akere nihi ngohama nia dumuleika maöraha nihi barihi nia gihihi.

¹¹Mä o berera aha nio ngohama o tonaka dema l̄oku-l̄okuoka dema wai-wai; matonaka yapehaka deʼ o awana.

¹²Ma Jou nia Jou Madutu wapaliara o berera gënanga deʼ wö goana o taongo magurutu.

¹³ Hoʼ nihingounu o pareta-pareta ngohi tohi ädo-ädono ngini ika o wange nënanga; niwï hininga ma Jou nia Jou Madutu deʼ ni puji Unangika deʼ ingodumu nia jiwa deʼ nia röehe.

¹⁴Nako ngini nidiai hoko gënanga, done ma Jou aha wohiguti güti o awana nia tonakuku ma orahoka, ipahaino ngini niutuku, deʼ maöraha ngini nimulaenge nidatomo. Done ngini aha iwöe nia gandum, o angguru deʼ o zaitun maminya,

¹⁵ikali o momo mangale nia aiwani o gigini. Hagala o inomo nipoparalu aha isadia mangale ngini.

¹⁶Uha ngini nimau nikurutika deʼ ma Jou mangale nihuba deʼ nima higilaongo o gikiri mahomoaika.

¹⁷Nako ngini nia tilakuru o pareta gënanga, ma Jou aha winï ngamo nginika. Unanga aha wohi gutiua o awana; nia tonaka idudungu deʼ makoku huhunu hiädono nia dö dato-datomo mahasili koiwa. Done oöraha madodipoko magoronaka ngini nihonenge o tonaka maboburereoka ma Jou winihi döa-döaka nginika.

¹⁸ Niohohininga deʼ nia tailako nihidodiai o pareta-pareta gënanga. Nia giamika nihi dapakitika deʼ nia bionoko nihi dapakitoko mangale niohohininga.

¹⁹Niä dotoko nia ngoha-ngohakika. Nihi ade-ade o tau magoronaka, deʼ o tau maporetoka, maöraha nikarajanga deʼ maöraha nimahi batonguku.

²⁰Nia tulihika nia tau mangorana maliateika deʼ nia ngorana ma amo-amokika.

²¹Done ngini deʼ nia ngoha-ngohaka aha nia umuru ikurutu o bereraka ma Jou nia Jou Madutu wahi jajajioka nia ete deʼ nia tohoraika. Hokä madekana naga o dihanga o dunia mal̄okuoka, hoko genangoli madekana ngini aha nigogere o tonakoka gënanga.

²²Nihi ngounu deʼ nia setia o tita mata-mata ngohi tohi ado-adonoka nginika: Niwï hininga ma Jou nia Jou Madutu, nia diai hagala wohi popareta nginika, deʼ kokiani ngini kahirahi nisetia Unangika.

²³Done ma Jou aha wä duhu mata-mata o hoana deʼ o berera manyawa gënanga nia himangoka, deʼ ngini aha niö gogere o tonaka tohoana deʼ o berera manyawa iholoi yolago-agomo deʼ iholoi yokuata dede ngini.

²⁴ O daera yogetongo ngini nia pitoko aha idadi tingini madutu. Nia daera o tonaka ikokakahaka o koreharail̄e deʼ itauru hiädono o Libanon mal̄oku ma Buturungu o koremieuku, deʼ o Efrat ma Ngairoka o wange mahiwaroko hiädono o Ngöto i Kokorona o wange madumuniha.

²⁵Ya mode-modekika o berera gënanga ma Jou nia Jou Madutu aha wadiai hagala o nyawa inï modongo nginika hokä wojajioka, hiädono kao nyawa moiö ma yakunua inï tatatoko.

²⁶O wange nënanga ngini yakunu nimä ngiriki o barakati ekola o lolai.

²⁷Ngini aha winihi barakati nako nihi ngounu ma Jou nia Jou Madutu Ai pareta-paretaika, o wange nënanga ngohi tohiädono nginika.

²⁸Mä ngini aha wini lolai nako ngini nihi ngounua ma Jou nia Jou Madutu Ai pareta-paretaika, mä nima idulu mangale nia huba hagala o gikiri mahomoa komaiwahi ngini nia huba.

²⁹ Ma Jou nia Jou Madutu wini ao ngini niwohama o berera ika ahaö ngini nio gogere deʼ iböto, o barakati gënanga kokiani ngini nia hetongo o Gerizim mal̄okuoka deʼ o lolai gënanga o Ebal mal̄okuoka. (

³⁰Ol̄oku hinoto gënanga ma gogere o Yordan ma Ngairi o wange ma dumuniha o Kanaan manyawa manga daera yogogere o Yordan ma Waioka, o wange ma dumuniha ihimangoka ikurutikaua deʼ o puji mangï ma gota mautu o Moreoka imahi tigi-tigika o Gilgal ma kotaika.)

³¹Itedekanokaua ngini nia tobongo o Yordan ma Ngairi deʼ nio gogere o tonaka ma Jou nia Jou Madutu winihi döa-döaka nginika. Ngini nia ora o tonaka gënanga deʼ iböto deʼnio gogere genangokadau,

³²ngini kokiani nihi ngounu o tita mata-mata ngohi tohi ado-adono nginika o wange nënanga.”