Read Tobelo O ULANGAN 12 Bible Online

O ULANGAN 12 - Tobelo bible

O ULANGAN 12

¹”Nënanga o tita-tita kokiani ngini nihi ngounu ho nia umuru magurutu o bereraka ma Jou, nia Jou Madutu wahi döa-döaka nia ete deʼ nia tohoraika.

²Niwohama o bereraika gënanga deʼ iböto kokiani ngini nia wedere o puji mangï ol̄oku ma gogurutil̄eoka, o doporono-o doporonoka deʼ o gota mahoka irubu-rubu matimiuku, o hoana deʼ o berera manyawa genangokadau yogö gogere mangï yahuba toönanga manga gikiri.

³ Nia ruba toönanga manga huhuba-huhuba mangï deʼ nia wede-wederuku o liate-liate o helewo naga önanga yapulono deʼ ya mao ikaramati. Nia tuhuku o Asyera ma nonako-nonako, deʼ nia wedere toönanga manga gomanga madulada, hiädono o gikiri-gikiri gënanga aha yahuba okaua o ngïoka gënanga.

⁴Maöraha ngini niwi huba ma Jou nia Jou Madutu, uha nimä duru o nyawa geönanga yahuba toönanga manga gikiri.

⁵Ingodumu o Israeloka manga hoa-hoana madaeraino ma Jou nia Jou Madutu aha wairiki moi o ngï hupaya tongone nanga hoana deʼ nanga berera manyawa yakunu yoboa Ai himangika deʼ iwi huba Unanga.

⁶O ngï ika gënanga kokiani ngini niao o huhuba-huhuba i tö tuhu-tuhuku ikali o huhuba-huhuba mahomoa, nia huhuba o regu ngimoi ikali nihi huba-huba mahomoa, o huhuba nia jaji mabobangu, o huhuba o hininga mahuka deʼ o hapi mangohaka deʼ nia kabingi deʼ nia duba madomoro.

⁷Genangoka dauö, ma Jou nia Jou Madutu Ai himangoka, ngini kamamoi deʼ nia hekata deʼ nia ngoha-ngohaka kokiani ni ol̄omo deʼ nia morene mangale hagala nia hidailako mahasili karana ma Jou nia Jou Madutu winihi barakati.

⁸Nako gënanga maöraha iboaka, ngini uhali nia diai hokä o öraha nënanga. Hiadono öraha nënanga ngini nipuji nia hininga mahuka,

⁹karana ngini niwohamowahi o bereraika ma Jou nia Jou Madutu nihi döa-döakoka nginika, o ngï ngini yakunu ni gogere kai rorahai.

¹⁰Ngini nia tobongo o Yordan ma Ngairi deʼ iböto, ma Jou nia Jou Madutu aha winï riwo ngini niö gogere deʼ nimä tau koni hawanua deʼ nia hininga irïdi.

¹¹De ipaha ma Jou nia Jou Madutu aha wairiki moi o ngï kiaka Unanga kokiani niwihuba. Genangika kokiani ngini nioiki niao hagala tinihi poparetaka, enagënanga o huhuba yatö tuhu-tuhuku deʼ o huhuba-huhuba mahomoa, nihihö huba-huba o regu ngimoi deʼ nihihö huba-huba nia tinga-tingakoka naga nihi jajaji oka ma Jouika.

¹²Ni mörene ma Jou nia Jou Madutu Ai himangoka, kamamoi de nia ngoha-ngohaka, nia gogilaongo, deʼ o Lewi manyawa naga yo gogere nia kotaka, karana ma hababu o Lewi manyawa yamakeua o hidoku o tonaka nia bereraka.

¹³Ngini yakunua nihihuba nia huhuba o ngi sabarangika ngini mahirete nima ngiriki,

¹⁴mä duga-duga o ngï ma Jou wairi-irikoka moiani nia hoana manga daeraka. Genangokadau dika kokiani ngini nihihuba o huhuba yatö tuhu-tuhuku deʼ nia diai o hali mahomoa tinihi poparetaka nginika.

¹⁵Mä ngini nibebasi mangale nia tonaka nia aiwani o gigini deʼ nia ol̄omo ma akeme kiaka dika ngini nigogere. Ngini yakunu nia ol̄omo imatero mangöe de ma Jou nia Jou Madutu winihi döa-döaka nginika. O nyawa moi-nyawa moi, ka yaoa yotebi-tebini kayaoa yopese-peseke, yakunu ya ol̄omo o hiode ma akeme, gënanga, hokä ngini yakunu nia ol̄omo o maijanga ma akeme ekola o maijanga ma akeme.

¹⁶ Duga-duga ma awunu yakunua nia ol̄omo, ma kokiani yakopoa o tonakuku hokä o akere.

¹⁷O ngï nimä tau-tauoka ngini yakunu nia ol̄omo ihi huba-huba yaregu ngimoi nia gandum, nia angguru, nia zaitun maminya, o hapi ekola nia kabingi de nia duba madomoro, o huhuba nihi fangu-fangu nia jaji, o huhuba o hininga mahuka ekola o huhuba mahomoa.

¹⁸Ngini deʼ nia ngoha-ngohaka kamamoi de nia gogilaongo deʼ o Lewi manyawa yogogere nia kotaka, kokiani ya ol̄omo o huhuba gënanga ma Jou nia Jou Madutu Ai himangoka, o ngï wairi-irikoka ma Jou nia Jou Madutu. Deʼ o ngïoka gënanga kokiani ngini nimorene karana hagala nia hidailako.

¹⁹Nio goana uha hiädono o Lewi manyawa nia mal̄aika yohuha moiua yapaliara maöraha madekana ngini niwango o bereraka gënanga.

²⁰Ma Jou nia Jou Madutu wawoatika nia berera mabatingi hokä Unanga winï jajioka de iböto, ngini yakunu niol̄omo o hiode ma akeme nia hininga mahuka.

²¹Nako o ngï wairi-iriki ma Jou nia Jou Madutu ikurutika holi de tingini nia ngï nigogere, ngini yakunu nia toaka o hapi o dutu moi, o duba ekola o kabingi ma Jou wini hi döa-döaka nginika, deʼ nia ol̄omo ma akeme nia ngï nigö gogeroka de nia hininga mahuka hokä ngohi ta heto-hetongoka nginika.

²²O nyawa moi-nyawa moi, kayaoa yotebi-tebini kayaoa yopese-peseke yakunu yaol̄omo o hiode ma akeme gënanga hokä ngini yakunu nia ol̄omo o maijanga ma akeme ekola o maijanga ma akeme.

²³ Mä o hiode ma akeme de ma awunokahi yakunua nia ol̄omo, karana o jiwa naga o awunu magoronaka, deʼ ngini yakunua nia ol̄omo majiwa kamamoi de ma akeme.

²⁴Mä awunu hakali-kali yakunua nia ol̄omo, mä kokiani nia kopoa o tonakuku hokä o akere.

²⁵Nako ngini nihingounu o pareta gënanga, ma Jou aha wo sanangi, deʼ ngini ikali nia difauku aha yohalamati.

²⁶Hagala o huhuba deʼ ihihö huba-huba nihijä jajioka ma Jouika kokiani ngini niao mangï ika ma Jou waö iri-iriki.

²⁷O huhuba yatö tuhu-tuhuku deʼ o huhuba ya ol̄o-ol̄omo o hiode ma akeme kokiani nihihuba o huhuba mangï gënanga mal̄okuoka.

²⁸Nia tailako nihidodiai hagala tohi poparetaka nginika, done ngini nia diai ma oa-oa deʼ ma Jou nia Jou Madutu Ai hiningaika yadaene hiädono ngini deʼ nia difauku yohalamati deʼ manga hininga irïdi kahi ado-adonika.”

²⁹”Ma Jou nia Jou Madutu aha wä binaha hagala o hoana deʼ o berera manyawa yogö gogere o bereraka gënanga, hiädono ngini yakunu niö gögere deʼ nimä tau.

³⁰Hagala o hoana deʼ o berera gënanga wä binaha deʼ iböto, nimahi dodiai uha hiädono ngini nimä duru önanga yahuba o gikiri mahomoa, hababu o manarama gënanga inï gao o bodito.

³¹Hagala o hoana deʼ o berera manyawa gënanga madodagi ya huba toönanga manga gikiri, uha nimä duru mangale niwi huba ma Jou nia Jou Madutu, hababu önanga yohuba deʼ yadiai o manarama-manarama ipese-peseke wodoha-dohata ma Jou. Maboboloi toönanga manga ngoha-ngohaka mahirete yatuhuku o huhuba mangï mal̄okuoka, o huhuba mangale toönanga manga gikiri.

³² Nia diai hagala tinihi popareta nginika; uha niö dogo ekola nia kuranga.