Read Tobelo O ULANGAN 13 Bible Online

O ULANGAN 13 - Tobelo bible

O ULANGAN 13

¹Nako o nabi womatengo ekola ai biaha wonä nanere winihi jaji moi o mujizat ekola ihö hera-heranga

²deʼ madungutu hupaya ngini nia huba deʼ nima higilaongo hagala o gikirika komaiwahi ngini nia nako, ngarokä okianaga winihi jajaji gënanga igou-goungu idadi,

³uha niwi domataga unangika. Ma Jou nia Jou Madutu wï pake o nyawa geunanga mangale winï taili ngini, mangale watailako botekä igou-goungu ngini niwï hininga ma Jou deʼ nia hininga ma gahumu ekola kowali.

⁴O nyawa marupa hoko gënanga kokiani iwi hukumu iwi ho honenge, karana womau winihi rehene ngini o ngekomo ma Jou nia Jou Madutu winihi popareta nginika. Unanga ganga o nyawa ma dorou karana winï huloko ngini niwilawani ma Jou nia Jou Madutuika winihi bebebasi ngini o Mesiroka, o ngï ngini imä gilaongo. Ho, ünanga kokiani niwitoma, hupaya o dorou gënanga nia hohihanga. Mä ngini kokiani niwinïki ma Jou nia Jou Madutu deʼ niwi horomati, deʼ niwihingounu Unanga, deʼ nia diai hagala Ai pareta. Kahirahi nisetia deʼ nimahi gilaongo Unangika.

⁶Nako ani dodoto ekola ani ngohaka o nauru ekola o ngoheka, ekola ngoni hekata nomï dora-dora ekola ani dodiawo maoa womahi bongonika deʼ wonibaja mangale nahuba o gikiri mahomoa ngona kona nakoua deʼ ani ete deʼ ani tohora mayanakoua, hagala o hoana deʼ o berera manyawa yotigi-tigino deʼ yokokurutika manga gikiri,

⁸uha nihi gihenika ünanga deʼ uha nohigumal̄a wonibaja. Uhali nïdora ekola nïriwo o nyawa geunanga.

⁹Unanga kokiani niwi kaweli deʼ o helewo hiädono wohonenge. Kokiani ngona ihira nomulaenge nikaweli, deʼ yongodumu o kawaha imahi moteke. O nyawa wahowo-howono gënanga kokiani niwitoma, hababu ünanga womau winihi tingaka ngini deʼ nia Jou Madutu ino ima gilaongo o Mesiroka, deʼ wonahi bebasi ngone.

¹¹Done yongodumu o Israel manyawa aha yoihene hagala o doma gënanga deʼ idadi yohawana, hiädono kao nyawa moiö ma, yodiai okaua itotorou gënanga.

¹²Nako ahaö ngini nio gogere o kota-kota ma Jou nia Jou Madutu winihi döa-döaka nginika, yakunu idadi o abari yodogilianga

¹³naga yamuruono naga o nyawa madorou nia hoana deʼ nia bereraino yahirehenoka o kota manyawa mangale yahuba o gikiri ngini konia nako-nakoua.

¹⁴Nako ni ihene ima kokuhudu hoko gënanga, niatailako nihidodiai. Nako igou-goungu o dorou gënanga idadioka,

¹⁵done yongodumu o kota manyawa gënanga kamamoi deʼ manga gigini kokiani yatoma. O kota gënanga kokiani yabinaha kama moi-uku.

¹⁶Ingodumu o kota manyawa gënanga manga arata kokiani ya toomu deʼ yatoporonil̄e o tonaka ilua-luasoka, daha o kota deʼ hagala manga arata kokiani yatuhuku hokä o huhuba ma Jou nia Jou Madutuika. Genanga mata-mata deʼ iböto kokiani niamal̄aika idadi okia honanga mangedere deʼ yakunua ihi gokoli.

¹⁷O bara-baranga yalololai gënanga yakunua nia gogono mangale nia diri mahirete, ma kokiani nia binaha kama moiuku. Done ma Jou Ai dohata aha iogoro deʼ Unanga aha wohi matoko o dora deʼ o hayanga nginika. Unanga aha ai hininga imura nginika deʼ winihi dadi ngini o hoana deʼ o berera ma ago-agomo hokä wo jä jajioka nia ete deʼ nia tohoraika,

¹⁸iti yakunu ngini nihi ngounu hagala Ai pareta ngohi tohi ado-adono nginika o wange nënanga, deʼ nia diai hagala Ai mau.”