Read Tobelo O ULANGAN 14 Bible Online

O ULANGAN 14 - Tobelo bible

O ULANGAN 14

¹ ”Ngini nënanga ma Jou nia Jou Madutu Ai umati. Hoʼ maöraha ngini nihaharu mangale o nyawa yohone-honenge, uha nia röehe nia l̄abo ekola nia kori nia häeke mahimangino, hokä ya dodiai o hoana deʼ o berera mahomoa manyawa.

² Ngini nanga toma Jou nia Jou Madutu; hagala o hoana deʼ o berera o dunia mal̄okuoka, ngini dika ma Jou Madutu winï iriki mangale nidadi Ai umati.”

³”Uha nia ol̄omo o aiwani ma Jou wohi nyö nyata-nyata iharamu.

⁴Ngini yakunu nia ol̄omo o aiwani-o aiwani nënanga: o hapi, o kabingi,

⁵o maijanga o duba o honganika, o kabingi o honganika

⁶deʼ mata-mata o aiwani makuliti i bela-belaka deʼ ma inomo yawedere yogilio mahohinoto.

⁷Ngini yakunua nia ol̄omo o aiwani makuliti ibelakua deʼ ma inomo yawedere yogilioua mahinoto. Uha nia ol̄omo o unta, o kelinci ekola o marmot. O aiwani gënanga iharamu, karana ngaroka mainomo yawedere yogilio mahinoto, mä hohinoto, mä kuliti ibelakua.

⁸Uha nia ol̄omo o ode. O aiwani gënanga iharamu karana ngarokä makuliti ibelaka, enanga ma inomo yawedere yogilioua mahinoto ma akeme yakunua nia ol̄omo, mahonenge yakunua nia peke.

⁹Ngini yakunu nia ol̄omo hagala o nawoko dema ëboka deʼ ma unahoka.

¹⁰O aiwani iwö wango-wango o akeroka ma ëbe koiwa deʼ ma ünaha koiwa ganga iharamu, hoʼ yakunua nia ol̄omo.

¹¹Ngini yakunu nia ol̄omo hagala rupa o totaleo iho haramua.

¹²Mä naga o totaleo o rupa muruono naga yakunua nia ol̄omo, enagënanga: o rajawali, o goroko, o wuku, hagala i rupa o kawihi, o kol̄oba, o wogono, o totaleo o unta, o ula-ula, o blekok deʼ hagala i rupa o huweko, o undan, o totaleo o kasa deʼ o manoko.

¹⁹Mata-mata o aiwani ma alu-aluhu deʼ mago gahuhuoka gënanga iharamu, hoʼ yakunua nia ol̄omo.

²⁰O aiwani deʼ mago gahuhuoka ihoharamua yakunu nia ol̄omo.

²¹ O aiwani ihonenge mahirete yakunua ngini nia ol̄omo, mä o nyawa o dagi-dagino naga yogogogere tingini nia hidogoronaka yakunu ya ol̄omo, ekola niä bukunu o nyawa dagi-dagino. Ngini ganga o umati inï tinga-tingakoka mangale ma Jou nia Jou Madutu. O duba mangohaka ma akeme ekola o kabingi mangohaka yakunua nihi dohakai deʼ ma ayo mahuhu mateongo.”

²² ”O taongo ihi getongo kokiani ngini nia tingaka o regu ngimoi o regu moi mata-mata nia tonaka mahasilino.

²³Ma Jou nia Jou Madutu Ai himangoka, o ngï Wairi-irikoka ko kiani ngini nia ol̄omo ihihö huba-huba o regu ngimoi maregu moi o gandum, o angguru mateongo, o zaitun maminya deʼ ikali o hapi ma ngohaka deʼ nia kabingi deʼ nia duba mangohaka madomoro. Nia diai o hali gënanga hupaya mangale salalu ngini nimadotoko niwi horomati ma Jou nia Jou Madutu.

²⁴Nako o ngï ma Jou nia Jou Madutu wairi-iriki ikurutikaholi deʼ nia tau, hiädono o regu ngimoi, maregu moi nia tonaka mahasilino ma Jou nia Jou Madutu winihi döa-döaka yakunua ngini niao genangika dau, done

²⁵nia hukunu nia tonaka ma hasilino gënanga ma hidoku deʼ niao matiwi o ngï ma Jou nia Jou Madutu wairi-irikika.

²⁶Nihi ija o tiwi gënanga mangale okia dika ngini nioigo — o hapi ekola o kabingi deʼ o duba, o angguru mateongo ekola o sopi — deʼ mangïoka gënanga, ma Jou nia Jou Madutu Ai himangoka ngini deʼ nia ngohaka deʼ nia hekata kokiani nia ol̄omo kamamoi deʼ nimahi sosanangi.

²⁷Uha nia mal̄aika o Lewi manyawa yogogogere nia bereraka yohuha moiua yapaliara; nio hohininga önanga gënanga manga tonaka mahirete koiwa.

²⁸Mabobaha o taongo mahangeoka ihi geto-getongo, kokiani ngini niao o regu ngimoi maregu moi nia tonaka ma hasilino deʼ nia toomu nia bereraka.

²⁹O inomo gënanga mangale o Lewi manyawa karana önanga koiwa manga tonaka, deʼ mangale o nyawa o dagi-dagino, o gohihi ma ngohaka deʼ o bobobao yowö wango-wango nia bereraka. Onanga yakunu yaino deʼ ima l̄ë hagala önanga yopoparalu. Nako ngini nia diai hoko gënanga, done ma Jou nia Jou Madutu aha Wohi barakati hagala nia usaha.”