Read Tobelo O ULANGAN 17 Bible Online

O ULANGAN 17 - Tobelo bible

O ULANGAN 17

¹Uha nihi huba o hapi ekola o duba dema boditooka ma Jou nia Jou Madutuika, karana Unanga wö dohata.

²Nako ni ihene nia berera moioka naga o nyawa yobaradoha ma Jou nia Jou Madutuika karana watilakuru o jaji

³ deʼ Ai pareta deʼ yahuba deʼ ima higilaongo o gikiri ma homoaika ekola o wange ma lakoika, o mede ekola o murumu,

⁴done kokiani ngini nia tailako nihidodiai. Nako o dorou gënanga igou-goungu idadioka o Israel mabereraka,

⁵wa howo-howono kokiani iwiao iwi hihupu o kota maporetika deʼ iwi kaweli deʼ helewo hiädono wohonenge.

⁶ Mä ünanga duga-duga yakunu iwi hukumu iwi hohonenge nako naga yahinoto ekola yoholoi yohakihi: woma tengo yakunua iwi hu-kumu iwi hohonenge imoteke o hakihi kawoma tengo dika wohi tararono.

⁷ Yohö hakihi iwi hikaweli o helewo madodihiraka o nyawaika gënanga, deʼ o kawaha yongodumu ihi moteke yokaweli. Deʼ hoko gënanga ngini nia hohihanga o dorou gënanga.

⁸Nako naga perkara o haki-hakimi o bereraka yakunua yaputuhu karana ihuhaholi, hohiade o perkara o doma yohangaja ekola yo-hangajaua, o ributu mangale o haku madutu ekola ima kokal̄abo manga röehe, kokiani ngini niä ao o ngï ika ma Jou nia Jou Madutu wairi-irikika.

⁹Nohi ngahu ani perekara gënanga o Lewi ma imam-imamika deʼ o hakimika magogiriahi yomanarama, deʼ mal̄aika önanga yaputuhu.

¹⁰Geönanga yogelenga maputuhu, deʼ kokiani ngini nia diai nihi dodiai okianaga önanga yahö heto-hetongo nginika.

¹¹Nia tarima toönanga manga putuhu deʼ nia diai okianaga önanga ihi gogeroka hiädono o hali ma alu-aluhu.

¹²O nagona dika yobarani yalawani o hakimi ekola o imam magogiriahi yomanarama, kokiani yä hukumu yahohonenge; deʼ hoko gënanga ngini nia hohihanga o dorou gënanga o Israel mabereraka.

¹³Mata-mata o nyawa aha yoihene mangale idö dadadi gënanga deʼ idadi yohawana, hiädono moi okaua yobarani yodiai hoko gënanga.”

¹⁴ ”Nako o tonaka winihi döa-döaka ma Jou nia Jou Madutu nginika idadioka tingini madutu, deʼ ngini nigogere genangokadau yakunu idadi ngini niö igo o koano womatengo hokä o hoana deʼ o berera yogö gogere nia gilolitino.

¹⁵Nia tailako nihidodiai hupaya o nyawa ngini niwi gora-goraka wodadi nia koano o nyawa gënanga ma Jou nia Jou Madutu wï iriki. Unanga kokiani nia hoana deʼ nia bereraino manyawa mahirete; uha niä goraka o nyawa dagi-dagino yodadi nia koano.

¹⁶ Ma koano yakunua ai kuda iwöe mangale aitentara deʼ yakunua o hoana deʼ o berera manyawa nënanga imakilioro o bereraika gënanga.

¹⁷ Ma koano yakunua ai hekata yowöe, hupaya ünanga uha wï porete ma Jou. Unangö yakunua womahi kaya deʼ o haaka deʼ gurasi.

¹⁸Nako womatengo iwitede wodadi o koano, ünanga kokiani iwihi döaka o buku o gahumu moi madol̄a ma Jou Madutu Ai tita madulihi yö duru o buku madodihiraka yagö gogono o Lewi manyawa manga imam-imam.

¹⁹O buku gënanga kokiani salalu naga ai datekoka, deʼ ai wo wango magurutu ünanga kokiani wabaca hupaya womä dotoko wiho-romati ma Jou Ai Jou Madutu deʼ ai setia wohingounu hagala o tita yatuli-tulihi magoronaka.

²⁰Nako ünanga wabaca wakaigoungu, ünanga aha womamao ua ai diri iholoi ya oa deʼ o nyawa ai höana deʼ ai berera ino, deʼ aha kowatilakurua ma Jou Ai tita ngarokä sarakia naga madodagi. Daha ünanga deʼ aidifauku yapareta manga hoana deʼ manga berera hiädono manga ngohaka deʼ manga danongo manga ngoha-ngohakuku.”