Read Tobelo O ULANGAN 18 Bible Online

O ULANGAN 18 - Tobelo bible

O ULANGAN 18

¹”Yongodumu o Lewi ai hoana yahi döaka o imam mamanarama, karana gënanga yakunua yatarima manga hidoku o tonaka o o Israelokaka. Onanga kokiani yowango deʼ ihihö huba-hubaino deʼ o huhuba-huhuba mahomoahi ihi döa-döaka ma Jouika.

² Onanga yakunua deʼ manga tonaka hokä o hoana mahomoa, hababu ma Jou la, toönanga manga puhaka hokä ma Jou wahi jajioka onangika.

³Nako imatengo ani ihihuba o huhuba o hapi ekola o duba, done magiama moi maokoko deʼ mamata o gigini gënanga kokiani ihi döaka o imam-imamika mangale toönanga manga hidoku.

⁴O gandum mahasili madodihiraka, o angguru mateongo, o zaitun maminya deʼ o duba magogo, genangö toönanga manga hidoku.

⁵O Israeloka manga hoanino mata-mata, ma Jou nia Jou Madutu wä irikoka o Lewi ai hoana yodadi o imam kahi ado-adonika.

⁶Nako o Lewi manyawa womatengo ai ahali o kota okiaino dika o Israel mabereraka woböa o bereraika ma Jou wairi-irikoka deʼ womau wogogere genangokadau,

⁷ünanga yakunu wï leleani ma Jou Ai Jou Madutu hokä ma imam hokä o Lewi manyawa mahomoa yomomanarama o ngï oka gënanga.

⁸Kokiani ünanga watarima o inomo ima koketero ma amoko hokä o imam-imam mahomoa; okianaga wamake-make ai tau madol̄aino, hoko genangö mangale ünanga.”

⁹”Nako ngini niwohamoka o bereraika ma Jou nia Jou Madutu winihi döa-döaka nginika, uha nimä duru o dorou yadodiai hagala o hoana deʼ o berera manyawa genangokadau.

¹⁰ Tingini nia hidogoronaka uha naga ihihuba manga ngoha-ngohaka hokä ohuhuba yatö tuhu-tuhuku. De kaima tengö ma uha yodadi yomai-maihi, yotö tailako o nonako-nonako, yomö matara ekola

¹¹ yogogumatere ekola yodiai o dodohanga deʼ o nyawa yohone-honenge manga womaha.

¹²O nyawa yododiai o manarama madorou gënanga ma Jou nia Jou Madutu wä dohata, deʼ hababu gënanga hagala o hoana deʼ o berera manyawa gënanga wahi rehene nia himangoka.

¹³ Ho, kokiani ngini nimahi gilaongo ma Jou nia Jou Madutuika deʼ nia hininga magahumu.”

¹⁴De ipaha o Musa wätemo, ”Hagala o hoana deʼ o berera manyawa o bereraka aha ngini niö gogere gënanga yanïki yo mai-maihi deʼ yotö tailako o nonako gënanga.

¹⁵ I idulu yaino tongone nanga hoana deʼ nanga bereraino mahirete Unanga aha wï huloko nginika o nabi womatengo hokä ngohi nënanga, deʼ kokiani ngini niwihi ngounu unangika.

¹⁶Mawange ngini nima toomu o Sinai mal̄okuoka, ngini ni gahoko hupaya ngini uhali ni ihene ma Jou nia Jou Madutu wo temo-temo deʼ uhali ngini nia make Ai himanga o uku itoka-tokara magoronaka, hababu ngini niö modongo nihonenge.

¹⁷Karana gënanga ma Jou wohi temo ngohino, ’Toönanga manga gogahoko gënanga ibarija.

¹⁸Toönanga manga hoanino mahirete Ngohi aha tihuloko onangika o nabi womatengo hokä ngona. Ngohi aha tahetongo unangika okianaga kokiani wahetongo, daha ünanga aha wohiädono o hoana deʼ o berera manyawaika gënanga hagala Tahi popareta.

¹⁹ Unanga aha wotemo-temo Ahi romanga wäo, deʼ Ngohi aha Tä hukumu o nagona dika yolu-oluku iwihi gïhene unangika.

²⁰Mä nako o nabi womatengo wobarani wohiadono o behehongo moi ani deʼ Ahi romanga wäo ena hioko Ngohi tohulokua wodiaihoko gënanga, ünanga kokiani wohonenge; Hoko genangö moi-moi o nabi yotemo-temo o gikiri mahomoa ma romanga yao kokiani yohonenge.’

²¹Yakunu idadi ngini nia hiningaka nileha, ’Sarakia ngomi mihiöriki botekä o nabi womatengo ai behehongo matiti ma Jou ekola kowali?ʼ

²²Nako o nabi womatengo wotemo-temo ma Jou Ai romanga wäo, mä okianaga waheto-hetongo gënanga koidadiua, done o hingahu gënanga koma Jou inoua. O nabi gënanga wotemo-temo ai romanga mahirete wäo deʼ ngini ngarouha niwï modongo unangika.”