Read Tobelo O ULANGAN 2 Bible Online

O ULANGAN 2 - Tobelo bible

O ULANGAN 2

¹ Mabaha ngone homakilioro o tonaka ikokakahaika hanonu o ngekomo yamö meta-meta o Akaba maJikoika, hokä ma Jou wohi-popareta. Madekana ngone hotagi hokaika hokaino o Edom madaera matonaka iloku-lokuoka.

²Daha ma Jou wohitemo ngohino

³yaoaka madekana ngone hodagi hokaika hokaino o daera gënanga. Hoʼ kokiani ngone hoiki o koremieuku.

⁴ De ipaha ma Jou wohihuloko tohidöaka o hidumutu-hidumutu nënanga nginika. ’Itedekanoka uali ngini aha nio ngohama o Edom maberera, nia ria-dodoto manga daera o Esau ai difauku. Aha önanga inimodongo ngini,

⁵mä ngini yakunua nia parangi önanga, hababu toönanga manga tonaka kama huhutulö ma aha ko Tinihi döakua nginika, karana madaera Tahi döakoka o Esau aingohaka deʼ ai danongika.

⁶Ngini yakunu ni mä ija o inomo deʼ o akere onangika.’

⁷Nio hohininga sarakia ma Jou nia Jou madutu winihi barakati oka ngini hagala ngini nia dodiai magoronaka. Unanga winï paliara ngini madekana ngini nitagi nio kaika nio kaino o tonaka ikokakaha ilua-luasoka nënanga. Unanga winï goana ngini madekana o taongo moruatino nënanga deʼ winï hidöaka hagala ngini niö poparalu.

⁸De ipaha ngone hotagi gila-gila, hamal̄a o ngekomo yanonu o Elat deʼ o Ezion-Geber makota yodumutu o Honenge ma Ngöto, daha horehene o wange mahiwaroko hodumutu o Moab matonaka mako-kakahaka.

⁹ Ma Jou wohitemo ngohino, ’O Moab manyawa, o Lot aidifauku, yakunua ngini nia ruae. Uhali nia parangi önanga. O Ar maberera Tahi döaka onangika deʼ toönanga manga tonaka kamahuhutulu ma aha ko Tinihi döakua nginika.’ ” (

¹⁰Kahuruonino o Ar yogogere o Emim manyawa. Onanga manga roëhe ilago-agomo, imaketero deʼ o Enak manyawa, onangö o nyawa manga ago-agomo.

¹¹Hokä o Enak manyawa, onangö yä hetongo o Refaim ma nyawa, mä o Moab manyawa yahi romanga önanga o Emim manyawa.

¹²Kahuruonino o Hori manyawa yogogere o Edom madaeraka mä o Esau aidifauku yaduhu deʼ yabinaha, deʼ ipaha yogogere toönanga manga tonaka; hoko genangoli o Israel manyawa o wange maduruino yaduhu manga haturu-haturu manga tonakoka ma Jou wahi döa-döaka onangika.)

¹³”Deʼ ipaha ngone hatobongo o Zered ma Ngairi hokä ma Jou wohi popareta ngoneino.

¹⁴ Genanga idadi o taongo moruange deʼ tufange ipahaika ngone hamal̄a o Kades-Bernea. Mata-mata o tentaraoka o doomuino gënanga yohonengoka hokä ma Jou waheto-hetongo.

¹⁵Ma Jou hoko genangika wä lawani önanga hiädono mabaha önanga mata-mata yobinaha.

¹⁶Onanga mata-mata yohonengoka deʼ ipahaika,

¹⁷ma Jou wonä temo ngoneino,

¹⁸’O wange nënanga ngini nia nonu o Moab madaera. O Ar maberera nia tilakuru.

¹⁹ Done ngini nima hiädono nimahi tigi-tigika deʼ o Amon manyawa manga tonaka, o Lot aidifauku. Uha nia ruae ekola niä parangi, hababu o tonaka Tahi döa-döaka onangika kamahuhutulö ma aha ko Tinihi döakua nginika.’ ” (

²⁰O daera genangö yanako hokä o Refaim ma berera, o hoana deʼ o berera ma romanga mahiraino yogogere genangokadau; o Amon manyawa yahi romanga önanga o Zamsumim manyawa.

²¹Hokä o Enak manyawa, onangö manga roëhe ma ago-agomo. Onanga duru kamanga kuata, deʼ manga gegetongo yowöe. Mä ma Jou wabinaha önanga, hiädono o Amon manyawa yaora o tonaka gënanga, deʼ yogogere genangokadau.

²²Hoko genangö ma Jou wodiai mangale o Edom manyawa, o Esau aidifauku. Ma Jou wä binaha o Hori manyawa, hiädono o Edom manyawa yaora o tonaka gënanga deʼ yogogere, deʼ yotatapu genangokadau hiädono o öraha nënanga.

²³O tonaka o Ngöto i Kokorona mahohana magurutu yogogere o Kereta manuhino manyawa. Onanga yabinaha o Awi manyawa, maberera madutu o tonaka gënanga, daha yogogere o daera gënanga hiädono o korehara il̄e magurutika imatero o Gaza makotaika.)

²⁴”Ngone hatilakuru o Moab madaera deʼ iböto, ma Jou wonä temo ngoneino, ’Nioiki öraha nënanga nia tobongo o Arnon ma Ngairi. Ngohi aha tinihi döaka nginika o Sihon, ma koano Amori wopopareta o Hesybon mabereraka, kama moi deʼ ai berera. Niwi parangi ünanga, daha nio gogere ai tonaka.

²⁵Mulaenge o wange nënanga Ngohi aha tadiai o hoana deʼ o berera manyawa kiaka dika inï modongongini. Moi-moi o nyawa yohawana deʼ yohahara nako yoihene mangale ngini.’ ”

²⁶”De ipahaika ngohi tahidingoto o huhuloko yamuruono naga o Kedemot matonaka ikokakahaka deʼ ma koano Sihonika o Hesybon ma bereraino mangale ihiädono o dame magogahoko nënanga:

²⁷’Nomi higumal̄a ngomi mia nonu ani berera ahi Tuanga. Ngomi aha mitagi mima togu-togumua deʼ komio rehenua o ngekomo ma amoko.

²⁸Ngomi aha mifangu o inomo ngomi mia ol̄o-ol̄omo deʼ o akere ngomi mia oke-okere. Ngomi duga-duga miparalu mia nonu o berera nënanga,

²⁹hiädono ngomi mia tobongo o Yordan ma Ngairi mangale mi wohama o bereraika ma Jou mia Jou Madutu womihi döa-döaka ngomino. O Esau ai difauku yogogogere o Edom mabereraka deʼ o Moab manyawa yogogogere o Ar mabereraka imï higumal̄aka ngomi mia nonu toönanga manga daera.’

³⁰Mä ma koano Sihon womihigumal̄ana ngomi mia tilakura ai berera genanga. Ma Jou, Ma Jou Madutu Widiai unanga ai haeke itogowani de ai dekati supaya ngone hakunu hikihanga unanga. Ai daira ngone kahogerikahi hiadono oraha nenanga.

³¹Ipaha ma Jou Wohi temo ngohino, ’Ma Koano Sihon de ai berera Tini hilapahi nginika; nia l̄ë de nia gogere o berera genanga.’

³²Wone woboa o Sihon de ai duduono yongodumu mangale inaparangi ngone itigi o Yahas makota.

³³Mä ma Jou tongone nanga Jou Madutu Wihilapahioka Unanga ngoneino, daha ngone ihihohinga unanga imakiniki aingoha-ngohaka de ai tentara yongodumu.

³⁴Öraha genangö ngone haora de hawedere o kota ma getongo, de hatoma yongodumu manyawa, o nau-nauru, ongongo heka de o ngoha-ngohaka. Koiwa hamal̄aika yowango.

³⁵Manga aiwani ipopaliara toonanga ngone hal̄ë de hagala manga kota ngone ha ora.

³⁶De ai roriwo ma Jou tongone nanga Jou Madutu, ngone yakunu haora mata-mata o kota genanga, mulaenge o Aroër de yaino, o Arnon ma Wai, de o kota o wai genanga mahidogoronaka, hiadono o Gilgal madaira. Koiwa o kota mabebeno o mohele ikuatoholi manga de ngone.

³⁷Mä ngone homahi tigina o Amori manyawa manga daera ekola Yabok Mangairi madatekoka ekola hagala o kota madaera de mal̄oku madukuruoka ekola ongi mähomoa kiakaö Wa lara-laranga ma Jou tongone nanga Jou Madutu.