Read Tobelo O ULANGAN 20 Bible Online

O ULANGAN 20 - Tobelo bible

O ULANGAN 20

¹”Nako ngini nioiki niparangi niä lawani nia haturu-haturu, uha nihawana nia make manga kureta ihi poparangi deʼ toönanga manga kuda mangöe-ngöe ikali toönanga manga tentara iholoi yowöe dede ngini. Ma Jou nia Jou Madutu winihi bebasoka ngini o Mesiroka, ahaö winï riwo ngini

²I hira deʼ nimulaenge niparangi, ma imam womatengo kokiani wotagi mahimangika deʼ wotemo-temo nginika hoko nënanga,

³’Roriadodoto, ni ihene! O wange nënanga nitagi niparangi. Uha nihawana ekola nia hininga ieteke ekola nibingu.

⁴Ma Jou nia Jou Madutu aha winï nïki la winï riwo ngini, deʼ Unanga aha winihi döaka o utumu nginika.’

⁵De ipaha yokokapita kokiani ihiädono o demo-demo nënanga nginika. ’Boteka naga o nyawa tingini niahi dogoronaka nënanga dahaö ihi goko il̄ë manga tau, mä yadiai uwahi yongohama ma upacara? Nako naga ünanga yakunu wolio. Hababu nako iwitoma o parangi magoronaka, o nyawa mahomoa aha yogogere ai tau.

⁶Boteka naga o nyawa tingini nia hidogoronaka dahaö yö datomo manga angguru madumule deʼ womahi daenowahi wapagele ai angguru mahohoko? Nako naga ünanga yakunu wolio. Hababu nako ünanga iwitoma o parangi magoronaka, o nyawa mahomoa aha yajame ai angguru mateongo.

⁷Boteka naga o nyawa nia hidogoronaka deʼ ngoi mamane deʼ nomau wokawingi? Nako naga ünanga yakunu wolio. Hababu nako ünanga iwitoma o parangi magoronaka o nyawa mahomoa aha wo mi kawingi ngoi mamane.’

⁸O kokapitaö kokiani yahetongo nënanga nginika, ’Boteka naga o nyawa tingini nia hidogoronaka yotaka-taka deʼ yohawana? Nako naga ünanga yakunu wolio, hupaya ünanga uha wahohihanga o nyawa mahomoa manga nauru.’

⁹O kokapita yotemo-temo o tentaraika deʼ iböto, kokiani yä tumutu o doomu moi-o doomu moi manga tutuda.

¹⁰Nako ngini nioiki mangale nia parangi moi o berera, i hira nia hidöaka oöraha maberera madutuika la imahi döaka.

¹¹Nako önanga yahelenga manga ngorana ma amoko deʼ imahi döaka, mata-mata önanga kokiani yodadi nia gilaongo deʼ yodiai o manarama itotubuho mangale ngini.

¹²Mä nako o berera madutu gënanga yoluku imahi döaka deʼ iholoi yöigo yoparangi, ngini kokiani ni higiloliti o berera gënanga.

¹³De ipaha nako ma Jou nia Jou Madutu wini higumal̄a ngini nia ora o berera gënanga, kokiani ngini nia toma mata-mata maberera madutu o nau-nauru.

¹⁴Mä ngini yakunu nima l̄ë o ngongoheka, o ngoha-ngohaka, deʼ o aiwani o gigini deʼ okia dika naga o bereraka gënanga. Hagala nia haturu manga arata gënanga yakunu ngini nia pake. Ma Jou nia Jou Madutu winihi döaka gënanga nginika.

¹⁵Hoko gënanga ngini kokiani ngini nia hidiai o berera ma gö gurutika deʼ nia berera niö gogogere.

¹⁶Mä nako o berera gënanga naga o daera ma Jou nia Jou Madutu winihi döa-döaka nginika magoronaka, yongodumu maberera madutu kokiani niä toma.

¹⁷Hokä ma Jou nia Jou Madutu wohi paretaka, kokiani ngini niä binaha, O Heti manyawa, o Amori, o Kanaan, o Feris deʼ o Yebus manyawa.

¹⁸Niä toma önanga, hupaya önanga yodiaiua ngini ni baradoha ma Jou nia Jou Madutuika deʼ ini dötoko ngini nidiai o manarama ha emo-emono toönanga manga gikirika.

¹⁹Nako ngini nia parangi moi o berera deʼ ni higilolitino ko hä dekanino, uha nia tol̄anga o gota ihö hohoko genangokadau. Nia ol̄omo mahohoko, mä uha nia bodito maröehe, hababu o gota mautu gënanga konia haturu ua.

²⁰O gota mahomoa yakunu ngini nia tol̄anga mangale nia hidiai o pagari ihigilolitino hiädono o berera gënanga iötakoka nginika.”