Read Tobelo O ULANGAN 21 Bible Online

O ULANGAN 21 - Tobelo bible

O ULANGAN 21

¹”Nako o bereraka ma Jou nia Jou Madutu winihi döa-döaka nginika naga yamake o nyawa yohonenguku yätoma o dumuleoka deʼ yä nakoua yotoma-toma onagona,

²done nia tutuda deʼ nia hakimi kokiani yoiki yatuga mahoana o mayeti yamake-makeoka gënanga deʼ o berera-berera moika itö tigi-tigika.

³Daha o berera duru itigi-tigino manga balu-baluhu kokiani yairiki o hapi magö o dutu moi komaiwahi ihi karajanga.

⁴O hapi gënanga kokiani önanga yäo o ngï moi ika imahi tigi-tigika deʼ o ngairi komaiwa idudungu ma akere deʼ matonaka komaiwahi yapajeko ekola yö datomo. Genangokadau kokiani önanga yatobiki o aiwani gënanga matomara.

⁵O imam-imam o Lewi o kokiani yoiki genangika, karana önanga kokiani yogelenga maputuhu moi-moi o perkara o manarama itotorou magoronaka. Onanga ma Jou nia Jou Madutu wä iriki mangale ima higilaongo Unangika deʼ yahetongo o barakati deʼ to Unanga ai romanga yäo.

⁶Daha o berera duru itigi-tigino mata-mata mabalu-baluhu kokiani yaihoro toönanga manga giama o hapi gënanga mal̄okuoka

⁷deʼ yotemo, ’Kongomiua miwitoma o nyawa geunanga, deʼ ngomi mihi örikua o nagona yadiai.

⁸Jou nahi apongo o Israeloka Ani umati Ngona nahi bebasoka o Mesiroka. Nomihi apongo ngomi deʼ uha nomï pulono mimahi tago-ngo o nyawa wahowo-howonua gënanga iwi toma.’

⁹Done deʼ nidiai okianaga ma Jou wögahoko, ngini winï pulo-nua nimahi tagongo o doma gënanga.”

¹⁰”Nako ngini niparangi deʼ ma Jou nia Jou Madutu winihi döaka nginika o utumu, daha ngini nimä l̄ë o parangi ma banakono,

¹¹yakunu idadi toönanga manga hidogoronaka naga moma tengo o ngoheka ami hohailoa nomï igo deʼ nomï nahihu nomä hekata.

¹²Nomi ao o ngoheka gënanga ani tauika. Genangokadau kokiani ngona naguti ami tadauru, naluiti ami kuliti,

¹³deʼ natururu ami pakeanga. Munanga kokiani mogogere ani tauoka deʼ mapake o haharu mapakeanga mangale ami dimono yo honenge madekana o mede moi ino. Genanga deʼ iböto ngona yakunu nokawingi dede munanga.

¹⁴Nako maduruino ngona nomï igo okaua, ngona yakunu nomi huloko moiki deʼ madudukoro okia-okiaua. Munanga yakunua nomi hidiai hokä o gilaongo ekola nomi hukumu, karana munanga nomi pakisaoka nima röehe moi dede munanga.”

¹⁵”O demo ma ade womatengo ngoi hekata yahinoto, deʼ yahinotö manga ngohaka o nauru, mä o ngohaka mariaka koigoungua ngoi hekata womi haya-hayanga ami ngohaka.

¹⁶Nako o nyawa gënanga womau wohi tantu sarakia ünanga aha waregu ai kaya aingoha-ngohakika, ünanga yakunua woböa ngoi hekata womi haya-hayanga ami ngohakino deʼ wihi döaka o ngohakika gënanga o hidoku o ngohaka o riaka ai haku.

¹⁷Unanga kokiani iwihi döaka ai arataino o hidoku hinoto aingohaka o nauru mariaka, ngarokä o ngohaka gënanga koigoungua ngoi hekata womi haya-hayanga ami ngohaka. O ngohaka ma riaka ai haku kokiani ai ama wohigoungu, deʼ o ngohakika gënanga kokiani wihi döaka o puhaka idadi ai haku imoteke o tita.”

¹⁸”O demo ma ade naga o ngohaka o nauru ai häeke itogowini, wö igo wolawani deʼ woluku wahi moteke ai dimonika ngarokä önanga iwi hukumoka.

¹⁹Done kokiani ai dimono iwi ao ünanga o kota önanga yo gogogere mabalu-baluhika deʼ yogahoko hupaya o ngohaka gënanga yatailako ai howono.

²⁰Onanga kokiani yä temo o kota gënanga ma balu-baluhika, ’Mia ngohaka nënanga ai häeke itogowini, wö igo wolawani deʼ woluku womihi ngounu ngomino; ünanga wohigogule o tiwi deʼ wö igo iwi daluku.’

²¹Daha o nau-nauru o bereraka gënanga iwi kaweli o ngohaka gënanga deʼ o helewo hiadono wohonenge. De hoko gënanga ngini nia hohihanga o dorou. O nyawa mata-mata o Israel ma tonakoka aha yoihene mangale idadadi gënanga deʼ idadi yohawana.”

²²”Nako womatengo iwi hukumoka wohonenge karana moi o dorou, de ai maiyeti yanuneuku o liateoka,

²³ o maiyeti gënanga yakunua yamal̄aika genangokadau o hutu moi yahaiwatiki, mä kokiani yalungunu o maiyeti gënanga hupaya ngini nia pesekua o berera ma Jou nia Jou Madutu winihi döa-döakoka nginika.