Read Tobelo O ULANGAN 23 Bible Online

O ULANGAN 23 - Tobelo bible

O ULANGAN 23

¹”O nyawa yä kokabirioka ekola yatobikoka to onauru yakunua yodadi o gegetongo ma Jou Ai umati.

²O mamane mangohaka deʼ mata-mata manga difauku hiädono o lape ngimoiuku, yakunua yodadi o gegetongo ma Jou Ai umati.

³ O Amon deʼ o Moab manyawa ikali toönanga manga difauku hiädono o lape ngimoiuku, yakunua yodadi o gegetongo ma Jou Ai umati,

⁴ karana önanga yoluku inihi döaka ngini o inomo deʼ o akere maöraha ngini nia dodagi magoronaka o Mesiroka kade nihupu. Maboboloi önanga iwï hewa o Bileam, o Beor aingohaka Petor ma kotaino o Mesopotamia madaeraino, mangale winï lolai ngini.

⁵ Mä ma Jou nia Jou Madutu woluku wihigihene o Bileam. I idulu yaino ünanga wangali o lolai gënanga idadi o barakati, karana Unanga winï dora ngini.

⁶Madekana ngini niwango deʼ kahi ado-adonika, uha niä riwo o hoana deʼ o berera manyawa gënanga ekola nidiai önanga manga ha-sili ilamoko.

⁷Uha niä pulono o Edom manyawa o kiaua yadaene, karana önanga gënanga nia riadodoto. Uha oli niä pulono o Mesir manyawa okiaua yadaene, karana ngini mamoi iböto nigögere toönanga manga bereraka.

⁸Imulaenge o baata hangeoka deʼ hikaika toönanga manga difauku yakunu yodadi o gegetongo ma Jou Ai umati.”

⁹”Maöraha ngini niparangi magogiria, kokiani ngini nimahi rehene deʼ hagala okianaga moi yadiai ngini nipeseke.

¹⁰Nako womatengo idadi wopeseke karana iwi kiokoka de to nauru ma akere ihupu kokiani ünanga wamal̄a manga tau madoomu deʼ wogogere maporetoka.

¹¹Ngade-ngade o bimaoa kokiani ünanga woma ohiki deʼ maöraha o wange itumunu ünanga yakunu wolio o tau madoomuino.

¹²Kokiani ngini nia sadia o ngï o tau madoomu maporetoka mangale nimä l̄ohihi.

¹³Nako nimau nioiki dokengika niao mahomoa deʼ nia kiahonanga niaoli o gota o dobiki moi mangale o guhu nimä baiti mangï nihupu maporetika deʼ mangale niö pohuku.

¹⁴Ma Jou nia Jou Madutu naga de de ngini nia tau ma dol̄a ma goronaka, mangale winï goana ngini deʼ Winihi döaka ngini nia haturu-haturu niä utumu. Done niö goana hupaya nia tau madoomu kahirahi itebini. Uha hiädono yamake okianaga moi ipatu-patutua tingini nia hidogoronaka, hupaya ma Jou uha winï mal̄aika ngini.”

¹⁵”Nako o gilaongo womatengo ai tuangoka deʼ wopiringana waino nginino, wogahoko o roriwo uha niwi huloko wolio.

¹⁶Unanga yakunu wogogere nia kota moioka imoteke ai ngongiriki, deʼ ngini yakunua niwihidiai itorou.

¹⁷ O Israeloka imatengo, kayaoa o nauru kayaoa o ngoheka, yakunua yodadi manga röehe yahuku-hukunu o gomanga ma pupuji ma tau-tauoka.

¹⁸O tiwiö manga hasilino yakunua yao ma Jou nia Jou Madutu ai Tauika mangale yofangu toönanga manga jaji, hababu ma Jou nia Jou Madutu wö dohata manga röehe ya huku-hukunu o pupuji ma tau-tauoka deʼ toenanga ma hewaino.

¹⁹ Nako ngini nia hibau o tiwi o nyawa dagi-daginoika, ngini yakunu niö gahoko ma bunga. Mä nako ngini nia hibau o tiwi ekola o inomo ekola o baranga mahomoa o nyawaika nimako hoana deʼ o berera moi, yabau-bau gënanga kokiani nia hidöaka ngaro uha deʼ mabunga. Nihingounu o pareta gënanga, done ma Jou nia Jou Madutu wohi barakati hagala moi-moi ngini nia dodiai nia bereraka ngini nio gogogere.

²¹ Nako ngini nijaji okianaga moi ma Jou nia Jou Madutuika, uha nia dohu-dohuku mangale nia totomo o jaji gënanga, karana ma Jou nia Jou Madutu kahirahi wögahoko, done ngini ni baradoha nako nia totomua.

²²Ngini ni baradohaua nako ngini nidiaiua o jaji ma Jouika.

²³Mä nako ngini deʼ nia hininga mahuka nidiai o jaji ma Jou nia Jou Madutuika, ngini kokiani nia totomo.

²⁴Nako ngini magogiriaka nitagi niä boa o nyawa mahomoa manga angguru madumule, ngini yakunu nia ol̄omo o angguru ma hohoko hokokia mangöe ngini niö nahihu, mä yakunua nia toomu o karajauku.

²⁵Nako ngini magogiriaka nitagi niä boa o nyawa mahomoa manga gandum madumule, ngini yakunu nia ol̄omo o gandum nia utu-ütuku deʼ nia giama, mä yakunua nihi utuku deʼ o gugutuku.”