Read Tobelo O ULANGAN 24 Bible Online

O ULANGAN 24 - Tobelo bible

O ULANGAN 24

¹ ”O demo ma ade womatengo o nauru wokawingi deʼo moholehe mo-matengo, deʼipahaika womï igo okaua karana ünanga wamake okianaga moi iwihi mal̄eke unangika. De o nauru gënanga wohidöaka o ngongoluku mahurata munangika deʼ womi duhu munanga ai tauoka.

²De ipaha o ngoheka gënanga mokawingi deʼ o nauru mahomoa.

³Mä o öraha muruono naga ipahaika o nauru gënanga womï igo okauaoli munangika, deʼ womihi döaka o ngongoluku mahurata munangika deʼ womi duhu munanga. Ekola yakunoli idadi ami rokata mahinotoka gënanga wohonenge.

⁴O hali hinoto magoranaka ami rokata mahira yakunua womi kawingoli o ngoheka gënanga; kokiani ünanga womi pulono hokä o ngoheka imi pese-pesekoka. Nako ünanga kawomi kawingoli, o manarama gënanga marupa o hikauku ma Jou nia Jou Madutuika. Ngini yakunua nidiai o baradoha hoko gënanga mamodorou o bereraka ma Jou winihi döa-döakoka nginika.”

⁵”O nauru womatengo gënanga dahaö wokawingino yakunua iwi huloko wowohama wotentara deʼ woiki woparangi ekola wodiai o mana-rama biaha mahomoa. Unanga kokiani iwihi manaramua o taongo moi madekana mangale wohidailako ai tau madol̄a deʼ wasanangi ngoi hekata ami hininga.

⁶Nako ngini nia hibau okianaga moi o nyawa mahomoaika, uha nia l̄ë hokä o dodanu ai helewo gënanga, ngini nia ora ai pakakaha yapake-pake ai tau madol̄a mangale ai ngango madogo.

⁷ O nyawa wä tohi-tohiki nia nyawa nimako hoana deʼ o berera moi, deʼ wahidiai önanga hokä o gilaongo ekola wähukumu kokiani iwi hukumu iwi hohonenge. De hoko gënanga ngini nia hohihanga o dorou gënanga.

⁸ Nako naga nia make o panyake madorou, nia diai nihi dodiai okianaga inihi popareta o Lewi ma imam-imam nginika, nia moteke o hidumutu-hidumutu ngohi tohi döa-döaka onangika.

⁹ Nio hohininga okianaga ma Jou nia Jou Madutu wadodiai o ngo Miryamika nia dodagi magoronaka o Mesiroka deʼ nihupu.

¹⁰ Nako ngini nia hibau okianaga moi nia dodiawoika, uhali niwohama ai tau magoronaika mangale nia l̄ë ai baju idadi ododanu.

¹¹Nitamä maporetoka deʼ niwi mal̄aika ünanga mahirete wao nginika.

¹²Nako o nyawa gënanga womihikini, o baju gënanga yakunua nia tumungu o hutu moi yahaiwatiki,

¹³mä kokiani o hutu ihi getongo nihigilio unangika, hupaya deʼ womä idu ünanga yakunu wapake. Done ünanga aha wotarima kasi deʼ ma Jou nia Jou Madutu aha ai hininga yadaene nginika.

¹⁴ Uha niä hokoto o hewa manyawa yomö mihikini deʼ yokura-kuranga, kayaoa o nyawa o hoana deʼ o berera moi, kayaoa o nyawa o dagi-dagino yogogogere nia kota moioka.

¹⁵O wange ihi getongo o wange deʼ itumunuwahi kokiani ngini ni fangu ai hewa mangale ai karajanga o wange gënanga; ünanga wonganono o tiwi gënanga karana ünanga wö paralu. Nako ngini nifanguua ai hewa, ünanga aha womahi böaka ma Jouika mangale wogahoko o roriwo nginika, deʼ ngini ihi nyata nibaradoha.

¹⁶ Uha niä hukumu nia hohonenge o dimono karana o dorou wa dodiai aingohaka, deʼ uha niä hukumu nia hohonenge o ngohaka karana o dorou yadodiai ai dimono. O nyawa moi-o nyawa moi duga-duga yakunu yä hukumu yahohonenge karana o dorou yadodiai ma hirete.

¹⁷ Uha niä ora o nyawa dagi-dagino deʼ o ngohaka o gohihi manga haku, deʼ uha nia l̄ë o bobao momatengo ami pakeanga mangale mohi dodanu.

¹⁸Niö hohininga ngini mamoi iböto nidadi o gilaongo o Mesiroka, deʼ ma Jou nia Jou Madutu winihi bebasi, gënanga hababu ngohi tohi döaka o datoro nënanga nginika.

¹⁹ Nako nia toomu nia tonaka mahasili, uhali nima kilioro la nia l̄ë o gandum iliko-likoino nia mal̄a-mal̄aika. O gandum gënanga kokiani nia mal̄aika mangale o nyawa o dagi-dagino, o ngohaka o gohihi deʼ o bobobao, hupaya ngini ma Jou nia Jou Madutu winihi barakati hagala nia usaha magoronaka.

²⁰Ngini nipagele o zaitun mahohoko mamoi deʼ nia angguru mahohoko deʼ iböto, uhali nima kilioro mangale nia toomu ma hohoko imal̄a-mal̄aika. Genanga kokiani ngini nia mal̄aika mangale o nyawa o dagi-dagino, o ngohaka o gohihi deʼ o bobobao.

²²Niö hohininga ngini mamoi iböto nidadi o gilaongo o Mesiroka. Ma hababu gënanga ngohi tohi döaka o datoro nënanga nginika.