Read Tobelo O ULANGAN 27 Bible Online

O ULANGAN 27 - Tobelo bible

O ULANGAN 27

¹De ipaha kamamoi deʼ o Israeloka manga tutuda, o Musa wo hiädono o behehongo nënanga o hoana deʼ o berera ma nyawaika gënanga, ”Nihi ngounu hagala o pareta ngohi tohi döa-döaka nginika o wange nënanga.

² Mawangeoka ngini nia tobongo o Yordan ma Ngairi mangale niwohama o bereraika ma Jou nia Jou Madutu winihi döa-döaka nginika, kokiani ngini nia oko il̄e o helewo ma ago-agomo o gahumu muruono naga daha nia kapurika.

³Nia tulihi o helewo-helewoika gënanga o tita-tita nënanga mabetongo moi-moi. Nako ngini niwohamoka o berera ikaya-kaya deʼ iboburereika winihi jajajioka ma Jou nia ete deʼ nia tohora manga Jou Madutu nginika,

⁴deʼ ngini o Yordan ma Ngairi mahomoaka nia ikaoka, kokiani ngini nioiki o Ebal mal̄okuika. Genangokadau kokiani ngini nia oko il̄e deʼ nia kapuru o helewo-helewo gënanga hokä ngohi tini hipoparetaka nginika o wange nënanga.

⁵ O ngïoka gënanga kokiani nginiö nihigoko mangale ma Jou nia Jou Madutu o gahumu moi o huhuba mangï o helewo komaiwahi yatüku deʼ o pakakaha o behi,

⁶hababu moi-moi o huhuba mangï ihi goko mangale ma Jou nia Jou Madutu kokiani yadiai deʼ o helewo magahu-gahumu. O huhuba mangï mal̄okuoka gënanga kokiani ngini nihi huba o huhuba-huhuba yatö tuhu-tuhuku.

⁷Nihi hubali nia dame mahuhuba deʼ ni ol̄omo genangokadau inoli nimore-morene ma Jou nia Jou Madutu Ai himangoka.

⁸O helewo-helewo yakapu-kapurika mal̄okuoka gënanga kokiani ngini nia tulihi nia totararonuku ma Jou Madutu Ai tita mabetongo moi-moi.”

⁹De ipaha kamamoi deʼ o Lewi ma imam-imam, o Musa wätemo o Israel manyawaika mata-mata, ”Riadodoto nia tailako nihidodiai deʼ ni ihene! O wange nënanga ngini nidadioka ma Jou nia Jou Madutu Ai umati.

¹⁰Hababu gënanga niwihi ngounu ma Jou nia Jou Madutu deʼ nia diai mata-mata Ai pareta ngohi tohi döa-döaka nginika o wange nënanga.”

¹¹De o Musa wätemo o Israel manyawaika,

¹² ”O Yordan ma Ngairi nia tobongo deʼ iböto, o Simon ai hoana, o Lewi, O Yehuda, o Isakhar, o Yusuf deʼ o Benyamin manga hoana kokiani ima okoino o Gerizim mal̄okuoka maöraha önanga yahetongo o barakati o hoana ma nyawaika nënanga.

¹³Maöraha yahetongo o lolai, o Ruben ai hoana, o Gad, o Asyer o Zebulon, o Dan ikali o Naftali manga hoana kokiani ima okoino o Ebal mal̄okuoka.

¹⁴O Lewi manyawa kokiani yahetongo o demo-demo nënanga deʼ manga ilingi yakua-kuatil̄e deʼ o Israel manyawa kokiani yö baluhu, ’Amin’.

¹⁵ O Lewi manyawa: ’Yobodito o nyawa yododiai o dulada o helewo, o gota ekola o haaka deʼ o gurasi, deʼ yahuba kaima ngiu-ngiunu. Ma Jou wodohata yapuji-puji o gomanga!.’ O kawaha yongodumu: ’Amin!ʼ

¹⁶ ’Yobodito o nyawa yahoromatiua manga dimono deʼ yamal̄aika önanga yapaliaraua.’ ’Amin!ʼ

¹⁷ ’Yobodito o nyawa yatotururu manga tonaka mabatingi imahi kokabatingi’ ’Amin.’

¹⁸ ’Yobodito o nyawa yahirö rehe-rehene o nyawa yopilo-piloko.’ ’Amin.’

¹⁹ ’Yobodito o nyawa yä ora o nyawa yotagi-tagino, o ngohaka o gohihi deʼ o bobao manga haku.’ ’Amin!ʼ

²⁰ ’Yobodito o nyawa wï hikauku ai ama karana ima röehe moi deʼ ai ama ngoi hekata momatengo ani.’ ’Amin!ʼ

²¹ ’Yobodito o nyawa imako röehe moi deʼ o aiwani.’ ’Amin.’

²² ’Yobodito o nyawa imako roëhe moi de ngoi hiranga o ama moi deʼ o ayo moi, ekola amiranga ima ama moi deʼ ima ayo moi.’ ’Amin!ʼ

²³ ’Yobodito o nyawa imako röehe moi deʼ ngoi toroa.’ ’Amin!ʼ

²⁴’Yobodito o nyawa yotoma ima ngiu-ngiünu.’ ’Amin!ʼ

²⁵’Yobodito o nyawa yototarima o tiwi o uru mabobokumu mangale yätoma o nyawa manga howono koiwaiwa.’ ’Amin!ʼ

²⁶ ’Yobodito o nyawa yatotomua ma Jou Madutu Ai tita deʼ Ai dodotoko deʼ manga manarama.’ ’Amin!ʼ ”