Read Tobelo O ULANGAN 28 Bible Online

O ULANGAN 28 - Tobelo bible

O ULANGAN 28

¹ ”Nako ngini niwihi ngounu ma Jou nia Jou Madutu deʼ nosetia nia diai hagala o pareta tohi döa-döaka nginika o wange nënanga, done Unanga aha winï diai ngini o hoana deʼ o berera manyawa duru yahö heto-hetongo o duniaka.

²Niwihi ngounu ma Jou nia Jou Madutu, done mata-mata o barakati nënanga aha winihi döaka nginika.

³Wohi barakati nia kota-kota deʼ nia dumule-dumule.

⁴Winihi barakati ngini, hiädono nia ngohaka yowöe, nia tonaka mahasili deʼ maboboloi deʼ nia hapi ikali nia kabingi deʼ nia duba duru kohangöe.

⁵Wohi barakati nia gandum nia utu-utuku ikali o inomo nia dodiai deʼ o gandum gënanga.

⁶Wohi barakati hagala nia usaha.

⁷Nako ngini ini parangi, ma Jou aha wähohihanga nia haturu. Onanga aha inï parangi deʼ madatoro ihi dodiaino, mä yopiringana ima hikokorikoka ua.

⁸Ma Jou nia Jou Madutu aha wohi barakati nia usaha deʼ wadol̄a nia gandum matau deʼ o gandum. Unanga aha winihi barakati ngini o bereraka Winihi döa-döaka nginika.

⁹Nako ngini niwihi ngounu ma Jou nia Jou Madutu deʼ nia diai Ai pareta, ngini aha winihi dadi Ai umati mahirete, hokä Wohi jajajioka.

¹⁰Done mata-mata o hoana deʼ o berera manyawa o duniaka aha inï make ngini ma Jou Ai ngongiriki manyawa, deʼ önanga aha inï dodato ngini.

¹¹Ngini aha winihi döaka nia ngohaka iwöe. Nia gigini aha iwöe deʼ nia tonaka mahasili deʼ maboboloi o bereraka wahi jaja jioka ma Jou nia ete de nia tohoraika mangale winihi döaka nginika.

¹²O dihangoka magogogono mangïoka deʼ maboboloi ma Jou aha wohiguti o awana ma orahoka. Unanga aha wohi barakati hagala nia usaha, hiädono ngini yakunu nia hibau manga ngöe o hoana deʼ o berera manyawa, mä ngini mahirete ngaro uha nibau.

¹³Ma Jou nia Jou Madutu aha winihi dadi ngini o tutuda hagala o hoana deʼ o berera manyawa manga hidogoronaka, deʼ koigoungua ninö ninïki. Nako ngini nisetia nihi ngounu ma Jou Ai pareta tinihi döa-döaka nginika o wange nënanga, ngini aha kai dogo okiaua nikuranga deʼ komaiwa nidohuku.

¹⁴Mä uha hakali-kali nio legaikaua o pareta-pareta gënanga deʼ madodagi sarakia nagali ma. Uhali nia puji deʼ nima higilaongo o gikiri mahomoaika.”

¹⁵”Mä nako ngini niwihi ngounua ma Jou nia Jou Madutu, deʼ nisetiaua nia diai hagala Ai pareta deʼ Ai tita ngohi tohi döa-döaka nginika o wange nënanga, done hagala o lolai nënanga aha inï tapal̄u ngini:

¹⁶Ibödito nia berera deʼ nia dumule.

¹⁷Ibödito nia gandum nia utu-utuku deʼ o inomo nia dodiai deʼ o gandum gënanga.

¹⁸Ibödito ngini, hiädono duga-duga kama huhutulu nia ngohaka, nia tonaka mahasili, ikali nia hapi deʼ nia kabingi deʼ nia duba.

¹⁹I bodito hagala nia usaha.

²⁰Nako ngini nia diai o dorou deʼ niwi umo ma Jou, Unanga aha winï dotagao o bodito, o ruäe deʼ o huha hagala ngini nia dodiai magoronaka, hiädono o öraha madodipoko dika magoronaka ngini winï binaha kama moiuku.

²¹O panyake itagali o panyake aha inï tapal̄u ngini, hiädono mabahaka o nyawa moiö ma nginioka moi okaua kayo gogerohi o bereraka ngini nio gogogere gënanga.

²²Ma Jou aha winï hukumu ngini deʼ o panyake o bobaku, o nobo-noboho deʼ o gogama. Unanga aha winï dotagao o hiwara deʼ o hidal̄oko itö tuhu-tuhuku hiädono nia gandum o dumule oka ibodito. O bodito-bodito gënanga kai taurika inï tapal̄u ngini hiädono ngini nibinaha.

²³Aha koi awanua deʼ nia tonaka itogowini hokä o behi.

²⁴Ma Jou wohi gutiua o awana o akere, duga-duga o awana o kafo deʼ o dowongi hiädono ngini mata-mataka nibinaha.

²⁵Nako ngini niwihi ngounua ma Jou nia Jou Madutu, Unanga aha wadiai nia haturu inï hohihanga. Ngini aha nia parangi madatoro nihi dodiaino, mä nipiringana nimahi kokorikokaua. Mata-mata o hoana deʼ o berera manyawa o duniaka aha ya mao yaporohono yamake nia bodito.

²⁶Nako ngini nihonenge, nia maiyeti idadi o totaleo deʼ o aiwani madorou ma inomo, deʼ moiua yaduhu o aiwani-o aiwani gënanga.

²⁷Ma Jou aha winï hukumu ngini deʼ o boro-boroho hokä wa dodiai o Mesir manyawaika. Nia röehe aha iomanga deʼ o boroho ma alu-aluhu deʼ o ngako-ngako iako-ako, mä koiwa mahouru.

²⁸Ma Jou aha wadiai ngini inï togohanga, nipiloko deʼ ni bingu.

²⁹O wange mahau-haukoka ngini kanimahi bobabal̄anga hokä o nyawa yopilo-piloko, mä ngini nia makeua o ngekomo. Hagala nia usaha aha koidadiua. Ngini kai taurika inï tuku deʼ inï ora, deʼ moiua inï riwo ngini.

³⁰Nako ngini niwihi ngounua ma Jou nia Jou Madutu, o hali-hali nënanga aha yatapal̄u nia diri: Ngini aha nimane, mä o nyawa mahomoa aha yokawingi deʼ nia mamane. Ngini aha nimahi goko o tau, mä koniö gogerua. Ngini nia dumule aha niö datomo o o angguru mä nia ol̄omua mahohoko.

³¹Nia hapi aha yatoaka nia lako mahimangoka, mä ngini aha nia ol̄omua ma akeme. Nia keledai-keledai aha yabirï ioiki ngini kania pulo-pulono deʼ aha koni higilio okaua. Nia duba-duba aha yahi döaka nia haturu-haturuika deʼ moiua inï riwo.

³²Nia lako mahimangoka nia ngoha-ngohaka aha yahi döaka hokä o gilaongo o nyawa o dagi-dagino manyawaika. O wange ihi getongo nia lako mahiri niä lingiri nia ngoha-ngohaka, mä nia usaha kaparahaja, hababu önanga aha yoliokaua.

³³O höana deʼ o berera manyawa yotagi-tagino aha yal̄ë nia tonaka mahasili mata-mata ngini nia make deʼ madubuho ni mä karajanga, mä ngini mahirete okia-kiaua nimä make duga-duga inï hangihara kai taurika deʼ ini hidiai itotorou.

³⁴Ngini aha initogohanga karana okianaga ngini nia mao deʼ nia make.

³⁵Ma Jou aha wadiai nia l̄ou iomanga deʼ o boroho ma alu-aluhu ihö hiri-hiri deʼ yakunua itogumu; nia l̄ouoka hiädono nia haekil̄e aha iomanga de o boro-boroho.

³⁶Ngini deʼ nia koano aha ma Jou winï ao o berera mahomoaika ngini koniä nakoua deʼ nia ete deʼ nia tohora makoyä nakoua. Genangokadau aha ngini nima higilaongo o giki-gikirika yadodiai gota deʼ o helewo.

³⁷Hagala o berera deʼo ngï ma Jou winihi kokabarihika ngini, hagala o nyawa aha yaporohono inï make ngini; ngini aha inï hohedu önanga deʼ ini gogiete.

³⁸Kohä amoko o gihihi ngini nihibarihi, mä mahasili kama huhutulu nia make, karana nia dö dato-datomo yamataka o kahoho ya ol̄omo.

³⁹Ngini nia dumule aha nio datomo o angguru deʼ nia paliara, mä nia pagelua ma angguru mahohoko ekola nia okerua ma angguru mateongo, karana o angguru magota mautu gënanga koiwaka o pipiti ya ol̄omo.

⁴⁰Nia berera yamode-modekika o zaitun magota mautu iwango, mä mahohoko aha irero, hiädono ngini nia makeua maminya.

⁴¹Ngini aha nia make o ngoha-ngohaka o nauru deʼ o ngoheka, mä önanga yäl̄ë hokä o dagokino o parangi ma goronaka, hiädono ngini niä make okaua önanga.

⁴²Mata-mata o gota mautu deʼ nia dato-datomo aha yamata o longu-longu ya ol̄omo.

⁴³O nyawa yotagi-tagino yogogogere nia bereraka aha kaidogo-dogo yokuaha, ena hioko nia kuaha mahirete kai dogo ikuranga.

⁴⁴Onanga deʼ manga tiwi mangale inihibau nginika, mä ngini konia kia-kiaua mangale nia hibau onangika. De mabaha önanga inï kuaha ngini.

⁴⁵Hagala o bodito gënanga aha inï tapal̄u ngini deʼ kai taurika inï ruäe ngini hiädono ngini nibinaha, karana ngini niwihi ngounua ma Jou nia Jou Madutuika deʼ konia diaiua hagala Ai tita winihi döa-döaka nginika.

⁴⁶O bodito-bodito gënanga marupa manyonyata igoungu ma Jou ai hukumanga nginiuku deʼ nia ngohaka deʼ nia danongika kahi ado-donika.

⁴⁷Ngini ma Jou nia Jou Madutu winihi barakatioka hagala o hali magoronaka, mä nioluku nima higilaongo Unangika deʼ nia hininga madebi-debini deʼ nia morene.

⁴⁸Karana gënanga kokiani ngini nima higilaongo nia haturu-haturuika naga ma Jou wahidingoto mangale inilawani ngini. Ngini aha inï habirokata, nia kiriti madudungu deʼ kania hekonoka ikali nikuranga hagala o hali magoronaka. Ma Jou aha winï tuku ngini mahayanga koiwa hiädono ngini ni binaha.

⁴⁹Moi o hoana deʼ o berera manyawa nimä mangaratiua manga demo aha ma Jou winidotagao o dunia mabahaino mangale inilawani ngini. Hokä o totaleo o rajawali önanga aha ini utuku ngini.

⁵⁰Onanga manga hayanga koiwa deʼ yadoraua o boberekika kayaoa o ngoha-ngohakika.

⁵¹Onanga aha yamata nia gigini deʼ nia tonaka mahasili, deʼ koi nigumal̄aua nia gandum, o angguru mateongo, o zaitun ma minya ekola nia hapi deʼ nia kabingi deʼ nia duba hiädono ngini nihonenge ini habirokata.

⁵²Onanga aha yoparangi o kota yogetongo nia bereraka ma Jou nia Jou Madutu winihi döa-döakoka nginka hiädono mabebeno o mehele magogurutil̄e deʼ ikö kua-kuata ngini nio ngano-nganono gënanga iruba.

⁵³Ma gogiriaka nia haturu-haturu ihi giloliti nia kota, ngini aha nia ngonganono itoaka karana o habirokata, hiädono nia ngoha-ngohaka mahirete ngini nimä ol̄omo, o ngoha-ngohaka winihi döa-döaka ma Jou nia Jou Madutu nginika.

⁵⁴Yö moholoi o nyawa yomomulia duru ikokurutil̄e manga sawaro aha manga ngonganono itoaka madekanino ihi gilolitino gënanga hiädono önanga ima ol̄omo manga ngoha-ngohaka mahirete karana koiwa o inomo mahomoa. Kama huhutulö ma, ünanga wihidöakua ai dodoto ekola ngoi hekata womï hohininga ekola ai ngoha-ngohaka yowö wango-wangohi.

⁵⁵

⁵⁶ Yö moholoioli o ngongoheka yomomulia ikokurutil̄e manga sawaro deʼ duru yokaya hiädono komaiwa yotagi yal̄ou-l̄ou, aha yodiai hoko genangoli. Maöraha nia haturu ihi giloliti nia kota, o ngongoheka gënanga aha manga nganono itoaka karana yahabirokata hiädono önanga kaima ngiu-ngiunu yaol̄omo manga ngohaka dahaö ima kil̄auino deʼ magogule. Kamahuhutulö ma, komihi döakua ami rokata mihohiningaika ekola ami ngoha-ngohakika.

⁵⁷

⁵⁸Nako ngini nisetiaua nihingounu mata-mata ma Jou nia Jou Madutu Ai tita yatö tuli-tulihi o buku nënanga magoronaka deʼ niwi horomatiua ma Jou nia Jou Madutu womomulia deʼ niwï hera-heranga.

⁵⁹Ma Jou aha winï dotagao nginiuku deʼ nia ngoha-ngohaka deʼ nia danonguku hagala o panyake yakunua yahouru deʼ obobaku o panyake koi paha-pahaua.

⁶⁰Hagala o panyake nio boborohono nia hohakihi o Mesiroka aha ini tapal̄u ngini, deʼ ngini koni togumokaua.

⁶¹Ma Jouö aha winï dotagao hagala irupa o panyake deʼ o bobaku o panyake yaheto-hetongua o buku nënanga magoronaka, ma Jou Ai Tita mabukuoka. De ngini aha winibinaha.

⁶²Ngarokä niwöeoka nia ngöe hokä o murumu o dihangoka, duga-duga nia huhutulu dika nia hidogoronaka kani wangohi, karana ngini nihingounua ma Jou nia Jou Madutuika.

⁶³Hokä ma Jou wosanangi winihi döaka okia honanga mata-mata kade maboboloi, Unanga aha wosanangi winibinaha deʼ wini hohihanga. Ngini aha winiduhu o bereraka itedekanokaua ngini nio gogere.

⁶⁴Ma Jou aha winihi kokitingakoka ngini hagala o hoana deʼ o berera manyawa manga hidogoronaka o dunia yamode-modekika. Dokengoka ngini aha nia huba hagala o gikiri yadododiai deʼ o gota deʼ o helewo, o gikiri ngini konia nako-nakoua deʼ nia ete deʼ nia tohora makoya nakoua.

⁶⁵Hagala o hoana deʼ o berera gënanga manga hidogoronaka ngini aha konia makeua nia hininga irïdi, deʼ koiwa naga o ngï yakunu ngini nia hetongo tingini madutu; ma Jou aha wadiai ngini duru kani hawa-hawanika deʼ nia ngonganono itoaka koiwa nia ngo-nganono.

⁶⁶Nia wowango aha salalu yohimanga o bodito. O hutu deʼ o wange ngini nia mao inï porohono deʼ nio modongo.

⁶⁷Maöraha nia make okia dika nia huo ihahara karana nihawana O ngoru-ngorumino ngini nio nganono yohutu, deʼ o hutu-hutu ngini nio nganono o ngorumino.

⁶⁸Ma Jou aha winihi dingotoli ngini o Mesirika deʼ o kapa, ngaroko ünanga wotemoka ngini aha nima kiliorokaua dokengika. Dokengoka ngini aha nimahi dailako nia hukunu nia diri hokä o gilaongo nia haturuika, mä kaima tengö ma, yoluku ini ija ngini.”