Read Tobelo O ULANGAN 30 Bible Online

O ULANGAN 30 - Tobelo bible

O ULANGAN 30

¹”O öraha nënanga ngini yakunu nimä ngiriki o barakati ekola o lolai hokä ngohi tohito tararonoka nginika. Nako ngini nia make deʼ nia maoka mata-mata o huha deʼ o hangihara gënanga deʼ niwango hagala o hoana deʼ o berera manyawa mahomoaino manga hidogoronaka o ngï ma Jou nia Jou Madutu winihi kokitingakoka, ngini aha niohininga o ngongirikika ngohi tohidöa-döaka nginika.

²Nako ngini deʼ nia difauku nimau nimakilioro ma Jou nia Jou Madutuika, de nia hininga magahumu nihingounu hagala Ai pareta ngohi tohi döa-döaka nginika o wange nënanga,

³done ma Jou nia Jou Madutu aha winï dora ngini. Ngini aha winï ao nimakilioro o hoana deʼ o bereraino kiakangi inihi kokitingakoka deʼ idadioli okia-kiaua nikuranga.

⁴Ngaroka ngini ini higerewoto okiaika honanga o dunia ya mode-modekika, ma Jou nia Jou Madutu aha winitoomu ngini deʼ wini ao ngini winihigilio.

⁵Done ngini yakunu nima hitingini oli o tonaka mahira nia ete deʼ nia tohora yogogere. Deʼ ngini aha idadi iholoi nia hasili iwöe, deʼ nia gegetongo iholoi niwöe deʼ nia ete deʼ nia tohora.

⁶Ngini deʼ nia difauku aha winihi döaka o hininga itotomoteke hiädono ngini niwï hininga ma Jou nia Jou Madutu deʼ nia hininga magahumu deʼ yakunu igila-gila nigogere o bereraka nënanga.

⁷Mata-mata o lolai gënanga aha waditifa nia haturu-haturu uku inï doha-dohata deʼ ini tuku-tuku ngini.

⁸Ngini aha niwihi ngounoli ma Jou deʼ nihidagi hagala Ai pareta naga tinihi döa-döaka nginika o wange nënanga.

⁹Ma Jou nia Jou Madutu aha wadiai nia hidailako mata-mata ihasili; ngini aha nia ngohaka manga ngöe deʼ mangöe nia aiwani o gigini; hagala nia dumule aha inihi döaka mahasili deʼ maboboloi. Ma Jou deʼ ai hininga isosanangi wadiai ngini nihasili ilamoko, hokä Unangö wosanangi wahidöaka o hasili ilamoko nia ete deʼ nia tohoraika.

¹⁰Mä ngini kokiani nihingounu ma Jou nia Jou Madutuika deʼ nihingounu hagala Ai tita yatuli-tulihi o buku nënanga magoronaka ma Jou Ai Tita mabuku. Ngini kokiani nimakilioro Unangika deʼ nia hininga ma gahumu.

¹¹O pareta tohi döa-döaka koyo muhuhaua mangale ngini deʼ koi kurutika uali.

¹² Mangï kodihangokaua, hiädono ngini nileha, ’O naguna aha wadöa dokengika la wal̄ë mangale ngone, hupaya ngone yakunu ho-ihene deʼ hohingounu?ʼ

¹³Mangï o ngoto mahonongakaua, hiädono ngone holeha, ’O naguna aha woiki o ngöto mahonongaika la wal̄ë mangale ngone, hupaya ngone yakunu hoihene deʼ hohingounu?ʼ

¹⁴Uha nileha hoko gënanga, karana o pareta gënanga duru imahi tigi-tigika nginika. Ngini nihi örikoka deʼ yakunoka nia hetongo nia hiningaka, hoʼ mahou kania diaiohi dika.

¹⁵O wange nënanga ngini yakunu nimä ngiriki ma oa-oa ekola itotorou, o ngango ekola o honenge.

¹⁶O wange nënanga ngohi tinihi pareta ngini mangale niwï hininga ma Jou nia Jou Madutu deʼ niwihi ngounu Unangika ikali nia diai hagala ai tita deʼ Ai pareta hupaya ngini nia hasili ilamoko deʼ nidadi o hoana deʼ o berera ma ago-agomo. Ma Jou nia Jou Madutu aha winihi barakati ngini o bereraka itedekanokaua ngini niö gogere.

¹⁷Mä nako ngini nihi ngounua deʼ nioluku nihigihene deʼ nihi gumal̄a nia diri nio rehene o diai mangale nia huba o gikiri ma homoa,

¹⁸maraioka ngini nibinaha, deʼ nia umuru aha koi kurutua o bereraka itedekanokaua ngini niö gogere. Nio hohininga! O hali gënanga ngohi tini hingahuoka nginika o wange nënanga.

¹⁹O öraha nënanga ngini yakunu nimä ngiriki o ngango ekola o honenge, ma Jou Ai barakati ekola Ai lolai. O dihanga deʼ o dunia ngohi ta ahoko idadi o hakihi mangale tingini nia putuhu. Nia iriki o ngango.

²⁰ Niwï hininga ma Jou nia Jou Madutu, niwihi ngounu Unanga deʼ nisetia Unangika. Done ngini deʼ nia difauku aha yowango deʼ nia umuru ikurutu o bereraka ma Jou wahi jajajioka nia ete deʼ nia tohoraika, o Abraham, o Ishak deʼ o Yakub.”