Read Tobelo O ULANGAN 31 Bible Online

O ULANGAN 31 - Tobelo bible

O ULANGAN 31

¹O Musa wä temo-temoli o Israel manyawaika,

² wato, ”O öraha nënanga tongohi ahi umuru o taongo o ratuhu moi deʼ monaoko iböto deʼ ngohi takunokaua todadi nia tutuda. Ma homoa degënanga ma Jou wotemoka ngohi yakunua ta tobongo o Yordan ma Ngairi.

³Ma Jou nia Jou Madutu mahirete aha wotagi nia himangoka deʼ wabinaha o hoana deʼ o berera manyawa yogö gogere genangokadau, hiädono ngini yakunu nio gogere toönanga manga tonakaka. O Yosua aha wodadi nia tutuda, hokä waheto-hetongoka ma Jou.

⁴ Ma Jou aha wä binaha o hoana deʼ o berera manyawa gënanga, hokä Unanga wä hohihanga o Sihon deʼ o Og, o Amori manyawa manga koano, ikali wawedere toönanga manga berera.

⁵Ma Jou aha winihi doäka ngini niä utumu önanga deʼ önanga kokiani ngini nia diai imatero hokä ngohi taheto-hetongoka nginika

⁶Kokiani ngini nia hininga ibitumu deʼ ibarani! Uha niä mödongo onangika, hababu ma Jou nia Jou Madutu mahirete aha wi nï riwo ngini. Unanga aha nia hininga wahuhaua ekola winï mal̄aika ngini.”

⁷Daha o Musa wï ahoko o Yosua, deʼ yongodumu o Israel manyawa manga himangoka ünanga wïtemo unangika, ”Kokiani ngona ani hininga ibitumu deʼ ibarani, Yosua! Ngona aha nätuda o hoana deʼ o berera manyawa nënanga mangale yogogere o berera wahi jajajioka ma Jou toönanga manga ete deʼ manga tohoraika.

⁸ Ma Jou mahirete wonituda deʼ wonï riwo ngona. Unanga aha ani hininga wahuhaua ekola woni mal̄aika ngona. Hababu gënanga uha nohawana ekola ani hininga ihuha.”

⁹Deʼ o Musa watulihi ma Jou o Jou Madutu Ai tita deʼ wahidöaka o imam-imam Lewi yahi momanarama mangale ihi dailako o Jaji ma Peti, deʼ o Israel manga tutuda-tutudaika.

¹⁰ Unanga wahipareta onangika, ”O taongo matumidi ma boba-haka o nagimi iehe mataongo magoronaka o Tau o Hoka-hoka ma rameangoka,

¹¹ngini kokiani nia basa o tita-tita nënanga deʼ nia ilingi makua-kuatil̄e mangale hagala o Israel manyawa yaino-ino iwi huba ma Jou nia Jou Madutu o ngï Wa iri-irikoka.

¹²Nia huloko mata-mata o nau-nauru o ngongoheka deʼ o ngoha-ngohaka ikali o nyawa o dagi-dagino yogö gogere nia bereraka ima toomu mangale ihi gihene yabö basa-basa gënanga, hupaya önanga imä dotoko iwi horomati ma Jou nia Jou Madutu ikali yosetia ihingounu hagala Ai pareta.

¹³Deʼ madodagi hoko gënanga nia ngoha-ngohaka komaiwahi yo ihene mangale ma Jou nia Jou Madutu Ai tita yakunu yoihene deʼ imä dotoko iwi horomati ma Jou madekana önanga yowango o bereraka itedekanokaua ngini nigogere o Yordan ma Ngairi mahonongaka.”

¹⁴Deʼ ipaha ma Jou wïtemo o Musaika, ”Ani wowango itedekanokaua, niahoko o Yosua deʼ nïao ünanga Ahi Tauika, hupaya Ngohi yakunu tihidöaka o hidumutu-hidumutu unangika.” Done o Musa deʼ o Yosua yoiki ma Jou Ai Tauika,

¹⁵deʼ ma Jou womahi matoko ai diri onangika o liate o lobi magoronaka imahi tigi-tigika o Tau mangoranika.

¹⁶Ma Jou wato o Musaika, ”Ani ajali itigioka. Deʼ nosoboka, o Israel manyawa yosetia okaua Ngohino deʼ ihi pongono o jaji To dodiai dede önanga. Onanga aha ihi mal̄aika Ngohi mangale ya huba hagala o gikiri yahö huba-huba o bereraka itedekanokaua önanga yö ngohama.

¹⁷Nako gënanga idadi, Ahi dohata aha duru kahagiria onangika. Onanga aha Ta mal̄aika deʼ Ta binaha. Mangöe o bodito yomodo-modongo aha yatapal̄u önanga, daha önanga imamao mata-mata gënanga idadi karana Ngohi, toönanga manga Jou Madutu, dede onangokaua.

¹⁸O öraha gënanga Ngohi toluku tariwo önanga, karana önanga yahubaka hagala o gikiri mahomoa deʼ yodiai o dorou.

¹⁹O öraha nënanga natulihi o nyanyi nënanga deʼ nä dotoko o Israel manyawaika hokä o hakihi onangika.

²⁰Onanga aha Tä ao o berera ikaya-kaya deʼ ibo burereika, hokä Tahi jajajioka toönanga manga ete deʼ manga tohoraika. Genangokadau önanga aha yowango deʼ masanangi yamake hagala o inomo önanga yopö paralu. Mä deʼ ipahaika önanga aha ima idulu deʼ yahuba hagala o gikiri mahomoa. Onanga ihi tila ngohi deʼ ihi pongono Ahi jaji,

²¹deʼ mangöe o bodito yomodo-modongo aha yatapal̄u önanga. Mä o nyanyi nënanga aha kahirahi ihi nyanyi deʼ yapake hokä o hakihi onangika. Maboboloi öraha nënanga, önanga Ta ao wahi o berera Tahi jajajika, Ngohi tohi öriki toönanga manga dibanga madodagi.”

²²O wange genangö o Musa watulihi o nyanyi gënanga, deʼ wä dotoko o Israel manyawaika.

²³ Deʼ ipaha ma Jou wï temo-temo o Yosuaika o Nun aingohaka, wato, ”Kokiani ngona ani hininga ibitumu deʼ nobarani, Yosua! Ngona aha nä tuda o Israel manyawa yongohama o berera Tahi ja-jaji onangika, deʼ Ngohi aha tonï riwo ngona.”

²⁴Deʼ o Musa watulihi ma Jou Madutu Ai tita o buku moi magoronaka. Unanga watulihi wohi dodiai madodihiraka hiädono mabaha.

²⁵Maöraha deʼ waböto, ünanga wätemo o Lewi ma imam-imamika yomomanarama mangale ihidö dailako o Jaji ma Peti,

²⁶”Nia l̄ë ma Jou Madutu Ai Tita mabuku nënanga, deʼ nia kelenga uku nia Jou Madutu Ai Jaji ma Peti mahonongaika, hupaya kahirahi naga genangokadau hokä o hakihi o Israel manyawaika gënanga.

²⁷Ngohi tohi öriki önanga duru itogowini manga häeke deʼ yöigo yolawani. Matero ngohi kato wango-wangohi mä önanga yolawani ma Jouika; okia hongoli ahaö ngohi tohonenge ipahaika!

²⁸Oraha nënanga nä huloko mata-mata o hoana manga tutuda deʼ o kokapita ima toomu tongohi ahi himangoka, hupaya ngohi yakunu tohi ädono o hali-hali nënanga onangika. O dihanga deʼ o dunia ngohi taähoko hokä o hakihi nginika.

²⁹Ngohi tohiöriki ngohi deʼ tohonengoka hagala o nyawa gënanga yodadi itorou deʼ yatila okia ngohi tä doto-dotokoka onangika. Deʼ aha önanga yä tapal̄u o bodito, karana yadiai ma Jou wongamo deʼ yodiai okianaga Wa lara-laranga.”

³⁰Deʼ ipaha o Musa wa heto-hetongo o nyanyi nënanga hiädono iböto magogiriaka yongodumu o Israel manyawa ihi gihene.