Read Tobelo O ULANGAN 32 Bible Online

O ULANGAN 32 - Tobelo bible

O ULANGAN 32

¹”Ni ihene, hei o dihanga, ngohi tö igo totemo-temo; hei o dunia, nia ngauku nihi dakunu!

²Tanu ahi dodotoko iuti hokä o awana, deʼ ahi demo-demo itututu hokä o dumunitara, hokä o awana yarë rero o momo mal̄okuku deʼ hokä o äwana iriki-rikimi idö dato-datomo mal̄okuku.

³Ngohi aha tohi giriri ma Jou Ai romanga. Tohi ngangahu tongone nanga Jou Madutu Ai kabaharanga!

⁴Ma Jou ani roriwo wonö nau-nauru, ai manarama itotomo, deʼ iadili mata-mata Ai ngekomo. Ani Jou Madutu wosetia Unangoka koiwa o lalimi, Unanga wodiai maoa-oa deʼ itiai.

⁵Mä ngini gënanga o hoana manyawa nisosetiaua, deʼ ipatutokaua nidadi Ai umati, o hoana manyawa inï ömanga o lalimi deʼ o baradoha.

⁶Hoko gënanga ngini nia balahi ma Jou Ai oa-oa, hei o nyawa bodo deʼ nia akali koiwa? Koigoungua Unanga nia Ama, nia Dodadi, winihi dadadi ngini o hoana deʼ o berera moi?

⁷Niohininga mahiraino, nia tailako manga öraha yohö hira-hiraika. Nia leha nia dimo-dimonika, hupaya önanga inihi ngahu nginika.

⁸ Maöraha Duru woko Kurutil̄e waregu o tonaka, moi-moi o hoana deʼ o berera wohi tantu manga daera deʼ o gikiri moi hokä wakokuaha.

⁹Mä o Yakub aidifauku nënanga ma Jou wä iriki mangale Ai diri mahirete.

¹⁰Unanga wä make önanga ma gogiriaka yakaika yakaino yodagi-dagi o ngï kai riridikaoka o tonaka ikokakahaka. Deʼ Unanga wä hohongo deʼ wä paliara önanga deʼ wä goana önanga hokä to Unanga madutu.

¹¹Hokä o totaleo o kawihi yodotoko mangohaka ihoho yatagoko magahuhu irö refe-refeika deʼ yatotiri magahuhu mal̄okuoka,

¹²hoko gënanga ma Jou mahirete wä tuda Ai umati, koiwa naga o gikiri mahomoa iwi tomoteke Unanga.

¹³Unanga wadiai önanga yakuaha hagala ol̄oku; hagala o dumule mahasili önanga yool̄omo deʼ yaokere o ohungu ihü huhuku ma gula o doporono o helewoino. Onanga yamake o minya o zaitun ma gotaino iwango o tonaka deʼ ma hohelewokaino.

¹⁴Manga hapi deʼ manga duba deʼ o kabingi mahuhu mahasili iwöe; toönanga manga aiwani o gigini duru irorahai, toönanga manga gandum deʼ manga angguru mateongo duru maoa-oa.

¹⁵Ma Jou Ai umati idadi yokaya, mä yoigo yolawani, önanga manga boburere, o inomo ihi bunuhu. Deʼ önanga iwi mal̄aika ma Jou Madutu, toönanga manga Dodadi deʼ iwi tila wahi Hohalamti wo poputurungu.

¹⁶Onanga yahuba o gomanga, hiädono ma Jou wä dohata, ai gangamo yamomiki karana o dorou gënanga.

¹⁷ Onanga ihi huba o huhuba hagala o womaha madorouika ma Jou Madutu ua, hagala o gikirika yanö nako-nakoua, hagala o gikiri mahungi yomodo-modongua toönanga manga ete deʼ manga tohora.

¹⁸Onanga iwï legaikaua wahi Hohalamati o wopo puturungu, iwi wohanga manga Jou Madutu wahi döa-döaka o wowango.

¹⁹Wa make o hali gënanga, ma Jou wongamo, deʼ wä tila Ai ngoha-ngohaka.

²⁰Wato, ’Ngohi tolukoka tä riwo önanga; mal̄aika Tä make mabobahaka önanga sarakia. Hababu o nyawa geönanga manga haeke itogowini deʼ kama moiuku koyo setiaua.

²¹ Onanga yadiai Ngohi tö dohata o Jou Madutuika ua, deʼ tongamo toönanga manga gomanga maduladaika. Done Tadiai Ahi umati yä dohata o hoana de o berera ma nyawaikaua, deʼ Tä ngamo o hoana deʼ o berera manyawa yobodo-bodoika.

²²Ahi dohata aha itokara hokä o uku yatuhuku hiädono o nyawa yohone-honenge manga duniauku. O uku gënanga yatuhuku o dunia deʼ hagala mahasili, deʼ hagala ol̄oku hiädono ma ngutu-ngutukuku.

²³Itogu-togumua Tä dotagao o bodito, Ahi toimi mata-mata Tahi toimi onangika.

²⁴Onanga aha yohonenge karana yagogama deʼ yahahini, deʼ karana o panyake hoboborohono. Tä mal̄aika önanga o aiwani madorou yagoli, deʼ o dodiha ibiha-biha yatuduku.

²⁵O parangi iao honenge o ngeko-ngekomika; o borohono yatapal̄u hagala o nyawa o tauoka. O gogoduru deʼ o moholehe ihi gögö il̄e aha yabinaha, inoli o ngohaka magil̄au deʼ o nyawa youmu-umuroka.

²⁶Ngohi tomau ta hohihanga önanga kama moiuku, hupaya önanga tä hininga okaua.

²⁷Mä Ngohi toluku o Israeloka manga haturu imahilamoko; uha-uha önanga yatagapi ihowono deʼ yotemo önanga yahohihanga Ahi umati,’ ena hioko Ngohi ganga tadiai.

²⁸O Israel moi o hoana deʼ o berera manga dibanga koiwa; o mangarati koiwa naga onangoka.

²⁹O demo ma ade önanga yobarija, önanga aha imangarati, deʼ yapikiri sarakia önanga mabahaika.

³⁰Sarakia womatengo wakunu waginïki o nyawa yaribuhu moi, deʼ yahinoto yadiai o nyawa yaribuhu ngimoi yopiringana? Ma Jou, toönanga manga Jou Madutu, wahukunoka önanga; önanga wamal̄aka ma Jou Madutu wopoputurungu.

³¹O Israeloka manga haturu ihi öriki toönanga manga hohohongo koiwa hokä ma Jou Madutu o Israeloka manga hohohongo.

³²Hababu önanga itorou hokä o Sodom deʼ o Gomora, hokä o angguru mautu mamali-mali deʼ mahohoko deʼ marasongoka.

³³Toönanga manga angguru mateongo ganga o dodiha ibiha-biha marasongo

³⁴Ma Jou wohininga Ai umati manga haturu manga manarama deʼ aha wä hukumu önanga toenanga maorahoka.

³⁵ Ma Jou aha wabalahi deʼ wä hukumu önanga, itedekanokaua önanga yotifa yobinaha; manga öraha yowedere önanga itaiti iboa.

³⁶ Ma Jou wahihalamati Ai umati deʼ wädora Ai gogilaongo, nako Unanga wä make önanga ima ngakunokaua deʼ imataka manga kuata.

³⁷Done ma Jou aha wäleha Ai umatika ’Kiaka yaika o gikiri ikö kua-kuata ngini nio ngano-nganono?ʼ

³⁸Onanga yaol̄omo o haki ngini nihihö huba-huba, deʼ yaokere o angguru mateongo ngini nihihö huba-huba. Niä huloko önanga yaino ini riwo ngini, mal̄aika önanga yodadi nia hohohongo.

³⁹Nia make, Ngohi ma Jou Madutu To ma Tengo-tengoka, koiwa o Jou Madutu sawaliua Ngohi. Ngohi tä toma deʼ tahiwango, tä l̄abo deʼ tahitogumu. Nako Ngohi okianaga tadiai, moiua yakunu yolawani.

⁴⁰Mangale ngohi mahirete, o Jou Madutu towango-wango Tagoraka Ahi giama deʼ tokoboto:

⁴¹Ngohi aha Ahi oworo toma gihoro taleto-letongo, deʼ tohidagi o hukumanga. Ta balaha mata-mata Ahi lawani deʼ Tä hukumu mata-mata ihi doha-dohata Ngohi.

⁴²Hagala Ahi toimi aha ihi nauhu toönanga manga awunu; mata-mata ihi lawa-lawani Ngohi Tä toma deʼ Ahi öworo. O nagona dika Tä mal̄aikaua ihi lawani Ngohi; o nyawa yatago-tagokino deʼ yal̄abo-l̄abo kokiani kayo honenge dika.

⁴³ Hei hagala o hoana deʼ o berera, niä higiriri ma Jou Ai umati, hababu ma Jou wä hukumu mata-mata yatoma-toma önanga. Unanga wabalahi manga janggutu ai haturuika mä wa apongo Ai umati manga baradoha.”

⁴⁴O Musa deʼ o Yosua o Nun aingohaka yahetongo o nyanyi gënanga, hiädono o Israel manyawa yongodumu yakunu yoihene.

⁴⁵Wo hiädono ma Jou Ai dodotoko o Israel manyawaika de iböto,

⁴⁶o Musa watemo, ”Niohininga nihi dodiai mata-mata o pareta tohi döa-döakoka nginika o wange nënanga. Nia hidotoko nia ngoha-ngohakika, hupaya önanga deʼ manga setia yadiai mata-mata ma Jou Ai tita.

⁴⁷O dodotoko gënanga o demo ihohomoaua, duga-duga nia ngängo. Nihingounu mata-mata o pareta gënanga, hupaya ngini nia umuru ikurutu o bereraka itedekanokaua niö gogere o Yordan ma Ngairi mahonongaka.”

⁴⁸ O wange gënanga dika ma Jou wïtemo o Musaika,

⁴⁹”Noiki o Abarim mal̄oku ma buturungika o Moab mabereraka o Yerikho ma kota ma honongaka. Deʼ nodöa o Nebo mal̄oku il̄e deʼ napulono o Kanaan matonaka itedekanokaua Tohi döaka o Israel manyawaika.

⁵⁰Ngona aha nohonenge ol̄oku gënanga mal̄okuoka, hokä o Harun ani riaka wohonenge o Hor mal̄okuoka.

⁵¹Ngini inihinoto nisetiaua Ngohino deʼ nihi horomatiua Ngohi o Israel manyawa manga himangoka maöraha ngini naga o Meriba majobubuoka, imahi tigi-tigika o Kades ma kotaika, o Zin matonaka ikokakahaoka.

⁵²Karana gënanga ngona yakunua nowohama o bereraika Tahidö doa-doaka o Israel manyawaika; ngona duga-duga yakunu mago gurutoka deʼ nö lega-legaika.”