Read Tobelo O ULANGAN 33 Bible Online

O ULANGAN 33 - Tobelo bible

O ULANGAN 33

¹Wohonengo wahi, o Musa, ma Jou Madutu Ai huhuloko, wahi barakati o Israel manyawa de o demo-demo nënanga:

²”Ma Jou woböa o Sinai mal̄oku deʼ waino; Unanga woböa o Edom mal̄okuino hokä o wange malako deʼ o Param mal̄okuoka deʼ Wä tararono Ai umati. Unanga iwi moteke o malaekat yaribuhu ngimoi; o uku itoka-tokara Ai nirakoka.

³Igoungu, ma Jou wä dora hagala Ai hoana deʼ o berera Unanga wä hohongo mata-mata o nyawa yodadadi to Unanga. Nia ino hatila bukuku Ai l̄ou mahimangoka deʼ hohingounu hagala Ai pareta

⁴O tita wohi doa-doaka o Musa ngone hohingounu, tö hoana deʼ o berera nënanga duru dema ija-ijaka.

⁵Maöraha o Israeloka ima toomu deʼ toönanga manga tutuda-tutuda, ma Jou wodadi Ai umati manga Koano.”

⁶Mangale o Ruben ai hoana, o Musa wato, ”Tanu o Ruben ai hoana komaiwa yobinaha ngarokä manga nyawa kamanga huhutulu dika.”

⁷Mangale o Yehuda ai hoana ünanga wato: ”Ma Jou woihene o Yehuda ai hoana; deʼ manga berera. No parangi mangale önanga, ya Jou nä riwo önanga manga lawani manga himangoka.”

⁸ Mangale o Lewi ai hoana ünanga wato: ”Deʼ o Urim deʼ o Tumim Ngona nohinyata Ani mau, deʼ mangekomo o Lewi manyawa, Ani gilaongo yososetia. Ngona nä tailako önanga o Masa mabereraka, deʼ nima teke ributuoka dede önanga o Meriba majobubuoka.

⁹Onanga yosetia Ngonaika iholoi deʼ hagala mata-mata, imahi holoika deʼ o dimo-dimono deʼ manga roriadodoto. Hagala Ani pareta önanga ihingounu, Ani jaji önanga yatotomo.

¹⁰Onanga yadotoko Ani umati ihingounu mata-mata Ani pareta deʼ ihi huba o huhuba Ani huhuba mangï mal̄okuoka.

¹¹Jou, nä riwo o hoana nënanga hupaya yokuata, tanu Ngona ahi hininga yadaene toönanga manga manaramika. Nä binaha mata-mata toönanga manga haturu hiädono yakunokaua yomomiki.”

¹²Mangale o Benyamin ai hoana ünanga wato: ”Nënanga o hoana wadö dora-dora ma Jou. Unanga wä hohongo önanga o hutu deʼ o wange deʼ wogogere toönanga manga hidogoronaka.”

¹³Mangale o Yusuf aidifauku ünanga wato: ”Tanu toönanga manga tonaka ma Jou wohi barakati deʼ o awana, de o akere o tonakil̄e.

¹⁴Tanu maöraha ihi getongo deʼ maboboloi o hohoko ya ol̄o-ol̄omo o hohoko duru ma oa-oa mautuoka iomuku.

¹⁵Tanu hagala madoporono ihira-hira inohi iomanga deʼ o tonaka mahasili marororahai.

¹⁶Tanu ai tonaka hagala ma oa-oa duru deʼ maboloi, deʼ wohi barakati mangale ma Jou Ai oa woto temo-temo o momo i toka-tokarino. Tanu o barakati gënanga yaduguti o Yusuf aidifauku, hababu ünanga o tutuda ai roriadodoto manga hidogoronaka.

¹⁷O Yusuf ai kuata o banteng o dutu moi, deʼ o hapi manauru o honganika matataduku genangala o Manasye ai ribu-ribuhu deʼ o Efraim ai sä säna. Hagala o hoana deʼ o berera yaohana deʼ ihi dodohuku hiädono o dunia mabahaika.”

¹⁸Mangale o Zebulon deʼ o Isakhar manga hoana ünanga wato: ”Tanu o Zebulon ai hasili iwöe karana hagala ai dodagi, deʼ o Isakhar wohalamati ai tau-tauoka.

¹⁹Onanga yä ahoko hagala o hoana deʼ o berera toönanga manga l̄oku-l̄okuika deʼ ihihuba o huhuba madiai dokengoka. Onanga yamake o kaya o ngötino, deʼ o dowongino o hohana magurutu.”

²⁰Mangale o Gad ai hoana ünanga wato: ”Iwihi gogiriri ma Jou Madutu wohi woata o Gad ai daera. O Gad wotamä hokä o singa o dutu moi imau yakakihi manga giama ekola manga häeke makai.

²¹O tonaka duru ma oa-oa wal̄ë mangale ai diri o tutuda manga hidoku iwi hidoaka unangika. Onanga yadiai hagala ma Jou Ai pareta deʼ Ai tita maöraha o Israeloka manga tutuda ima toomu dede önanga.”

²²Mangale o Dan ai hoana ünanga wato: ”O Dan hokä o singa magö o dutu moi ima totubo ihupu o Basan deʼ yaino.”

²³Mangale o Naftali ai hoana ünanga wato: ”O Naftali iwi hiholoi deʼ ma Jou Ai barakati deʼ ai dora; ai daera o Galilea ma Taagaoka hiädono o koreharail̄e.”

²⁴Mangale o Asyer ai hoana ünanga wato: ”O Asyer iwihi barakati iholoi deʼ o hoana mahomoa; tanu ünanga wodadi ai roriadodoto manga hayangi, deʼ o zaitun magota iwango iburere ai tonakoka.

²⁵Tanu hagala ai kota yahohongino deʼ o ngorana o tabaga deʼ o behi ilö lago-lagomo hupaya ai wowango salalu kai dame-dame deʼ kai rirïdi.”

²⁶”Hei Israel! Koiwa o gikiri hokä nia Jou Madutu; Unanga wa tilakuru o dihanga deʼ ma utumu deʼ watotara o lobi mangale winï riwo ngini.

²⁷Ma Jou Madutu salalu wodadi nia hohohongo, Ai giama ikokakali winï tiki ngini. Unanga wä duhu nia haturu nia himangoka, deʼ winï huloko ngini nia binaha önanga.

²⁸Done o Yakub aidifauku aha yowango de kai rirïdi o bereraka mapine deʼ ma angguru mateongo deʼ maboboloi, deʼ yapehaka deʼ o dumunitara o dihanguku.

²⁹No utumu ngona, hei Israel! Koiwa naga o hoana deʼ o berera hokä ngona ma Jou wonihi halamati. Ma Jou hokä o oworo deʼ o dadatoko ngonaika; mangale wonï riwo ngona deʼ wonihi döaka o utumu ngonaika. Hagala ani haturu aha yoböa yogahoko nadora, deʼ ngona aha nadoko-doko önanga.”