Read Tobelo O ULANGAN 34 Bible Online

O ULANGAN 34 - Tobelo bible

O ULANGAN 34

¹Daha o Musa wamal̄a o Moab matonaka irata-rata deʼ wa döa o Nebo mal̄oku, o Pisga matubuil̄e o Yerikho o wange ma hiwaroko idaduoka. Genangokadau ma Jou wihi dumutu unangika mata-mata o berera gënanga, enagënanga: o Gilead madaera o koremieuku magurutika o Dan ma kota;

²mata-mataika o Naftali ai daera; o Efraim deʼ o Manasye manga daera, o Yehuda ai daera o wange madumuniha magurutika o Ngöto i Kokorona;

³o Yehuda o koreharail̄e idaduoka deʼ o tonaka irata-rata ima hoheika o Zoar deʼ yaino o Yerikhoika, o kota iomanga de o korma magota mautu.

⁴ Deʼ ma Jou wïtemo o Musaika, ”Genanga maberera Tahijö ja-jaji o Abraham, o Ishak deʼ o Yakubika mangale Tahi döaka toönanga manga ngohaka deʼ manga danongika. Ngohi tonihi matokoka ngonaika, Musa, mä toni higumal̄aua ngona noiki dokengika.”

⁵Daha o Musa ma Jou Ai gilaongo wohonenge o Moab matonakoka, hokä ma Jou wahetongoka.

⁶Ma Jou wï lungunu ünanga o wai moioka o Moab matonakoka o Bet-Peor makota mahonongaka, mä kahi ädono o wange nënanga kao nyawa moiö maihi örikua madiai ai jëre.

⁷O Musa wohonenge ai umuru o taongo o ratuhu moi deʼ monaoko. Ai kuata koi kurangua deʼ womä lega-lega kai tara-ronohi.

⁸O Moab matonaka irata-rataka o Israel manyawa iwï gari o Musa deʼ imahi noa o duka mapakeanga madekana o wange moruangeino.

⁹Ma Jou wï hiholoi o Yusak o Nun aingohaka deʼ o sawaro karana ünanga o Musa wï tumutoka wodadi ai dagali. O Israel manyawa iwi hingounu o Yosuaika deʼ ihi dagi hagala o pareta ma Jou wohidö doa-doaka onangika de madodagi o Musa.

¹⁰ O Israel matonakoka koiwaka o nabi hokä o Musa yotemo-temo ima teke rihimangino deʼ ma Jou.

¹¹Koiwa yadodiai o nonako ihera-heranga deʼ ihö hera-herangaika imamoteke deʼ ma Jou Ai pareta.

¹²Koiwa yadodiai hagala o manarama i lago-agomo deʼ hö modo-modongo hokä o Musa wadodiai o Israel manyawa yo ngödumu manga himangoka.