Read Tobelo O ULANGAN 6 Bible Online

O ULANGAN 6 - Tobelo bible

O ULANGAN 6

¹”Ma Jou nia Jou Madutu wohi huloko ngohi tinï dotoko mata-mata o tita nënanga hupaya ngini nia diai o bereraka itedeka-nokaua ngini nio gogere.

²Kokiani ngini de nia difauku nia wowango magurutu niwi horomati ma Jou nia Jou Madutu deʼ nihi ngounu Ai tita mata-mata ngohi tohi ado-adonoka nginika, hupaya ngini nia umuru ikurutu o bereraka gënanga.

³Hababu gënanga ni ihene roriadodoto, nia diai gënanga de nia setia, hupaya ngini nihalamati deʼ nidadi o hoana de o berera ma ago-agomo manyawa o berera ikaya-kaya deʼ iboburere oka, hokä wojajioka ma Jou nanga ete de nanga tohora manga Jou Madutu.

⁴ Roriadodoto, nio hohininga! Duga-duga ma Jou, deʼ ma Jou dika tongone nanga Jou Madutu!

⁵ Niwihininga ma Jou nia Jou Madutu deʼ nia hininga ma gahumu: Nihidumutu gënanga nia wowango madodagi magoronaka deʼ nia manarama magoronaka.

⁶ Hakali-kali uha nia wohanga o pareta-pareta ngohi tinihi döa-döaka nginika o wange nënanga.

⁷Niä dotoko nia ngoha-ngohaka. Kokiani ngini nihi ade-ade nia tau magoronaka ekola nia tau maporetoka, maöraha nimahi batonguku deʼ maöraha nikarajanga.

⁸Nihi likoino nia giamino deʼ nihi dapakitoko nia bionoko la niö hohininga.

⁹Nihi tulihika nia tau mangorana maliateika deʼ nia ngorana ma amokika.”

¹⁰ ”Ma Jou nia Jou Madutu wojaji nia ete deʼ nia tohoraika o Abraham, o Ishak deʼ o Yakub Unanga aha wahi döaka o berera gënanga nginika. Ma kota ma ago-agomo deʼ mahasili iwöe, deʼ konginiua nihi goko.

¹¹Ma tau iomanga de o bara-baranga maoa-oa, deʼ konginiua niö dol̄a. Ngini aha nimä make hagala o humu, deʼ konginiua nihaiti. Ngini aha nimä make o anggur deʼ o zaitun madumule, deʼ konginiua nidatomo. Nako ma Jou winï ao ngini o bereraika gënanga, dede maënanga ngini nio nö nahihu mangale nia ol̄omo,

¹²nimä goana nihi dodiai hupaya uha niwi wohanga ma Jou winihi bebasoka ngini o Mesir mabereraka, o ngï ngini imä gilaongo.

¹³ Niwi horomati ma Jou, nia Jou Madutu, deʼ niwipuji Unangika dika, deʼ nako ngini nikoboto, nia diai de tounanga Ai romanga dika.

¹⁴Uha nia huba o gikiri mahomoa yahö huba-huba o hoana de o berera manyawa inihi gogilolitino.

¹⁵Nako ngini nia huba o gikiri mahomoa, done ngini aha inï tapal̄u ma Jou nia Jou Madutu Ai dohata deʼ nibinaha kama moiuku, hababu ma Jou nia Jou Madutu naga tingini nia hidogoronaka woluku niwihi tero de okianagaö.

¹⁶ Uha niwitaili ma Jou nia Jou Madutu hokä ngini nia diai o Masaka,

¹⁷Nihi ngounu mata-mata o tita ma Jou nia Jou Madutu wohi döa-döaka nginika.

¹⁸Nia diai okianaga imoteke ma Jou yaoa deʼ iadili, done ngini aha nihalamati. O tonaka iboburere ma Jou wahijä jajioka nia ete deʼ nia tohoraika, aha idadi tingini madutu,

¹⁹deʼ ngini aha niä duhu nia haturu-haturu hokä wojajaji ma Jou.

²⁰O wange maduruino nia ngoha-ngohaka aha yoleha nginika, ’Yadodoa hoʼ ma Jou nanga Jou Madutu wonä huloko ngone hohi ngounu mata-mata o pareta gënanga?ʼ

²¹Done kokiani ngini nihaluhu hoko nënanga, ’Mahiraino ngone hodadi o Mesir ma koano ai gilaongo, daha ma Jou wonahi bebasi ngone de o kuata ilago-agomo.

²²Ngomi mahirete mia hakihi ma Jou wadiai ihö hera-heranga de o hali-o hali hoboborohono o Mesir ma nyawaika deʼ toönanga manga koano ikali mata-mata ai pegawe.

²³Unanga o Mesir mabereraka de wonähi bebasi mangale wonä ao ngone nenangino, deʼ o tonaka nënanga Wonahi döaka ngoneino hokä wahi jajioka nanga ete de nanga tohoraika.

²⁴Ma Jou nanga Jou Madutu wonä huloko ngone hadiai mata-mata o pareta gënanga deʼ hihoromati Unanga. Nako ngone hodiai hoko gënanga, Unanga aha salalu wapaliara tongone nanga hoana deʼ nanga berera hupaya ngone kahirahi howango de mahalamati.

²⁵Nako ngone de nanga setia hohi ngounu hagala wohi popareta ma Jou nanga Jou Madutu ngoneino, done Unanga aha wamao wosanangi ngoneino.’ ”