Read Tobelo O ULANGAN 7 Bible Online

O ULANGAN 7 - Tobelo bible

O ULANGAN 7

¹ ”Ma Jou nia Jou Madutu aha winï ao ngini o bereraika aha ngini nio gogere, deʼ mangöe o hoana deʼ o berera de manyawa wä duhu genangokadau. Nia lako mahimangoka Unanga aha wä duhu tumidi o hoana deʼ o berera iholoi iago-agomo deʼ iholoi i kuata de ngini, enagënanga o Heti manyawa, o Girgasi, o Amori, o Kanaan, o Feris, o Hewi deʼ o Yebusi manyawa.

²Nako ma Jou nia Jou Madutu wohi döaka o hoana deʼ o berera gënanga nia kuaha magoronaka deʼ ngini niä hohihanga önanga, niä toma önanga mata-mata. Uha niä dora önanga nidiai o jaji dede önanga.

³Ngini yakunua nikawingi dede önanga, deʼ uha nia hi gumal̄a nia ngoha-ngohaka yokawingi dede önanga,

⁴hupaya önanga uha nia ngoha-ngohaka yahitingaka magurutika de ma Jou mangale yahuba o gikiri mahomoa. Nako ngini nia huba o gikiri mahomoa, ma Jou wongamo deʼ ngini aha de majapati winï binaha.

⁵ Hababu gënanga, nia kilianga o hoana de o berera gënanga manga huhuba-huhuba mangï, nia wedere manga liate-liate o helewo önanga yapulono ikaramati, nia heleuru o Asyera manonako-nonako, deʼ nia tuhuku o gomanga madulada önanga yahuba-huba.

⁶ Nia diai mata-mata gënanga karana toma Jou nia Jou Madutu. Hagala o hoana deʼ o berera o dunia mal̄okuoka, ngini dika ma Jou nia Jou Madutu winï iriki mangale nidadi Ai umati womä dinga-dingakika.

⁷Ngini winï hininga deʼ winï iriki ma Jou koigoungua karana ngini iholoi ni amoko de o hoana de o berera mahomoa; igoungu ngini ganga o hoana de o berera duru ni eteke o dunia mal̄okuoka.

⁸Mä ma Jou winï iriki ngini karana Unanga winï dora ngini deʼ woigo watotomo o jaji wadodiai de nia ete de nia tohora. Ma hababu gënanga Unanga winï hihalamatoka ngini de o kuaha ma ago-agomo deʼ winihi bebasi ngini nigilaongo ma koano Mesirika.

⁹ Nio hohininga ma Jou nia Jou Madutu gënanga woma tengo-tengoka ma Jou Madutu, deʼ Unanga ma Jou Madutu wososetia. Ma Jou wohitö totomo Ai jaji deʼ wohi dumutu Ai dora kahirahi hiädono manga difauku iribuhu o nyawa iwï dora-dora Unanga, deʼ ihi ngounu Ai pareta-paretaika.

¹⁰Mä kowo taka-takaua Unanga wä hukumu önanga iwï doha-dohata Unangika.

¹¹Ho, nihi ngounu mata-mata o tita ngohi tohi ado-adono nginika o wange nënanga.”

¹² ”Nako ngini niohininga nihidodiai o pareta-pareta gënanga deʼ nia diai de nia setia, done ma Jou nia Jou Madutu ma aha wo setia o jajika wadodiai dede ngini. Unanga aha wohi matoko Ai dora kahirahi nginika hokä wojajaji nia ete deʼ nia tohoraika.

¹³Unanga aha winï dora deʼ winihi barakati ngini, hiädono nia ngohaka manga ngöe deʼ nia gegetongo kai dogo-dogo. Unanga aha wohi barakati nia dumule, hiädono ihi hasili o gandum, o anggur deʼ o zaitun ma minya. Unanga aha winihi barakati ngini hiädono nia hapi mangöe deʼ nia kabingi deʼ nia duba. Mata-mata o barakati gënanga aha nia tarima o bereraka ma Jou wi ni döa-döaka nginika, i moteke de ai jaji nia ete de nia tohoraika.

¹⁴Mata-mata o hoana de o berera o duniaka nënanga kamoiö makoiwa yamake o barakati hoko gënanga mangöe hokä ngini. Nginioka mata-mata komoiua aha koyo ngohakua deʼ hagala nia aiwani o gigini kamoiö ma aha koibolaua.

¹⁵Ngini aha ma Jou winï goana de hagala o panyake deʼ wini hitingakika hagala o bodito ngini nia hö hakihi o Mesiroka, mä o bodito-bodito gënanga aha wahitapal̄u nia haturu-haturu uku.

¹⁶Moi-moi o hoana deʼ o berera ma Jou nia Jou Madutu wohi döa-döaka nia kuahaika kokiani ngini niä binaha önanga: uha nia hidumutu o dora onangika. Uha nia huba toönanga manga gikiri, karana o manarama gënanga inï dotagao obodito nginika.

¹⁷Mudukua ngini nia pikiri o hoana deʼ o berera gënanga i holoi yowöe hiädono ngini niakunua niä duhu önanga.

¹⁸Mä uha niä modongo onangika: nio hohininga okianaga wa dodiaioka ma Jou nia Jou Madutu o Mesir manga koanoika deʼ yongo-dumu ai kawaha.

¹⁹Nio hohininga o bodito-bodito niö modo-modongo ngini mahirete nia hakihi, ihö hera-heranga, de o kuata ma amoko ma Jou nia Jou Madutu wapö pake-pake mangale winihi bebasi ngini. Hoko genangoli ma Jou nia Jou Madutu aha wadiai mata-mata o ho-ana de o bereraika niä modo-modongo.

²⁰Maboboloioli ma Jou nia Jou Madutu aha wapuda o ruae toönanga manga hidogoronaka hiädono hagala o nyawa yaku-akunu ihi oara manga diri deʼ ima ngiungiunö aha yobinaha.

²¹Hoʼ uha niä modongo hagala o hoana deʼ o bereraika gënanga. Ma Jou nia Jou Madutu aha winï riwo ngini. Unanga gënanga ma Jou Madutu wolamo-amoko deʼ himö modo-modongo.

²²Hagala o hoana deʼ o berera gënanga aha Wä duhu wä hutu-hutu nia himangoka. Ngini yakunua niä binaha önanga dema japati, hupaya o aiwani-aiwani madorou uha idogo iwöe deʼ idadi o momodongo nginika.

²³Hoko gënanga ma Jou nia Jou Madutu aha wohi döaka nia haturu-haturu nginika. Unanga aha wä burakati önanga hiädono önanga yobinaha.

²⁴Unanga aha winihi döaka manga koano nginika. Onanga aha ngini niä toma deʼ toönanga manga romanga aha iwohanga. Kai matemgo mamoiua yakunua inï himanga ngini; önanga mata-mata aha ngini nia binaha.

²⁵Nia tuhuku manga gomanga ma dulada önanga ya huba-huba. Uha nio nahihu o haaka ekola o gurasi ya tau-taulika manga roë hoka deʼ uha nia l̄ë mangale nia diri mahirete. Nako ngini nia tilakuru o pareta gënanga ngini aha nihonenge, hababu ma Jou nia Jou Madutu wä dohata yahuba-huba o gomanga madulada.

²⁶Uha nihi gogere o gahumu moi o gomanga madulada nia tau magoronaka, hupaya o lolai yatotapal̄u uha inï tapalu nginiö. O hali gënanga kokiani ngini niö dohata deʼ nia pulono okiaua yadaene, karana ma Jou walolai.”