Read Tobelo O YOHANIS 1 Bible Online

O YOHANIS 1 - Tobelo bible

O YOHANIS 1

¹Kama dodi hirakahi o dunia idadi uahi, o Demo nagaka. O Demo naga de ma Jou Madutu deʼ o Demo kaimatero de ma Jou Madutu.

²Kamahirahi Unanga de ma Jou Madutu.

³Hagala mata-mata idadi kiani dede Unanga, deʼ hagala nënanga naga, de kamoiö de koiwa idadi nako dede Unangua.

⁴O Demo gënanga o ngango matiti, deʼ o ngango i hi döaka o dararono o nyawaika.

⁵O dararono gënanga itararono o huhutu magoronaka, deʼ o huhutu yakunua yahohonenge.

⁶ Woböa o nyawa wihulo-huloko ma Jou Madutu, o Yohanis airomanga.

⁷Unanga woböa wohiabari mangale o dararono gënanga, hupaya o nyawa mata-mata yongaku.

⁸Unanga mahirete gënanga o dararonua, ünanga duga-duga wohiabari.

⁹O dararono madutu yätararono mata-mata o nyawa, iböa o duniauku.

¹⁰O Demo naga o duniaka, o dunia idadi kiani dede Unanga, mä o dunia iwinäkoua Unanga.

¹¹Unanga woböa aibereraika mahirete mä airoriadodoto iwitarimaua Unanga.

¹²Mä nagaö o nyawa iwitarima Unanga de iwingaku Unangika, yahidöaka o haku yodadi ma Jou Madutu aingoha-ngohaka,

¹³iwihingohaka o nyawa okaua de yaino, hababu o ngango mahungi gënanga, ma ahali ma Jou Madutuoka de yaino.

¹⁴O Demo ima dadioka o nyawa, de ënanga igogere nanga hidogoronaka, deʼ ngone hamäkeoka mamulia. Mamulia gënanga watarima hokä o Ama aingohaka woma Tëngo-tëngoka. Unangoka ngone himäke ma Jou Madutu deʼ Ai dora ngoneino.

¹⁵O Yohanis woböa hokä Ai hakihi, ünanga wohiabari: ”Nenangala Unanga tohidododemoka: Unanga aha woböa wohïhiduruino, mä iholoi wolamoko dede ngohi, hababu ngohi koihiwahi Unanga nagaka.”

¹⁶Unanga iwiomanga de o dora; koiwa madodogumu, Unanga wonahi barakati ngone.

¹⁷Ma Jou aipareta ngone hatarima, o Musaka de yaino. Mä Ai dora de Ai setia ma Jou Madutu wohimatoko o Yesus Kristusoka de yaino.

¹⁸Komaiwahi naga iwimäke ma Jou Madutu, mahomoa de ma Ama aingohaka woma Tëngo-tëngoka, kaimatero de ma Ama deʼ duru wotigi Unangika. Unangala wonahi matoko o Ama ngoneino.

¹⁹Yokokuaha o Yahudioka o Yerusalemoka yähuloko o imam-imam deʼ o Lewi manyawa yoiki o Yohanisika deʼ iwileha Unangika, ”Ngona nënanga o nagona?”

²⁰O Yohanis womangaku wohitotiaika, ”Ngohiua o Koano Wohihohalamati.”

²¹ ”Nako hoko gënanga, ngona o nagona?” yoleha önanga. ”Bote ngona o Elia?” ”Kowali,” o Yohanis wohaluhu. ”Bote ngona o Nabi woamo-amoko?” yoleha önanga ihigalioli. ”Kowali,” wohaluhu.

²²Onanga yato, ”Nako hokogënanga, nomihingahu ngomino o nagona ngona nënanga,” ”hupaya ngomi miakunu mihidöaka o bobaluhu o nyawa imihulo-huloko ngomi. Okia anidemo mangale anidiri mahirete?”

²³ O Yohanis wohaluhu, ”Ngohi neünanga ma Nabi Yesaya wotemoka: ’O nyawa yopöa-pöaka o tonaka makokakahaka: Nihitiai o ngëkomo mangale ma Jou.’ ”

²⁴O Farisioka yähulo-huloko o nyawa gënanga,

²⁵yolehali, ”Nako ngona o Koano Wohihohalamatiua, o Eliaua, o Nabi woamo-amokua, yadodoa ngona näohiki?”

²⁶O Yohanis wohaluhu, ”Ngohi to ohiki de o akere. Mä niahidogoronaka naga o nyawa ngini niwinäkoua.

²⁷Unanga woböa wohihiduruino, mä ngohi topatutua tahohe to Unanga aihapato maliliko.”

²⁸Mata-mata gënanga idadi o Betania, o wange mahiwara o Yordan ma Ngairi, o ngï o Yohanis wo ohiki.

²⁹Yarehino mawange, o Yohanis wimäke o Yesus waika unangika. Daha o Yohanis wätemo, ”Niwilega, ge Unanga ma Jou Madutu ai Duba ma Ngohaka yäoehe-ehe o dunia mabaradoha.

³⁰Unanga ngohi tohidodemoka aha woböa wohihiduruino, mä Unanga iholoi wolamoko dede ngohi, hababu ngohi tomakil̄auahi, Unanga nagaka.

³¹Kowahi de gënanga, ngohi tinäkoua o nagona Unanga gënanga. Enahioko ngohi toböa to ohiki de o akere, hupaya o Israeloka manyawa iwinäko Unanga.”

³²O Yohanisö wohidöaka o hakihi nënanga, ”Ngohi tamäke ma Jou Madutu ai Womaha iuti hokä o namodara o dihanguku deʼ itangi ail̄okuku.

³³Oraha gënanga ngohi tinäkouahi o nagona Unanga. Mä ma Jou Madutu wohihuloko to ohiki de o akere wotemoka ngohino, ’Nako ngona namäke ma Jou Madutu ai Womaha iuti, deʼ itangi Ai l̄okuoka womatëngo, Unanga aha wo ohiki de ma Jou Madutu ai Womaha.’

³⁴Ngohi mahirete tamäkeoka,” o Yohanis wato, ”deʼ ngohi tohidöaka hakihi Unanga ma Jou Madutu ai Ngohaka.”

³⁵Yarehino mawange, o Yohanis naga o ngï genangokali de iwinöninïki yahinoto.

³⁶Maöraha Unanga wimäke o Yesus wakaino, ünanga wato, ”Niwi lega! Gënanga ma Jou Madutu ai Duba ma Ngohaka.”

³⁷Yahinoto iwinöninïki o Yohanis yoihene o demo gënanga, yoiki iwinïki o Yesus.

³⁸O Yesus womaidulu Ai poretoko, deʼ wamäke önanga iwinïki Unanga. Unanga wäleha, ”Ngini nialingiri okia?” Onanga yohaluhu, ”Rabi, kiaka Rabi anigogere?” (Ma demo ’Rabi’ mamangarati guru.)

³⁹O Yesus wato, ”Niaino niolega mahirete.” Onanga yoiki dede Unanga deʼ yamäke kiaka Unanga wogogere. O öraha gënanga o takoro iata o bimaoa. O wange gënanga önanga yogogere dede Unanga.

⁴⁰Womatëngo, yahinoto manga hidogoronaka woihene okia o Yohanis wotemo ipaha winïki o Yesus, ganga o Andreas, o Simon Petrus aidodoto.

⁴¹Womatai-taiti o Andreas wilingiri o Simon airiaka, deʼ wohingahu unangika, ”Ngomi mima kamäkeoka de o Mesias!” (O Mesias kaima däene de o Kristus, enagënanga o Koano Wohi hohalamati.)

⁴²O Andreas wingotaka o Simon o Yesusika. O Yesus wipulo-pulono o Simon, deʼ witemo, ”Ngona o Simon, o Yona aingohaka. Ngona aha inihetongo o Kefas.” (O Kefas kaima däene de o Petrus mamangarati: o l̄oku o helewo.)

⁴³Yarehino mawange o Yesus waputuhu woiki o Galileaika. Unanga imakamäke de o Filipus, deʼ wato unangika, ”Naino nohi nïki Ngohi!”

⁴⁴O Filipus aiahali o Betsaidaino, enagënanga ima teke berera moi o Andreas deʼ o Petrus.

⁴⁵O Filipus imamäke de o Natanel deʼ witemo unangika, ”Ngomi miwi mäkeoka o nyawa kiaka o Musa wahetongoka ma Jou Madutu ai Tita ma Bukuoka, deʼ kiaka o nabi-nabi ihi abarioka. Unanga gënanga o Yesus Nazaretino, o Yusuf aingohaka.”

⁴⁶Mä o Natanel wohaluhu, ”Kaiyakunu maoa-oa moi iböa o Nazaretino?” O Filipus wohaluhu, ”Naino laʼ nolega mahirete.”

⁴⁷O Yesus wimäke o Natanel woböa, deʼ unanga wotemo mangale ünanga, ”Niwilega, gënanga o Israeloka manyawa madutu. Koiwa o tengeluku unangoka.”

⁴⁸”Sarakia Bapa nohinäko ngohi?” O Natanel woleha o Yesusika. O Yesus wohaluhu, ”O Filipus woniahokuahi ngona, Ngohi toni mäkeoka ngona, o ara mautu matimiuku gënanga.”

⁴⁹”Bapa Guru,” o Natanel wato, ”Bapa nagala ma Jou Madutu ai Ngohaka! Bapa o Israeloka manyawa manga Koano!”

⁵⁰O Yesus wato, ”Ngona nongaku, hababu duga-duga Ngohi tonihi ngahu Ngohi tonimäkeoka ngona o ara mautu matimiuku gënanga? Mahomoahi iholoi ilamoko de gënanga ngona aha namäke!”

⁵¹ O Yesus wotemooli, ”Igoungu, nongaku, ngona aha namäke o dihanga ihelenga, deʼ ma Jou Madutu ai malaekat-malaekat youti yodoa o Nyawa manga Ngohakuku.”