Read Tobelo O YOHANIS 12 Bible Online

O YOHANIS 12 - Tobelo bible

O YOHANIS 12

¹O wange butangahi de o Paskah ma Wange ma Amoko yadono, o Yesus woiki o Betaniaika. O ngï gënanga aigogere o Lazarus, ünanga wohonengoka de o Yesus wihimomikoka.

²Dokengoka Unanga iwihiol̄omo önanga, deʼ mäleleani o ngo Marta. O Lazarus deʼ iwiado-adonino yogogere yol̄omo imakinïki de o Yesus.

³ Ahao o ngo Maria maino mäo done holitere ngade yatogorona, o minya mabou-bounu narwastu maija duru kohahali. Münanga mihituagi o minya gënanga o Yesus ail̄ouku, daha maehe de amitadauru. O tau magoronaka gënanga idadi mabounu ihëmoro hababu o minya mabou-bounu gënanga.

⁴Mä o Yudas Iskariot, o nyawa womatëngo o Yesus iwinöninïki — mabahaino wihukunu o Yesus — wato,

⁵”Yadodoa o minya mabou-bounu gënanga nahukunua dika de maija o tiwi haäka o ratuhu hange, deʼ ma tiwi nahidöaka o nyawa yomomihikinika?”

⁶O Yudas wotemo hoko gënanga koigoungua hababu wahininga o mihikini manyawa, mä hababu ünanga wotohi-tohiki. Unanga mamoi-mamoi wal̄ë manga doomu matiwi mabukuoka i gogogono unangoka.

⁷Mä o Yesus wotemo, ”Nimi mal̄aika o ngoheka gënanga! Münanga modiai nënanga mangale mawange ihilungunu Ngohi.

⁸ O nyawa yomomihikini hokogenangika naga niahidogoronaka ngini, mä Ngohi kowali.”

⁹O Yahudioka manyawa manga ngöe yoihene o Yesus naga o Betaniaka, hoʼ onanga yoiki dokengika. Onanga yoiki koigoungua mangale hababu o Yesus dika, mä hababu onangö yomau iwilega o Lazarus wihimomikoka o honengino.

¹⁰Hababu gënanga o imam-imam manga häeke yomau iwitoma o Lazarusohi;

¹¹hababu ünanga idadi o hababu, o Yahudioka manyawa kamanga ngöe yämal̄aka önanga deʼ iwingaku o Yesusika.

¹²Yarehino mawange o nyawa manga ngöe yoböaka mangale ihirame o Paskah yoihene o Yesus o ngëkomo mahidogoronainoka wameta o Yerusalem.

¹³ Onanga yal̄ë o biso mahoka-hoka daha yoiki iwibuhuku Unanga, de yopöa-pöaka, ”Niwipuji ma Jou Madutu! Iwihibarakatioka Unanga woboböa-böa de ma Jou Ai romanga. Iwihibarakatioka o Israeloka manga Koano!”

¹⁴O Yesus wamäke o keledai mago moi, deʼ Unanga wobarenuku. La idadi itulihoka Ma Jou Ai Demo ma Buku magoronaka:

¹⁵ ”Uha nohawana, Sion mamomoholehe! Ni lega ani Koano woböa, wobarene o keledai mago moi!”

¹⁶Oraha gënanga o Yesus iwinöninïki imangaratiuahi mata-mata gënanga. Mä ipahaika o Yesus iwihimuliaka de Toünanga aihonenge, daha önanga imahininga, hagala o nyawa yodiaioka Unangika itulihoka Ma Jou Ai Demo ma Buku magoronaka iwikorona Unanga.

¹⁷Hagala o nyawa yohima-himangino maöraha o Yesus wiahoko o Lazarus wohupu o lungunino wohonengoka deʼ wihimomiki, gila-gila ihidöaka o hakihi mangale o hali gënanga.

¹⁸Hababu gënanga o nyawa manga ngöe gënanga yoiki o Yesusika hababu önanga yoihene Unanga wodiaioka ihëra-hëranga gënanga.

¹⁹O Farisioka manyawa imaketemo moi de moika, ”Kia-kiaua ngone hakunu hodiai! Nia mäke dika, o dunia ingodumu yoiki iwinïki Unanga!”

²⁰Manga hidogoronaka hagala o nyawa yoi-oiki o Yerusalemika mangale yohubayanga maöraha o rameanga gënanga, nagaö yamuruono naga o Yunanioka manyawa.

²¹Onanga yoiki o Filipusika deʼ yato, ”Riadodoto, nako yakunu, ngomi mioigo mimaka mäke de o Yesus.” (O Filipus ai ahali o Betsaidaino o Galilea matonakoka.)

²²O Filipus woiki wohingahu o hali gënanga o Andreasika, deʼ ipaha önanga yahinoto ihiädono o Yesusika.

²³O Yesus watemo onangika, ”Maöraha iböto o Nyawa manga Ngohaka iwihimulia.

²⁴Igoungu itiai Ahi demo nënanga: Nako o gandum o mui moi idatomua o tonakuku deʼ ihonenge, ënanga aha i gogogere kao mui moi dika. Mä nako o gandum mamui gënanga ihonenge, ahao ënanga ihihohoko o gandum koha amoko.

²⁵ O nyawa yohininga manga wowango aha ihihanga manga wowango. Mä o nyawa yodohata manga wowango o duniaka nënanga, aha yapaliara mangale manga wowango madutu deʼ ikakali.

²⁶O nyawa yomau ihileleani Ngohi kiani ihi nïki Ngohi; hupaya ihilöleleani Ngohi yakunu dede Ngohi kiaka Ngohi naga. O nyawa ihilöleleani Ngohi aha Ahi Ama wahoromati.”

²⁷”Ahi hininga Ngohi baliha; okia kiani Ngohi totemo örahanënanga? Kiani Ngohi totemo, ’Bapa, nohihalamati Ngohi örahanënanga’? Mä hababu gënanga Ngohi toböa mangale tatagongo o hangihara örahanënanga.

²⁸Bapa, tohimulia Aniromanga!” Toihene o ilingi o dihanguku itemo, ”Ngohi tonihimuliaka, deʼ Ngohi aha tonihimuliali.”

²⁹O nyawa manga ngöe naga genangoka yoihene o ilingi gënanga. Onanga yato, ”Gënanga o dotoreke!” Mä nagaö yato, ”Kowali! O malaekat iwitemo Unangika!”

³⁰Daha o Yesus wotemo onangika, ”O ilingi gënanga ni ihene, igoungua mangale Ngohi ahihali, mä mangale tingini niahali.

³¹Orahanënanga maöraha iböto o dunia yahukumu; örahanënanga o dunia makuaha nënanga yaluluoka.

³²Mä Ngohi nënanga, nako Ngohi ihituboil̄eoka o dunia mal̄okuoka, Ngohi aha tatauru mata-mata o nyawa Ngohino.”

³³Unanga wotemo hokogënanga, mangale wohidumutu sarakia madodagi Unanga aha wohonenge.

³⁴ O nyawa yowöe-wöe gënanga yotemo Unangika, ”Imoteke tongomi mia Tita ma Buku, ma Koano Wohihohalamati aha wowango kahiado-adonika. Sarakia Ngona yakunu notemo o Nyawa manga Ngohaka kiani iwituboil̄e, o dunia mal̄okuoka? O nagona o Nyawa manga Ngohaka gënanga?”

³⁵O Yesus wohaluhu, ”Duga-duga kabotinokahi dika o dararono gënanga naga ngini niahidogoronaka. Hoʼ, nitagi hokokia madekana o dararono gënanga kanagahi, hupaya ngini uha inibänga o huhutu. O nyawa imadagi o huhutu magoronaka, wohiorikua kiaika ünanga wakaika.

³⁶Niangaku o dararonika gënanga, hokokia madekana o dararono gënanga kanagahi nginioka, hupaya ngini nidadi o dararono mangoha-ngohaka.” O Yesus wotemo iböto hokogënanga, Unanga genangoka de woiki deʼ wolukoka womahi matoko Ai diri onangika.

³⁷Ngaro mangöeoka ihëra-hëranga wodiai o Yesus önanga manga himangoka, önanga iwingakua Unangika.

³⁸ Idadi okia ma Nabi Yesaya wotemoka, ”Jou, o nagona yängaku tongomi mia abarika? O nagonaika anikuaha Jou nohimatoko?”

³⁹Hababu gënanga önanga yakunua yongaku, hababu o Yesaya wotemokali, ”Ma Jou Madutu wotemo,

⁴⁰ ’Ngohi tapilokoka önanga manga lako, tadiai önanga manga hininga itogowini; hupaya manga lako uha imahi öriki, de manga dibanga önanga uha imangarati. Hupaya önanga uha yolio Ngohino, la Ngohi tahitogumu önanga.’ ”

⁴¹O Yesaya wotemo hokogënanga, hababu ünanga wamäkeoka Ai mulia de Ai kuaha o Yesus, deʼ wohidemo yakorona Unangika.

⁴²Ngaro hokogënanga, o nyawa manga ngöe, o Yahudioka manyawa yokokuaha manga hidogoronaka mahirete iwingaku o Yesusika. Mä onanga yobaraniua iwingaku gënanga ihitotararonika, hababu önanga yohawana uha-uha o Farisioka manyawa yahigumal̄aokaua önanga yowohama o pupuji matauika.

⁴³Onanga iholoi yoigo yamäke o higiriri o nyawaino, ngaro de o higiriri ma Jou Madutuino.

⁴⁴Dahao o Yesus womapöaka, ”O nyawa ihingaku Ngohino, koigoungua Ngohino ünanga wohingaku, mä Unangika wohihulo-huloko Ngohi.

⁴⁵Deʼ o nyawa ihimäke Ngohi, iwimäke Unanga wohihulo-huloko Ngohi.

⁴⁶Ngohi toböa o duniaka nënanga hokä o dararono, hupaya mata-mata o nyawa ihingaku-ngaku Ngohino uha yogogere o huhutu magoronaka.

⁴⁷O nyawa yoihene Tongohi ahi dodötoko, mä yamotekua ënanga — Ngohiua tihukumu ünanga. Hababu Ngohi toböa tahakimua o dunia nënanga, mä mangale tohihalamati ënanga.

⁴⁸O nyawa ihitila Ngohi deʼ yoluku yoihene Ahi demo, naga yahihaki-hakimi. O demo Ngohi tohi ado-adono gënanga, aha yahihakimi o Kiamati ma Wangeoka.

⁴⁹Hababu Ngohi totemoua, Ahi mauino mahirete; o Ama wohi huloko Ngohi, Unanga wohihipareta Ngohino okia kiani Tohi demo deʼ Tohiädono.

⁵⁰Deʼ Ngohi tohiöriki Ai pareta gënanga ihidöaka o ngango madutu deʼ i kakali. Ho Ngohi tohiädono hokä wohi dotokoka o Ama Ngohino.”