Read Tobelo O YOHANIS 13 Bible Online

O YOHANIS 13 - Tobelo bible

O YOHANIS 13

¹O wange moiohi Paskah ma Wange ma Amoko, o Yesus wohiöriki maöraha yadonoka Unanga wamal̄a o dunia nënanga de wolio Ai Amaika. Unanga wahininga hagala o nyawa yodadi Toünanga madutu o duniaka, deʼ Unanga tatapu wahininga önanga hiädono mabahaika.

²O Yesus deʼ iwinöninïki magogiria yol̄omo o hutu-hutu mangol̄omo. O Ibilihi ihingohamikaka madibanga itotorou aihininga magoronaka o Yudas o Simon Iskariot aingohaka, mangale wihibodito o Yesus.

³O Yesus wohiöriki o Ama wihilapahioka mata-mata o kuaha Unangika. Unanga wohiorikö, Unanga woböa ma Jou Madutuino deʼ aha wolio ma Jou Madutuika.

⁴Hababu gënanga Unanga womaoko, Ai juba waiki, deʼ wohiliko o handoko Ai goronaino.

⁵Iböto gënanga Unanga woguhe o akere o bokolo moi magoronauku, dahao womuläenge waihoro manga l̄ou iwinöninïki deʼ wohitoraha de o handoko wohiliko-likoino Ai goronaino.

⁶Unanga womahiädono o Simon Petrusika, de wotemo, ”Jou, yakunu Jou tongohi ahi l̄ou de naihoro?”

⁷O Yesus wohaluhu, ”Oraha nënanga nomangaratiua okia Ngohi tadiai nënanga, mä ahao ngona nomangarati.”

⁸”Uha, Jou,” wotemo o Petrus o Yesusika, ”Hakali-kali uha Jou, naihoro tongohi ahil̄ou!” Mä o Yesus wohaluhu, ”Nako Ngohi toni ihorua, ngona koiwa ani dodohanga dede Ngohi.”

⁹O Simon Petrus wato, ”Nako hokogënanga, Jou, uha duga-duga katongohi ahil̄ou mä tongohi ahigiama deʼ ahihaekö!”

¹⁰”O nyawa imaohikoka, yotebinoka mata-mata,” o Yesus witemo o Petrusika. ”Unanga ngaro uha womatebinoli; sawaliua ail̄ou. Ngini nënanga nitebinoka, mä mata-mataua.” (

¹¹O Yesus wohiorikoka o nagona aha iwihibodito. Gënanga mangale Unanga wotemo, ”Ngini nënanga nitebinoka, mä mata-mataua.”)

¹² O Yesus wäihoro önanga manga l̄ou iböto, Unanga womahi noakali Ai juba deʼ wogogerokali. Daha Unanga watemo onangika, ”Nimangarati ngini okia aha ipahaino Ngohi todiaioka nginika?

¹³Ngini nihiahoko Ngohi o Guru deʼ o Jou. Deʼ igoungu hokogënanga.

¹⁴Nako Ngohi hokä nia Jou deʼ nia Guru taihoro nial̄ou, nginiö kiani nimakihoro nial̄ou.

¹⁵Ngohi tohidöaka o dulada nënanga nginika, hupaya nginiö niadiai okia Ngohi tadiaioka nginika.

¹⁶ Igoungu itiai Ahi demo nënanga: womatëngo o gilaongo iholoiua wolamoko de aituanga, deʼ womatëngo o huhuloko iholoiua de iwihohulo-huloko.

¹⁷Nako ngini nihiörikoka mata-mata nënanga, niutumu ngini nako niadiai.

¹⁸ Okia totemo nënanga, igoungua inidäene ngini mata-mata. Ngohi tohiöriki o nagona honanga Ngohi tairikoka. Mä okia itulihoko Ma Jou Ai Demo ma Buku magoronaka, kiani idadi, enagënanga ’O nyawa yol̄omo dede Ngohi, aha ihilawani Ngohi.’

¹⁹O hali gënanga tohiadonoka nginika örahanënanga, koidadiuahi ma, hupaya nako o hali gënanga damä imadadi, ngini aha ningaku Ngohila Unanga ihihetongo, NGOHI NAGA.

²⁰ Igoungu itiai Ahi demo nënanga: O nagona yatarima o nyawa Ngohi tahulo-huloko, önanga ihitarima Ngohi. Deʼ o nagona ihitarima Ngohi, iwitarima Unanga wohihulo-huloko Ngohi.”

²¹O Yesus wotemo iböto hokogënanga, Unanga duru iwitora. Daha Unanga wotemo, ”Igoungu itiai Ahi demo nënanga: O nyawa womatëngo niahidogoronaka ngini aha wohihibodito Ngohi.”

²²Iwinöninïki kaimakupulono moi de moi de duru yohëranga, karana ihiorikua Ai dungutu o nagonaika.

²³Winöninïki wihohininga o Yesus yogogere imadatekuku de o Yesus.

²⁴O Simon Petrus wikul̄abete unangika, hupaya ünanga woleha o Yesusika o nagonaika madungutu.

²⁵Winöninïki gënanga womahitigi o Yesusika, deʼ woleha, ”O nagona ünanga, Jou?”

²⁶O Yesus wohaluhu, ”O nyawa Ngohi tihidöaka o roti, Ngohi tatonoka o udo-udomo magoronauku, geünanga manyawa.” O Yesus wal̄ë o roti o luiti moi, watono o udo-udomo magoronauku; daha wihidöaka o Yudasika o Simon Iskariot aingohaka.

²⁷De madataitoka o Yudas wodahongo o roti gënanga iböto, o Ibilihi iwohama aihininga magoronaika. Daha o Yesus witemo unangika, ”Nadiai itaiti okia nomau nadiai.”

²⁸O nyawa moiuaö onangino yogogeruku yol̄omo genangoka imangarati yadodoa o Yesus witemo hokogënanga o Yudasika.

²⁹Utunaga yatobote o Yesus wihuloko o Yudas woija okianaga iparalu mangale o rame gënanga, ekola wahidöaka o tiwi mahuhutulu o huha manyawaika — hababu o Yudas naga wasö to önanga manga tiwi mabuku.

³⁰O Yudas wodahongo iböto o roti gënanga, ünanga gila-gila wohupu. O wange yohutuoka.

³¹O Yudas woikoka, o Yesus watemo, ”Orahanënanga o Nyawa manga Ngohaka iwihimulia, deʼ ma Jou Madutu iwihimulia mangale Unanga.

³²Nako ma Jou Madutu iwihimulia mangale Unanga, Unangö aha iwihimulia ma Jou Madutu mangale Ai diri mahirete. Iholoi idogo ma Jou Madutu aha wi himulia de madataitoka.

³³ Ahi ngoha-ngohaka, Ngohi aha totedekanokaua Togogerohi dede ngini. Ngini aha nihilingiri Ngohi, mä hokä Ngohi totemoka o Yahudioka yakokuahaika, hoko genangoli Ngohi totemo nginika; o ngï Ngohi to oi-oikika, ngini niakunua niädono.

³⁴ O pareta mahungi Ngohi tinihidöaka nginika: Nima tekehininga moi de moi. Hokä Ngohi tini hininga ngini, hokä genangö, ngini kiani nimatekehininga.

³⁵Nako ngini nima teke hininga o nyawa mata-mata aha ininäko ngini, nihinöninïki Ngohi.”

³⁶”Jou, Jou nomau kiaika noiki?” o Simon Petrus wileha o Yesusika. O Yesus wohaluhu, ”Kiaika Ngohi toiki, ngona nakunua nohinïki örahanënanga. Maduruino ngona aha nohi nïki Ngohi.”

³⁷O Petrus wolehaokali, ”Jou, yadodoa ngohi takunua toninïki Jou örahanënanga?” ”Ngohi toigo tohonenge mangale Ngona Jou!”

³⁸O Yesus wibaluhu, ”Igoungu ngona noigo nohonenge mangale Ngohi? Nohiöriki, o kuru-kuru ihorenuahi, ngona mahange i böto notemo, ngona nohinäkoua Ngohi!”