Read Tobelo O YOHANIS 15 Bible Online

O YOHANIS 15 - Tobelo bible

O YOHANIS 15

¹O Yesus wotemoli, ”Ngohi o angguru maröehe madutu, deʼ Ahi Ama naga o dumule madutu.

²Moi-moi majaga Ngohioka ihohokua, yaoto yatobiki, deʼ moi-moi majaga ihohohoko yapoporo mahoka deʼ yatebini hupaya iholoi iwöeoli mahohoko.

³Ngini nitebinoka karana o dodötoko Ngohi tohidöaka nginika.

⁴Nitatapu nirimoi dede Ngohi, deʼ Ngohiö aha totatapu torimoi dede ngini. Majaga mahirete yakunua ihohoko, kokiani nako ënanga itatapu maröehika. Hokogenangö ngini duga-duga yakunu nihohoko, nako nitatapu nirimoi dede Ngohi.

⁵Ngohi o angguru maröehe, deʼ ngini majaga-jaga. O nyawa yotatapu yorimoi de Ngohi, deʼ Ngohi dede önanga aha yohohoko iwöe; hababu de kode Ngohiua, okia-kiaua ngini niakunu niadiai.

⁶O nyawa yotatapua yorimoi dede Ngohi, aha yäumo hokä o jaga, daha idadi itoolenge. Jaga-jaga hokogënanga aha yatoomu deʼ yaumo o uku magoronaika, daha youku.

⁷Nako ngini nitatapu nirimoi dede Ngohi deʼ Tongohi ahidodötoko igogere niahininga magoronaka, nigahoko o Amaika okiadika ngini niamau, niagogahoko gënanga aha ihi totomo.

⁸Nako ngini nia hohoko iwöe, Ahi Ama iwihimulia; deʼ de hokogënanga ngini igou-goungu nidadi nihinöninïki Ngohi.

⁹Hokä o Ama wohihininga Ngohi, hokogenangö Ngohi tinihininga ngini. Kiani ngini nitatapu niwango hokä o nyawa Ngohi tahohininga.

¹⁰Nako ngini nihidagi Ahi pareta-pareta, ngini tatapu nisetia Tongohi ahidoraika, hokä imatero Ngohi tatapu tosetia Tongohi ahi Ama Ai doraika hababu Tohi dagi Ai pareta-pareta.

¹¹Mata-mata nënanga Ngohi tinihingahu nginika, hupaya Ahi mörene naga niahininga magoronaka, deʼ niamörene idadi iahumu.

¹² Nënanga Tongohi ahipareta: nimateke hininga moi de moi, hokä imadäene de Ngohi tinihininga ngini.

¹³O nyawa duru yahininga manga hoba-hobata gangala o nyawa ihidöaka manga wowango mangale önanga.

¹⁴Ngini ganga Tongohi ahihoba-hobata, nako ngini niadiai okia Ngohi tinihipareta nginika.

¹⁵Ngini, Ngohi tiniahokokaua o gilaongo, hababu o gilaongo wohiorikua okia wamanarama aituanga. Ngini Ngohi tiniahoko hobata, hababu mata-mata Ngohi toihene Ahi Amaino, Ngohi tinihi ngahuoka nginika.

¹⁶Nginiua nihiiriki Ngohi. Ngohi tiniiriki ngini, deʼ Tinihuloko ngini nioiki mangale nihohoko iwöe — o hohoko-hohoko yakunua ibinaha. Ma Ama aha winihidöaka nginika okia dika ngini nigahoko Unangika de Tongohi ahiromanga.

¹⁷Nenangala Ahi pareta nginika: Nima tekehininga moi de moika.”

¹⁸”Nako o dunia inidohata ngini, niohininga Ngohi iholoi ihiraka ihidohata dunia.

¹⁹Hokä nako ngini todunia, ngini aha inihininga o dunia hokä toënanga. Mä Ngohi tiniirikoka o duniaino nënanga, hoʼ ngini toduniaokaua. Hababu gënanga o dunia inidohata ngini.

²⁰ Niohininga okia Ngohi totemoka nginika, ’O gilaongo iholoiua wolamoko de aituanga.’ Nako önanga ihianiayaoka Ngohi, önanga aha inianiaya nginiö. Nako önanga yamoteke Tongohi ahi dodötoko, onangö aha yamoteke tinginiö niadodötoko.

²¹Mata-mata gënanga aha önanga yodiai inihihimanga nginika, hababu ngini nihinöninïki Ngohi, hababu önanga iwinäkoua Unanga wohihöhulo-huloko Ngohi.

²²Hokä nako Ngohi toböaua deʼ tohidemoua mata-mata gënanga onangika, önanga yobaradohaua. Mä örahanënanga önanga koiwaka manga hababu mangale to önanga manga baradoha.

²³O nyawa ihidohata Ngohi, iwidohata Ahi Ama.

²⁴Hokä nako manga hidogoronaka önanga Ngohi tadiaiua okianaga komaiwahi yadiai o nyawa mahomoa, önanga yobaradohaua. Mä örahanënanga önanga yamäkeoka okia Ngohi tadiaioka, deʼ önanga ihidohata Ngohi yaoa Tongohi ahi Amaö.

²⁵ Mä kiani hokogënanga iböto hupaya idadi okia itulihoka toönanga manga Tita ma Buku magoronaka, enagënanga: ’Onanga ihi dohata Ngohi koiwa mahababu.’

²⁶Ngohi aha tihuloko nginika o Roriwo ma ahali Ahi Amaino. Unangala o Womaha aha wohimatoko o diai mangale ma Jou Madutu. De nako Unanga woböa, Unanga aha wohidöaka o hakihi mangale Ngohi.

²⁷Deʼ nginiö kiani nihidöaka o hakihi mangale Ngohi, hababu ngini dede Ngohi horimoioka kamahirahi.