Read Tobelo O YOHANIS 16 Bible Online

O YOHANIS 16 - Tobelo bible

O YOHANIS 16

¹Mata-mata gënanga Ngohi tinihingahuoka nginika hupaya ngini uha nisetiaokaua.

²Ngini aha inihihupu o puji matau-tauoka. Deʼ aha iböa maöraha o nyawa initoma ngini, önanga aha yatobote gënanga o leleani moi ma Jou Madutuika.

³Onanga yodiai gënanga nginika, hababu önanga iwinäkouahi o Ama, yaoa Ngohi.

⁴Mä örahanënanga Totemo gënanga nginika, hupaya nako gënanga imadadi aha, ngini niohininga Ngohi tinihi ngahuoka nginika.” ”Kamamulaengohi o hali nënanga Tinihingahua nginika, hababu Ngohi kadede nginiohi.

⁵Maöraha nënanga Ngohi aha toiki Unangika wohihulo-huloko Ngohi; deʼ moiua ngini nileha kiaika Ngohi toiki.

⁶Orahanënanga niahininga idadi idogo iduka, karana Ngohi totemo o hali nënanga nginika.

⁷Mä Ngohi totemo nginika de madiai: Iholoi yaoa mangale ngini, nako Ngohi toiki; hababu nako Ngohi toikua, o Roriwo gënanga aha iböaua nginika. Mä nako Ngohi toiki Ngohi aha Tihuloko Unanga nginika.

⁸Nako Unanga woböa, Unanga aha wohimatoko o duniaika mamangarati madiai, mangale o baradoha, okiaoka madiai, deʼ ma Jou Madutu aihukumanga.

⁹Unanga aha winihimatoko ihingakua Ngohino ganga o baradoha;

¹⁰Ngohi itiai, karana Ngohi toiki o Amaika deʼ ngini aha nihimäkeokaua Ngohi;

¹¹deʼ ma Jou Madutu womulaengoka wahukumu, hababu o dunia makuaha nënanga wahukumoka.

¹²Mangöeohi Ngohi tomau tinihingahu nginika, maöraha nënanga ngini niakunuahi niatarima.

¹³Mä nako o Womaha gënanga iböa, enagënanga Unanga wohimatoko o diai mangale ma Jou Madutu, ngini aha inituda mangale nianäko mata-mata o diai. Unanga aha wotemoua Ai dirino mahirete, ma wohidemo okia woihenoka, deʼ Unanga aha winihingahu nginika okia aha idadi o wange maduruino.

¹⁴Unanga aha wohihimulia Ngohi, hababu okia wohiädono nginika, watarima Ngohino.

¹⁵Mata-mata naga Ahi Amaka ganga ka Tongohi madutu. Hababu gënanga Ngohi totemo okia o Womaha wohiädono nginika, yatarima Ngohino.”

¹⁶”Oraha mahuhutulokahi dika, ngini nihimäkeokauali Ngohi, deʼ oraha mahuhutulokahioli dika ngini aha nihimäke Ngohi.”

¹⁷Yamuruono naga iwinöninïki o Yesus yomuläenge imake leha moi de moika, ”Okia madungutu Unanga wotemo ngoneino: ’Oraha mahuhutulokahi dika, ngini nihimäke okauali Ngohi, deʼ oraha mahuhutulokahioli ngini aha nihimäke Ngohi’? De okiali Ai dungutu de: ’Ngohi toiki o Amaika’?”

¹⁸Onanga yoleha gila-gila, ”Okia mamangarati, ’öraha mahuhutulu’? Ngone homangaratiua Unanga wotemo mangale okia!”

¹⁹O Yesus wohiöriki önanga yomau iwileha Unangika. Hoʼ Unanga watemo, ”Kangano Ngohi totemoka, ’Oraha mahuhutulokahi dika, ngini aha nihimäke Ngohi’. Gënanga ngini nialeha niahidogoronaka?

²⁰Ningaku, ngini aha niari deʼ nidodora, mä o dunia aha imörene. Ngini aha niahininga ihuha, mä niahuha gënanga aha ingali idadi o mörene.

²¹Nako o ngoheka momatëngo itigioka momagilianga, münanga amihininga ihuha, hababu maöraha yadonoka münanga mohangihara. Mä hokogënanga amingohaka ima kil̄auoka, o ngoheka gënanga aha mawohangoka amihangihara karana ami mörene o nyawa moi o ngohaka imakil̄auoka o duniaino.

²²Hoko genangoli de ngini: Orahanënanga ngini niahininga ihuha, mä Ngohi aha homaka mäkeoli dede ngini, niahininga aha imörene; deʼ moiua o nyawa yakunu yal̄ë niamörene gënanga niahiningaka.

²³O wange gënanga, ngini aha nileha okia-kiakaua Ngohino. Ningaku: Okia dika ngini nigahoko o Amaika de Tongohi Ahi romanga, gënanga aha winihidöaka o Ama nginika.

²⁴Hiädono öraha nënanga ngini nigahokuahi okia naga de Tongohi Ahi romanga. Nigahoko, ngini aha niatarima, hupaya niamörene itotomo.”

²⁵”Mata-mata nënanga Ngohi totemoka nginika de o hitotero. Mä aha iböa maöraha, Ngohi tapäke okaua o hitotero, mä tohidemo tohitotararonuku nginika mangale o Ama.

²⁶Orahagënanga ngini aha nigahoko o Amaika de Tongohi Ahi romanga; nihiöriki, Ngohi aha togahokokaua o Amaino mangale ngini,

²⁷hababu o Ama mahirete winihininga ngini. Unanga winihininga ngini hababu ngini nihihininga Ngohi, deʼ ningaku Ngohi toböa ma Jou Madutuino.

²⁸Igoungu Ngohi ahi ahali o Amaino, deʼ Toböaka o dunia magoronaka. Mäoraha nënanga Ngohi tamal̄a o dunia mangale tolio o Amaika.”

²⁹Daha iwinöninïki o Yesus yotemo Unangika, ”Orahanënanga Jou notemo nohi totararonika deʼ napäkeua o hitotero,

³⁰deʼ ngomi mihiöriki Jou nohiöriki hagala mata-mata. Iparaluua kao nyawa moiö de inileha okia honanga ngonaika Jou. Hababu gënanga ngomi mingaku Jou noböa ma Jou Madutuino.”

³¹O Yesus wabaluhu önanga, ”Hoʼ ningaku ngini örahanënanga?

³²Niohohininga! Maöraha aha iböa, de iböaka, ngini aha hohinihikokabarihi. Ngini aha nilio niatauika moi-moi deʼ nihidogumal̄aika Ngohi tomatëngoka. Mä Ngohi tomatëngookaua hababu o Ama naga dede Ngohi.

³³Mata-mata nënanga Ngohi tahetongoka hupaya ngini niamäke o dame hababu ngini kamoi dede Ngohi. O duniaka ngini aha nihangihara. Mä nihibitumu niahininga! Ngohi tautumoka o dunia!”