Read Tobelo O YOHANIS 17 Bible Online

O YOHANIS 17 - Tobelo bible

O YOHANIS 17

¹Ipaha wotemo hokogënanga, o Yesus womamataga o dihangil̄e deʼ wotemo, ”Ama, örahanënanga yadonoka maöraha. Nihimulia Ani Ngohaka, hupaya Ani Ngohakö wonihimulia Ama.

²Ama nohihidöakoka o kuaha o umati o nyawa mata-mata o Ngohakika, hupaya Unanga wahidöaka o ngango madutu deʼ i kokakali o nyawa mata-mataika, Ama nihidöa-döakoka Unangika.

³Nënanga o ngango madutu deʼ ikokakali; hupaya o nyawa ininäko Ama Jou Madutu madiai nomadinga-dingakoka deʼ iwinäko o Yesus Kristus, Ama nihulo-hulokoka.

⁴Ngohi tonihimuliaka Ama o dunia nënanga mal̄okuoka, deʼ tabötoka o manarama, Ama nohihidöa-döakoka Ngohino.

⁵Ama! Orahanënanga Ngohi tonihimulia Amaika, de o mulia Tongohi madutu imakinïki de Ngona Ama kao dunia nënanga idadiö de kowahi.

⁶Ngohi tonihinäkoka Ama hagala o nyawaika o duniaino nënanga, Ama nohihidöa-döakoka Ngohino. Onanga ganga kato Ngona Ama, deʼ Ama nohihidöa-döakoka önanga Ngohino. Onanga yamotekoka Anidemo Ama.

⁷Orahanënanga önanga ihiöriki mata-mata Ama nohidöakoka Ngohino ma ahali Ngonaino Ama.

⁸Ngohi tohi adonoka onangika Anidemo Ama nohidöa-döakoka Ngohino; deʼ onanga yatarimaka. Onanga ihiöriki de madiai Ngohi toböa Amaino deʼ onanga yongaku Ama nohihuloko Ngohi.

⁹Ngohi toma niata mangale önanga. Ngohi toma niatua mangale o dunia mä mangale hagala o nyawa Ama nohihidöa-döakoka Ngohino, hababu önanga ganga kato Ngona Ama.

¹⁰Mata-mata kato Ngohi, ganga kato Ngonaö Ama; deʼ mata-mata Tongona Ama, ganga kato Ngohiö. Ngohi ihihimulia önanga manga hidogoronaka.

¹¹Orahanënanga Ngohi toböa Ngonaika Ama. Ngohi togogerokaua o duniaka; mä onanga naga o duniaka. Ama notebi-tebini! Nagöana önanga de Ani romanga makuaha Ama, enagënanga Ani romanga Ama nohidöakoka Ngohino — hupaya önanga yodadi kamoi, hokä imatero Ama deʼ Ngohiö kamoi.

¹² Maöraha Ngohi kadede onangohi, Ngohi tägoanoka önanga de Ani romanga makuaha Ama — Ani romanga nohihidöa-döakoka Ngohino. Ngohi tagoanoka önanga deʼ kao nyawa moiö de önanga yohihangua sowaliua ünanga igoungu kokiani wohihangoka; hupaya de gënanga idadi okia itulihoka Ma Jou Ai Demo ma Buku magoronaka.

¹³Orahanënanga Ngohi toböa Amaika. Mata-mata nënanga Ngohi totemoka maöraha Ngohi kao duniakahi; hupaya önanga yamäo yaomanga de Ahi mörene.

¹⁴Ngohi tahiadonoka onangika Ani demo Ama, deʼ o dunia yadohata önanga, hababu önanga koto duniaua hokä imatero Ngohiö toduniaua.

¹⁵Ngohi togahokua hupaya Ama nal̄ë önanga o duniaino nënanga, mä Ngohi togahoko hupaya Ama nagöana önanga o Dorouino.

¹⁶Ka ima tero mahali hokä Ngohi toduniaua, onangö toduniaua.

¹⁷Nahi dadi önanga, kato Ngona Ama madutu noma dinga-dingakoka o diai; Ani demo Ama gënanga o diai.

¹⁸Hokä Ama nohihulokoka o duniauku, hoko genangö Ngohi tahuloko önanga o duniaika.

¹⁹Mangale to önanga manga wowango mahidoku, Ngohi toma hilapahi Ahi diri hokä Tongona madutu Ama, nomadinga-dingakoka hupaya onangö yodadi kato Ngona madutu Ama nomadinga-dingakoka de mangëkomo o diai.

²⁰Mangale ka onangua nënanga dika Ngohi toma niata. Ngohiö tomaniata mangale hagala o nyawa aha ihingaku Ngohino de to önanga manga hakihi nënanga.

²¹Ngohi togahoko, Ama hupaya önanga mata-mata yodadi kamoi, hokä Ama kamoi dede Ngohi, deʼ Ngohi dede Ngona Ama. Tanu önanga yodadi moi dede ngone, hupaya o dunia yongaku Ama nohihulokoka Ngohi.

²²Ngohi tahidöakoka onangika o mulia Ama nohihidöa-döakoka Ngohino, hupaya önanga yodadi moi, hokä ima tero Ngoneö kamoi;

²³Ngohi dede önanga, deʼ Ama dede Ngohi; hupaya önanga igou-goungu kamoi. O dunia aha ihiöriki Ngona Ama nohihuloko Ngohi, deʼ Ama nahininga önanga hokä Ama nohihininga Ngohi.

²⁴Ama, Ngohi toigo hupaya önanga, Ama nohihidöaka Ngohino, naga dede Ngohi o ngï kiaka naga Ngohi, hupaya önanga yamäke Tongohi Ahi mulia; enagënanga Ani mulia Ama nohihidöa-döakoka Ngohino, hababu Ama nohihininga Ngohi o dunia kai dadiö dekowahi.

²⁵Ama noadi-adili! O dunia ininäkoua Ama, mä Ngohi toninäko Ama; deʼ hagala o nyawa nënanga ihiöriki Ama nohihuloko Ngohi.

²⁶Ngohi tahimatokoka Ani romanga Ama onangika; deʼ Ngohi aha gila-gila todiai hokogënanga, hupaya Ani dora Ama Ngohino itatapu manga hininga magoronaka deʼ Ngohi kamoi dede önanga.”