Read Tobelo O YOHANIS 2 Bible Online

O YOHANIS 2 - Tobelo bible

O YOHANIS 2

¹O wange hinoto ipaha naga o kawingi marameanga o Kana mabereraka o Galilea matonakoka, deʼ o Yesus ngoi ayo naga genangoka.

²O Yesus deʼ iwinöninïkö ya ahoko o rameangika gënanga.

³Maöraha manga angguru imataka, o Yesus ngoi ayo mitemo o Yesusika, ”To önanga manga angguru imataka.”

⁴O Yesus wohaluhu, ”Ayo, uha nohihuloko ngohi. Maöraha yadonuahi ngohi tohimatoko ahi diri.”

⁵Mä o Yesus ngoi ayo mätemo o nyawa yolöleleanika, ”Nia diai dika okia winitemo nginika.”

⁶Gengoka naga o rube o gahumu butanga isadiaka ihi iho-ihoro manga l̄ou imoteke o Yahudioka manga adati. O rube gënanga moi-moi madol̄a done ho litere o ratuhu moi.

⁷O Yesus wätemo yolöleleanika gënanga, ”Nioguhe o rube-rube gënanga de o akere.” Onangö yoguhe hiädono iomanga.

⁸Dahao o Yesus watemo onangika, ”Nial̄ë o akere mahuhutulu gënanga deʼ niao o rameanga mahäekika.” De önanga yao o akere gënanga o rameanga mahäekika,

⁹deʼ unanga wataili o akere idadadioka o angguru. (Ma ünanga wohiorikua kiaino o angguru gënanga, duga-duga yolöleleani dika gënanga ihiöriki önanga yöguhe.) O rameanga mahäeke gënanga wiahoko o nauru wokawi-kawingi,

¹⁰deʼ witemo unangika, ”Mabiaha o nyawa yäguhe ihira o angguru i hëmo-hëmoro, deʼ nako önanga yokere yadugaka, dahao o angguru biaha. Mä ngona nagogonika o angguru duru mahëmo-hëmoro hiädono öraha nënanga!”

¹¹Gënanga o nonako ihëra-hëranga madodihiraka gënanga o Yesus, ünanga wodiai gënanga o Kana mabereraka o Galilea ma tonakoka. De o nonako gënanga ünanga wohimatoko toünanga aimulia. Hoʼ iwinöni nïki iwingaku unangika.

¹² I paha gënanga o Yesus woiki o Kapernaumika imakinïki de ngoi ayo, airoriadodoto de iwinöninïki. De önanga yogogere dokengoka o wange muruono naga madekana.

¹³ Maöraha o Yahudioka manga Wange ma Amoko o Paskah itigioka, o Yesus woiki o Yerusalemika.

¹⁴Ma Jou ai Tauoka o Yerusalemoka ünanga wämäke imahuku-hukunu o hapi, o duba, deʼ o namodara; de ihitotagali o tiwi yogogeruku genangoka.

¹⁵O Yesus o dewili womadiai aigogohara moi deʼ waduhu mata-mata aiwani gënanga, yaoa o duba, o hapi, ma Jou ai Tau magoronaka. Manga meja-meja o tiwi ihito tagali wabitikanga hiädono mangatiwi önanga hohibari-barihi kiaika honanga.

¹⁶Daha ünanga watemo o namo dara yohuku-hukunika, ”Niagoraka mata-mata nenangoka. Uha ahi Ama ai Tau, niadiai o bubukunu ma ngï!”

¹⁷ Iwinöni nïki ahao imahininga Ma Jou Ai Demo ma Buku mademo nënanga, ”Ahi ngigo mangale ani Tau, ya Jou Madutu, yatuhuku ahihininga.”

¹⁸O Yahudioka manyawa yokokuaha iwitemo dema dohata o Yesusika, önanga yato, ”Abeika nodiai ihëra-hëranga hokä o nonako ngomino, igoungu Ngona de anihaku nodiai hokonënanga.”

¹⁹ O Yesus wohaluhu, ”Niakilianga o Tau nënanga, deʼ o wange hange mahidogoronaka aha Tohigoko okali.”

²⁰Deʼ onanga yato, ”O taongo moruata de butangaino ihidailako mangale ihigoko ma Jou ai Tau nënanga. Deʼ ngona nomau nohigokokali o wange hange mahidogoronaka?”

²¹Mä ma Jou ai Tau o Yesus aidungutu gangala airöehe mahirete.

²²Hoʼ maduruino, o Yesus womomikoka o honengino, ima hininga iwinöninïki o hali gënanga Unanga wohidodemoka. De yongaku önanga okia i tulihoka Ma Jou Ai Demo ma Buku magoronaka deʼ okia o Yesus wotemo-temoka.

²³Maöraha o Paskah ma Rameanga o Yesus naga o Yerusalemoka, de o nyawa mangangöe iwingaku Unangika, hababu wodiai o nonako ihëra-hëranga.

²⁴Mä o Yesus mahirete wangakua önanga, hababu Unanga wanäko o nyawa mata-mata.

²⁵Ngaro uha o nyawa iwihitararono Unangika o nagona dika, hababu Unanga mahirete wohiöriki okianaga o nyawa manga hininga magoronaka.