Read Tobelo O YOHANIS 20 Bible Online

O YOHANIS 20 - Tobelo bible

O YOHANIS 20

¹O Minggu mawange o ngoru-ngoruminohi, maöraha kai hohü hutuohi, o ngo Maria Magdalena moiki o lungunika. Münanga mamäke o helewo madadamunu yorehenoka o lungunu mapidahoka gënanga.

²Münanga momapopäta milingiri o Simon Petrus deʼ winöninïki wihohininga o Yesus, deʼ motemo onangika, ”Ma Jou iwil̄ëoka o lungunoka, deʼ ngohi tohiorikua okiaka Unanga iwikelenga.”

³Daha o Petrus deʼ winöninïki mahomoa gënanga yoiki o lungunika.

⁴Yahinoto imapopäta, mä winöninïki mahomoa gënanga iholoi wotaiti de o Petrus, deʼ unanga womahiädono iholoi wohira o lungunika.

⁵Unanga wohihahere o lungunu magoronaika deʼ wamäke o ngöere magare-garehe ikelengauku genangoka, mä unanga wowohamua.

⁶O Simon Petrus wihidoduruino aiporetino, daha gila-gila wowohama o lungunu gënanga magoronaika. Unanga wamäke o ngöere magare-garehe ikelengauku genangoka,

⁷mä o ngöere ihiliko-liko o Yesus Ai häekino koiwa madatekoka mailuluino imatingakika.

⁸Ahaino winöninïki iholoi wohira womahiädono o lungunika, unangö wowohama. Unanga wamäke deʼ wongaku. (

⁹Hiädono öraha gënanga önanga imangaratiuahi okia i tulihi Ma Jou Ai Demo ma Buku magoronaka Unanga kiani womomiki o honengino.)

¹⁰Ipaha de gënanga iwinöninïki o Yesus gënanga yolio.

¹¹O ngo Maria Magdalena momaokoino o lungunu mahimangoka de moari. Moari magogiriaka, münanga mohihahere o lungunu magoronaika,

¹²daha mamäke o malaekat yahinoto manga pakeanga magare-garehe. Onanga yogogeruku o ngï o Yesus Ai mayeti marïoka, moi Ai häekiha idaduoka deʼ mahomoa Ai l̄ouoko idaduoka.

¹³O malaekat-malaekat gënanga imileha, ”Ayo, yadodoa noari!” O ngo Maria mohaluhu, ”Tongohi ahi Jou iwil̄ëoka, deʼ ngohi tohi orikua Unanga kiaka iwikelenga.”

¹⁴Motemo iböto hokogënanga, münanga moma lega ami poretoko deʼ mimäke o Yesus womaokoino genangoka. Mä munanga mihiorikua gënanga o Yesus.

¹⁵O Yesus womi leha munangika, ”Ayo, yadodoa noari? Ayo nä lingiri o nagona?” O ngo Maria matobote gënanga madumule madutu, hoʼ munanga motemo, ”Bapa, nako Bapa nitagalioka Unanga nenangoka, tanu nohihingahu ngohino okiaka Bapa nikelenga Unanga, hupaya ngohi takunu til̄ë?”

¹⁶O Yesus womitemo munangika, ”Maria!” O ngo Maria moma lega o Yesusika daha motemo de o Ibranioka manga demo, ”Rabuni!” (Mamangarati ”Guru”.)

¹⁷”Uha nohi sö Ngohi,” o Yesus womitemo munangika, ”hababu Ngohi todoauahi o Amail̄e. Mä noiki Ahi roriadodotika, deʼ nahi ngahu onangika örahanënanga Ngohi todoa Ahi Amail̄e deʼ Ani Amail̄e, Ahi Jou Madutuil̄e deʼ ani Jou Madutu il̄e.”

¹⁸Ho ngo Maria moiki mohingahu iwinöninïkika o Yesus münanga mimäkeoka ma Jou deʼ ma Jou wotemoka mata-mata gënanga munangika.

¹⁹Ma Minggu mawange genangoli dika, maöraha yohutuoka, iwinöninïki o Yesus imatoomu o tau moika de manga ngora-ngorana yakusioka, hababu önanga yämodongo o Yahudioka yokokuahaika. Itodokanino o Yesus woböa deʼ womaokoino manga hidogoronaka önanga deʼ watemo, ”Nia tabea de o dame dede ngini.”

²⁰Wotemo iböto hokogënanga, Unanga wahimatoko onangika Ai giama deʼ Ai meheho. Maöraha iwimäke ma Jou, önanga duru yomörene.

²¹Gila-gila o Yesus watemo onangika wohi galioli, ”Nia tabea de o dame dede ngini. Hokä o Ama wohi huloko Ngohi, hoko genangoli Ngohi tinihuloko ngini.”

²²Gila-gila Unanga wahiwuwu Ai womaha onangika deʼ wotemo, ”Niatarima ma Jou Madutu ai Womaha.

²³ Nako ngini niahiapongo o nyawa moi manga baradoha, ma Jou Madutuö winihiapongo. Nako ngini niahiapongua o nyawa moi manga baradoha, ma Jou Madutuö winihiapongua.”

²⁴O Tomas, womatëngo o Yesus iwinöninïki yangimoi de yahinoto manga hidogoronaka, (iwi hetongo o ”Hago”) kodede unangua de aidodiawo mahomoa maöraha o Yesus woböa.

²⁵Iwinöninïki o Yesus mahomoa iwitemo o Tomasika, ”Ngomi miwi mäkeoka ma Jou!” Mä o Tomas wohaluhu, ”Nako ngohi tamäkeuahi o paku mario Ai giamoka, ngohi togelengauahi ahi hagarara Ai nabo o paku marioika gënanga, deʼ togelengauahi tongohi ahigiama Ai mehehoika, ngohi tolukohi tongaku.”

²⁶O Minggu moi yaino, iwinöninïki o Yesus nagali o ngïoka gënanga, deʼ o Tomasö woböaino. O ngorana mata-mata ikusioka. Mä o Yesus woböa deʼ womaokoino manga hidogoronaka, daha wotemo, ”Nia tabea de o dame dede ngini.”

²⁷Dahaino o Yesus witemo, o Tomasika, ”Nakelenga anihagarara nenangoka, deʼ nolega Tongohi Ahi giama. Nohidöaka anigiama deʼ nakelenga Ahi mehehoika. Uha nodododatohi, mä nongaku!”

²⁸O Tomas wotemo o Yesusika, ”Ahi Jou, deʼ ahi Jou Madutu!”

²⁹O Yesus witemo unangika, ”Ngona nongaku hababu nohi mäkeoka Ngohi igoungua? Youtumoka o nyawa yongaku ngaro ihimäkeua Ngohi!”

³⁰Duru kohangöeohi ihëra-hëranga mahomoa wodiai o Yesus iwinöninïki manga himangoka, mä itulihua buku nënanga magoronaka.

³¹Mä mata-mata nënanga itulihi, hupaya ngini ningaku o Yesus ganga ma Koano Wohi hohalamati, ma Jou Madutu ai Ngohaka, deʼ karana iwi ngaku Unangika, ngini niamäke o ngango.